Imibuzo Evela Kubafundi

AmaHeberu 9:16 (“NW”) athi umenzi wesivumelwano kumelwe afe ukuze isivumelwano sisebenze. Kodwa uNkulunkulu wenza isivumelwano esisha, futhi akazange afe. Ngakho singaliqonda kanjani lelivesi?

KumaHeberu 9:15-17 (NW) siyafunda: “Yingakho [uKristu] engumlamuleli wesivumelwano esisha, ukuze kuthi, ngenxa yokuthi kufe othile ukuze bakhululwe ngesihlengo eziphambekweni ngaphansi kwesivumelwano sangaphambili, labo ababiziwe bakwazi ukwamukela isithembiso sefa eliphakade. Ngoba lapho kukhona isivumelwano, kudingeka ukuba kube nokufa komenzi wesivumelwano [ongumuntu]. Ngoba isivumelwano sisebenza ezisulwini ezifile, njengoba singasebenzi kunoma isiphi isikhathi esaphila umenzi wesivumelwano [ongumuntu].”a

UJehova nguyena onguMenzi wangempela walesivumelwano esisha. KuJeremiya 31:31-34, uNkulunkulu wabikezela ngokuqondile ukuthi yena ngokwakhe wayeyokwenza isivumelwano esisha nabantu bakhe. Umphostoli uPawulu uyawucaphuna lombhalo kumaHeberu 8:8-13, okubonisa ukuthi empeleni, uPawulu wayekuqaphela ukuthi uNkulunkulu ngokwakhe owasungula lesivumelwano saphezulu.

Nokho, kumaHeberu isahluko 9, uPawulu waqhubeka ekhulumela izindima ezihlukahlukene ezafezwa uJesu maqondana nesivumelwano esisha. UKristu weza njengoMpristi Omkhulu walesivumelwano. Ngakolunye uhlangothi, uJesu waba umhlatshelo walesivumelwano esisha; “igazi likaKristu” kuphela ‘elingahlanza onembeza bethu emisebenzini efileyo.’ UKristu futhi waba nguMlamuleli walesivumelwano, ngisho nanjengoba uMose ayengumlamuleli wesivumelwano soMthetho.—Heberu 9:11-15.

UPawulu waphawula ukuthi kwakudingeka kufe othile ukuze izivumelwano ezenziwa phakathi kukaNkulunkulu nabantu zisebenze. Isivumelwano soMthetho siyisibonelo salokhu. UMose wayengumlamuleli waso, owayezokwenza lesivumelwano phakathi kukaNkulunkulu noIsrayeli wenyama sisebenze. Ngaleyondlela uMose wafeza indima ebalulekile futhi wayengumuntu owasebenzelana namaIsrayeli lapho engena esivumelwaneni. Ngakho uMose wayengabhekwa njengomenzi wesivumelwano ongumuntu walesivumelwano soMthetho esasungulwa nguJehova. Kodwa ingabe kwadingeka uMose achithe igazi lakhe lokuphila ukuze isivumelwano soMthetho sisebenze? Cha. Kunalokho kwakwenziwa iminikelo yezilwane, igazi lazo lithatha indawo yegazi likaMose.—Heberu 9:18-22.

Kuthiwani ngesivumelwano esisha esiphakathi kukaJehova nesizwe sikaIsrayeli ongokomoya? UJesu Kristu wayenendima ekhazimulayo yokuba ngumxhumanisi, uMlamuleli phakathi kukaJehova noIsrayeli ongokomoya. Nakuba kunguJehova owasungula lesivumelwano, sasigxile kuJesu Kristu. Ngaphandle kokuba nguMlamuleli waso, uJesu wasebenzelana ngokuqondile ngokwenyama nalabo ababezoba ngabokuqala ukungena kulesivumelwano. (Luka 22:20, 28, 29) Ngaphezu kwalokho, wayekufanelekela ukulungiselela umhlatshelo owawudingeka ukuze lesosivumelwano sisebenze. Lomhlatshelo wawungewona owezilwane nje kodwa wawungowokuphila okuphelele kobuntu. Ngakho uPawulu wayengabhekisela kuKristu njengomenzi wesivumelwano esisha ongumuntu. Ngemva kokuba ‘uKristu engene ezulwini uqobo ukuba abonakale ebusweni bukaNkulunkulu ngenxa yethu,’ isivumelwano esisha saqala ukusebenza.—Heberu 9:12-14, 24.

Lapho ekhuluma ngoMose noJesu njengabenzi bezivumelwano abangabantu, uPawulu wayengasikiseli ukuthi ngamunye wabo wayesungule isivumelwano sakhe, eqinisweni okwakuyizivumelwano ezazenziwe nguNkulunkulu. Kunalokho, labobantu ababili babehileleke ngokujulile njengabalamuleli ekuphumeleliseni izivumelwano ezaziqondene nabo. Futhi esimweni ngasinye, kwakudingeka kufe okuthile—izilwane esikhundleni sikaMose, nokunikela kukaJesu ngegazi lokuphila kwakhe siqu ngenxa yalabo abasesivumelwaneni esisha.

[Umbhalo waphansi]