Injabulo Egcinelwe Labo Abathola Iqiniso
UMUNTU othile waseFinland wathola incwadi ethi The Divine Plan of the Ages ekamelweni lakhe elingaphansi kophahla endlini eyisitezi. Waqala ukuyifunda ngaso lesosikhathi, futhi ngokushesha wazitshela, ‘Leli iqiniso; leli iqiniso.’ Njengoba ayehlela phansi esuka kulelikamelo, watshela umkakhe, “Ngiyitholile inkolo yeqiniso.”
Lokhu okuhlangenwe nakho akuvamile ngenxa yendlela lomuntu alithola ngayo iqiniso, kodwa iningi loFakazi BakaJehova lingase lilandise ukusabela okufanayo. Bonke bangakutshela ngenjabulo eza ngokuthola iqiniso. Okuhlangenwe nakho okulandelayo kuqokomisa lokhu.
Izimfundiso Zeqiniso ZeBhayibheli Ziletha Injabulo
UMargarita Königer wakhulela eMunich, eJalimane, phakathi neMpi Yezwe II. Izindlu eziqhunyiswe ngamabhomu nezishayo kwakuvamile. Umfowabo wafela empini. Njengoba ayeba khona ezinkonzweni zesonto lamaKatolika, wayezwa imithandazo eyayenzelwa amasosha aseJalimane nomholi, uHitler. Ngemva kwempi, wathola umfundaze wokuyofunda ekolishi e-United States njengengxenye yesimiso sokushintshana kwabafundi. Wathola ukuthi abantu babenobungane kuye, ngakho wazibuza ukuthi kazi yini lena eyayibonakala ishukumisa abantu, abasifiso sabo esingokwemvelo siwukuphila ngokuthula, ukuba bangathembani futhi bazondane phakathi nesikhathi sempi. Emuva eMunich, wahlangana noFakazi BakaJehova, futhi ngesifundo seBhayibheli nabo, wathola izimpendulo emibuzweni yakhe. Uthi: “Ngaboniswa eBhayibhelini ukuthi kuhileleke amandla emimoya emibi . . . IBhayibheli liwabiza ngokuthi ‘ababusi bezwe,’ futhi eqinisweni, lithi uSathane ‘udukisa umhlaba wonke owakhiwe.’ . . . Uma ngibheka izenzo zokungamhloniphi uNkulunkulu nezobudeveli zezizwe nabantu, yeka ukuthi yayinengqondo futhi yanelisa kanjani lempendulo!”—Efesu 6:12; IsAmbulo 12:9.
UMargarita uyaqhubeka: “Kwangilethela injabulo enkulu ukufunda ngelungiselelo likaNkulunkulu lokuxazulula izinkinga zomhlaba. Cha, akuyikuba ngokucabanga noma ukuphatha okuthile kwabantu, njengoba kusongozwa izazi zezwe. Kunalokho, iBhayibheli libonisa ukuthi uhulumeni omusha wasezulwini uyoqondisa izindaba zomhlaba. . . . UJesu Kristu wafundisa abalandeli bakhe ukuba bathandaze: ‘Umbuso wakho mawuze.’ . . . Ngaqala ukubona ukuthi lombuso uwuhulumeni ongokoqobo nokuthi ukuthula kwangempela, komhlaba wonke kungafinyelelwa ngawo kuphela.” Cishe phakathi neminyaka engu-30, uMargarita uye wakhonza njengesithunywa sevangeli emazweni ase-Afrika angaba mahlanu—iminyaka engu-19 yokugcina uyisebenzise ememezela iqiniso kubantu abathobekile base-Ouagadougou, eBurkina Faso.
Okuhlangenwe nakho kukaMargarita akukhona okungavamile. Iningi liye lasabela kahle ngendlela efanayo lapho lithola ukuthi abefundisi beLobukholwa kuzo zombili izinhlangothi zempi babethandazela ukunqoba kuNkulunkulu. Abantu abanhliziyo-ziqotho bayakubona ukuba nengqondo kwencazelo yeBhayibheli yokuthi uNkulunkulu akahlanganyeli ezimpini zabantu kodwa ukuthi ziba khona ngenxa yokuthi “lonke izwe lisemandleni omubi.” Lababafuni beqiniso bafunda ukuthi amaKristu eqiniso akumelwe abe “ingxenye yezwe” kodwa kumelwe ahlale engathathi-hlangothi ezindabeni zalo. Beqaphela ukuthi oFakazi BakaJehova baye bathatha lokho kuma, laba abasanda kuthakazela bayaqiniseka ngokuthi bathole iqiniso. Abanjalo baba nethemba nenjabulo enkulu njengoba bezuza ulwazi olwengeziwe ngokuqondene nesizathu sokuvumela kukaNkulunkulu ububi nendlela ayoletha ngayo ngokushesha ukuthula nezimo zokulunga emhlabeni ngoMbuso wakhe.—1 Johane 5:19; Johane 17:16; Mathewu 6:9, 10.
Izimiso Zeqiniso ZeBhayibheli Ziletha Injabulo
UDaniel Rosero wase-Ecuador waba nomuzwa wokuthi ukuphila kwakungenanjongo, ngakho waqala ukuphuza. Isonto ayesonta kulo lamfundisa ukuthi okuwukuphela kwento ayengabheka phambili kuyo ukufa nesihogo somlilo. Wasabela, “Ngizosha, ngakho ngiyekeni ngiphuze!” Wayenomkhaya onamalungu angu-8 ayengawondli, futhi wayelwa njalo nomkakhe, uDelia. Izimo zashintsha lapho ngelinye iSonto ekuseni bevakashelwa oFakazi BakaJehova futhi beqala ukufunda iBhayibheli. Ngokokuqala ngqá lapho uDaniel eba khona emhlanganweni wesifunda woFakazi BakaJehova, waqaphela ukuthi wayelitholile iqiniso. Uthi: “Lenhlangano inginqobile. Abantu abaningi bayezwana. Wawungaluzwa uthando phakathi kwesixuku. Akekho owayebhema. Lungekho nolimi olungcolile. . . . Ngiyakhumbula ngicabanga, ‘Leli iqiniso!’ Akukhona ukwesaba ukufa noma ukuphela kwezwe okwangishukumisa. Kwakuwukuhlanzeka kwalenhlangano.”
Wonke umkhaya wakwaRosero waba oFakazi BakaJehova. Ukuphila kwawo komkhaya nesimo sezomnotho kwathuthuka njengoba wawusebenzisa izimiso zeBhayibheli. UDelia Rosero uthi: “Uyazi, konke lokhu kuye kwenzeka ngenxa yeqiniso leBhayibheli. Ubani owaziyo ukuthi ngabe zikuphi izingane zami ngaphandle kweZwi likaNkulunkulu? Bonke abayisikhombisa babhapathiziwe futhi bagxilile. Iqiniso liye lasho ukuphila okusha ngokuphelele, injabulo entsha ngami.”
Okuhlangenwe nakho komkhaya wakwaRosero akukhona okungavamile. Abaningi osukwini lwethu bahlushwa izinkinga. Esinye isizathu ukuthi izindinganiso zokuziphatha ezinikezwe eBhayibhelini cishe azisahlonishwa, njengoba zazihlonishwa izizukulwane zangaphambili. Izinkolo eziningi ziye zalandela lendlela, ngenxa yokubekezelela okuthile noma ngenxa yokuthi zinomuzwa wokuthi ngokushintsha kwezikhathi ukuziphatha kwakudala kuyaphuma emfashinini. Ngakho, njengabanye, abakwaRosero bashiywa dengwane bengenasiqondiso seBhayibheli. Nokho, lapho abantu abanjalo abathobekile befinyelela ekuqondeni umbono kaNkulunkulu ngokuziphatha nokuphila komkhaya, basebenzisa lokho abakufundayo ngaphandle kokuchitha isikhathi. Ezindabeni eziphathelene nabo singabona imiphumela emihle yokwenza kanjalo.
Injabulo Kumelwe Ihlakulelwe
Nokho, lokhu akusho ukuthi umKristu uhlala esesimweni sokuzizwa ejabule. Ngokusobala, izinkinga abantu bonke ababhekana nazo, njengokuphelelwa umsebenzi, ukugula, nokufa, ziyawathinta namaKristu. AmaKristu futhi kudingeka alwe ngokuqhubekayo nokungapheleli nobuthakathaka bawo siqu. Ukulandisa kweBhayibheli kuthi uLoti ‘wayecindezeleke kakhulu ngokuzitika kwabantu abadelela umthetho ekuziphatheni okuxekethile’ emzini waseSodoma. AmaKristu athembekile awanakukugwema ukuba nemizwa efanayo lapho ebona izimo ezimbi zidlondlobala.—2 Petru 2:7, 8.
Nokho, labo abaye bathola iqiniso bathole okungcono kakhulu. Ngokwesibonelo, umuntu okholwayo olilayo ngenxa yothile ofile akudingekile ukuba azizwe ‘edabuke njengoba nje kwenza bonke abanye abangenalo ithemba.’ Usizi lwakhe alunakuba olungenamngcele. Lokhu kuyiqiniso ngisho nangezinye izinkinga. Umuntu othole iqiniso uyazi ukuthi izinkinga zamanje zingezesikhashana kuphela. Ithemba lenza kube lula ukubekezela ngaphansi kobunzima. Indlela yokuphila elinganiselayo nayo iyasiza.—1 Thesalonika 4:13.
UPawulu wanikeza amaKristu lesisikhuthazo: “Jabulani eNkosini ngaso sonke isikhathi. Ngizophinda futhi ngithi, Jabulani!” (Filipi 4:4) Lokhu kubonisa ukuthi nakuba sonke singase sikwazi ukuyithola injabulo, kunokwenzeka futhi ukuba singabi nayo. Izinkathazo zalesisimiso esidala sezinto zingabonakala ziyisithiyo. Ngaphezu kwalokho, iBhayibheli lisitshela ukuthi sidinga ukuhlakulela injabulo, esinye sezithelo zomoya kaNkulunkulu. (Galathiya 5:22) Uma uqhubeka ungenisa ulwazi lweqiniso futhi uzikhumbuza ngengcebo engokomoya oluye lwayiletha nolusayiletha, injabulo yakho ayisoze yaphela. Iyoqina njengoba sisondela esikhathini lapho uNkulunkulu ‘eyosula zonke izinyembezi’ emehlweni abantu nalapho “ukulila noma ukukhala noma ubuhlungu” kungasayikuba khona.—IsAmbulo 21:4.
[Izithombe ekhasini 8]
Abaningi bahlabeka umxhwele ngenxa yenjabulo nokuhleleka okuhle emihlanganweni yoFakazi BakaJehova