Abathweswe Iziqu EGileyadi Baqalisa Indlela Yokuphila Evuzayo

“YEKA isenzakalo esijabulisayo lesi okuyiso, ukuthweswa iziqu kwekilasi lama-90 laseGileyadi!” Ngalawomazwi, usihlalo, uKarl F. Klein weNdikimba Ebusayo, wethula isimiso sokuthwesa iziqu. Ekhumbula lapho iWatchtower Bible School of Gilead iqala, wanezela: “Emuva ngo-1943, lapho ikilasi lokuqala laseGileyadi lithweswa iziqu, ubani owayengacabanga ukuthi eminyakeni engu-48 kamuva sasisayolokhu sibuthana ndawonye ngenjongo yokuthweswa iziqu kwelinye futhi ikilasi—elama-90?”

Nokho, ngoMarch 3, 1991, usuku olushisayo olungafanelani nenkathi yonyaka eNew Jersey, izimenywa ezingaphezu kuka-4 000 namalungu omkhaya waseBethel zahlangana eHholo LoMhlangano laseDolobheni laseJersey, ngaphesheya nje komfula ukusuka eDolobheni laseNew York, ngenjongo yokuthweswa iziqu kwalezithunywa zevangeli ezintsha. Ngaphambi kokuba baqalise ukuphila kobuthunywa bevangeli, laba abathweswe iziqu babezothola iseluleko esithile sokuvalelisa ngalokhu ngosuku lwabo lokuthweswa iziqu.

Isimiso sasiqalise ngengoma. Ngemva kwalokho, bonke ababekhona bathinteka ngokujulile lapho uFrederick W. Franz, umongameli oneminyaka engu-97 ubudala weWatchtower Bible School of Gilead, enza umthandazo wokuvula. Khona-ke, ngemva kwamazwi kasihlalo esethulo, abathweswa iziqu—nabo bonke ababekhona—balulalela ngesithakazelo uchungechunge lwezinkulumo ezimfushane, eziwusizo.

UMax H. Larson weKomiti Yefektri wakhuluma kuqala, ngesihloko esithi “Izisebenzi Ezikanye NoJehova.” Ngemva kokudonsela ukunakekela emkhunjini wokusindisa uNowa nomkhaya wakhe abawakha, wathi: ‘Namuhla uJehova ubutha umkhaya womhlaba wonke wezigidi, futhi uhlose ukudlulisela lomkhaya omkhulu osizini olukhulu.’ Kanjani? Phela, ngomkhumbi wosuku lwanamuhla—ipharadesi elingokomoya! ‘Nina,’ ekhumbuza abathweswa iziqu, ‘nizobe niya ezingxenyeni ezihlukahlukene zomhlaba, lapho nizoba yizisebenzi ezikanye noJehova khona ekwakheni umkhumbi wosuku lwanamuhla.’ Ebalungiselela lokho okwakungaphambili, wathi: ‘Kuzodingeka ukuba nisebenze. Kuzodingeka ukuba nibe nesineke. Nizobhekana nezithiyo. Lapha kulapho nizodinga khona amakhono ukuqeqeshwa kwenu okuye kwaninikeza wona.’

UDaniel Sydlik, ilungu leNdikimba Ebusayo, wayesanda kuvakashela izithunywa zevangeli esezinesikhathi eside eJapane naseCosta Rica. Ekhuluma ngesihloko esithi “Indlela Yenu Yokuphila Ingevuzayo,” wahlanganyela okunye kokusikisela okuwusizo ayekuthole kulezithunywa zevangeli eziphumelelayo. Omunye udade, echaza, wadlulisela esinye iseluleko ayesinikezwe unina: ‘Yithande inkonzo yasensimini. Zenzele ubungane nabantu. Hlanganyela ukuphila kwakho nabanye, futhi kuyosho injabulo ngawe.’ Omunye udade wathi: ‘Eminyakeni eminingi edlule, siye saqonda ukuthi uma singalindeli okuningi ngokweqile kwabanye, ngeke sidumale kalula. Noma isiphi isenzo somusa nesokucabangela esisenzelwayo sisho okukhulu kakhulu kithi.’ Ukusebenzisa iseluleko esinjalo esiwusizo akungabazeki ukuthi kuyosiza abathweswe iziqu ukuba bona ngokwabo babe izithunywa zevangeli eziphumelelayo.

“Nibabekezelele bonke,” kusho eyoku-1 Thesalonika 5:14. ULeon Weaver weKomiti Yomnyango Wenkonzo wakhulumela lombhalo njengoba ayekhuluma ngesihloko esithi “Yibani Nesineke Kuyo Yonke Imisebenzi Yenu.” Obani abahlanganiswa kwelithi “bonke” okumelwe sibe nesineke kubo? Isikhulumi saphendula: ‘Labo enizohlangana nabo enkonzweni yasensimini. Abazalwane nodade ebandleni lenu elisha. Izithunywa zevangeli ezikanye nani. Labo abasegatsheni. Umlingani wakho. Wena ngokwakho.’ Kungani kufanele sibe nesineke kuyo yonke imisebenzi yethu? ‘Bazalwane nodade,’ kuchaza isikhulumi, ‘isineke sinciphisa ukucindezeleka nokukhathazeka. Isineke sidala ukuthula. Isineke sigcina ithemba liphila. Isineke sisiza ukuba silondoloze injabulo yethu ekukhonzeni.’

UAlbert D. Schroeder, ilungu leNdikimba Ebusayo nowayekade engumbhalisi eSikoleni saseGileyadi, wakhuluma ngokulandelayo. Ekhuluma ngesihloko esithi “Qhubekani Nilandela Isibonelo Senu—UJesu Kristu,” wasekela amazwi akhe kweyabaseFilipi isahluko 2. “Mawube-kini lowomqondo [“Makube umqondo wenu,” umbhalo waphansi weNW] owawukhona nakuKristu Jesu,” kusho ivesi 5. ‘Lokhu,’ kuchaza isikhulumi, ‘kubonisa ukuthi kudingeka sibe nokucabanga okulinganiselayo, ngisho nanjengoba uJesu ngokwakhe ayenokucabanga okulinganiselayo.’ Eqala ngevesi 6, ngokulandelayo wenza ukuhlaziya okuthakazelisayo, ebonisa ukuthi uPawulu okokuqala unikeza ubufakazi bokuthi uJesu wayenokucabanga okulinganiselayo (amavesi 6-8) bese echaza izindlela uJehova amvuza ngazo ngenkambo yakhe yokulalela (amavesi 9-11). ‘Lena ingxenye yelungelo lenu,’ ephetha, ‘lokuba nishumayele ngeNkosi uJesu Kristu, nisize abanye ukuba babe nesimo sengqondo esifanayo ayenaso.’

Yimaphi amazwi okuvalelisa abaqeqeshi besikole ababewaphathele abafundi babo? UJack D. Redford wakhuluma ngesihloko esithi “Ikhono Lokucabanga Liyonilondoloza.” (IzAga 2:10, 11, qhathanisa neNW.) ‘Njengoba niphuma manje,’ echaza, ‘injabulo yenu ngeke ixhomeke ekutheni ningobani noma ninani, noma ngisho neqiniso lokuthi nithweswe iziqu eGileyadi. Injabulo yenu iyoxhomeka endleleni enicabanga ngayo. Uma nisebenzisa ikhono lenu lokucabanga futhi nisebenzisa ulwazi lwenu, niyojabula.’ Ebonisa ukubaluleka kwekhono lokucabanga, wachaza: ‘Umehluko phakathi kwesinyathelo esilungile nesinyathelo esingalungile siwukucabanga. Lokho okucabangayo kunquma lokho okwenzayo.’ UJ. D. Redford waphetha ngalamazwi esikhuthazo kubafundi: ‘Kunabantu abaningi abanobuhlakani obukhulu ezweni abangebona abacabangi abahle, futhi kunabantu abaningi abanobuhlakani obuvamile asebeye baba abacabangi abanekhono. Ngakho zuza lelokhono. Zimisele ukusebenzisa ingqondo yakho. Sebenzisa ulwazi lwakho. Bhekana nezinkinga. Sebenzelana kahle nabantu. Yamukela igunya. Yiba okhiqizayo emsebenzini wakho. Khuthazela esabelweni sakho.’

U-Ulysses V. Glass, umbhalisi esikoleni, wakhetha isihloko esithi “UJehova Uphasa Isandla Sethu,” esisekelwe kumaHubo 37:23, 24. ‘Kumelwe ngilituse lelikilasi,’ ephawula, ‘ngesithakazelo salo ekufundeni.’ Wabakhumbuza ngolunye usizo uJehova alulungiselele ukuze abasekele—iZwi likaNkulunkulu, inceku ethembekileyo neqondayo ngaphansi kokuqondisa kukaJesu ukuze inikeze incazelo nokuqonda imiBhalo, izincwadi ezihlukahlukene, imihlangano, nemihlangano emikhulu. ‘Usizo eniye nalusebenzisa ezifundweni zenu,’ eqhubeka, ‘lunjengobhoko nenduku engokomoya. Siyaludinga ukuze lusiphase ngokomoya, futhi lusenza sikwazi nokukhuluma ngegunya ekudluliseleni iZwi likaNkulunkulu kwabanye.’ Ekuphetheni wayebaphathele lamazwi eseluleko abafundi: ‘Uma izinhliziyo zenu zigcwele uthando ngabantu, izinhliziyo eziqotho ziyosabela. Niyophumelela enkonzweni yenu, futhi niyokwazi ukuthi uJehova uphasa isandla senu.’

Isikhulumi sokugcina esimisweni sasekuseni sasinguCarey W. Barber weNdikimba Ebusayo, owakhetha isihloko esithi “Ngenani Ngomnyango Omncane.” Ekhulumela uLuka 13:23, 24, waphawula: ‘Baningi abafuna izibusiso zokuphila, kodwa bambalwa kakhulu abazimisele ukuzikhandla ngokwanele ukuze bazithole.’ Kuthiwani ngathi? ‘Kuhle ngathi ukuba sizibuze, “Yini lomfanekiso womnyango omncane oyishoyo kimi ngokwami?”’ Labo abahlulekayo ukungena ngomnyango omncane abahluleki ngoba kungenakwenzeka, kodwa ngenxa yokuthi abazimisele ukuzikhandla. ‘UJehova akafuni okuningi ngokweqile kithi,’ kuchaza isikhulumi. ‘Ngosizo lukaJehova,’ ephetha, ‘kwangathi sonke ngenjabulo singaba nentshiseko eyanele ukuze sizimpintshe singene ngomnyango omncane ezweni elisha lokuphila okuphakade, ukuthula, injabulo, nentokozo, kube udumo lwaphakade kuJehova!’

Ngemva kwalamazwi, usihlalo wadlulisela imikhonzo evela ezingxenyeni ezihlukahlukene zomhlaba. Manje kwase kufike isikhathi sokuba abathweswa iziqu bamukele amadiploma abo. Labafundi babevela emazweni ayisithupha—eCanada, eFinland, eJalimane, eGreat Britain, eSwitzerland, naseUnited States. Nokho, izabelo zabo ziyobayisa emazweni anjengeArgentina, iBenin, iBolivia, iDominican Republic, iPapua New Guinea, iPeru, iSt. Lucia, neTaiwan. Futhi laba abathweswe iziqu bazizwa kanjani ngosuku lwabo lokuthweswa iziqu? Encwadini eshukumisayo eyayibhalelwe iNdikimba Ebusayo nomkhaya waseBethel, bathi ngokwengxenye: “Siyaqiniseka ngokusekelwa iNdikimba Ebusayo, umkhaya waseBethel, nayo yonke inhlangano kaJehova. Njengoba sibhekene nezilingo ezingaphambili, lokho kusekela kungokuthile esiyokwazisa. Sibonga ngempela ngalokhu.”

Ngemva kwekhefu, isimiso santambama saqalisa ngeSifundo SeNqabayokulinda esifushanisiwe, esaqhutshwa uKarl A. Adams. Ngemva kwalokho, abafundi badlala imidlalo yokuhlangenwe nakho kwangempela ekuphileni kokufinyelela inhliziyo ekufundiseni iZwi likaNkulunkulu. Ekugcineni, bonke ababekhona, kuhlanganise nabathweswa iziqu bekilasi lama-90, bajabulela idrama eyayifike ngesikhathi enesihloko esithi Gwema Iminako Yokuphila, eyayidlalwa abamemezeli bendawo.

Usihlalo, uKarl Klein, wakhulumela bonke lapho emazwini akhe okuphetha ethi: “Ngempela kuye kwaba kuhle ngathi ukuba sibe lapha kulolusuku lwesithathu lukaMarch 1991!” Lesosimiso esijabulisayo sabe sesiphetha ngengoma yokuphetha, eyalandelwa umthandazo owenziwa uHarold J. Dies.

[Ibhokisi ekhasini 27]

Ukuma Kwekilasi

Inani lamazwe abawamelelayo: 6

Inani lamazwe ababelwe kuwo: 10

Ingqikithi yabafundi: 24

Isilinganiso seminyaka yabo yobudala: 31,2

Isilinganiso seminyaka yokuba kwabo seqinisweni: 15

Isilinganiso seminyaka yokuba kwabo senkonzweni yesikhathi esigcwele: 11

[Isithombe ekhasini 26]

Ikilasi Lama-90 Elithweswa Iziqu LeWatchtower Bible School of Gilead

Ohlwini olungezansi, izinombolo zezinhlu zisuka phambili ziya emuva futhi amagama ahlelwe kusukela ngakwesobunxele kuya ngakwesokudla ohlwini ngalunye. (1) Miller, M.; Helenius, S.; Marsh, L.; Kleeman, A.; Loosli, Y.; Nizan, H. (2) Skogen, R.; Nutter, D.; Noack, E.; Diehl, L.; Hair, J. (3) Marsh, C.; Helenius, H.; Loosli, M.; Danio, A.; Danio, A.; Nizan, D. (4) Miller, L.; Noack, J.; Hair, L.; Kleeman, W.; Skogen D.; Diehl, S.; Nutter, W.