ISonto Elihlukene—Libi Kangakanani?
“NJENGOMKHAYA omkhulu futhi omangele, ohlala endlini endala ewayo enodonga lwangaphambili olusanda kuwa ngokungazelele, kuzwakala kunomsindo okhona cishe kuwo wonke amakamelo—nabantwana bakaJesu abashaya izingubhu bethethisa ongqingili be-Anglo-Catholic ababonakala bebahle begqoke amasudi amnyama kasilika.”—The Sunday Times, London, April 11, 1993.
Lomkhaya iSonto LaseSheshi. Lomsindo uphathelene nokuvunyelwa kwabesifazane ebupristini. Lencazelo ecacile yoqhekeko olukhulu isebenza ngendlela efanayo kulo lonke eLobukholwa. Ngokuphathelene nezinzalamizi zeSonto Lobu-Orthodox nopapa abalahla isinqumo sokuvunyelwa kwabesifazane ukuba babe ngabapristi, omunye umbiko uphetha ngokuthi umphumela ophelele uwukuthi “iphupho lokuhlanganiswa kabusha kwalo lonke eLobukholwa liyinganekwane.”
Lihlukene Kangakanani ISonto?
Njengoba sifunda kuMathewu 7:21, uJesu Kristu wathi abaningi babeyozisholo ukuthi banokholo kuye njengeNkosi kodwa babe behluleka ‘ukwenza intando kaYise.’ Umagazini i-Maclean’s uyaphawula: “Abafundi bencwadi kaMathewu abafuna insindiso bangase bangasolwa ngokudideka ngalokho intando kaNkulunkulu eyikho ngempela, lapho amaKristu, namasonto awo, engavumelani kakhulu kangaka kulendaba.” Ngemva kokuhlola abantu baseCanada, lomagazini waphetha ngokuthi kukhona “ukwehlukana okukhulu ezinkolelweni nasemikhubeni yamaKristu aseCanada—ukwehlukana okukhudlwana phakathi kwamalungu anoma iliphi isonto, empeleni, kukhulu ngaphezu kokwehlukana okuphakathi kwamasonto ngokwawo.”
Ngokokuhlola kwalomagazini, amaphesenti angu-91 amaKatolika ayavumelana nokusetshenziswa kwezindlela ezingezona ezingokwemvelo zokuvimbela inzalo nakuba isonto lawo likulahla; amaphesenti angu-78 acabanga ukuthi abesifazane kufanele bavunyelwe babe ngabapristi; futhi amaphesenti angu-41 ayakwamukela ukukhishwa kwezisu “ngaphansi kwezimo ezithile.” Ukungavumelani phakathi kwamasonto ahlukene “ngezindaba eziningi ezingokwemfundiso yenkolo,” kusho i-Maclean’s, “kugcizelela ukwehlukana okubangela ukuwohloka kwamasonto avelele.”
Izindinganiso Ezimbaxambili
Kukhona izindinganiso ezimbaxambili kanye nezindinganiso ezingqubuzanayo ekuziphatheni. Abanye bathi basekela izimiso zeBhayibheli, kodwa abanye bazishaya indiva. Ngokwesibonelo, ingabe umgidi “womshado” owenzelwa oNgqingili ababili besifazane eMetropolitan Church yaseToronto wawuvumelana nentando kaNkulunkulu? Ngokusobala ababekhona babecabanga kanjalo. “Sifuna ukubonakalisa uthando lwethu obala naphambi kukaNkulunkulu,” besho.
Omunye umhleli wephephandaba wabuza ukuthi kwenzeka kanjani ukuba “umbhishobhi omkhulu wamaKatolika okwakukhonondwa ngaye njalo, athumele abapristi ababa nobuhlobo bobulili nabantwana eqenjini elihlukile labafana abasebenza e-altare.” UmPristi u-Andrew Greeley usikisela ukuthi kungenzeka abapristi abasukela ku-2 000 kuya ku-4 000 baye bahlukumeza izisulu ezingu-100 000 zabantwana, ngokuvamile okungenziwa lutho ngakho.
Isonto elingabumbene likhiqiza abantu abangabumbene. Emazweni aseNhlonhlweni iBalkan, abantu baseSerbia naseCroatia “abangamaKristu” banomuzwa wokuthi uKristu unabo empini yabo ‘yokulunga.’ Abaningi bafaka iziphambano empini; othile, kubikwa ukuthi, “ngaso sonke isikhathi wayefaka isiphambano sakhe emlonyeni lapho impi ishuba kakhulu.”
“Kungabikho Ukwahlukana Phakathi Kwenu”
Yiqiniso, ezinye izindaba iBhayibheli lizishiyela kunembeza, kodwa lokhu akufanele kubangele ukwehlukana. Umphostoli uPawulu usho ngokucacile: “Nikhulume [futhi nenze] ngokuvumelana, nokuba, kungabi khona ukuhlukana phakathi kwenu.”—1 Korinte 1:10, NW; Efesu 4:15, 16.
Ukuhlola ngokwethembeka “ubuKristu” eminyakeni engaba izinkulungwane ezimbili ngemva kokuba umphostoli uPawulu ebhale lawomazwi kuphakamisa imibuzo ethile engathi sína ngempela. Kungani “amaKristu” ehlukene kangaka? Ingabe isonto elihlukene kanjalo lingasinda? Liyoke libe khona yini eLobukholwa elibumbene? Isihloko esilandelayo sizocabangela lemibuzo.
[Isithombe ekhasini 3]
Ukumasha kwabapristi abamelene nokukhishwa kwezisu
[Umthombo]
Cover and above: Eleftherios/ Sipa Press