‘Ukuhlwanyela Ngezinyembezi Nokuvuna Ngokuthokoza’

Njengoba ilandiswa uMiyo Idei

“Ngafa! Ngafa! Ngisizeni!” Ubaba wayezama kanzima ukumemeza. Izwi lakhe lalizwakala yonke indawo njengoba ngigijima ngiphuma endlini. Kwakuphakathi kwamabili, futhi ubaba wayehlaselwa inhliziyo. Ngagijima ngaya kumalume, owayehlala eduzane, kodwa lapho sibuya, ukushaya kwenhliziyo kaBaba kwakungasazwakali.

LOKHO kwenzeka ngoDecember 14, 1918. Lapho ngineminyaka engu-13, ngase ngiyintandane. Umama wayeshone lapho ngineminyaka eyisikhombisa ubudala. Ngilahlekelwe yibo bobabili abazali ngisemncane kangako, ngaqala ukuzibuza, ‘Kungani abantu befa? Kwenzekani ngemva kokufa?’

Ngemva kokuba sengiphothulile esikoleni sobuthisha, ngaba uthisha eTokyo futhi ngafundisa eShinagawa Elementary School. Kamuva, umngane wangethula ensizweni ethile, uMotohiro, engashada nayo lapho ngineminyaka engu-22. Eminyakeni engu-64 edlule, siye sahlanganyela okuhlangenwe nakho kokuphila kokubili okumnandi nokubuhlungu. Ngokushesha sathuthela eTaiwan, ngalesosikhathi eyayingaphansi kombuso waseJapane. Ngalesosikhathi ngangingacabangi ukuthi ngangiyothola okuyongijabulisa kulelozwe.

Ukufunda Iqiniso

Entwasahlobo ka-1932, lapho sihlala emngceleni weChiai eTaiwan emaphakathi, savakashelwa indoda ebizwa ngokuthi uSaburo Ochiai. Yaveza ukuthi iziprofetho zeBhayibheli zihlanganisa nesithembiso sokuvuka kwabafileyo. (Johane 5:28, 29) Yeka ithemba elimangalisayo! Ngangifuna kakhulu ukuphinde ngibone umama nobaba. Inamaphuzu anengqondo, izincazelo ezinengqondo, nobufakazi obuseBhayibhelini obuzwakalayo, amazwi ayo abonakala eneqiniso. Isikhathi sadlula masinyane njengoba sathatha usuku lonke sixoxa ngeBhayibheli. Ngokushesha laba incwadi engikhangayo.

Ngokushesha uMnu. Ochiai waya kwenye indawo, esishiya nezincwadi ezinjengezithi Creation, Harp of God, Government, Prophecy, Light, nethi Reconciliation, zonke ezakhishwa iWatch Tower Bible and Tract Society. Ngaba nesithakazelo esikhulu sokuzifunda, futhi njengoba ngangenza kanjalo, ngazizwa nginesifiso sokutshela abanye lokho engangikufunda. Uma uJesu aqala inkonzo yakhe emzini wakubo eNazaretha, kungani ngingenakuqala lapho ngihlala khona? Ngaya kumakhelwane oseduze. Akekho owayengifundise ukushumayela, ngakho ngaya endlini ngendlu neBhayibheli lami nezincwadi engangizifundile, ngishumayela ngokusemandleni ami. Abantu basabela kahle futhi babathatha omagazini. Ngacela iTodaisha, njengoba iWatch Tower Society yayibizwa kanjalo eJapane ngalesosikhathi, ukuba ingithumelele amakhophi angu-150 encwajana ethi The Kingdom, the Hope of the World, futhi ngawasakaza.

Ngolunye usuku umuntu owayethathe izincwadi wangitshela ukuthi kwafika amaphoyisa ngemva kokuhamba kwami futhi athatha izincwadi. Ngokushesha ngemva kwalokho, kwafika abaseshi abane endlini yami bathatha zonke izincwadi nomagazini. Bashiya iBhayibheli kuphela. Eminyakeni eyisihlanu, angizange ngihlangane noyedwa wabantu bakaJehova, kodwa umlilo weqiniso waqhubeka uvutha enhliziyweni yami.

Khona-ke kwaba uDecember 1937! Savakashelwa amacolporteurs (izikhonzi zesikhathi esigcwele) amabili aseJapane. Ngimangele, ngabuza: “Nizwe kanjani ngathi?” Athi: “Sinamagama enu lapha.” UJehova wayesikhumbulile! OFakazi ababili, uYoriichi Oe noYoshiuchi Kosaka, babeshove amakhilomitha angaba ngu-240 besuka eTaipei beya eChiai ngamabhayisekili amadala, belayishe izimpahla zabo ziqongile emihlane yabo. Njengoba babekhuluma nathi, ngazizwa njengomthenwa waseTiyopiya owathi: “Kwalani ukuba ngibhapathizwe na?” (IzEnzo 8:36) Ngobusuku abafika ngabo, sobabili nomyeni wami sabhapathizwa.

Ukunakekela Abazalwane Ababoshiwe

Ngo-1939 ukuboshwa koFakazi BakaJehova kwafika ngokuzumayo kulo lonke elaseJapane. Ngokushesha igagasi loshushiso lafinyelela eTaiwan. NgoApril bobabili uMzalwan’ uOe noKosaka baboshwa. Ezinyangeni ezimbili kamuva nathi saboshwa. Njengoba nganginguthisha, ngakhululwa ngosuku olulandelayo, kodwa umyeni wami wayesetilongweni izinyanga ezine. Ngemva kokukhululwa komyeni wami, sathuthela eTaipei. Njengoba manje sase siseduze kakhulu kwejele lapho labazalwane ababili babeboshwe khona, lokhu kwaba yilungiselelo elihle kakhulu.

ITaipei Prison yayiyijele eliziqaphe kakhulu iziboshwa. Ngathatha ukudla nezingubo, ngaya kobona abazalwane. Okokuqala, kwaqhamuka uMzalwan’ uKosaka enonogada nomseshi ngemva kwewindi elingamasentimitha-skwele angu-30 elinofenisi wocingo. Wayephaphathekile nezindebe zakhe zibomvu njengamastrawberry. Wayengenwe isifo sofuba.

Ngemva kwalokho kwaqhamuka uMzalwan’ uOe emamatheka, elokhu ephindaphinda ngenjabulo: “Kuhle ukuthi ufikile.” Njengoba ubuso bakhe babuphuzi futhi buvuvukele, ngambuza ngempilo yakhe. “Ngiphile kahle!” ephendula. “Indawo enhle kakhulu lena. Azikho izimbungulu noma izintwala. Ngingadla ngisho namanoodle enziwe ngokudla kwezinkukhu. Kufana nje nasemzini wesicebi,” kusho yena. Iphoyisa nonogada abakwazanga ukubamba ukuhleka kwabo bathi: “Oh, asinakuyehlula lensizwa enguOe.”

Ukuboshwa Futhi

Cishe phakathi kwamabili ngoNovember 30, 1941, ezinsukwini ezimbalwa ngemva kokubuya ekuvakasheleni abazalwane, kwezwakala ukungqongqoza emnyango. Ngabona izithunzi ezinjengentaba zezigqoko emnyango wengilazi. Lapho ngizibala zaziyisishiyagalombili. Kwakungamaphoyisa. Angena ngenkani endlini yethu futhi aphequlula yonke into endlini—kodwa angathola lutho. Ngemva kwehora esesha indawo, athatha izincwadi zezithombe ezimbalwa ayesesitshela ukuba sihambe nawo. Ngakhumbula ukuthi uJesu waboshwa phakathi kwamabili. (Mathewu 26:31, 55-57; Johane 18:3-12) Ukucabanga ngamadoda ayisishiyagalombili ezihlupha kangaka ngathi sobabili kwangihlekisa.

Sayiswa esakhiweni esingajwayelekile esasisikhulu futhi simnyama. Kamuva sathola ukuthi kwakuyiTaipei Hichisei Prison. Sasihleli phambi kwedeski elikhulu, futhi kwaqala uphenyo. Abuza ephindaphinda: “Ubani enimaziyo?” futhi ngamunye wethu wayephendula: “Angazi muntu.” Sasingabazi kanjani abasezweni laseJapane? Sasazi uMzalwan’ uOe noKosaka kuphela, futhi asizange sithi vú ngamanye amagama okungenzeka ukuthi sasike sawezwa.

Ngokushesha kwase kuyihora lesihlanu ekuseni, futhi abaseshi ababili bangiyisa esitokisini sami. Kwadlula isikhathi esithile ngaphambi kokuba ngijwayele indawo entsha. Ngokokuqala ngqá ekuphileni kwami, ngahlangana nezimbungulu. Lezinambuzane ezincane, ezazihlose ukuzitika ngabafikayo, zazingikhathaza ngonya, ziyeka abanye abesifazane ababili abebesesitokisini—naphezu kokuba ngangizibulala lezo ezaziza kimi. Ekugcineni ngayeka futhi ngazivumela ukuba zizitike ngami.

Ukudla kwethu kwakuyinkomishi yephalishi elenziwe ngelayisi elingavuthiwe kahle, kodwa umlomo wami waphikelela uzwa sengathi kwakuyilayisi elingavuthiwe. Okwakuhambisana nephalishi kwakungamaqabunga amancane edaikon (iradish yaseJapane) afakwe usawoti alumela inhlabathi. Ekuqaleni, ngenxa yokuthi lokudla kwakunuka kabi futhi kungcolile, ngangingakwazi ukukudla, abanye esasiboshwe nabo babefika bakudle. Yebo, kancane kancane ngazivumelanisa nesimo ukuze ngiphile.

Impilo yasejele yayidabukisa kakhulu. Ngesinye isikhathi, ngezwa indoda ethile, okwakusolwa ukuthi iyinhloli, ikhala usuku nosuku ngenxa yokuhlushwa. Ngabona nomunye umuntu esitokisini esiseduze efa kalusizi. Njengoba konke lokhu kwenzeka phambi kwami, ngaba nomuzwa onamandla wokuthi lesimiso esidala kumelwe siphele, futhi ithemba lami ezithembisweni zikaNkulunkulu laqina kunanini.

Uphenyo

Ngahlala ejele cishe unyaka futhi ngaphenywa izikhathi eziyisihlanu. Ngolunye usuku kwafika umshushisi ngokokuqala ngqá, futhi ngayiswa endlini yokuphenyela encane kakhulu. Okokuqala akusho wathi: “Ubani omkhulu, uAmaterasu Omikami [unkulunkulukazi welanga] noma uJehova? Ngitshele!” Ngacabanga isikhashana ukuthi ngangizophendula kanjani.

“Ngitshele ukuthi ubani omkhulu, ngalé kwalokho ngizokushaya!” Wangigqolozela.

Ngaphendula ngomoya ophansi: “Ekuqaleni kweBhayibheli, kulotshiwe, ‘Ekuqaleni uNkulunkulu wadala izulu nomhlaba.’” Ngabona kungenasidingo sokunezela okunye. Wamane wangigqolozela wangasho lutho wayeseshintsha indaba.

Kakade, kungani ngangifakwe ejele? Umbhalo wokuhlolwa wathi: “Kwesatshwa ukuthi angase adukise umphakathi ngenkulumo yakhe nangezenzo.” Kungenxa yalesosizathu ngaboshwa ngaphandle kokuthethwa kwecala.

UJehova wayeseduze nami ngaso sonke isikhathi lapho ngihlangabezana nakho konke lokhu. Ngomusa kaJehova, nganikezwa imiBhalo yamaKristu yesiGreki engena ephaketheni. Umseshi wayiphonsa esitokisini sami ngolunye usuku, wathi: “Ngizokuvumela ube nalokhu.” Ngayifunda nsuku zonke kwaze kwaba yilapho ngikwazi ngekhanda engangikufunda. Isibonelo esivelele samaKristu ekhulu lokuqala esisencwadini yezEnzo saba umthombo omkhulu wesikhuthazo. Izincwadi ezingu-14 zikaPawulu nazo zangiqinisa. UPawulu wabhekana nokushushiswa okukhulu, kodwa umoya ongcwele wawumsekela ngaso sonke isikhathi. Imibhalo enjalo yangiqinisa.

Ngazaca futhi ngaba buthakathaka, kodwa uJehova wangisekela, ngokuvamile ngezindlela ezingalindelekile. Ngelinye iSonto umseshi engangingakaze ngimbone weza nephasela eligoqwe ngeduku. Wavula umnyango wesitokisi wangikhiphela egcekeni. Lapho sifika emthini omkhulu wecamphor, waqaqa lelophasela. Yeka engakubona! Phakathi kwakukhona ubhanana namabhanisi. Wangitshela ukuba ngikudlele lapho. Umseshi waphawula: “Nonke ningabantu abahle kakhulu. Nokho kudingeka siniphathe kanje. Ngifuna ukuwuyeka lomsebenzi ngokushesha.” Kanjalo onogada nabaseshi baqala ukungiphatha kahle. Babengethemba futhi bangivumela ukuba ngihlanze amakamelo abo futhi banginikeza ezinye izinhlobo ezihlukahlukene zemisebenzi engconywana.

Ngasekupheleni kuka-1942, ngabizwa omunye wabaseshi ababesibophile. Wathi: “Nakuba ufanelwe isigwebo sokufa, uzokhululwa namuhla.” Umyeni wami wayesebuyele ekhaya cishe isikhathi esingangenyanga ngaphambi kokukhululwa kwami.

Ukuvuselela Ukuxhumana NoFakazi

Lapho sisejele, iJapane yangenela iMpi Yezwe II. Khona-ke, ngo-1945, sezwa ukuthi iJapane ihluliwe, futhi safunda emaphephandabeni ukuthi iziboshwa zezombangazwe zazizokhululwa. Sasazi ukuthi uMzalwan’ uKosaka wayebulawe ukugula ejele, kodwa ngokushesha ngathumela izincwadi emajele aseTaipei, eHsinchu, nakwamanye amadolobha ngibuza ngoMzalwan’ uOe. Nokho, angitholanga-mpendulo. Kamuva ngezwa ukuthi uMzalwan’ uOe wayebulawe ngokudutshulwa amasosha.

Ngo-1948 sathola incwadi esasingayilindele ivela eShanghai. Yayivela kuMzalwan’ uStanley Jones, owayethunyelwe eChina evela eGileyadi, isikole sezithunywa zevangeli soFakazi BakaJehova esasisanda kumiswa. UJehova wayesikhumbulile futhi! Ngajabula kakhulu ngokuba nalokhu kuthintana nenhlangano kaJehova. Kwase kudlule iminyaka eyisikhombisa kusukela sasigcine ukubona uMzalwan’ uOe. Nakuba ngangingedwa ngokuphelele ngaso sonke lesosikhathi, ngangilokhu ngitshela abanye ngezindaba ezinhle.

Lapho uMzalwan’ uJones esivakashele okokuqala, kwakuyisikhathi sokujabula. Wayenobungane kakhulu. Nakuba sasingakaze simbone ngaphambili, sazizwa sengathi samukela isihlobo esiseduze kakhulu ekhaya lethu. Ngokushesha ngemva kwalokho, uMzalwan’ uJones waya eT’ai-tung, ngaphesheya kwezintaba, ehamba nomyeni wami njengomhumushi wakhe. Babuya cishe ngemva kwesonto, okwathi phakathi nalesosikhathi baba nomhlangano wosuku olulodwa futhi babhapathiza abangaba ngu-300 besizwe sama-Amis esisogwini olusempumalanga.

Ukuvakasha kukaMzalwan’ uJones kwakubaluleke nangenye indlela kimi. Ngangikade ngishumayela ngedwa kwaze kwaba yilesosikhathi. Futhi manje umbhangqwana, indoda yakulelokhaya eyayiwumnikazi wendawo esasihlala kuyo, wabhapathizwa phakathi nokuhambela kukaMzalwan’ uJones. Kusukela lapho, ngiye ngajabulela injabulo yokwenza abafundi izikhathi eziningi ngaphezu kwenjabulo yokumemezela uMbuso. Kamuva sathuthela eHsinchu, lapho uMzalwan’ uJones asivakashela khona kathathu, amasonto amabili isikhathi ngasinye. Ngabujabulela kakhulu ubungane obuyinzuzo. Ekuvakasheni kwakhe kokugcina, wathi: “Ngesikhathi esilandelayo, ngiyokuza nomngane wami, uHarold King.” Kodwa “lesosikhathi esilandelayo” asizange sifike, ngoba ngokushesha ngemva kwalokho bobabili baboshwa eChina.

Ngo-1949, uJoseph McGrath noCyril Charles, izithunywa zevangeli zekilasi le-11 laseGileyadi, zafika eTaiwan. Zandisa umsebenzi eTaiwan, zisebenzisa ikhaya lethu njengesikhungo sazo. Isibonelo sazo sangikhuthaza ngempela. Nokho, isimo sezombangazwe saziphoqelela ukuba ziye eHong Kong. Angikwazanga ukubamba izinyembezi zami lapho zihamba nephoyisa. “Ungakhali Miyo,” kusho uJoe. Wanezela: “Siyabonga,” wayesenginika ipeni lakhe ayeselisebenzise kakhulu elalizoba yisikhumbuzo.

Ukuqala Ukuqeqesha Umntwana

Sinomyeni wami sasingenabo abantwana, ngakho sathatha umshanakazi womyeni wami lapho enezinyanga ezine ubudala. Ukuphila kukanina kwakusengozini ngenxa yesifuba somoya.

Ngo-1952, uMzalwan’ uLloyd Barry, owayekhonza njengesithunywa sevangeli eJapane, wavakashela eTaiwan eyofuna ukuqashelwa okungokomthetho kwemisebenzi yoFakazi BakaJehova. Wahlala nathi futhi wasikhuthaza kakhulu. Ngalesosikhathi indodakazi yethu yayisinezinyanga ezingu-18 ubudala. Wayithatha wayibuza: “Ubani igama likaNkulunkulu?” Ngimangele, ngambuza: “Usho ukuthi kufanele siyifundise isencane kangaka?” “Yebo,” ephendula ngokuqiniseka. Khona-ke wakhuluma nami ngokubaluleka kokuqeqesha umntwana kusukela ebuncaneni bakhe. Lamazwi akhe: “Uyisipho esivela kuNkulunkulu ukuze akududuze,” ahlala engqondweni yami.

Ngokushesha, ngaqala ukuqeqesha indodakazi yami, uAkemi, ukuba yazi futhi ithande uJehova futhi ibe inceku yakhe. Ngayifundisa izimpawu zokuphinyiselwa kwamagama, ngiqala ngezinhlamvu ezintathu ue, ho, noba, ezakha igama elithi “Ehoba,” noma Jehova, ngesiJapane. Lapho iba neminyaka emibili, yayisikwazi ukuqonda lokho engangiyitshela khona. Ngakho njalo ebusuku ngaphambi kokuba iyolala, ngangiyixoxela izindaba zeBhayibheli. Yayilalela ngesithakazelo futhi izikhumbula.

Lapho isineminyaka emithathu nengxenye ubudala, uMzalwan’ uBarry waphinde wasivakashela futhi wanika uAkemi iBhayibheli elilotshwe ngesiJapane esivamile. Wazulazula endlini neBhayibheli, ethi: “IBhayibheli lika-Akemi! IBhayibheli lika-Akemi!” Khona-ke ngemva kwemizuzu emibalwa, wazwakala esethi: “IBhayibheli lika-Akemi alinaye uJehova! Angilifuni!” Walilahla phansi. Ngethukile, ngahlola okuphakathi. Okokuqala ngavula kuIsaya isahluko 42, ivesi 8. Lapho igama elithi Jehova lalimelelwe igama elithi “Nkosi.” Ngabheka eminye imibhalo, kodwa angizange ngilithole igama laphezulu, elithi Jehova. UAkemi waxola lapho ngiphinda ngimbonisa igama elithi Jehova eBhayibhelini lami elidala, elalilotshwe ngesiJapane sakudala.

Ukubuyela EJapane

Sabuyela eJapane ngo-1958 futhi sahlanganyela neBandla laseSannomiya eKobe. Njengoba nganginezizathu eziningi kangaka zokubonga uJehova, ngafuna ukubonisa lokho kubonga ngokuba iphayona—isikhonzi sesikhathi esigcwele soFakazi BakaJehova. Ngazikhandla enkonzweni yamaphayona. Ngenxa yalokho, ngakwazi ukuqhuba izifundo zeBhayibheli zasekhaya eziningi futhi nganambitha injabulo yokusiza abantu abangaba ngu-70 kuya ku-80 ukuba bangene eqinisweni. Ngaba ngisho nanelungelo lokukhonza njengephayona elikhethekile isikhathi esithile, ngisebenza amahora angaphezu kuka-150 nyanga zonke ensimini, kuyilapho futhi nginakekela umyeni wami nendodakazi.

Njengoba sase sihlale eTaiwan iminyaka engaphezu kwengu-30, ukuphila eJapane kwakwethusa ngokwempucuko, futhi ngabhekana nokuhlangenwe nakho okuningana okuvivinyayo. Ezikhathini ezinjengalezi uAkemi waba umduduzi nomsekeli wami, njengoba nje uMzalwan’ uBarry ayengitshelile eminyakeni engaphambili. Lapho ngicindezelekile, wayethi kimi: “Mama, yiba nesibindi. UJehova uzolenza icebo.” “Yebo, uzolenza, akunjalo?” Ngangiphendula futhi ngimange kakhulu. Yeka umthombo wesikhuthazo! Yeka indlela engangingambonga ngayo uJehova!

Ukunikela Indodakazi Yami KuJehova

UAkemi waba ummemezeli lapho eneminyaka engu-7 futhi wabhapathizwa lapho eneminyaka engu-12, ehlobo lika-1963. Ngazama ukuba nesikhathi esiningi ngangokunokwenzeka nginaye. (Duteronomi 6:6, 7) Kwakunezikhathi ezinzima lapho eseminyakeni yokukhula, kodwa ngezibonelo ezinhle nesikhuthazo samaphayona akhethekile ayethunyelwe ebandleni lakithi, ekugcineni uAkemi wakwenza umgomo wakhe ukuphayona emasimini amasha.

Emhlanganweni wesigodi ngo-1968, wadlala indima yendodakazi kaJefta edrameni yeBhayibheli. Njengoba ngangibukele ledrama, nganquma, njengoba kwenza uJefta, ukunikela ngendodakazi yami okuwukuphela kwayo, engangiyinakekele kwaze kwaba yilesosikhathi, kuJehova ukuze ingenele inkonzo yesikhathi esigcwele. Ukuphila kwakuzoba njani indodakazi yami ingekho eduzane? Kwakuyinselele, njengoba ngase ngineminyaka engaphezu kuka-60 kakade.

Ngo-1970 kwafika isikhathi sokuba indodakazi yethu isishiye. Yathola imvume kumyeni wami yaya eKyoto ukuze iyokhonza njengephayona. Iyiqonda imizwa yethu, inhliziyo yayo yaba lusizi njengoba yayisishiya. Ngacaphuna iHubo 126:5, 6 njengombhalo wokumvalelisa: “Abahlwanyela ngezinyembezi bayakuvuna ngokuthokoza. Ohamba ekhala izinyembezi, ephethe imbewu yokuhlwanyela, uyakubuya ngokuthokoza, ephethe izinyanda zakhe.” Lamazwi abonakala ekhuthaza nakimi.

Kamuva uAkemi washada futhi waqhubeka eyiphayona elikhethekile nomyeni wakhe. Kusukela ngo-1977, lapho umyeni wakhe emiswa njengombonisi wesifunda, baye bakhonza emsebenzini wokujikeleza. Ngokuvamile ngindlala ibalazwe bese “ngithatha uhambo” ebalazweni nendodakazi yami. Kuyinjabulo enkulu kimi ukuzwa okuhlangenwe nakho kwabo kanye nokwazana nodade abaningi abazi indodakazi yami.

Sengineminyaka engu-86 kakade. Izinsuku ezidlule zibonakala zinjengokulinda ebusuku. Angisakwazi ukusebenza kakhulu njengakuqala, kodwa inkonzo yasensimini isangijabulisa. Lapho ngizindla ngeminyaka engu-60 esidlule kusukela ngafunda iqiniso, isithembiso sikaNkulunkulu esiqinisekisayo sigcwala enhliziyweni yami. Yebo, uJehova oyosebenzelana ngokwethembeka nabathembekileyo bakhe usenza sivune injabulo echichimayo.—IHubo 18:25.