Isinyathelo Sokubuya

‘WAKHULUMA kubo ngemifanekiso.’ IBhayibheli liyethula kanjalo imifanekiso kaJesu emithathu ephawulekayo ephathelene nesihe—imvu eyodwa eyalahleka, uhlamvu lwesiliva olwalahleka, nendodana yolahleko.—Luka 15:3-32.

Izihloko ezimbili zeNqabayokulinda ka-April 15, 1991, zahlaziya leyomifanekiso futhi zasiza abafundi abaningi ukuba babone indlela isihe esingase siboniswe ngayo namuhla. Ukunakekela okuyinhloko kwabhekiswa kubelusi abangokomoya ekuthatheni isinyathelo kuqala sokuthintana nabantu abasuswa ekuhlanganyeleni kodwa abangasabela ekuhanjelweni komusa. Uye waba yini umphumela walezihloko nalenqubo entsha?

Ngokushesha ngemva kokukhululwa kwalomagazini, indoda ethile esifundazweni saseWashington, eU.S.A., yabhala: “Ubufakazi bomusa wothando omkhulu kaJehova bufike namuhla ngeposi. Ngihleli lapha ngezinyembezi emehlweni ami nenjabulo enhliziyweni yami ngenxa yamalungiselelo nokulungisa okulungiselelwa oPhezukonke. UNkulunkulu onobulungisa ngempela kuphela ongalungiselela usizo ngalabo abanjengezimvu abalahlekile. . . . Yebo, ngisusiwe ekuhlanganyeleni kodwa ngisendleleni yokubuyiselwa.” Ngo-October yabuyiselwa.

Kodwa kuthiwani ngokuhambela okwenziwa abadala ababili bebandla? Inkosikazi ethile engumKristu yabhala: “Angikwazi ukuchaza indlela engizizwa ngayo. Sekuyiminyaka engaba ngu-13 indoda yami isusiwe ekuhlanganyeleni. Abadala bayivakashela, njengoba kwakusikiselwe esihlokweni. Izolo kusihlwa ngokokuqala ngqá ngemva kweminyaka eminingi, ibe khona kowodwa wemihlangano. Manje izama ukulungisa ukuphila kwayo bese ibuya.”

Njengoba ababonisi abajikelezayo behambela amabandla ngamanye, bayayibona imiphumela. Muva nje omunye umbonisi wesifunda wabhala:

“Lapho kukhishwa INqabayokulinda ka-April 15, 1991, abaningi bazibuza ukuthi kwakuyoba yini ukusabela ekuhambeleni kwabadala. Impendulo iye yaba sobala.

“Esifundeni sethu, amabandla amane okugcina engawavakashela abone ukubuya kwabantu abayisishiyagalolunye emaHholo oMbuso. Nakuba kungoyedwa kuphela osebuyiselwe, laba abanye abayisishiyagalombili bathuthuka kahle. Abadala namabandla bayajabula ukubona izithelo zokukhandleka kwabo nokuhlakanipha kokusebenzisa ukuqondisa kwaphezulu.

“Siyajabula ngalelungiselelo elihle, lesihe. Njengoba omunye udade obuyiselwe aphawula, ‘Bengingenaso isibindi sokuzibuyela ngokwami, njengoba ngangizizwa ngilahliwe phambi kukaJehova. Kodwa lapho abadala bengihambela, kwakuyisikhuthazo engangisidinga ukuze ngibuye.’ Intshiseko yakhe ilikhuthaze kakhulu ibandla.”

Ngisho noma abaningi abavakashelwayo bengasabeli, ngokuqinisekile kufezwa okuhle ngalesinyathelo sokuqala sesihe. Ngakho, kusukela ngoSeptember abadala ebandleni ngalinye bayohlaziya amagama alabo abasensimini abasusiwe ekuhlanganyeleni futhi bayohlela ukuhambela bonke abanomuzwa wokuthi bayosabela kulokhu kuboniswa kwesihe.