Ukufakaza EFrance—Izwe Labantu Abayizinhlobo Ezihlukahlukene
IFRANCE iyizwe elinezinto ezihlukahlukene kakhulu. Izintaba ezinkulu, amagquma asabalele, amawa angamadwala apheshethwe izivunguvungu, izingu ezifudumele ezinesihlabathi esiningi, amasimu okusanhlamvu angodeda ngendlale, amapulazi amancane abiyelwe, izivini ezinkulu, izindawo zamadlelo, amahlathi ezihlahla zepine ezingabuni neziwisa amaqabunga ebusika, amadolobha amancane kanye namakhulu esimanje—iFrance iyikho konke lokhu, kanye nokuningi okwengeziwe.
Nakuba ingxenye enkulu yendawo yasemaphandleni iye yalondoloza ubuhle bayo, isimo sezenhlalo saseFrance siye sashintsha ngokushesha eminyakeni yamuva. “Umphakathi waseFrance awubhekene nenkathi yesimo esibucayi,” kusho uhlelo lweFrancoscopie luka-1989, “kodwa ubhekene nesiyaluyalu sangempela. Izimo zezenhlalo, izimiso zokuziphatha, izindinganiso zobuciko nezimo zengqondo kubhekene nezinguquko ezijulile ngesivinini esiphakeme.”
Lezinguquko eziphawulekayo ziye zathinta nomkhakha ongokwenkolo. Nakuba ubuKatolika buseyinkolo yeningi, manje sebumane nje buyisiko kunokuba kube yinkolo enanoma iliphi ithonya langempela ekuphileni kwamalungu amaningi. Ukungabi nasithakazelo kwabantu okwandayo ezimisweni ezingokwenkolo kuye kwenza amasonto angabe esanda.
Ngokuphambene, umsebenzi woFakazi BakaJehova eFrance uye waqhubekela phambili ngokushesha eminyakeni embalwa edlule. Ukusuka eAlsace enyakatho-mpumalanga kuya eBrittany eAtlantic, ukusuka ezintabeni eziphakeme iAlps kuya esiGodini esiphansi iLoire, ngisho nasesiqhingini saseCorsica eMediterranean, oFakazi babhekana nezimo ezihlukile futhi bahlangana nabantu abanezizinda ezihlukile. Ake sithathe uhambo ngamehlo engqondo futhi sibone ukuthi kunjani ukushumayela izindaba ezinhle zoMbuso eFrance, izwe labantu abayizinhlobo ezihlukahlukene.—Mathewu 24:14.
IALSACE
Njengoba igudle iJalimane, iAlsace iyisifundazwe esaziwa kakhulu ngezivini zaso nangamadolobha akhangayo agcwele izimbali. IStrasbourg, inhlokodolobha yayo, ibilokhu iyisiphephelo sobuProtestani kusukela eNkathini Yenguquko, futhi abantu baseAlsace ngokuvamile banenhlonipho enempilo ngeBhayibheli. OFakazi BakaJehova bebelokhu beshumayela izindaba ezinhle zoMbuso kulendawo kusukela ekuqaleni kwalelikhulu leminyaka. Namuhla, umsebenzi usumiswe kahle, njengoba kuboniswa okuhlangenwe nakho kosemusha othiwa uSylvie, owalisebenzisa kahle ithuba lokushumayela esikolweni.
Lapho exoxa nezingane eziningana afunda nazo ekilasini, uSylvie waveza injongo yokuphila namathemba esikhathi esizayo. Omunye umfana waba nesithakazelo esanele ukuba avumele uSylvie nomunye uFakazi ukuba bamvakashele ekhaya. “Nakuba lona osemusha ongumKatolika ayengumfana okhonza ealtare, wayenemibuzo eminingi eyayi-ngakaze iphendulwe,” kusho uSylvie. “Sasebenzisa iBhayibheli ukuze siphendule eminye yayo, futhi wasamukela isifundo seBhayibheli sasikhathi sonke.” Lensizwa yabhapathizwa ngemva konyaka kamuva futhi ngemva kokuba isifaneleka yangenela inkonzo yesikhathi esigcwele njengephayona elivamile. NoSylvie kusukela ngaleso sikhathi wangenela lelolungelo lenkonzo.
IBRITTANY
Njengoba iphuma ingenela olwandle iAtlantic, iBrittany iyisifundazwe sesiko elinamandla lamaKatolika. Nokho, ngemizamo ephikelelayo yoFakazi, inani elandayo labantu kulendawo lamukela isigijimi soMbuso. Nasi isibonelo salokho okwenzekayo kulendawo esenyakatho ntshonalanga yeFrance.
“Umbhangqwana osemusha wathuthela endlini engenhla kweyethu,” kubika uFakazi wendawo. “Esikhathini esithile kamuva, ngahlangana nowesifazane osemusha ezitebhisini, egone indodana yakhe. Ngemva kokuzwa ukuthi igama layo uJonathan, ngabuza ukuthi wayeyazi yini imvelaphi yalelogama. ‘Ngicabanga ukuthi livela eBhayibhelini, kodwa yilokho kuphela engikwaziyo,’ ephendula. Walalela incazelo engayinikeza, futhi washo ukuthi bobabili yena nomyeni wakhe banesithakazelo esikhulu eBhayibhelini. Nakuba saba nezinye izingxoxo, akwenzekanga lutho olungako ngalesosikhathi.
“Esikhathini esithile kamuva, lombhangqwana wacela iseluleko sami ezinkingeni ezithile. Ngasebenzisa iBhayibheli ekuziphenduleni, futhi ukwaziswa elalikunikeza kwabahlaba umxhwele. Ngaphinde ngabamema futhi ukuba babe nesifundo seBhayibheli. Ngosuku olulandelayo lowesifazane osemusha wavuma. Emasontweni ambalwa kamuva, umyeni wakhe wahlanganyela esifundweni. Bobabili manje bangoFakazi ababhapathiziwe.”
IZINTABA IALPS
Izintaba iAlps ziyaziwa ngenxa yokuba kwazo umbukwane okhangayo. Abantu baya lapho ukuze babone iziqongo eziphakeme, ikakhulukazi iMont Blanc, isiqongo esiphakeme kunazo zonke eNtshonalanga Yurophu. Nakulendawo, liyanda inani labamemezeli boMbuso abadumisa uMdali. Abantu babo bonke ubudala nabavela kuzo zonke izindlela zokuphila bajoyina izinhlu zabo, njengoba ukulandisa okulandelayo kubonisa.
Abasha abane kuleyondawo babenomlando omubi kakhulu. Babentshontsha izimoto nezinye izimpahla, bevame ukudakwa, besebenzisa futhi bethengisa izidakamizwa, futhi babehileleke ebufebeni nasekusebenziseni imimoya. Babengasebenzi futhi bevame ukuba sezinkingeni namaphoyisa, futhi bonke babeke baboshwa. Nokho, bobane babeke bezwa ngeqiniso ebuntwaneni ngoba imikhaya yakubo yayike yafunda noFakazi BakaJehova ngezikhathi ezithile.
Ngemva kweminyaka ethile yokuphila ngobudlwangudlwangu, omunye walentsha washintsha isimo sakhe futhi wanquma ukukhonza uJehova. Lokhu kwabangela uhide lwezenzakalo ezihlobene. Ngolunye usuku amaphoyisa ayenza ukuhlola okuyinqubo yawo, ayesecela omunye walentsha ukuba avule isikhwama sakhe. Njengoba ayelindele ukuthola izidakamizwa noma izimpahla ezebiwe, amangala uma ethola iBhayibheli nezincwajana ezithile kuphela. Lensizwa yasebenzisa iBhayibheli ukuze ichaze lokho okwakubangele izinguquko ekuphileni kwayo. Likuthola kunzima ukukukholelwa, elinye lamaphoyisa labuza: “Usho ukuthi awusabhemi, awusaphuzi, noma usebenzise izidakamizwa?” Ekugcineni lamaphoyisa ayamukela lencazelo ayesemdedela ngaphandle kokumchithela isikhathi. Namuhla lezinsizwa ezine zibhapathiziwe, zonke zikhonza ebandleni ezikulo njengezinceku ezikhonzayo, futhi ezintathu kuzo zingamaphayona avamile.
ISIGODI ILOIRE
IsiGodi iLoire sibizwa ngokuthi insimu yaseFrance. Sisuka eOrléans, ebangeni lamakhilomitha angu-110 eningizimu yeParis, senabele esizalweni soMfula iLoire oGwini lweAtlantic. Lendawo yaziwa ngezinqaba zayo eziningi, izindawo zokuhlala zesikhathi sangaphambili nezindawo zokuhlala abasebukhosini lapho bezingela. Kunamabandla oFakazi BakaJehova kuwo wonke amadolobha amakhulu kulendawo.
Phakathi nesikhathi sekhefu esikoleni ngolunye usuku, uEmma osemncane, intombazanyana eneminyaka eyisithupha enobungane nothando, waphindela ekilasini eyobingelela uthisha wakhe. Ethuswe ukubona uthisha wakhe ebhema, wasidinda isililo wayeseyabaleka. Lothisha wamlandela futhi wambuza ukuthi ukhalelani, kodwa uEmma akazange amphendule. Lapho lothisha ephikelela, uEmma waba nesibibithwane wayesephendula: “Yingoba uyabhema. Uzogula bese uyafa!”
Ngosuku olulandelayo lothisha wabiza umama kaEmma ukuze amtshele indlela ukusabela kwendodakazi yakhe okwamthinta ngayo. Ngakho umama wachaza ukuma koFakazi ngokuqondene nogwayi. Lothisha wayesemthululela isifuba sakhe wathi umkhaya wakhe wawusumcelile kakade ukuba ayeke ukubhema, kodwa kwakungazange kuphumelele. Nokho, kulokhu wayeshukunyiswe kakhulu ukusabela okuqotho kukaEmma kangangokuthi wayeka ukubhema ngezinsuku ezimbili nje kuphela.
ICORSICA
Isiqhingi saseCorsica, nakuba sibizwa ngokuthi “isiqhingi esiqholiwe,” saziwa futhi ngomoya wobuqhwaga wezakhamuzi ezihlala kuso, ovame ukuphumela ezimpini zenzondo ezichitha igazi. Iminyaka eminingi oFakazi babebhekwa njengenkolo “evela eZwekazini.” Nokho, amandla eqiniso leBhayibheli aseguqula izinhliziyo zabaningi lapho.
UFakazi othile osanda kubhapathizwa walandisa ukuthi kwake kwathi ebuya eholidini wathola ukuthi zonke izimpahla zakhe eziphathekayo epulazini lakhe zazebiwe. “Ngokuthemba uJehova,” ethulula isifuba, “ngakwazi ukusabela ngokwehlukile endleleni engangingasabela ngayo esikhathini esedlule.” Ngenkathi ekhuluma nomakhelwane, wakhuluma ngesizotha ngokulahlekelwa kwakhe.
“Kamuva, abanye omakhelwane baba nezinkinga. Ngashiya umsebenzi wami ngayobasiza. Ezinsukwini ezimbalwa kamuva, ngathola ucingo luvela komunye wabo engicela ukuba ngize kuye ngokushesha ngangokunokwenzeka. Ngicabanga ukuthi wayesephinde waba senkingeni, ngahamba ngaso lesosikhathi. Wathi mangihlale phansi wayesebuza: ‘Uyazi ukuthi kungani ngikubizile? Ngikubizele izimpahla zakho. Yimi owazeba. Kodwa lapho ngibona isimo sakho sengqondo somusa nesinobungane, ngazitshela ukuthi, “Anginakukwenza lokho kuye!” Futhi ngemva kokuba usisizile, angibange ngisakwazi ukulala ebusuku.’” UbuKristu beqiniso lapho busetshenziswa buholela emphumeleni omuhle.
Ekupheleni kwempi yezwe yesibili, lapho umsebenzi wokufakaza ngoMbuso usuphinda uqaliswa eFrance, kwakunoFakazi abangu-1 700 kuphela kulo lonke lelizwe. Umsebenzi wokufinyelela bonke abantu ngesigijimi soMbuso wabonakala uyinto engenakwenzeka. Nokho, eminyakeni edlule, uJehova uye wababusisa abantu bakhe eFrance ngezinto ezidingekile—imishini yokunyathelisa, amaHholo oMbuso, amaHholo oMhlangano, njalonjalo—nangomoya wokuzimisela ukuze kufezwe umsebenzi. Namuhla, njengoba kunabashumayeli abakhuthele abangaphezu kwabangu-117 000, isigijimi sokuthi uMbuso kaJehova ngoKristu uwukuphela kwethemba lesintu siyashunyayelwa kulo lonke lelizwe labantu abayizinhlobo ezihlukahlukene.
[Ibalazwe/Izithombe ekhasini 23]
(Ukuze ubone ukuthi indaba ihlelwe kanjani, bheka encwadini)
IFRANCE
IBRITTANY
ISIGODI ILOIRE
IZINTABA IALPS
IALSACE
ULWANDLE IATLANTIC
ULWANDLE IMEDITERRANEAN
IENGLISH CHANNEL
ICORSICA