Kungani OFakazi Befika Njalo?
‘NAMPO-KE futhi! Angithi bebelapha nje emasontweni ambalwa edlule!’ Ingabe lokho kuke kukufikele engqondweni lapho omunye woFakazi BakaJehova ekuvakashele? Izigidi namuhla zivakashelwa njalo oFakazi BakaJehova. Ungase ubuze, Kungani bephikelela uma bazi ukuthi abantu abaningi banenkolo yabo noma abanasithakazelo? Lowombuzo udinga impendulo.
Umthwalo Wemfanelo Phambi KukaNkulunkulu
OFakazi BakaJehova baye bafunda emiBhalweni ukuthi kusukela ngo-1914, unyaka okwaqala ngawo iMpi Yezwe I, izenzakalo zezwe ziye zagcwalisa iziprofetho zeBhayibheli ngokuphathelene nesiphelo sesimiso samanje sezinto nokuza koMbuso kaNkulunkulu kulomhlaba. Cishe ikhulu lonke leminyaka lobudlova, ukuchitheka kwegazi, nenzondo libonakala lisishiye isintu singasenakulithola nanini ikhambi lezinkinga zaso kwezombangazwe. Izimpi nobuphekula okusakhungethe umkhaya wesintu kuwubufakazi bokuthi ukubusa kwabantu kwehlulekile ukuguqula izinhliziyo zabantu, izingqondo nezimo zabo zengqondo. Inzondo ejulile ngezenzakalo ezenzeka kudala emlandweni iyaqhubeka yonakalisa ubudlelwane phakathi kwamaqembu ezinhlanga, ezizwe, nawezenkolo. Lokhu kuyenzeka ezindaweni eziqhelelene njenge-Afghanistan, iMpumalanga Ephakathi, iNdiya, iNingizimu Afrika, iNyakatho Ireland, nezwe elaliyiYugoslavia. Liyini-ke ikhambi elihlala njalo?
Yini Eshukumisa OFakazi?
OFakazi BakaJehova bayaqaphela ukuthi ikhambi likaNkulunkulu—ukubusa koMbuso wakhe othenjisiwe ngoKristu Jesu—liwukuphela kwekhambi eliphumelelayo. UJesu waze wahlanganisa ngisho nesicelo sokubusa kwalowoMbuso emkhulekweni wakhe oyisibonelo odumile: “Ngakho-ke anokhuleka kanje‚ nithi: Baba wethu osezulwini‚ malingcweliswe igama lakho; mawufike umbuso wakho; mayenziwe intando yakho emhlabeni njengasezulwini.” OFakazi bakholelwa ukuthi lomkhuleko ucela ngokoqobo ukungenela kukaNkulunkulu ezindabeni zesintu.—Mathewu 6:9, 10.
Ngakho-ke kungani oFakazi BakaJehova benomuzwa wokuthi kudingeka baye njalo endlini ngendlu ukuze bazame ukudlulisela lesosigijimi? Kungenxa yemiyalo emibili eyaqokonyiswa uJesu: “Woyithanda iNkosi uNkulunkulu wakho ngayo yonke inhliziyo yakho‚ nangawo wonke umphefumulo wakho‚ nangayo yonke ingqondo yakho. Yilowo umyalo omkhulu nowokuqala. Owesibili ofana nawo uthi: Wothanda umakhelwane wakho njengalokhu uzithanda wena.”—Mathewu 22:37-39.
OFakazi bafuna ukubusiswa uNkulunkulu, futhi ngenxa yokuthi bayabathanda omakhelwane babo, bafuna ukuba nabo babusiswe. Ngaleyondlela, belandela isibonelo sikaJesu, bazizwa beshukunyiswa uthando olungenabugovu ukuba bavakashele omakhelwane babo. Bafuna okungenani ukubanikeza ithuba lokuba bazi lokho “uNkulunkulu ojabulayo,” akuthembise isintu esilalelayo emhlabeni ohlanziwe.—1 Thimothewu 1:11, NW; 2 Petru 3:13.
Isithunywa sevangeli esingumKristu uPawulu sasikholelwa ezithembisweni zikaNkulunkulu futhi ngaleyondlela sabhala: “UPawulu‚ inceku kaNkulunkulu nomphostoli kaJesu Kristu ngokokukholwa kwabakhethiweyo bakaNkulunkulu nangokokwazi iqiniso elingokokukhonza uNkulunkulu, ethembeni lokuphila okuphakade uNkulunkulu ongaqambi amanga akwethembisa phambi kwezikhathi zaphakade.” Yebo, uNkulunkulu, “ongaqambi amanga,” ‘wathembisa’ ukuphila okuphakade kulabo abafuna ngokuthobeka ukumazi futhi bamkhonze.—Thithu 1:1, 2; Zefaniya 2:3.
Ingabe OFakazi Bayakhokhelwa?
Ngezinye izikhathi abanye baye bacabanga ukuthi oFakazi bayakhokhelwa ngenkonzo yabo. Ayikho into enjalo! Bawathatha ngokungathi sína amazwi kaPawulu ayewaqondise ebandleni laseKorinte: “Asinjengabaningi abonakalisa izwi likaNkulunkulu ngenxa yenzuzo‚ kodwa njengabaqotho‚ njengabavela kuNkulunkulu sikhuluma phambi kukaNkulunkulu sikuKristu.”—2 Korinte 2:17.
Abanye abaholi benkolo bashumayela ngenxa yemali, kungaba inkokhelo yezinkonzo zenkolo noma ukuthuthukisa izinhlangano zezentengiselwano ngezintshumayelo zabo ku-TV. Izinkolo eziningi zinabefundisi abakhokhelwayo.
Kunalokho, oFakazi abanabo abefundisi abakhokhelwayo, futhi ngokuvamile izincwadi zabo zeBhayibheli zihanjiswa ngaphandle kwentengo kulabo abalifuna ngobuqotho iqiniso, nakuba abaningi babo beshukumiseleka ukwenza iminikelo yokuzithandela. Leminikelo isisetshenziselwa ukunakekela izindleko zalomsebenzi wokushumayela womhlaba wonke. Ngokuvumelana neseluleko sikaJesu esithi: “Namukelisiwe ngesihle‚ yiphani ngesihle,” oFakazi basebenzisa lokho abanakho, kuhlanganise nesikhathi namandla, ekunikeleni ngezigidi zamahora unyaka ngamunye enkonzweni kaNkulunkulu. Ngaleyondlela, bafundisa abantu abanesithakazelo endlini ngendlu nangezifundo zeBhayibheli zasekhaya.—Mathewu 10:8; 28:19, 20; IzEnzo 20:19, 20.
Lamaqiniso awubufakazi bokuthi isisusa sokuzuza imali akusona esishukumisa oFakazi BakaJehova ngabanye, ibandla abakulo, noma i-Watch Tower Society. Akukho muntu okhokhelwayo ngokuya endlini ngendlu. Lomsebenzi usekelwa kanjani-ke ngezimali? Ngeminikelo yokuzithandela evela kubantu abanokwazisa emhlabeni wonke. Akukho nkongozelo ethathwayo.
Umphumela Wokufakaza Kwabo
Ingabe inkonzo yoFakazi yendlu ngendlu nokushumayela kwabo ngokwethukela kuyaqashelwa umphakathi? Ubufakazi bemithombo yezindaba bunikeza impendulo enguyebo omkhulu kulowombuzo. OFakazi BakaJehova kuye kwakhulunywa ngabo ezinhlelweni nasemidlalweni ye-TV lapho kuboniswa othile engqongoza emnyango. Izithombe zopopayi ziye zakhuluma ngoFakazi. Umsebenzi wabo wentshiseko waziwa kakhulu kangangokuthi abadwebi bopopayi emhlabeni wonke baye babhekisela koFakazi BakaJehova. Lemidwebo ingase ibonakale ibhuqa, kodwa ngokuvamile isekelwe ephuzwini elilodwa elihle elibalulekile—ukuthi oFakazi baziwa ngokushumayela kwabo okuphikelelayo endlini ngendlu.—IzEnzo 20:20.
Omunye umdwebo wopopayi wamuva nje wawubonisa indoda icaca intaba iyobonana “nomfundisi wezomoya.” Yathi: “Ake ungitshele ngezinto ezimangalisayo ezizayo!” Waphendula wathini “umfundisi wezomoya”? “Awuthi ngibone . . . Kuzoba nendlala, izifo, nokuzamazama komhlaba. Ilanga lizophenduka ubumnyama, nenyanga ibe yigazi.” Lendoda ezobuza yathi: “Zithini izindaba ezimnandi?” “Umfundisi wezomoya” waphendula: “UNkulunkulu uzokwesula zonke izinyembezi . . . futhi ukufa nokudabuka nobuhlungu ngeke kusaba khona!” Isivakashi sabuza: “Uzazelaphi zonke lezizinto?” Yathini impendulo? “Akudabuli muntu koFakazi BakaJehova!” Futhi kungenzeka nalomdwebi wopopayi ngokwakhe akakaze adabule!
Iphuzu elithakazelisayo lalomdwebo kanye neminye liwukuthi awembuli nje ukuphikelela koFakazi kodwa nokungashintshashintshi kwesigijimi sabo. Lomdwebi wanikeza ngamafuphi ingxenye ebalulekile yomsebenzi wabo wokushumayela wacaphuna nemibhalo.—Qhathanisa noMathewu 24:7, 29; IsAmbulo 21:3, 4.
Iqiniso lokuthi abantu abaningi bayasenqaba isigijimi sabo alibadumazi oFakazi noma liqede intshiseko yabo. Umphostoli uPetru waxwayisa: “Nazi kuqala lokhu ukuthi ngezinsuku zokugcina kuyakufika abahleki abahleka usulu‚ behamba ngezinkanuko zabo‚ bethi: Siphi isithembiso sokufika kwakhe na? Ngokuba kuselokhu obaba balala‚ konke kumi kunjalo njengakwasekuqaleni kokudalwa.” Naphezu kwalokho, beshukunyiswa uthando, oFakazi bayaqhubeka behambela omakhelwane babo futhi bayoqhubeka benza kanjalo kuze kube yilapho uNkulunkulu eqeda lesisimiso samanje esonakele.—2 Petru 3:3, 4.
UJesu wathi ezinsukwini zokugcina, izindaba ezinhle kwakuzomelwe zishunyayelwe kuqala. Ukuze uthole ukuthi kungani nokuthi kanjani, bheka izihloko ezimbili ezilandelayo.—Marku 13:10.
[Izithombe ekhasini 9]
OFakazi BakaJehova abanaso isigaba sabefundisi abakhokhelwayo—bonke bayizikhonzi zokuzithandela