Ungakubonisa Yini Ukubekezela?

UJEHOVA watshela u-Abrama: “Phuma ezweni lakini . . . uye ezweni engiyakukukhombisa lona. Ngiyakukwenza isizwe esikhulu, ngikubusise, ngenze igama lakho libe-likhulu.” (Genesise 12:1, 2) Ngalesosikhathi u-Abrama wayeneminyaka engu-75 ubudala. Walalela futhi ngokuhlakanipha wabonisa ukubekezela kukho konke ukuphila kwakhe, elindela uJehova.

Ekugcineni, uNkulunkulu wenza lesisithembiso ku-Abrahama (u-Abrama) owayebekezela: “Impela ngiyakukubusisa nokukubusisa‚ ngiyakukwandisa nokukwandisa.” Umphostoli uPawulu wanezela: “Kanjalo kwathi [u-Abrahama] esebekezele‚ wakuzuza okwathenjiswayo.”—Heberu 6:13-15.

Kuyini ukubekezela? Izichazamazwi zikuchaza ngokuthi ikhono “lokulindela okuthile ngokuthula” noma ukubonisa “ukuzibamba lapho ucasukile noma ungaphansi kokucindezeleka.” Ngakho ukubekezela kwakho kuyavivinywa lapho kudingeka ulindele othile noma okuthile, noma lapho ucasukile noma ungaphansi kokucindezeleka. Ezimweni ezinjalo umuntu obekezelayo uhlala ezolile; umuntu ongabekezeli uba namawala futhi asheshe acasuke.

Izwe Lethu Lanamuhla Elingenakubekezela

Ikakhulukazi ezindaweni eziningi ezingamadolobha, kugcizelelwa ukushesha hhayi ukubekezela. Usuku ngalunye lwezigidi zabantu abahlala emadolobheni aminyene luqala lapho kukhala iwashi ekuseni. Lokho kuqalisa isikhathi sokubhuduzela—ukuya endaweni ethile, ukubona othile, ukufinyelela okuthile. Kuyamangalisa yini ukuthi abaningi bacindezelekile futhi abakwazi ukubekezela?

Uyacasuka yini lapho ubhekene nokushiyeka kwabanye? “Angikuthandi ukungagcinwa kwesikhathi,” kusho u-Albert. Abaningi bangavuma ukuthi ukulinda umuntu oshiywe isikhathi kuyacindezela, ikakhulukazi uma kunokuthile okufanele kwenziwe ngesikhathi esithile. Ngokuqondene neDuke of Newcastle, isazi sezombangazwe saseBrithani sekhulu le-18, kwathiwa: ‘Uba semuva ngengxenye yehora ekuseni, achithe usuku lonke ezama ukwenza izinto asilele kuzo kodwa akalokothi abe ngaphambi kwesikhathi.’ Ukuba bekungadingeka uthembele kumuntu onjalo usuku ngalunye, ubuyobekezela?

Lapho ushayela, uyashesha yini ukuthukuthela, kungavumi ukuba ulinde, noma ulingeke ukuba ugijime kakhulu? Ezimweni ezinjalo, ukungabekezeli ngokuvamile kudala inhlekelele. Phakathi no-1989, ezweni elaliyiNtshonalanga Jalimane, izingozi zasemigwaqweni emikhulu ezingaphezu kuka-400 000 zabangela ukulimala noma ukufa. Kulezizingozi, eyodwa kwezintathu yayibangelwe ukushayela ngesivinini esikhulu kakhulu noma ukusondela kakhulu emotweni engaphambili. Ngakho-ke, okungenani ngezinga elithile, ukungabekezeli yikhona okwabangela ukulimala noma ukufa kwabantu abangaphezu kuka-137 000. Yeka indlela ukungabekezeli okulahlekisela ngayo!

“Ngikuthola kunzima ukubekezela lapho umuntu ephazamisa njalo,” kukhononda u-Ann, “noma lapho umuntu eqhosha kakhulu.” UKarl-Hermann uyavuma ukuthi ukubekezela kwakhe kuyaye kubekelwe inselele “abasha abangabahloniphi abantu abadala.”

Lezizimo kanye nezinye zingase zikwenze uhluleke ukubekezela. Ungakuhlakulela kanjani-ke ukubekezela okwengeziwe?

UJehova Angakunika Amandla Okubekezela

Abantu abaningi bacabanga ukuthi ukubekezela kubonisa ukuba manqikanqika noma ubuthakathaka. Nokho, kuJehova kuwuphawu lwamandla. Yena uqobo ‘uyabekezela‚ engathandi ukuba kubhubhe namunye‚ kodwa ukuba bonke beze ekuphendukeni.’ (2 Petru 3:9) Ngakho-ke, ukuze uthole amandla okuzibamba, yiba seduze noJehova uthembele kuye ngayo yonke inhliziyo yakho. Ukuqinisa ubuhlobo bakho noNkulunkulu yisona sinyathelo esibaluleke kakhulu sokuhlakulela isimo sokubekezela.

Ngaphezu kwalokho, kubalulekile ukwazi izinjongo zikaJehova ngomhlaba nangesintu. U-Abrahama “wayebheké umuzi onezisekelo [uMbuso kaNkulunkulu]‚ omakhi nomenzi wawo nguNkulunkulu.” (Heberu 11:10) Ngokufanayo, kuyoba yinzuzo ukuhlale unombono ocacile ngezithembiso zaphezulu futhi waneliswe ukulindela uJehova. Khona-ke uyoqaphela ukuthi ukubekezela, njengoba kungakubonisi ukuba manqikanqika, eqinisweni kuletha abantu ekukhulekeleni kweqiniso. Ngakho, ‘bheka ukubekezela kweNkosi yethu njengokusindiswa.’—2 Petru 3:15.

Kuthiwani uma izimo zakho siqu zivivinya ukubekezela kwakho cishe ngendlela engabekezeleleki? Ingabe abantu abangakholwa bakucindezela ngendlela ecasulayo? Ingabe usugule isikhathi esibonakala siside ngokungenamkhawulo? Uma kunjalo, lalela lokho umfundi uJakobe akubhala. Ngemva kokukhuluma ngesibonelo esabekwa abaprofethi ngokubonisa ukubekezela, wembula imfihlo yokuhlala unokuthula ngaphansi kokucindezeleka okukhulu. UJakobe wathi: “Kukhona ohluphekayo phakathi kwenu na? Makakhuleke.”—Jakobe 5:10, 13.

Ngobuqotho cela uNkulunkulu ngomthandazo ukuba akunike amandla okubekezela futhi akusize ulawule umoya wakho ngaphansi kokulingwa. Phendukela kuJehova ngokuphindaphindiwe, futhi uyokusiza ukwazi ukubona izimo noma imikhuba yabanye ekusongela ngokukhethekile ukuthula kwakho. Ukuthandaza kusengaphambili ngezimo ezingase zikuvivinye kungakusiza ukuba uhlale unokuthula.

Umbono Ofanele Ngawe Nangabanye

Ukuze ulondoloze isimo sengqondo esinokuthula, kumelwe uzibheke wena kanye nabanye ngendlela efanele. Lokhu kungenzeka ngesifundo seBhayibheli, ngoba libonisa ukuthi wonke umuntu unokungapheleli akuzuze ngefa futhi ngenxa yalokho ubuthakathaka. Ngaphezu kwalokho, ulwazi lweBhayibheli luyokusiza ukuba ukhule othandweni. Lemfanelo ibalulekile ukuze ukwazi ukubekezelela abanye.—Johane 13:34, 35; Roma 5:12; Filipi 1:9.

Uthando nokuzimisela ukuthethelela kungakwenza ube nokuthula lapho ucunuliwe. Uma othile enemikhuba ekucasulayo, uthando luyokukhumbuza ukuthi yimikhuba yakhe ongayithandi, hhayi lowomuntu. Cabanga ukuthi ubuthakathaka bakho kumelwe ukuba bukuvivinya kangakanani ukubekezela kukaNkulunkulu nokuthi kumelwe ukuba kubacasula kanjani abanye.

Umbono ofanele ngawe siqu uyokusiza futhi ukuba ulinde ngokubekezela. Ngokwesibonelo, ingabe ubulokhu ulwela ukufanelekela amalungelo enkonzweni kaJehova, kodwa wadumazeka? Uyakuzwa yini ukubekezela kwakho kuphela kancane kancane? Uma kunjalo, khona-ke khumbula ukuthi ingxenye enkulu yokungabekezeli isekelwe ekuqhosheni. “Onomoya obekezelayo ungcono kunoziphakamisayo,” kusho uSolomoni. (UmShumayeli 7:8) Yebo, ukuqhosha kuyisithiyo esikhulu ekuhlakuleleni ukubekezela. Akulona yini iqiniso ukuthi umuntu othobekile ukuthola kulula ukulinda ngokuthula? Ngakho-ke, hlakulela ukuthobeka, uyokwazi ukwamukela ukulibala unokuthula kwengqondo.—IzAga 15:33.

Ukubekezela Kunemivuzo Ecebile

U-Abrahama waziwa kakhulu ngokholo lwakhe. (Roma 4:11) Nokho, ukubekezela kwenza ukholo lwakhe lwaqina. Waba yini umvuzo wokulindela kwakhe uJehova?

U-Abrahama wethenjwa uJehova ngokwengeziwe. Ngenxa yalokho igama lika-Abrahama laba likhulu nezizukulwane zakhe zaba isizwe esinamandla. Zonke izizwe zomhlaba zingazibusisa ngembewu yakhe. U-Abrahama waba umkhulumeli kaNkulunkulu waze wafanekisela nokufanekisela uMdali. Ukhona yini omunye umvuzo omkhulu kunalowo owawungafanela ukholo nokubekezela kuka-Abrahama?

“INkosi inesihe esikhulu nesihawu” kumaKristu akhuthazelela ukulingwa ngokubekezela. (Jakobe 5:10, 11) Abantu abanjalo banonembeza ohlanzekile ngoba benza intando yakhe. Khona-ke, esimweni okuso uma ulindela uJehova futhi ukhuthazelela ukulingwa ngokubekezela, ukuzibamba kwakho kuyokwenza uJehova akwamukele futhi akubusise.

Ukubekezela kusiza abantu bakaNkulunkulu kuzo zonke izici zokuphila. Izinceku zikaJehova ezimbili, uChristian no-Agnes, zakubona lokhu lapho zinquma ukuthembisana umshado. Zakuhlehlisa ukuthembisana kwazo zihlonipha abazali bakaChristian, ababedinga isikhathi sokwazi u-Agnes kangcono. Lesisenzo saba namuphi umphumela?

“Sabona kamuva ukuthi ukubekezela kwethu kwakubaluleke kangakanani kubazali bami,” kuchaza uChristian. “Ukulinda kwethu ngokubekezela akuzange kubonakalise ubuhlobo phakathi kwami nomkami. Kodwa kwaba isitini sokuqala sokwakha ubuhlobo bethu nabazali bami.” Yebo, akuve kunomvuzo ukubekezela.

Ukubekezela kubuye kuthuthukise nokuthula. Amalungu omkhaya nabangane bayobonga ngokuthi awusizakali ngakho konke ukushiyeka kwabo. Ukuthula kwakho nokuba ngoqondayo lapho abanye benza amaphutha kuyovimbela ukuba kube nezimo ezibangela ukudumazeka. Isaga sesiShayina sithi: “Ukubekezela ngomzuzu wentukuthelo kuyokusiza ukuba ungabhekani nezinsuku eziyikhulu zosizi.”

Ukubekezela kuthuthukisa ubuntu bakho, eqinisweni kukusiza ukuba ugcine ezinye izimfanelo zakho ezinhle zisesimweni esihle. Kwenza ukholo lwakho luqine, ukuthula kwakho kube okuhlala njalo, nothando lwakho lube olungenakunyakaziswa. Ukuba ngobekezelayo kuyokusiza ukuba ujabule lapho ubonisa umusa, ubuhle, nobumnene. Ukubonisa ukubekezela kunikeza amandla adingekayo ukuze uhlakulele ukukhuthazela nokuzithiba.

Khona-ke, kulindele ngokubekezela ukugcwaliseka kwezithembiso zikaJehova ukuze uqiniseke ukuthi uyoba nekusasa elihle kakhulu. Njengo-Abrahama, ‘kwangathi ungadla ifa lezithembiso ngokholo nangokubekezela.’—Heberu 6:12.

[Isithombe ekhasini 23]

Ubuhlobo obuseduze noJehova buyokusiza ukuba ubonise ukubekezela, njengoba kwenza u-Abrahama