“Umbuso KaNkulunkulu Ususondele”
NJENGOBA uMesiya ayezoba inzalo ka-Abrahama, uIsaka, noJakobe, ilungu lesizwe sakwaJuda, ‘neNdodana kaDavide,’ kwakumelwe azalwe njengomuntu; kwakumelwe abe ‘indodana yomuntu,’ njengoba isiprofetho sikaDaniyeli sasishilo. “Lapho sekufikile ukuphelela kwesikhathi,” uJehova uNkulunkulu wathumela iNdodana yakhe, eyazalwa ngowesifazane futhi yahlangabezana nazo zonke izimfuneko ezingokomthetho ukuze izuze ngefa “isihlalo sobukhosi sikayise uDavide.” (Galathiya 4:4; Luka 1:26-33) Kokubili umlando weBhayibheli nobufakazi obungokwezwe kwembula ukuthi umuzwa ovamile wokulindela ukuthi ukuza kukaMesiya kwakusondela wawandile phakathi kwamaJuda. (Luka 2:36-38) Nokho, ngokuyinhloko kwabaningi isithakazelo sasisekutholeni inkululeko ejokeni elisindayo lokubusa kwamaRoma.
UJohane uMbhapathizi watshela abantu ngokungagunci ukuthi babebhekene nesikhathi sokwahlulelwa uNkulunkulu, ukuthi ‘umbuso wezulu wawususondele,’ ekwenza kuphuthume ukuphenduka kwabo ngokushiya inkambo yokungawulaleli umthetho kaNkulunkulu. Lokhu futhi kwagcizelela indinganiso kaJehova yokuba nezikhonzi ezizithandelayo kuphela, abantu abaqaphela futhi bazise ukulunga kwezindlela zakhe nemithetho.—Mathewu 3:1, 2, 7-12.
UMesiya wafika lapho uJesu eziletha kuJohane ngenjongo yokubhapathizwa futhi wayesegcotshwa ngomoya ongcwele kaNkulunkulu. (Mathewu 3:13-17) Ngaleyondlela waba iNkosi Emisiwe, Lowo oqashelwa iNkantolo kaJehova njengonelungelo elingokomthetho lokuba sesihlalweni sobukhosi sikaDavide, ilungelo elalikade lingasebenzi phakathi neminyaka engamakhulu ayisithupha ngaphambili. Kodwa ngaphezu kwalokho uJehova waletha leNdodana ayamukelayo esivumelwaneni soMbuso wasezulwini, lowo uJesu ayezoba iNkosi noMpristi kuwo, njengoba nje noMelkisedeki waseSalema lasendulo ayenjalo. (IHubo 110:1-4; Luka 22:29; Heberu 5:4-6; 7:1-3; 8:1) ‘Njengembewu ka-Abrahama’ ethenjisiwe, leNkosi enguMpristi yasezulwini yayiyoba iNxusa Eliyinhloko likaNkulunkulu ekubusiseni abantu bazo zonke izizwe.—Genesise 22:15-18, qhathanisa neNW; Galathiya 3:14; IzEnzo 3:15.
“Umbuso KaNkulunkulu Uphakathi Kini”
Ethembela emandleni kaJehova okumvikela nokumnika impumelelo, uJesu waqalisa inkonzo yakhe yasobala, ememezela kubantu bakaJehova besivumelwano ukuthi “isikhathi sigcwalisekile, umbuso kaNkulunkulu ususondele.” (Marku 1:14, 15) Ekutholeni ukuthi umbuso kaNkulunkulu ‘wawusondele’ ngamuphi umqondo, amazwi akhe kubaFarisi abathile angase aphawulwe, athi, “umbuso kaNkulunkulu uphakathi kini.” (Luka 17:21) Iphawula ngalelivesi, i-Interpreter’s Dictionary of the Bible ithi: “Umqondo wokuthi umbuso kaNkulunkulu uyisimo sengqondo sangaphakathi, noma sensindiso yomuntu siqu, uphambene nomongo walelivesi, kanye nakho konke ukuvezwa kwalomqondo e[T]estamenteni [E]lisha.” (Ehlelwe uG. A. Buttrick, ngo-1962, uMqulu 2, ikhasi 883) Njengoba elithi “umbuso [ba·si·leiʹa]” lingabhekisela “esikhundleni sasebukhosini,” kusobala ukuthi uJesu wayesho ukuthi yena, njengommeleli kaNkulunkulu wasebukhosini, lowo ogcotshwe uNkulunkulu ukuba abuse, wayephakathi kwabo. Akukhona nje ukuthi wayekhona ngalomqondo kuphela kodwa futhi wayenegunya lokwenza imisebenzi ebonakalisa amandla kaNkulunkulu obukhosi nokulungiselela amalungu athile izikhundla phakathi nokubusa koMbuso wakhe okuzayo. Kungalowomqondo uMbuso ‘wawusondele’ ngawo; kwakuyisikhathi sethuba elimangalisayo.
‘Umbuso WeNkosi Yethu NokaKristu Wayo’
Umphostoli uJohane, ebhala ngasekupheleni kwekhulu lokuqala leminyaka C.E., wabona kusengaphambili ngesambulo saphezulu isikhathi esizayo lapho uJehova uNkulunkulu, ngeNdodana yakhe, ayeyobonakalisa khona ukubusa kwaphezulu ngendlela entsha. Ngalesosikhathi kuyothiwa uJehova ‘uthabathe amandla akhe amakhulu wabusa.’ Lokhu kuyoba isikhathi sokuba amazwi amakhulu ezulwini athi: “Umbuso wezwe usungoweNkosi yethu nokaKristu wayo; iyakubusa kuze kube-phakade naphakade.”—IsAmbulo 11:15, 17.
‘YiNkosi yethu,’ iNkosi enguMbusi uJehova, esebenzisa igunya layo ‘embusweni wezwe,’ emisa indlela entsha yokusebenzisa ubukhulu bayo emhlabeni wethu. Inika iNdodana yayo, uJesu Kristu, isabelo sokuhlanganyela kulowoMbuso, ukuze ubizwe ngokuthi ‘umbuso weNkosi yethu nokaKristu wayo.’ Lokhu kwenzeka ngo-1914 lapho ‘izikhathi zabezizwe’ ziphela.—Luka 21:24.
Lapho enikezwa ukuba ahlanganyele ‘embusweni wezwe,’ uJesu Kristu wathatha izinyathelo ezidingekile ukuze asuse ukumelana nobukhosi bukaNkulunkulu. Lesinyathelo sokuqala senzeka endaweni yasezulwini; uSathane namademoni akhe behlulwa futhi baphonswa phansi endaweni yasemhlabeni. Lokhu kwaphumela esimemezelweni esithi: “Kalokhu insindiso namandla nobukhosi ngokukaNkulunkulu wethu, nombuso ngokaKristu wakhe.” (IsAmbulo 12:1-10) Phakathi nesikhathi esifushane esimsalele, uSathane uye waqhubeka nokugcwalisa isiprofetho sikaGenesise 3:15 ngokulwa ‘nabaseleyo’ [‘bembewu,’ NW] yowesifazane. (IsAmbulo 12:13-17) Ngesikhathi esifanayo ‘izenzo zikaJehova zokulunga’ ziyabonakaliswa futhi ukukhishwa kwezahlulelo zakhe kuhlupha abaphikisi bakhe. Lokhu kuyophumela ekubhujisweni kweBabiloni Elikhulu. (IsAmbulo 18:1-8) Ngemva kwalokho ‘umbuso weNkosi yethu nokaKristu wayo’ uyothumela amabutho awo asezulwini ngokumelene nababusi bayo yonke imibuso yasemhlabeni namabutho ayo ekulweni kwaseArmagedoni, ubaqede. (IsAmbulo 16:14-16; 19:11-21) Lokhu kuyimpendulo yokunxusa okuya kuNkulunkulu: “Mawufike umbuso wakho; wayenziwe intando yakho emhlabeni njengasezulwini.” (Mathewu 6:10) USathane ube esephonswa kwalasha futhi kuqalise inkathi yeminyaka eyinkulungwane lapho uKristu Jesu nabahlobo bakhe bebusa khona njengamakhosi nabapristi phezu kwezakhamuzi zomhlaba.—IsAmbulo 20:1, 6.