OFakazi BakaJehova Emhlabeni Wonke—INew Zealand

INGABE iziqhingi zingamdumisa uJehova? Kunjalo, ngokuka-Isaya 42:10: “Mhubeleni uJehova ihubo elisha, nodumo lwakhe, kusukela emikhawulweni yomhlaba, . . . nina-ziqhingi nabakhileyo kuzo.” Ngokuqinisekile iziqhingi ezakha iNew Zealand ziyamdumisa uJehova. Njengoba idume umhlaba wonke ngamachibi, imifudlana ephahlwe amawa, izintaba eziphakeme, izinguzunga zeqhwa elihambayo, izingu, amahlathi emvula avunule ngama-fern, nezindawo ezinamadlelo ezivundile, iNew Zealand ibukhulumela kahle ubukhosi nobuhle boMdali wezulu nomhlaba.

Kusukela nje ngemva kokuqala kwaleli khulu leminyaka, abaningi ngokwandayo babakhé eNew Zealand baye banezela amazwi abo ekudumiseni uJehova ngokuphendukela kuye ekukhulekeleni okuhlanzekile nasekuhlanganyeleni izindaba ezinhle zoMbuso kaNkulunkulu nabanye. Muva nje, uFakazi othile owayezwe okuhlangenwe nakho okuhle kokufakaza ezihlotsheni unqume ukukuzama emkhayeni wakubo. Wanikeza amalungu amaningana omkhaya isipho sencwadi ethi Ungaphila Phakade EPharadesi Emhlabeni. Iyini imiphumela kuze kube manje? Ubika ukuthi manje udadewabo oyedwa nomfowabo oyedwa batadisha iBhayibheli, umshana wakhe uye wabhapathizwa njengomunye woFakazi BakaJehova, futhi abanye manje sebesabela kakhudlwana eqinisweni leZwi likaNkulunkulu. Usenensimu enkulu okufanele ayisebenze; ngaphandle kwabazali bakhe, unabafowabo abangu-6 nodadewabo abangu-9!

Kuba udumo kuJehova futhi lapho oFakazi bebambisana ekwakheni amaHholo OMbuso. Ngokwesibonelo, umlobeli wephephandaba uRoy Perkins wabhala lokhu kuyi-Opotiki News ka-May 17, 1994: “Njengoba ngingelona ikholwa, ngahlatshwa umxhwele kakhulu imisebenzi nomzamo wazo zonke izisebenzi ezizinikele ezasebenzisa isikhathi futhi zenza umzamo omkhulu kangaka kulomsebenzi ngenxa yothando ngoNkulunkulu wazo.

“Kuwo wonke lamahora okwasetshenzwa ngawo ngempelasonto angizange ngibone noma ngizwe kuphikiswana ngisho nasengxenyeni eyodwa yezisebenzi . . . Abesifazane babegibele ezikafuleni besebenza nabesilisa, bephala izitini, befukula, bethwala, konke kwenziwa ngokukhululeka nangenjabulo.

“Futhi akukho nowodwa umzuzu owalahleka lapho othile esalibele ukufuquza ugwayi. Kunoma imuphi umsebenzi bonke laba bantu ababewenza kwakunomoya oncwaba nohlanzekile ngaphandle nje kwephunga likapende nothuli lwezitini.”

Indikimba yabadala yeBandla Lase-Opotiki yabhala: “Wonke lomsebenzi uye washiya idolobha likhexile. Kubonakala sengathi wonk’ umuntu ukhuluma ngawo. Kuye kwaqalwa izifundo zeBhayibheli eziningana. Esinye esisithola sijabulisa kakhulu esombhangqwana oyithanda kakhulu inkolo osekuyiminyaka eminingi usicela ukuba singawuvakasheli. Usuku ngalunye wawufika esakhiweni wabe usufika nasemhlanganweni. Kamuva indoda yathi, ‘Ngiyabona ukuthi ningabantu bakaNkulunkulu. Ngaphakathi, bengilangazelela ukuzihlanganisa nabantu abanjena kukho konke ukuphila kwami.’”

Ngonyaka owawandulele, umlobeli wephephandaba i-Otago Daily Times washo okulandelayo ngeHholo LoMbuso elakhiwa ngokushesha eDunedin: “Bekuwumsebenzi ophawulekayo, isibonelo esiphawulekayo samandla ashukumisayo nokuzisiza.” Leli phephandaba laphawula: “Abantu bedolobha babukela ngokuncoma njengoba isakhiwo esikhulu sasiphakama phambi kwamehlo abo, futhi kumelwe ukuba abaningi bacabanga ngokuthi yiziphi ezinye izinguquko nemisebenzi eyakhayo engafezwa uma bekungaba neqembu lezisebenzi zokuzithandela elikhulu ngendlela efanayo nogqozi olukhulu lokubambisana. IHholo LoMbuso liwuphawu oluhle kakhulu lokufinyelela umzamo owakhayo.”

Emakhulwini amaningi avakashela indawo yesakhiwo, enye indoda ehloniphekile yaphawula ukuthi oFakazi babakha “amasonto” kuyilapho ihlelo lakhe lenkolo laliwadayisa ngenxa yokuncipha kwamalungu. “Ukube beniye nalinda ezinye izinyanga ezingaba yishumi nambili, beningathenga elinye lawethu,” isho ngesibindi. “Kudingeka sithengise elinye ngoba asikwazi ukuqhubeka sikhokha izindleko zalo. Kodwa, vele, nina aninabo abefundisi abakhokhelwayo. . . . Futhi nezakhiwo zenu kulula ukuzinakekela, azizona izakhiwo eziphakeme ezinemibhoshongo okunzima ukuyinakekela.”

Kuyacaca ukuthi ngempela iziqhingi zingamdumisa uNkulunkulu. Kwangathi izindumiso zikaJehova zingaqhubeka zinkeneneza kulelizwe elihle lasePacific—nasemhlabeni wonke!

[Ibhokisi ekhasini 9]

UMBIKO WEZWE:

Unyaka Wenkonzo Ka-1994

INANI ELIPHAKEME LABABEFAKAZA: 12 867

ISILINGANISO: UFakazi oyedwa kubantu abangu-271

INANI LABABEKHONA ESIKHUMBUZWENI: 24 436

ISILINGANISO SABAMEMEZELI ABANGAMAPHAYONA: 1 386

ISILINGANISO SEZIFUNDO ZEBHAYIBHELI: 7 519

INANI LABABHAPATHIZWA: 568

INANI LAMABANDLA: 158

IHHOVISI LEGATSHA: IMANUREWA

[Isithombe ekhasini 9]

Amaphayona elibangise ensimini cishe ngo-1930

[Isithombe ekhasini 9]

Isakhiwo segatsha eManurewa

[Isithombe ekhasini 9]

Ukushumayela isigijimi soMbuso eDevonport, e-Auckland