Igama LikaNkulunkulu Libuyiselwe

“KUYE kwathatha iminyaka engaba ngu-60 ukuba igama likaNkulunkulu, elithi ‘JHWH,’ ongeyena uNkulunkulu wamaJuda kuphela kodwa nowamaKristu, ukuba libuyiselwe lapho umdwebi wemifanekiso ayelibeke khona ekuqaleni.” Yileyondlela iphephandaba laseJalimane iSchwarzwälder Bote elikuphawula ngayo ukubuyiselwa kwegama likaNkulunkuu odongeni olungaphambili lwehholo ledolobha laseHorb, eningizimu yeJalimane. Kodwa kungani leligama lalisusiwe?

Leliphephandaba libika ukuthi ingaphandle lalelihholo ledolobha lalidwetshwe imifanekiso emihle yezithombe ezilandisa indaba ezazihlobisa udonga lwalo lwangaphambili. Okwakuhlanganisiwe kwakuyiTetragrammaton, izinhlamvu ezine zesiHeberu ezimelela igama likaNkulunkulu.

“Leligama, elivela izikhathi ezingaphezu kuka-6 000 eBhayibhelini,” kuqhubeka iphephandaba, “lithi ‘Jehova’ noma okuthile okufanayo ngesiJalimane. Ukubizwa kwalo okuqondile akuqinisekile ngoba isiHeberu esibhalwayo sasinongwaqa kuphela. Onkamisa babefakwa umfundi.”

Nokho, ngo-1934 abameleli beQembu LamaNazi banquma ukuthi iTetragrammaton “yayingavumelani nezimfundiso zangalesosikhathi” ngakho kwakumelwe icishwe ngopende. Ngokujabulisayo, leTetragrammaton manje isiye yabuyiselwa. Leliphephandaba liyaphawula: “Namuhla ingaphambili [lehholo ledolobha], elihlotshiswe ngemifanekiso elandisa indaba engokomlando, izimpawu zesikhundla, nemidwebo yabantu, liyindawo yokubukwa eHorb.”