Ngeke Udumale

OMUNYE umbhangqwana ePhilippines wathatha izinsuku ezimbili ukuba ufike lapho. Wahamba ibanga elingamakhilomitha angu-70, uphethe abantwana abancane ababili unqamula emahlathini agcwele izibungu ezilumayo futhi uwela imifula edla izindwani ngenxa yezikhukhula zemvula. Kodwa wawungazimisele ukulahlekelwa yiwo.

Abesifazane ababili eZaire bahamba ibanga elingama khilomitha angaphezu kuka-500, bechitha izinsuku ezingu-14 besendleleni, ukuze babe lapho. Futhi eZaire, enye indoda eneminyaka engu-70 ubudala yafika lapho ngokuhamba ngebhayisekili layo ibanga elingamakhilomitha angu-260. Ayizange idunyazwe ibanga noma ukungaphatheki kahle. Into eyayibalulekile kwakuwukuba ingalahlekelwa yiwo.

Babeyaphi bonke labantu? Komunye wemibuthano emikhulu yoFakazi BakaJehova ohlelwe emazweni abo. Futhi kungakhathaliseki ukuthi uhambo lwalunzima kanjani, bonke baba nomuzwa wokuthi imizamo yabo yayifanele.

Ingabe usuwenzile amalungiselelo okuba seMhlanganweni Wesigodi “Wabaphathi Bokukhanya” ka-1992? Ngokunokwenzeka, ngeke kudingeke wenze ukuzidela okwenziwa yilemiphefumulo ethembekile ukuze ibe khona. Kodwa ngisho noma kungakubangela ukuphazamiseka okuthile, sikunxusa ukuba ungalahlekelwa yiwo.

Kuye kwalungiselelwa isimiso esihle ngokukhethekile nesiwusizo kakhulu. Uma ukujabulela ukuba nobudlelwane bobuKristu futhi unesithakazelo sokufunda indlela yokuthola ukuthula kwangempela, lokho ikusasa elikuphethe, noma indlela engcono yokwenza intando kaNkulunkulu, singakuthembisa ukuthi ngeke udumale. Noma imuphi uFakazi endaweni yakini uyokutshela ngendawo nesikhathi okuyoqhutshwa ngaso umhlangano oseduze nawe.