Induduzo Evela ‘KuNkulunkulu Wenduduzo Yonke’
“Makatuswe uNkulunkulu noYise weNkosi yethu uJesu Kristu, uYise wesihe sesisa noNkulunkulu wenduduzo yonke, osiduduza osizini lwethu lonke.”—2 KORINTE 1:3, 4.
1, 2. Hlobo luni lwenduduzo abantu abadabukile abaludingayo?
ABANTU abadabukile badinga induduzo yangempela—hhayi amazwi anesidina navame kakhulu. Sonke siye sezwa kuthiwa ‘ngokuhamba kwesikhathi kuzolunga,’ kodwa imuphi umuntu okhungethwe usizi, osanda kushonelwa ongase aduduzwe yilowomqondo? AmaKristu ayazi ukuthi uNkulunkulu uthembise uvuko, kodwa lokho akubuvimbeli ubuhlungu obujulile nokucindezeleka ngokomzwelo kokulahlekelwa okwenzeka kungazelelwe. Futhi ngokuqinisekile uma uye walahlekelwa ingane, ezinye izingane ezisaphila azisivali isikhala saleyongane eyigugu.
2 Ngezikhathi zokulahlekelwa, sisizwa kakhulu yinduduzo yangempela, induduzo esekelwe ngokuqinile ezithembisweni zikaNkulunkulu. Futhi sidinga ububele. Lokhu ngokuqinisekile kuye kwaba njalo kubantu baseRwanda, ikakhulukazi emakhulwini emikhaya yoFakazi BakaJehova lapho, alahlekelwa abathandekayo kulokho kuceka ngonya kobuhlanga kobudeveli. Bangayithola kubani induduzo bonke abadabukile?
UJehova—UNkulunkulu Wenduduzo
3. UJehova uye wasibeka kanjani isibonelo ekunikezeni induduzo?
3 UJehova uye wabeka isibonelo ekusinikeni sonke induduzo. Wathumela iNdodana yakhe ezelwe yodwa, uKristu Jesu, emhlabeni ukuze isinike induduzo nethemba okumi phakade. UJesu wafundisa: “UNkulunkulu walithanda izwe kakhulu kangangokuba waze wanikela ngeNdodana yakhe ezelwe yodwa, ukuze wonke umuntu obonisa ukholo kuyo angabhujiswa kodwa abe nokuphila okumi phakade.” (Johane 3:16) Wabuye watshela abalandeli bakhe: “Akekho onothando olukhulu kunalolu, ukuba umuntu anikele umphefumulo wakhe ngenxa yabangane bakhe.” (Johane 15:13) Ngesinye isikhathi wathi: “INdodana yomuntu [ayizelanga] ukukhonzwa, kodwa ukukhonza nokunikela umphefumulo wayo ube isihlengo esenana abaningi.” (Mathewu 20:28) Futhi uPawulu wathi: “UNkulunkulu utusa uthando lwakhe siqu kithi ngoba, ngesikhathi siseyizoni, uKristu wasifela.” (Roma 5:8) Ngalemibhalo neminye eminingi, siqonda uthando lukaNkulunkulu nolukaKristu Jesu.
4 .Kungani umphostoli uPawulu ikakhulukazi ayekweleta uJehova?
4 Umphostoli uPawulu wayewuqaphela ngokukhethekile umusa kaJehova ongafanelwe. Wayehlwithwe esimweni sokufa ngokomoya, kusukela ekubeni umshushisi wabalandeli bakaKristu onobudlova ngokweqile kuya ekubeni umKristu oshushisiwe ngokwakhe. (Efesu 2:1-5) Uchaza okuhlangenwe nakho kwakhe ngalendlela: “Ngingomncane kunabo bonke kubaphostoli, futhi angifaneleki ukubizwa ngomphostoli, ngenxa yokuthi ngashushisa ibandla likaNkulunkulu. Kodwa ngomusa ongafanelwe kaNkulunkulu ngiyilokho engiyikho. Futhi umusa wakhe ongafanelwe ngakimi awuzange ube yize, kodwa ngashikashikeka ukubadlula bonke, nokho kungemina kodwa kuwumusa ongafanelwe kaNkulunkulu okimi.”—1 Korinte 15:9, 10.
5. Yini uPawulu ayibhala ngenduduzo evela kuNkulunkulu?
5 Khona-ke ngokufanelekile, uPawulu wabhala: “Makatuswe uNkulunkulu noYise weNkosi yethu uJesu Kristu, uYise wesihe sesisa noNkulunkulu wenduduzo yonke, osiduduza osizini lwethu lonke, ukuze sikwazi ukududuza labo abakunoma iluphi uhlobo losizi ngenduduzo nathi ngokwethu esiduduzwa ngayo uNkulunkulu. Ngoba njengoba nje ukuhlupheka ngenxa kaKristu kuvama kithi, kanjalo nenduduzo esiyitholayo nayo ivama ngoKristu. Manje kungakhathaliseki ukuthi sisosizini yini, kungokwenduduzo nensindiso yenu; noma ukuthi siyaduduzeka yini, kungokwenduduzo yenu esebenza ukuba inenze nikhuthazelele izinhlupheko ezifana nalezo esihlupheka ngazo nathi. Ngakho ithemba lethu ngani alintengi, njengoba sazi ukuthi, njengoba nje ningabahlanganyeli bezinhlupheko, ngendlela efanayo niyohlanganyela induduzo futhi.”—2 Korinte 1:3-7.
6. Lisho ukuthini igama lesiGreki elihunyushwe ngokuthi “induduzo”?
6 Yeka amazwi akhuthazayo! Igama lesiGreki elihunyushwe lapha ngokuthi “induduzo” lihlobene ‘nokubizela othile ngasohlangothini lwakho.’ Ngakho-ke, “kuwukuma eceleni komuntu ukuze umkhuthaze lapho ebhekene nokuvivinywa okunzima.” (A Linguistic Key to the Greek New Testament) Esinye isazi seBhayibheli sabhala: “Leligama . . . ngaso sonke isikhathi lisho okungaphezu kakhulu kozwela olududuzayo. . . . Induduzo yamaKristu iyinduduzo eletha isibindi, induduzo eyenza umuntu akwazi ukubhekana nakho konke lokho ukuphila okungase kukwenze kuye.” Ihlanganisa namazwi aduduzayo asekelwe esithembisweni esiqinile nethemba—sokuvuswa kwabafileyo.
UJesu NoPawulu —Abaduduzi Abanobubele
7. UPawulu wayeduduza kanjani kubafowabo abangamaKristu?
7 Yeka ukuthi uPawulu wayeyisibonelo esihle kanjani ekunikeni induduzo! Wayengase abhalele abazalwane baseThesalonika: “Saba mnene phakathi kwenu, njengalapho umama oncelisayo enakekela ngesisa abantwana bakhe siqu. Kanjalo, njengoba sasinokusondelana okunesisa nani, sakujabulela kakhulu ukungadluliseli kini izindaba ezinhle zikaNkulunkulu kuphela, kodwa nemiphefumulo yethu siqu, ngoba naba abathandekayo kithi. Ngokuvumelana nalokho nazi kahle ukuthi, njengoba kwenza ubaba kubantwana bakhe, saqhubeka kanjani sikhuthaza ngamunye wenu, siniduduza futhi sifakaza kini.” Njengabazali abanothando, abakhathalelayo, sonke singahlanganyela nabanye umuzwa wethu wemfudumalo nokuqonda nabanye ngezikhathi zabo zokuswela.—1 Thesalonika 2:7, 8, 11.
8. Kungani ukufundisa kukaJesu kuyinduduzo kulabo abadabukile?
8 Ekuboniseni ukukhathalela okunjalo nomusa, uPawulu wayemane nje elingisa iSibonelo sakhe esikhulu, uJesu. Khumbula isikhuthazo sobubele uJesu asidlulisela kithi sonke njengoba silotshwe kuMathewu 11:28-30: “Wozani kimi, nina nonke enikhandlekayo nenisindwayo, ngizonenza niqabuleke. Bekani ijoka lami phezu kwenu futhi nifunde kimi, ngoba nginomoya omnene futhi ngithobekile ngenhliziyo, nizotholela imiphefumulo yenu ukuqabuleka. Ngoba ijoka lami ngelomusa nomthwalo wami ulula.” Yebo, ukufundisa kukaJesu kuyaqabula ngoba kunikeza ithemba nesithembiso—isithembiso sovuko. Leli ithemba nesithembiso esikunikeza abantu, ngokwesibonelo, lapho sibashiyela incwajana ethi Lapho Ufelwa Othandekayo. Lelithemba lingasisiza sonke, ngisho noma ngabe sekuyisikhathi eside sidabukile.
Indlela Yokududuza Labo Abadabukile
9. Kungani kungafanele singabi nasineke kubantu abadabukile?
9 Usizi alulinganiselwe enkathini ethile yesikhathi enqunywe ngokushesha nje ngemva kokufa kothandekayo. Abanye abantu bathwala umthwalo wokuba lusizi kukho konke ukuphila kwabo, ikakhulukazi labo abaye balahlekelwa izingane. Umbhangqwana ongamaKristu othembekile eSpain walahlekelwa indodana yawo eneminyaka engu-11 ubudala ngo-1963 njengesisulu sesifo solwelwesi lobuchopho. Kuze kube namuhla, usakhala izinyembezi lapho ukhuluma ngoPaquito. Izinsuku zokukhumbula izenzakalo ezithile onyakeni, izithombe, izinto eziyizikhumbuzo, zingase zibuyise izinkumbulo ezidabukisayo. Ngakho, akufanele neze siphelelwe isineke futhi sicabange ukuthi abanye kufanele ukuba sebeluleme ekulahlekelweni kwabo manje. Isikhulu sezokwelapha siyavuma: “Ukucindezeleka nokushintshashintsha okungokomzwelo kungahlala iminyaka eminingana.” Ngakho-ke, khumbula ukuthi njengoba nje izibazi ezingokoqobo zingahlala unomphela emizimbeni yethu, kungokufanayo nangezibazi eziningi ezingokomzwelo.
10. Yini okumelwe siyenze ukuze sisize abadabukile?
10 Iziphi ezinye zezinto eziwusizo esingazenza ukuze siduduze labo abadabukile ebandleni lobuKristu? Ngobuqotho bonke singase sithi kumzalwane noma kudade odinga induduzo, “Uma kukhona engingakwenza ukuze ngisize, ngicela ungazise.” Kodwa eqinisweni kukangaki lapho umuntu oshonelwe esibiza khona athi, “Ngicabange ngokuthile ongakwenza ukuze ungisize”? Ngokusobala, kudingeka sithathe isinyathelo esifanelekile kuqala ukuze siduduze oshonelwe. Ngakho, yini esingayenza ngendlela ewusizo? Nakhu ukusikisela okumbalwa okuwusizo.
11. Ukulalela kwethu kungaba kanjani induduzo kwabanye?
11 Lalela: Enye yezinto eziwusizo kakhulu ongayenza iwukuzwelana nomuntu oshonelwe ngokulalela. Ungase ubuze, “Ungathanda yini ukuxoxa ngakho?” Makazinqumele yena. Omunye umKristu ukhumbula lapho uyise eshona: “Kwakungisiza ngempela lapho abanye bebuza okwakwenzekile bese belalelisisa.” Njengoba uJakobe eluleka, shesha ukulalela. (Jakobe 1:19) Lalela ngesineke nangozwela. “Khalani nabantu abakhalayo,” kutusa iBhayibheli kweyabaseRoma 12:15. Khumbula ukuthi uJesu wakhala enoMarta noMariya.—Johane 11:35.
12. Hlobo luni lwesiqinisekiso esingalunikeza labo abalilayo?
12 Nikeza isiqinisekiso: Khumbula ukuthi umuntu oshonelwe ekuqaleni angase azizwe enecala, ecabanga ukuthi mhlawumbe kunokwengeziwe okumelwe ngabe wakwenza. Qinisekisa lomuntu ukuthi cishe konke okwakungase kwenziwe kwenziwa (noma usho noma yini enye oyaziyo ukuthi iyiqiniso futhi iyakha). Mqinisekise ukuthi lokho akuzwayo akukhona neze okungavamile. Mxoxele ngabanye obaziyo abalulama ngokuphumelelayo ekulahlekelweni okufanayo. Ngamanye amazwi, yiba nozwela. Usizo lwethu lomusa lungase lusho okukhulu! USolomoni wabhala: “Izwi elikhulunywayo ngesikhathi esiyiso linjengama-apula asezitsheni zesiliva.”—IzAga 16:24; 25:11; 1 Thesalonika 5:11, 14.
13. Uma sizenza sitholakale, lokho kungasiza kanjani?
13 Zenze utholakale: Zenze utholakale, hhayi nje kuphela ngezinsuku ezimbalwa zokuqala lapho abangane abaningi nezihlobo besekhona kodwa nangemva kwezinyanga ezithile uma kudingekile, lapho abanye sebebuyele enqubweni yabo yokuphila evamile. Inkathi yokudabuka ingase yehlukahluke kakhulu, kuye ngomuntu. Isithakazelo sethu sobuKristu nozwela kungasho lukhulu nganoma isiphi isikhathi esidingeka ngaso. IBhayibheli lithi “kukhona abangane ababambelela kuneselamani.” Ngakho, isisho esithi, “Umngane ngesikhathi sokuswela umngane wangempela,” siyiqiniso elingenakuphikwa okumelwe siphile ngokuvumelana nalo.—IzAga 18:24; qhathanisa nezEnzo 28:15.
14. Yini esingakhuluma ngayo ukuze siduduze oshonelwe?
14 Khuluma ngezimfanelo ezinhle zomuntu oshonile: Lolu olunye usizo olukhulu uma lunikezwa ngesikhathi esifanele. Hlanganyela izindatshana ezakhayo ozikhumbulayo ngalowomuntu. Ungesabi ukusebenzisa igama lalowomuntu. Musa ukwenza sengathi othandekayo oshonile akakaze abe khona noma ubeyinto engabalulekile. Kuyaduduza ukwazi ukuthi incwadi yaseHarvard Medical School yathi: “Ukululama okuthile kuyafinyeleleka lapho oshonelwe ekugcineni engase akwazi ukucabanga ngomuntu ofile ngaphandle kokudabuka okukhungathekisayo . . . Njengoba iqiniso elisha livunywa futhi lamukelwa, usizi luyashintsha lube izinkumbulo eziyigugu.” “Izinkumbulo eziyigugu”—yeka indlela okududuza ngayo ukukhumbula lezozikhathi eziyigugu ezachithwa nothandekayo! UFakazi owalahlekelwa uyise eminyakeni ethile edlule wathi: “Inkumbulo ekhethekile kimi eyokufunda iBhayibheli nobaba ngokushesha nje ngemva kokuba eqale ukufunda iqiniso. Ngikhumbula futhi silele ngasosebeni lomfula sixoxa ngezinye zezinkinga zami. Ngangimbona kuphela ngemva kweminyaka emithathu noma emine, ngakho lezozikhathi zaziyigugu.”
15. Umuntu angasithatha kanjani isinyathelo kuqala ukuze asize?
15 Thatha isinyathelo kuqala lapho kufanelekile: Abanye abantu abadabukile bangakwazi ukubhekana kangcono nesimo kunabanye. Ngakho, kuye ngezimo, thatha izinyathelo ezingokoqobo ukuze usize. Omunye wesifazane ongumKristu owayedabukile uyakhumbula: “Abaningi babethi, ‘Uma kukhona engingakwenza, ungazise.’ Kodwa omunye udade ongumKristu akazange abuze. Wavele wangena ekamelweni, wandlula umbhede, wayesewasha okokulala okungcolile. Omunye wathatha ibhakede, amanzi, nezinto zokuhlanza wayesehlanza ukhaphethi owawuhlanzelwe umyeni wami. Laba babengabangane beqiniso, futhi angisoze ngabakhohlwa.” Lapho kunesidingo esisobala sosizo, thatha isinyathelo kuqala—mhlawumbe ngokupheka ukudla, ukusiza ngokuhlanza, noma ukwenza imisetshenzana ethile. Yiqiniso, kufanele siqaphele ukuba singagxambukeli lapho umuntu oshonelwe efuna ukuba yedwa. Ngakho, kufanele silalele amazwi kaPawulu: “Ngakho, njengabakhethiweyo bakaNkulunkulu, abangcwele nabathandwayo, gqokani ukusondelana okunesisa kobubele, umusa, ukuthobeka kwengqondo, ubumnene, nokubhekakade.” Umusa, isineke, nothando, akusoze kwaphela.—Kolose 3:12; 1 Korinte 13:4-8.
16. Kungani incwadi noma ikhadi kunganikeza induduzo?
16 Bhala incwadi noma uthumele ikhadi eliduduzayo: Ngokuvamile akunakwa ukubaluleka kwencwadi yokulilela oshonelwe noma ikhadi elihle lokuzwelana naye. Iyini inzuzo yayo? Ingafundwa ngokuphindelela. Incwadi enjalo akudingekile ukuba ibe yinde, kodwa kufanele ibonise ukuba kwakho nobubele. Kufanele ibonise futhi ukuthambekela ezintweni ezingokomoya kodwa ngaphandle kokuba oshumayelayo. Umyalezo nje oyisisekelo othi “Sikanye nawe” ungaba induduzo.
17. Umthandazo ungayiletha kanjani induduzo?
17 Thandaza nabo: Ungakudeleli ukubaluleka kokuthandaza namaKristu ashonelwe okanye nawo nokuwathandazela. IBhayibheli kuJakobe 5:16 lithi: “Ukunxusa komuntu olungileyo . . . kunamandla amakhulu.” Ngokwesibonelo, lapho abadabukile besizwa sibathandazela, kuyabasiza ukuba babhekane ngokuphumelelayo nemizwa ephambene njengokuba nomuzwa wecala. Ezikhathini zethu zokuba buthaka, zokudumazeka, uSathane uzama ukusenza buthaka ‘ngamaqhinga’ akhe, noma “izenzo zobuqili.” Kungalesisikhathi lapho sidinga khona induduzo nokusekela komthandazo, njengoba uPawulu asho: ‘Qhubekani nithandaza ngomoya ngazo zonke izinhlobo zomthandazo nokunxusa ngezikhathi zonke. Futhi ngenxa yaleyonjongo hlalani niphapheme ngakho konke ukuqinisela nangokunxusa ngenxa yabo bonke abangcwele.’—Efesu 6:11, 18, Kingdom Interlinear; qhathanisa noJakobe 5:13-15.
Okumelwe Kugwenywe
18, 19. Singakubonisa kanjani ukuba namasu okungacunuli ezingxoxweni zethu?
18 Lapho umuntu edabukile, kunezinto futhi okungamelwe sizenze noma sizisho. IzAga 12:18 ziyaxwayisa: “Bakhona abaphahluka njengokuhlaba kwenkemba, kepha izilimi zabahlakaniphileyo ziyimpiliso.” Ngezinye izikhathi, ngaphandle kokuqaphela, siyahluleka ukubonisa amasu okungacunuli ekukhulumeni. Ngokwesibonelo, singase sithi, “Ngiyazi ukuthi uzizwa kanjani.” Kodwa ingabe kunjalo ngempela? Ingabe uke wabhekana nokulahlekelwa okufana nsé? Kanti-ke, abantu basabela ngezindlela ezingafani. Kungenzeka ukuthi ukusabela kwakho kwakungafani nokwalomuntu odabukile. Kungase kungazweli kahle ukuthi, “Ngizwelana nawe kakhulu ngoba nami ngalahlekelwa ngendlela efanayo lapho . . . efa esikhathini esithile esidlule.”
19 Kuyobonisa ukucabangela futhi ukugwema ukukhuluma ngokuthi oshonile uyovuswa yini noma cha. Abanye abazalwane nodade baye bezwa ubuhlungu obujulile ngezinkulumo zokwahlulela ezazishiwo ngokuphathelene namathuba esikhathi esizayo omngane womshado ongakholwa oshonile. Asibona abahluleli bokuthi obani abayovuswa noma abangeke bavuswe. Singakhululeka ngokuthi uJehova, obona inhliziyo, uyoba nesihe kakhulu kunokuba abaningi bethu bebengenza.—IHubo 86:15; Luka 6:35-37.
Imibhalo Eduduzayo
20, 21. Imiphi eminye imibhalo engaduduza oshonelwe?
20 Omunye wemithombo yosizo omkhulu ukuyedlula yonke lapho unikezwe ngesikhathi esifanele, ukucabangela izithembiso zikaJehova ngabafile. Lemiqondo eseBhayibhelini iyoba usizo kungakhathaliseki ukuthi umuntu oshonelwe usenguFakazi kakade noma ungumuntu esihlangana naye enkonzweni. Imiphi eminye yalemibhalo? Siyazi ukuthi uJehova unguNkulunkulu wenduduzo yonke, ngoba wathi: “Yimina, yimi enginguye oniduduzayo.” Wabuye wathi: “Njengoduduzwa ngunina, kanjalo ngiyakuniduduza nina.”—Isaya 51:12; 66:13.
21 Umhubi wabhala: “Lokhu kuyinduduzo ekuhluphekeni kwami, ngokuba izwi lakho lingiphilisile. Ngiyakhumbula izahlulelo zakho zasendulo, Jehova; ngiyaduduzeka. Umusa wakho mawube-yinduduzo encekwini yakho ngokwezwi lakho.” Phawula ukuthi igama elithi “induduzo” lisetshenziswe ngokuphindaphindiwe kulezozindima. Yebo, singazitholela induduzo yeqiniso futhi siduduze nabanye ngokuphendukela eZwini likaJehova esikhathini sethu sokuhlupheka. Lokhu, kuhlangene nothando nobubele babazalwane, kungasisiza ukuba sibhekane ngokuphumelelayo nokulahlekelwa kwethu futhi siphinde sigcwalise ukuphila kwethu ngomsebenzi ojabulisayo enkonzweni yobuKristu.—IHubo 119:50, 52, 76.
22. Iliphi ithemba eliphambi kwethu?
22 Singalunqoba futhi usizi lwethu ngezinga elithile ngokuba matasa sisize abanye ekucindezelekeni kwabo. Njengoba siphendulela ukunakekela kwethu kwabanye abadinga induduzo, nathi sithola injabulo yangempela yokupha ngomqondo ongokomoya. (IzEnzo 20:35) Masihlanganyele nabo umbono wosuku lovuko lapho abantu bazo zonke izizwe zangaphambili, izizukulwane ngezizukulwane, beyobe bamukela abathandekayo babo abashonile bebuya ekufeni, bengena ezweni elisha. Yeka ithemba! Yeka izinyembezi zenjabulo eziyociphizwa ngalesosikhathi njengoba sikhumbula ukuthi uJehova ngempela unguNkulunkulu “oduduza labo abadangele”!—2 Korinte 7:6.
Uyakhumbula?
◻ Kungayiphi indlela uJehova ‘enguNkulunkulu wenduduzo yonke’?
◻ UJesu noPawulu babaduduza kanjani abadabukile?
◻ Iziphi ezinye zezinto esingazenza ukuze siduduze abadabukile?
◻ Yini okufanele siyigweme lapho sisebenzelana noshonelwe?
◻ Imiphi imibhalo oyithandayo yokududuza abanye ngezikhathi zokulahlekelwa?
[Isithombe ekhasini 15]
Ngamasu okungacunuli thatha isinyathelo kuqala ukuze usize labo abadabukile