UKubekezela—Kungani Kunqabe Kangaka?

U-EMILIO wayeseminyakeni yawo-60.a Wayeze e-Oahu ezokwenza umsebenzi othile odabukisayo—ukungcwaba indodana yakhe endala. Lapho esahamba emgwaqweni othulile owummango futhi ekhuluma nabangane, u-Emilio wethuswa imoto eyayihlehla ngesivinini esikhulu ngendlela engenayo. Lemoto yacishe yamshayisa, futhi ngenxa yentukuthelo nokungabekezeli, u-Emilio wathethisa umshayeli futhi washaya lemoto ngesandla. Kwalandela impikiswano. Kubonakala sengathi lomshayeli wasunduza u-Emilio, owawa futhi washayeka ngekhanda endaweni eqinile yabahamba ngezinyawo. Ezinsukwini ezimbalwa kamuva, u-Emilio wafa ngenxa yokulimala ekhanda. Yeka umphumela odabukisayo!

Siphila ezweni lapho ukubekezela kuyimfanelo engavamile khona. Abashayeli abaningi bezimoto bashayela ngesivinini esikhulu. Abanye balandela ngendlela eyingozi—belandela eduze kakhulu—izimoto ezihamba ngesivinini esivunyelwa umthetho. Kanti abanye bashintshashintsha olayini ngoba bengenakukubekezelela ukuba ngemuva kwenye imoto. Ekhaya, amalungu omkhaya angase adedele intukuthelo futhi abe nobudlova. Ngisho namanye amaKristu angase acasuke kakhulu ngenxa yokushiyeka noma amaphutha abafowabo abangokomoya.

Kungani ukubekezela kunqabe kangaka? Ingabe bekulokhu kunjalo ngaso sonke isikhathi? Kungani kunzima kangaka ukubekezela esikhathini sethu?

Izibonelo Zokungabekezeli

IBhayibheli lisitshela ngowesifazane ongazange alindele ukubonisana nomyeni wakhe ngaphambi kokwenza isinqumo esibalulekile. Igama lakhe u-Eva. Ehambela u-Adamu phambili, mhlawumbe ngokwengxenye ngenxa yokungabekezeli, wadla isithelo esenqatshelwe. (Genesise 3:1-6) Kuthiwani ngomyeni wakhe? Naye kungenzeka wabonisa ukungabekezeli ngokulandela u-Eva esonweni ngaphandle kokuya kuYise wasezulwini uJehova, kuqala, ukuze athole usizo noma isiqondiso. Ukuhaha kwabo, mhlawumbe kuhlangene nokungabekezeli okwaholela esonweni, kuye kwaba nemiphumela ebulalayo kithi sonke. Futhi siye sazuza kubo njengefa ukuthambekela kokwenza izono, kuhlanganise nalezo zokuzidla nokungabekezeli.—Roma 5:12.

Cishe eminyakeni engu-2 500 ngemva kwesono sabazali bethu bokuqala, abantu bakaNkulunkulu abakhethiwe, ama-Israyeli, babonisa ukuntula ukholo okujulile, okuphikelelayo, kanye nokuntula ukubekezela. Nakuba uJehova ayesanda nje kubakhulula ngokuyisimangaliso ebugqilini eGibithe, basheshe “bakhohlwa imisebenzi yakhe” futhi “abalindelanga isiluleko sakhe.” (IHubo 106:7-14) Ngokuphindaphindiwe babewela ebubini obungathi sína ngenxa yokuthi babengenakubekezela. Benza ithole legolide futhi balikhulekela; bakhononda ngelungiselelo elingokwenyama lemana uJehova ayebenzele lona; futhi abaningi babo baze bahlubuka ngisho nokuhlubuka kummeleli kaJehova omiswe ngokwaphezulu, uMose. Ngempela, ukuntula kwabo ukubekezela kwabaholela osizini nasenhlekeleleni.

Inkosi yakwa-Israyeli yokuqala engumuntu, uSawule, yalahlekisela amadodana ayo ithuba lokungena esikhundleni sayo sobukhosi. Ngani? Ngenxa yokuthi yahluleka ukulindela umprofethi uSamuweli, okwakufanele enze umhlatshelo kuJehova. Ukwesaba abantu kwabangela uSawule ukuba amhambele phambili uSamuweli ekwenzeni lomhlatshelo. Cabanga indlela okumelwe ukuba wazizwa ngayo lapho uSamuweli eqhamuka ngemva nje kokuba uSawule esewuqedile umkhosi! Ukube nje wayelinde imizuzu embalwa eyengeziwe!—1 Samuweli 13:6-14.

Ukube nje u-Eva wayelindele u-Adamu kunokuba athathe isithelo ngokuxhamazela! Ukube nje ama-Israyeli ayekhumbule ukulindela iseluleko sikaJehova! Yebo, ukubekezela kwakungaphephisa bona kanye nathi osizini oluningi nasebuhlungwini.

Izimbangela Zokungabekezeli

IBhayibheli lisisiza ukuba siqonde imbangela eyinhloko yokungabekezeli namuhla. Eyesi-2 Thimothewu isahluko 3 ichaza isizukulwane sethu njengesiphila ‘ezikhathini ezibucayi okunzima ukubhekana nazo.’ Ithi abantu “bayoba abazithandayo, abathandi bemali, abazazisayo, abazidlayo . . . abangenakho ukuzithiba, abanolaka, abangenalo uthando ngobuhle.” ( Amavesi 2, 3 ) Isimo sengqondo esinjalo sokuhaha nobugovu sithonya izinhliziyo nezingqondo zabantu abaningi, sikwenze kube nzima ngabo bonke, ngisho namaKristu eqiniso, ukuba babonise ukubekezela. Lapho sibona abantu bezwe beshayela ngesivinini esikhulu noma bengenela emigqeni noma besichapha ngenhlamba, ukubekezela kwethu kungase kuvivinyeke kakhulu. Singase silingelwe ukuba sibalingise noma siphindisele, sizehlise sibe sezingeni labo lokuqhosha kobugovu.

Ngezinye izikhathi iziphetho zethu siqu eziyiphutha ezisibangela ukuba siphelelwe ukubekezela. Phawula indlela iNkosi ehlakaniphile uSolomoni eyaveza ngayo ukuhlobana phakathi kokuxhamazela, ukucabanga okuyiphutha nokuziphatha kokungabekezeli, okubonisa intukuthelo: “Onomoya obekezelayo ungcono kunoziphakamisayo. Ungasheshi ukuthukuthela emoyeni wakho, ngokuba ulaka luhlala ezifubeni zeziwula.” (UmShumayeli 7:8, 9) Uma sizinika isikhathi sokuthola umbono ogcwele, onembile ngesimo ngaphambi kokusabela kuso, cishe siyobaqonda kakhudlwana abanye, sibe nozwela kakhudlwana kubo, sibabekezelele kakhudlwana. Ngakolunye uhlangothi, umoya wokuzidla, wobugovu ungasibangela ukuba sibe nengqondo emfushane, singabekezeli, futhi sibe nenzondo, njengama-Israyeli abubulayo, angontamo-lukhuni ahlupha uMose.—Numeri 20:2-5, 10.

Enye imbangela yokuntuleka kokubekezela kwalelizwe okwandayo isimo salo sokungabi nathemba, esibangelwa ukudediselwa kude noJehova. UDavide wazwakalisa isidingo somuntu sokuthembela kuJehova: “Mphefumulo wami, zithulisele kuNkulunkulu kuphela, ngokuba ithemba lami livela kuye.” (IHubo 62:5) Abantu abaningi abangamazi uJehova banombono olinganiselwe, ongenathemba, ngakho bazama ukuthola yonke injabulo nenzuzo abangayithola ngaphambi kokuba baphelelwe isikhathi. Njengoyise ongokomoya, uSathane uDeveli, ngokuvamile abanandaba nendlela izenzo zabo ezingabalimaza ngayo abanye.—Johane 8:44; 1 Johane 5:19.

Akumangalisi ukuthi ukubekezela kunqabe kakhulu namuhla. Lesi simiso sezinto esibi, esinobugovu, unkulunkulu waso uSathane, nokuthambekela esonweni kwenyama yethu enesono kukwenza kube nzima ngabo bonke, ngisho nabaqotho, ukuba babekezele. Nokho, iBhayibheli lisinxusa ukuba ‘sibonise ukubekezela,’ ikakhulukazi ngokuphathelene nokufezwa kwezinjongo zikaNkulunkulu. (Jakobe 5:8) Kungani ukubekezela kubaluleke kangaka? Imiphi imivuzo okungasilethela yona?

Ukubekezela—Okukwenza Kubaluleke

“Bayakhonza nalabo abamane bame futhi balinde.” Lawomazwi ashiwo imbongi eyiNgisi uJohn Milton eminyakeni engaphezu kuka-300 enkondlweni yayo ethi “On His Blindness [Ebumpumputheni Bakhe].” Ekuqaleni kwalenkondlo, lembongi yazwakalisa ukukhungatheka nokukhathazeka kwayo ngomuzwa wayo wokungakwazi ukukhonza uNkulunkulu ngokugcwele ngenxa yokuthi yayibe impumputhe lapho iseminyakeni yawo-40. Kodwa njengoba kuboniswa umugqa wokugcina walenkondlo ocashunwe ngenhla, yaqala ukuqaphela ukuthi umuntu angamkhulekela uNkulunkulu ngokukhuthazelela usizi ngokubekezela futhi ngesizotha afune amathuba avelayo enkonzo. UMilton wakubona ukubaluleka kokuncika kuNkulunkulu ngokubekezela.

Kungenzeka iningi lethu libona kahle, kodwa sonke sinokulinganiselwa okungasenza sithukuthele noma sikhathazeke. Singakuthola futhi sikubonise kanjani ukubekezela?

Izibonelo Ezikhuthazayo

IBhayibheli lisinikeza izibonelo eziningana ezinhle zokubekezela. Ukubekezela kukaJehova kwenza ukuphila okuphakade kube nokwenzeka ngezigidi ezingenakubalwa zabantu. (2 Petru 3:9, 15) Esimemweni sakhe somusa sokuthatha ijoka lakhe futhi ‘sitholele imiphefumulo yethu ukuqabuleka,’ uJesu wakubonakalisa ngokuphelele ukubekezela okumangalisayo kukaYise. (Mathewu 11:28-30) Ukuzindla ngezibonelo zikaJehova noJesu kungasisiza ukuba sibekezele kakhudlwana.

Umuntu okubonakala sengathi wayenesizathu esanele sokuthukuthela, ukuba nenzondo, noma ukufuna ukuphindisela kwakuyindodana kaJakobe uJosefa. Abafowabo bamphatha ngendlela engenabulungisa kakhulu, beceba ukumbulala futhi ekugcineni bamthengisa ebugqilini. EGibithe, naphezu kwenkonzo yakhe eqotho, yokwethembeka kuPotifari, uJosefa wamangalelwa ngamanga futhi wavalelwa ejele. Wakhuthazela ngokubekezela kulo lonke usizi lwakhe, cishe eqonda ukuthi uvivinyo olunjalo lwalungasiza ekufezeni izinjongo zikaJehova. (Genesise 45:5) Ngenxa yokuthi wahlakulela ukholo nethemba kuJehova kanye nokuthobeka nokuqonda, uJosefa wayengabonisa ukubekezela ngisho nangaphansi kwezimo ezivivinya kakhulu.

Olunye usizo olubalulekile umoya ongcwele kaJehova. Ngokwesibonelo, uma sisheshe sicasuke futhi sinolimi oluhlabayo, singathandazela usizo lomoya ongcwele ukuze sihlakulele izithelo zawo. Ukuzindla ngasinye salezi zithelo, njengokubhekakade nokuzithiba, kuyosisiza sibone indlela ezihlobene ngayo ngokuseduze nokubekezela.—Galathiya 5:22, 23.

Imivuzo Yokubekezela

Ukuba ababekezelayo kungasilethela izinzuzo eziningi. Kuqinisa uhlobo lwabantu esiyilo futhi kusivikele ekwenzeni izenzo zokuxhamazela, zobuwula. Ubani phakathi kwethu ongakaze enze amaphutha alimazayo ngenxa yokusabela kwethu ngokushesha ezimweni ezinzima nezicindezelayo? Kungenzeka siye sasho izwi elingenamusa noma saba nokhahlo. Kungenzeka siye savumela isenzakalo esingasho lutho saba impi eshubile nothandekayo. Ngemva kokuthukuthela kakhulu, ukukhungatheka, nobuhlungu, kungenzeka siye sacabanga ngokudabuka, ‘Ukube nje bengilinde isikhashana esengeziwe.’ Ukubonisa ukubekezela kungasivikela kuzo zonke izinhlobo zosizi. Lelo qiniso lilodwa linikeza ukuphila kwethu ukuthula okwengeziwe, ukuqina, nokwaneliseka.—Filipi 4:5-7.

Ukuba ababekezelayo kuyosisiza futhi ukuba sibe nenhliziyo ezolile, ethembayo. Lokhu kungaholela ekubeni sijabulele impilo engcono engokomzimba, engokomzwelo, nengokomoya. (IzAga 14:30) Uma ingalawuliwe, intukuthelo enkulu ingabangela ukugula okubi okungokomzwelo nokungokomzimba kanye nokufa. Ngakolunye uhlangothi, ngokuba ababekezelayo singazuza isimo sengqondo esihle kakhudlwana ngakwabanye, ikakhulukazi abafowethu abangokomoya namalungu omkhaya. Khona-ke siyothambekela ngokwengeziwe ekubeni abacabangelayo nabawusizo kunokuba sibe abacasuka ngokushesha nabagxekayo. Kamuva, abanye bayokuthola kulula futhi kuthakazelisa kakhudlwana ukuba phakathi kwethu.

Abadala ebandleni lobuKristu kudingeka babonise ukubekezela ngokukhethekile. Ngezinye izikhathi, amaKristu akanye nabo eza kubo nezinkinga ezingathi sína. Kungenzeka laba bantu abaqotho bakhungathekile, bacasukile, noma bacindezelekile, kuyilapho nabadala ngokwabo kungenzeka ukuthi bakhathele noma baphazanyiswa izinkinga zabo siqu noma ezemikhaya yabo. Nokho, yeka indlela okubaluleke ngayo ukuba abadala babonise ukubekezela ezimweni ezinjalo ezivivinyayo! Ngalendlela bangayala “ngobumnene” futhi ‘bawuphathe ngesisa umhlambi.’ (2 Thimothewu 2:24, 25; IzEnzo 20:28, 29) Ukuphila okuyigugu kusengozini. Yeka isibusiso abadala abanomusa, abanothando, nababekezelayo abayiso ebandleni!

Izinhloko zemikhaya kufanele ziphathe imikhaya yazo ngokubekezela, ukuqonda, nomusa. Kufanele futhi zilindele zibuye zikhuthaze wonke amalungu omkhaya ukuba abonise izimfanelo ezifanayo. (Mathewu 7:12) Lokhu kuyoba neqhaza elikhulu ekubeni nothando nokuthula ekhaya.

Ukubonisa ukubekezela lapho kuhlanganyelwa enkonzweni yasensimini kuyosiza izikhonzi ezingamaKristu ukuba ziyijabulele ngokugcwele inkonzo. Ziyokwazi kangcono ukukhuthazelela noma ikuphi ukunganaki nokuphikiswa ezihlangabezana nakho. Esikhundleni sokuphikisana nabaninikhaya abathukuthele, izikhonzi ezibekezelayo ziyokwazi ukunikeza impendulo enomusa noma zihambe ngokuthula, ngaleyondlela zilondoloze ukuthula nenjabulo. (Mathewu 10:12, 13) Ngaphezu kwalokho, lapho amaKristu ephatha bonke abantu ngokubekezela nomusa, abantu abanjengezimvu bayodonsekela esigijimini soMbuso. UJehova uye wayibusisa ngezinga lomhlaba wonke imizamo yokubekezela, njengoba amakhulu ezinkulungwane zabafuni beqiniso abathobekile ethuthelekela ebandleni likaJehova elinothando unyaka ngamunye.

Ngempela, ukubonisa ukubekezela kuyosilethela imivuzo emihle. Siyogwema izingozi nezinkinga eziningi ezibangelwa ukuxhamazela noma ukushesha kakhulu ukukhuluma. Siyojabula ngokwengeziwe, sizole ngokwengeziwe, futhi mhlawumbe sibe nempilo enhle ngokwengeziwe. Siyoba nenjabulo nokuthula kakhudlwana enkonzweni yethu, ebandleni, nasekhaya. Kodwa okubaluleke kakhulu, siyojabulela ubuhlobo obuseduze noNkulunkulu. Ngakho lindela uJehova. Bonisa ukubekezela!

[Umbhalo waphansi]

[Izithombe ekhasini 10]

Ubekezela kangakanani ekuphileni kwansuku zonke?