Izindaba Ezinhle Ezivela EMalawi!
NGO-NOVEMBER 15, 1993, i-Watch Tower Bible and Tract Society of Pennsylvania yabhaliswa ngokomthetho eningizimu-mpumalanga yezwe lase-Afrika eMalawi. Lokhu kuzonikeza oFakazi BakaJehova ukuqashelwa okungokomthetho nenkululeko yokushumayela amaqiniso eBhayibheli kubantu baseMalawi.
Emuva ngo-1948, kwamiswa ihhovisi legatsha le-Watch Tower Society eMalawi ukuze liqondise umsebenzi woFakazi BakaJehova kulelozwe. Ngo-January 8, 1957, i-Watch Tower Society yabhaliswa lapho ngokokuqala ngqá. Iminyaka eminingana oFakazi BakaJehova bajabulela ukwanda okusheshayo. Kodwa ngo-1964 kwagqashuka ukushushiswa kobudlova. Ngani?
Belalela uNkulunkulu, oFakazi BakaJehova balondoloza ukungathathi-hlangothi okuqinile kwezombangazwe. (Johane 17:16) Ngokusobala, abanye abazange bakuqonde kahle lokhu kuma okungokomBhalo futhi babamelela kabi oFakazi njengenkolo evukelayo nanjengabantu abephula umthetho. Ngakho, abanye baba nomuzwa wokuzithethelela ngokushushisa kwabo lamaKristu athanda ukuthula. OFakazi abaningi baxoshwa emisebenzini yabo, bashaywa bahlaziswa nangezinye izindlela. Abanye bahlukaniswa ngenkani nabantwana babo.
Ngo-1972 oFakazi abangaphezu kuka-30 000 nabathile ababetadisha nabo iBhayibheli kwadingeka ukuba balishiye lelizwe besaba ukulahlekelwa ukuphila kwabo. Izinkulungwane zahlala emakamu ababaleki eMozambique engumakhelwane. Kodwa ngo-1975 lababaleki bathunyelwa emuva eMalawi, lapho kwadingeka ukuba babhekane khona noshushiso oluqhubekayo. Abaningi bafakwa emakamu okuhlushwa. Phakathi nalesisiyaluyalu, i-Watch Tower Society yakhishwa ohlwini olungokomthetho lwezinhlangano ezisemthethweni eMalawi. Kusukela ngalesosikhathi oFakazi BakaJehova nezinhlangano zabo ezingokomthetho bekuvinjelwe kulelozwe.
Naphezu kwazo zonke lezenzakalo, oFakazi abazange baphindisele. Abazange bakhe amaqembu ezixuku noma babhikishe ngokumelene nohulumeni. Kunalokho, ngomthandazo balondoloza isibopho sabo sobuKristu sokubonisa inhlonipho efanele ‘ngamandla ombuso’ kahulumeni. (Roma 13:1-7; 1 Thimothewu 2:1, 2) Futhi oFakazi baye basekela izindinganiso eziphakeme zokuphila kobuKristu ezivezwe eBhayibhelini, futhi ngokwenza kwabo kanjalo, baye babeka isibonelo esiyingqayizivele sokuziphatha.
Ngenkululeko yabo abasanda kuyithola, oFakazi BakaJehova eMalawi bazimisele ukuqhubeka beshumayela amaqiniso eBhayibheli ngokuphuthumayo, “ngenkathi evumayo.”—2 Thimothewu 4:2, NW.
[Isithombe ekhasini 31]
UM. G. Henschel nomkhaya waseBethel waseMalawi ngawo-1960