Ukwesaba Abafileyo Kusakazekile
Kade ilanga lishonile. Uphindela ekhaya cishe sekwephuze kakhudlwana kunesikhathi obungathanda ukuba sekhaya ngaso. Njengoba uhambo lwakho lukudlulisa ngasemathuneni endawo, inhliziyo yakho iqala ukushaya ngamandla. Ukuthula kobusuku obumnyama kukwenza uzwe noma yimuphi umsindo omncane. Ngokungazelele buqamama uzwa umsindo onswininizayo, othusayo. Uhamba ngokushesha—ukushaya kwenhliziyo yakho nakho kuba namandla ngokwengeziwe—njengoba uphikelele esivikelweni sasekhaya.
INGABE wake waba nomuzwa wokukhathazeka lapho usemathuneni noma useduze kwawo? Uma kunjalo, kungenzeka ukuthi uye wathonywa umbono ongokwenkolo ovamile emhlabeni wonke—ukuthi imimoya yabafileyo ingabasiza noma ibalimaze abaphilayo.
Amasiko amaningi ayinkolelo-ze aye aba khona ngenxa yenkolelo yokuthi abafileyo badinga usizo lwabaphilayo noma ukuthi bangabalimaza abaphilayo uma kungashwelezwa kubo. Ngokwesibonelo, kwamanye amazwe aseLatin America abantu abaningi banesiko lokwakha indawo encane yokuhlala enesiphambano lapho umuntu efe engozini. Abantu bakhanyisa amakhandlela futhi babeke izimbali njengomzamo wokubonisa isithakazelo noma ukuze basize umphefumulo noma umoya womuntu ofile. Kwezinye izimo, kusakazwa imibiko ephathelene nezimpendulo zemithandazo “eyisimangaliso,” ukuze abantu baqale ukujwayela ukuvakashela indawo ye-animita, indawo encane ehlala umphefumulo noma umoya womuntu ofile. Kuleyondawo benza i-mandas, noma izithembiso, zokuthi uma lomuntu ofile engabasiza ukuba bafeze noma bathole okuthile—mhlawumbe ukwelashwa ngokuyisimangaliso—bayobonisa ukubonga kwabo ngendlela ekhethekile. Ngakolunye uhlangothi, kungase kubikwe ukuthi umphefumulo womuntu ubonakala ebumnyameni basebusuku, uthuse labo abakhona. Ngokuvamile imiphefumulo enjalo kuthiwa ingama-penando, ahlukumeza abantu abaphilayo ngenxa yezenzakalo zesikhathi esidlule.
Abantu emazweni amaningi benza imizamo emikhulu ukuze bashweleze “emimoyeni” yabafileyo. Kwenziwa amadili amakhulu, kunikelwe imihlatshelo, kukhulunywe amazwi aduduzayo—konke kwenzelwa ukuvimbela isijeziso esivela emoyeni womuntu ofile. Kucatshangwa ukuthi ukushweleza kulomoya kuyophumela emivuzweni nasezibusisweni kulabo abasele.
“Abaningi bakholelwa ukuthi asikho isenzakalo ‘esizenzekelayo noma esingokwemvelo,’” kusho omunye umbiko ovela e-Afrika. “Noma isiphi isenzakalo—kungaba ukugula, inhlekelele, ubunyumba, inkinga yomnotho, izikhukhula, noma ukushisa kwelanga ngokweqile, izingozi, ukungabi nabunye emkhayeni, ukufa—bakholelwa ukuthi imimoya engabonakali, enamandla angaphezu kwawabantu, iyimbangela yazo zonke lezizinto.” Omunye umbiko uthi: “Lababantu bakholelwa ukuthi imimoya yawokhokho babo isendaweni ethile ezulwini futhi ihlala igade izihlobo zayo ezisaphila emhlabeni. Kukholelwa ukuthi okhokho banamandla angaphezu kwawemvelo, abangawasebenzisela ukubusisa nokuvikela izihlobo zabo emhlabeni noma ukuzijezisa, kuxhomeke endleleni izihlobo ezibadumisa noma ezingabanaki ngayo abafileyo.”
Kodwa ingabe lokho kuyavumelana neZwi likaNkulunkulu? Uyini umbono wakho?
[Isithombe ekhasini 4]
I-“Animita” eChile