‘Izenzo Zakhe Ziyomlandela’

NGO-8:50 ekuseni ngoLwesine, July 28, 1994, uGeorge D. Gangas waqeda inkambo yakhe yasemhlabeni. Wayeneminyaka engu-98 ubudala. Njengoba ayengomunye wabagcotshiwe, uGeorge Gangas waba ilungu leNdikimba Ebusayo yoFakazi BakaJehova kusukela ngo-October 15, 1971.

Bonke abebejwayelene naye uMfoweth’ uGangas bebelwazi uthando lwakhe ngokulunga nenzondo yakhe ngobubi. Bayikhumbula kahle indlela ayemchaza ngayo ngokuphindaphindiwe uSathane njengomqambimanga omkhulu, omubi, owonakele, nonyanyekayo. Ngokuphambene, wayekhuluma ngoJehova njengoBaba onothando, onomusa, onesihawu, onesisa, nokhathalelayo. Abaningi bayayikhumbula futhi indlela ayethanda ngayo ukubuza imibuzo engokweBhayibheli. Kunoma iyiphi ingxoxo wayengayeki ukuphakamisa imibuzo—eminye yayo eyayiba lula, eminye ifuna ukusebenza kwengqondo. Ngempela, wayelithanda iqiniso leBhayibheli.

UMfoweth’ uGangas wabhapathizwa ngo-July 15, 1921. Waqala umsebenzi wakhe enkonzweni yokushumayela yesikhathi esigcwele (ukuphayona) ngo-March 1928. Ngakho-ke, ubesenkonzweni yesikhathi esigcwele ingqikithi yeminyaka engu-66. Waba ilungu lezisebenzi zasendlunkulu yaseBrooklyn ye-Watch Tower Bible and Tract Society ngo-October 31, 1928.

Indaba yokuphila kwakhe yavela kumagazini i-Watchtower ka-October 15, 1966. Ichaza umuntu kaNkulunkulu ongokomoya ngempela. Kulesosihloko, washo lamazwi ajabulisayo: “Ngiyakuthanda ukuphila futhi ngifuna abafowethu bazuze ukuphila. Ngizizwa njengomphostoli uPawulu owathi, ‘konke ngikushaya indiva ngobukhulu bokumazi uKristu Jesu.’”—Filipi 3:8.

UMfoweth’ uGangas wabonisa ngezenzo zakhe ukuthi ukuthanda ngempela ukuphila, futhi eluhlanganyela nabanye ngentshiseko ‘lolulwazi ngoKristu Jesu.’ Uzokhumbuleka, kodwa yeka ukuthi sijabula kanjani ngokuthi manje usewuzuzile umvuzo wakhe wasezulwini! Manje, ‘usezophumula emshikashikeni wakhe, ngoba izenzo zakhe ziyamlandela.’—IsAmbulo 14:13, New International Version.

[Izithombe ekhasini 31]