AmaNdiya AngamaGoajiro Asabela Kahle
NGAPHANSI komthunzi wesihlala esikhulu kwakuhlezi intokazi esikhulile eyayibonakala ingowesizwe esihluke ngokuphelele, igqoke ingubo emnyama eshaya emaqakaleni. Yayikhuluma nolimi olungavamile ezindlebeni zethu. “Niphinde nibuye,” isho ngentshiseko. Ikhomba abanye abantu abangu-50 bohlanga lwayo ababehlezi beyizungezile, yanezela: “Sonke sifuna niphinde nibuye. Nize masonto onke!”
Babengobani labantu? Kungani babekhathazeke kangaka ngokuba sibuye, nakuba babengakaze basibone ngaphambili? Ake sikuxoxele ngosuku esaluchitha siphakathi kwamaNdiya angamaGoajiro ahlala eNhlonhlweni YaseLa Guajira enyakatho-mpumalanga yeColombia futhi eduze nenyakatho-ntshonalanga yeVenezuela.
Esakubona Kuqala
Njengoba sasisuka enhloko-dolobha yaseVenezuela, iCaracas, saqala sema eMaracaibo. Njengoba sasingena kulelidolobha, sabona abesifazane abasebasha abathathu behamba eceleni kwendlela begqoke izingubo ezinde ezimibalabala. Babengafani nabantu abavamile baseVenezuela—benemihlathi ebanzi, isikhumba esinsundu, izinwele ezilulekile ezimnyama. Siphawula indlela ababehamba ngayo ngokungajahi nangesizotha, sahlabeka umxhwele ngalokho esakubona kuqala kulamaNdiya angamaGoajiro.
Usuku lohambo lwethu oluya eNhlonhlweni YaseLa Guajira lwasa lubalele futhi lucwathile. Ngaphambi kokuba ilanga lasekuseni lishise kakhulu, singabantu abangu-50 sagibela ibhasi, sijabulile ngokuba nengxenye emkhankasweni okhethekile wezwe lonke wokuyisa isigijimi seBhayibheli ezindaweni ezikude lapha eVenezuela. Sasiphokophele edolobheni laseParaguachón, elisemngceleni weColombia.
Njengoba sishiya idolobha laseMaracaibo ngemuva, sadlula emadolobhaneni amaningi amakhulu namancane, ngalinye linemakethe namatafulana okuthengisela izimbadada ezalukiwe, kanye nezingubo ezinde, ezimibalabala ezibizwa ngokuthi amamanta. Idolobhana ngalinye lalinendawo yomphakathi enenxanxathela yezitolo ecocekile nesenkabeni yaleyondawo kanye nesonto elinemibala engagqamile kodwa ekhanyayo, okwakwenza yonke indawo ibonakale iyinhle. Bonke abantu babefana namaNdiya. Nakuba babengafani nathi, kwakudingeka sizikhumbuze ukuthi laba babengabanye babantu baseVenezuela bendabuko.
Ukufuna Izindlu
Ekugcineni safika lapho sasiya khona. Ibhasi lethu lema eceleni komgwaqo futhi lapaka ngasodongeni oluphansi ethunzini lesihlahla esendlalekile impela. Ngakolunye uhlangothi lwaloludonga kwakunesikole sendawo sakulelidolobhana—sasivaliwe ngoba kwakuyiSonto.
Sihlukana siba amaqembu amabili, sahamba ngezindlela ezahlukene sifuna izindlu. Sasizomema wonke umuntu ukuba eze enkulumweni yeBhayibheli eyayizonikezwa ngolimi lwesiGoajiro ngehora lesithathu nga-lolosuku ntambama egcekeni lesikole. UEvelinda, oyiNdiya lomdabu elingumGoajiro, wayehambisana nathi. Sasethemba ukuthi lokhu kwakuyosenza samukeleke kangconywana, ngoba nakuba sasikwazi ukukhuluma isiPanishi, sasingalwazi nakancane ulimi lwesiGoajiro.
Lapho sesiphumile kulelidolobhana, kwakudingeka sihambe ibanga elide sisuka kwezinye izindlu siya kwezinye. Njengoba sasihamba sehla emgwaqweni omude, oqondile owene kakhulu nhlangothi zombili, umfanyana ocishe abe neminyaka eyishumi wayehamba eceleni kwethu esigqolozele ngamehlo agcwele ilukuluku lokwazi. UEvelinda wamomotheka embhekile wayesemchazela ngesiGoajiro ngenjongo yokuhambela kwethu kulendawo. Igama lakhe kwakunguOmar, futhi wahamba egxumagxuma ngemva kokuba simmemile ukuba eze enkulumweni.
Siphuma emgwaqweni, sahamba endleleni ewubhuqu eyayisemanzi ngenxa yezimvula ezazisanda kuna. Sathola ukuthi lezi kwakuyizindlela ezisetshenziswa izigebengu ezazihamba phakathi kweColombia neVenezuela. Umoya wawugcwele iphunga elimnandi lohlaza olusakhula. Nakuba isifudumezi sasicindezela kancane, asizange siyidambise intshiseko yethu. Nokho, konke ukungaphatheki kahle kwalibaleka njengoba lendlela eyayidlula phakathi kohlaza oluminyene, lwasezindaweni ezishisayo ngokungazelele ivuleka kuvela indawo enkulu eyibala—umuzi wamaGoajiro uqobo lwawo.
Ukubhekana NamaGoajiro
Inqwaba yezimbuzi, ezinamabala amahle amhlophe, amnyama, nampofu, yayilele ethunzini, ihlafuna ngokwaneliseka. Enetheni elingumbhede elalelulwe phakathi nemithi emibili, kwakulele owesifazane owayefunza ingane yakhe. Kwakunabantwanyana abaningana ababedlala eduze. Lona wesifazane wayengaphandle nje kothango olwenziwe ngezinkuni nocingo oluzungeze indlu eyakhiwe ngodaka nangezinduku efulelwe ngotshani. Kwakukhona nezakhiwo ezimbalwa ezivulekile kulendawo. Esinye ngokusobala kwakuyikhishi, lapho kwakuvutha khona umlilo wezinkuni phansi phakathi kwezimbiza ezinkulu zensimbi. Eduze nje kwakulengiswe izikhumba zezimbuzi ukuze zome.
Lapho isibona siza, indoda ethile eyayimi ngasesangweni yagijima yayolanda futhi yabeka izigqiki ezimbili ukuze sihlale kuzo eduze nowesifazane olele enetheni elingumbhede. UEvelinda wabingelela lona wesilisa nowesifazane ngolimi lwakubo wayesechaza ithemba elingokomBhalo ngekusasa esebenzisa incwajana enemifanekiso ethi Jabulela Ukuphila Emhlabeni Phakade! Izimo zokuthula kulendawo zasitshela ukuthi izinkinga zezwe lonke noma ukwanda kobugebengu basezindaweni eziphakathi edolobheni kwakungeke kube izihloko ezifanelekayo lapha. Omunye uFakazi kuleliqembu wayechazile ukuthi njengoba amaNdiya angamaGoajiro engakhululekile ngokwemvelo ekuxoxeni, kubalulekile ukubonisa ubungane nesithakazelo esiqotho somuntu siqu zisuka nje. “Ngokuvamile sibuza ngempilo yomkhaya, isivuno, ukuthi like lana yini muva nje, nokunye,” esho. “Lokhu kuvula indlela yokuba siwatshele ngoMbuso kaNkulunkulu futhi siwabonise ukuthi uJehova ngokushesha uzoqeda konke ukuhlupheka kanye noSathane uDeveli, lowo amesabisa okwenyoka.”
Njengoba uEvelinda ekhuluma, izilaleli zakhe zazenanela ngokuvuma, futhi ngokushesha kweza omunye umuntu wesifazane kanye nezingane eziningi. Ngaphambili sasizwile ukuthi umthetho wamaGoajiro uyayivumela indoda ukuba ibe nabafazi abangaphezu koyedwa. Ingabe kunjalo nalapha? Lokhu kwasikhumbuza ngoYenny, intombazana enhle eneminyaka engu-21 ubudala engumGoajiro ehlala eMaracaibo. Indoda ethile engumGoajiro yathi izokhokha ilobolo eliningi ngayo. Kodwa abazali bayo, abangebona oFakazi BakaJehova, babehlukene phakathi. Nakuba unina ayevumelana nalomshado, uyise kaYenny wenqaba. Lesisesheli kakade sasishade nodadewabo kaYenny!
Lapho uEvelinda eqeda intshumayelo yakhe, lendoda yathatha incwajana. Owesifazane owayemi ngemva kwayo naye wayicela, futhi sakujabulela ukuba sikwazi ukumnika. Ngalesosikhathi abanye abangane bethu base bedlulile. Ngakho samemela lomkhaya enkulumweni yantambama sase siyahamba, singafuni ukulahleka kulendawo yasemaphandleni esingayijwayele.
Omunye uFakazi kuleliqembu walandisa ngalokho okwakumehlele. Indoda ethile eyayilele enetheni elingumbhede yayilalele ngokucophelela ngenkathi umkayo eyolanda iziphuzo—izingilazi ezimbili zechicha, eyayenziwe ngombila ogayiwe. Ngomoya omuhle, lomfowethu wasamukela wayesesiphuza. Kamuva, uMagaly owayehamba naye ongumGoajiro, wachaza indlela lesiphuzo esenziwa ngayo. Ngokuvamile, umbila wawugaywa ngamazinyo! UMagaly waqhuma insini njengoba ebona loFakazi eshintsha ebusweni.
Elinye inenekazi eliyiNdiya, ngokusobala lihlatshwe umxhwele umzamo wabafowethu wokufinyelela ikhaya lalo ngesigijimi seBhayibheli, lehla enethini lalo elingumbhede. Ligqoka iyembe, labayisa ngokwalo endlini eyayifihlekile eyayinganakiwe.
Lapho sidlula kwenye indawo eyibala lapho abangane bethu ababexoxa khona nabantu abadala bomkhaya othile, sabona iqembu lezingane ezincane, ezingagqokile ezinezisu eziqumbile limi lithulile ngaphansi kwesihlahla. Sezwa ukuthi lesimo sasibangelwa ukungondleki kahle kanye nezilwanyane ezisemzimbeni. Abaningi balabantu abanawo amanzi agelezayo nogesi. Yebo, lokhu kusho ukungabi nazo iziqandisi, iziphephetha-moya, noma izibani.
Inani Elingalindelekile
Isikhathi sasekuseni sasheshe sadlula. Njengoba sasiphindela ebhasini siyodla ukudla kwasemini, sasizibuza ukuthi bangaki kulabo ababemenyiwe ababezoza enkulumweni yeBhayibheli yantambama.
Ngo-2:45 p.m., sacabanga ukuthi yithina kuphela esasize ngebhasi esasizoba izilaleli zomzalwane ongumGoajiro, owayelungiselele inkulumo yemizuzu engu-45 ngolimi lwendawo. Kodwa akubanga njalo! Umkhaya wokuqala omncane weza unamahloni wangena egcekeni lesikole. Kumelwe ukuba wamangala njengoba wonke umuntu ayewenza uzizwe wamukelekile. Emizuzwini embalwa eyalandela, kwafika abaningi abengeziwe, abanye ngokusobala behambe indlela ende. Umkhaya owawuhlala kuleyandawo eyibala owawunezimbuzi eziningi nawo wawukhona! Yeka indlela intokazi eyayilele enetheni elingumbhede eyayibonakala yehluke ngayo njengoba isigqoke imanta yayo enhle, emnyama! Ngisho no-Omar omncane, esakhuluma naye endleleni, wayezile, ngokusobala eyedwa. Njengoba abanye befika, isitebhisi esisodwa eside, sikakhonkolo esasisegcekeni lesikolo esaba ibhentshi sagcwala abantu. Ebona lokho, umshayeli wethu webhasi onobungane wakhipha izihlalo ebhasini ukuze abantu bahlale kuzo phakathi nenkulumo.
AmaNdiya angamaGoajiro angu-55 esewonke ahlala futhi alalela njengoba uEduardo ebeka inkulumo yeBhayibheli. Nokho, awazange ahlale athule ngokuphelele. Uma evumelana nephuzu lesikhulumi, ayehumazela noma avume ngamazwi. Lapho ekhuluma ngokuphela kobubi okuzayo, intokazi esikhulile okukhulunywe ngayo ekuqaleni yangenela. “Yebo buningi ububi lapha,” isho, ikhuluma kakhulu ukuze bonke bezwe. “Eqinisweni, kunabantu ababi abahlezi khona lapha. Ngakho ngithemba ukuthi bayezwa!” UMfoweth’ uEduardo ngobuhlakani wazwakalisa ukwazisa ngalokho okushiwoyo wayeseqhubeka nenkulumo yakhe.
Ngemva kwenkulumo, omunye eqenjini lethu wathatha isithombe. AmaGoajiro akuthanda lokho ayesecela ukuthatha isithombe esilandelayo ephethe izincwajana ezithi Jabulela. Khona-ke kancane kancane abanye baqala ukuhamba, kodwa ingxenye yabo yasala yasibuka sigibela ibhasi. Bathi masithembise ukuthi sizobuya, base bema bevayiza laze layosithela ibhasi.
Njengoba sasihamba, saba nomuzwa wokuthi bekuyilungelo ukuyisa izindaba ezinhle zoMbuso kaNkulunkulu kulabantu. Abaningi babeqala ngqá ukuzizwa. OFakazi baseMaracaibo kakade base bekhuluma ngokuhambela kwabo okulandelayo. Ingabe lendaba yayizoba nomphumela?
Umphumela Oyimpumelelo
Abazalwane babuya emasontweni amabili kamuva. Kwahanjiswa inqwaba yezincwadi zeBhayibheli, kwenziwa izimpindelo kwabathakazelayo, futhi kwaqaliswa nezifundo zeBhayibheli zasekhaya. Ngaphezu kwalokho, amaNdiya angu-79 aba khona emhlanganweni wesibili wasobala owaqhutshelwa endaweni evulekile. Kulesosenzakalo abazalwane bachaza ukuthi babezobuya ngemva kwamasonto amathathu esikhundleni samabili ngenxa yokuthi kwakuzoba nomhlangano wesifunda. LamaNdiya amangala. “Singase sife ngaphambi kwalesosikhathi!” kusho omunye wawo. Abuza ukuthi uyini umhlangano wesifunda. Akuzwa kuthakazelisa kangangokuba nawo anquma ukuthi ayafuna ukuya kuwo! Kwenziwa amalungiselelo, futhi angu-34 awo akwazi ukuba khona emhlanganweni eMaracaibo, lapho abazalwane abakhuluma isiGoajiro bawasiza khona ukuba aqonde isimiso sesiPanishi.
Intando kaJehova iwukuba “abantu bonke . . . bafinyelele ekulazini iqiniso.” (1 Thimothewu 2:3, 4) Yeka injabulo okuyiyo ukubona ukusabela okuhle okunjalo phakathi kwalamaNdiya afuna iqiniso ahlala eNhlonhlweni YaseLa Guajira!
[Ibhokisi ekhasini 26]
Iqiniso LeBhayibheli Licebisa Ukuphila
UIris noMargarita, amantombazane amabili eve eshumini elinambili angamaGoajiro, bajabula lapho bebona incwajana ethi Jabulela Ukuphila Emhlabeni Phakade! Kodwa babenenkinga. Babengakwazi ukufunda. UFakazi owayebahambele wathi angabasiza ngokusebenzisa incwajana ethi Funda Ukuzifundela Nokubhala. Ngokushesha, lamantombazane ajabula kakhulu ngokukwazi ukuzibhalela nokuliphimisa kahle igama elithi Jehova.
Njengoba ayethuthuka, amangazwa ithemba elimangalisayo elinikezwa eBhayibhelini. Ashukunyiswa ikakhulukazi yisithembiso sokuthi sonke isintu siyojabulela inkululeko. “Kulendawo ukuphila kudabukisa kakhulu ngathi thina esineminyaka eyeve eshumini elinambili,” echaza. “Ngokuvamile sishadiswa sisebancane kakhulu, futhi ukudlwengulwa kuyingozi ehlala ikhona.”
Okuvelele koIris noMargarita kwaba ukuba khona kwabo emhlanganweni wesifunda eMaracaibo. Ubuso babo babubonisa injabulo ababeyizwa ezinhliziyweni zabo, ikakhulukazi lapho kuculwa izingoma. Njalo babelindela ngokulangazela emnyango lapho uFakazi efika ezobaqhubela isifundo seBhayibheli, futhi abakaze baphuthe enkulumweni yeningi eba sedolobhaneni lakubo. Lamantombazanyana anomuzwa wokuthi ukuphila kwawo ngempela kuye kwacetshiswa ulwazi ngoJehova uNkulunkulu nangenjongo yakhe.