Ukukhuthazela Ngenjabulo EMpumalanga Ephakathi
Lombiko oshukumisayo uvela koFakazi BakaJehova eLebanon
UNYAKA wethu wenkonzo ka-1990 waqala ngokuhlasela kobudlova ngezimbumbulu eBeirut. Kwase kuba nokuzola okwaqala ekupheleni kukaSeptember 1989 kwaze kwaba ngoJanuary 1990.
Phakathi nalezozinyanga kwabikwa inani elisha eliphakeme labamemezeli abangu-2 659 (ngoNovember), uma kuqhathaniswa nabangu-2 467 onyakeni wenkonzo ka-1989. Kwabhapathizwa abantu abangamashumi amane nane, futhi inyanga ngayinye kwahlanganyela isilinganiso sabangu-65 enkonzweni yamaphayona asizayo. Ngokokuqala ngqá, kwabikwa izifundo zeBhayibheli ezingaphezu kuka-2 000, futhi saqala ukucabangela okwakungafezwa esikhathini esizayo.
Kodwa impi yaphinde yagqashuka futhi eMpumalanga Beirut, lapho okunamabandla amaningi khona, futhi iningi labafowethu kwadingeka ukuba libalekele kwezinye izingxenye zezwe. Izinsuku eziningi sasingakwazi ukuxhumana namabandla asezindaweni ezithintekile, futhi imibiko yenkonzo yasensimini yayingaphelele. Nokho, abazalwane ababehlakazekile bahlanganyela namabandla asezindaweni ababebalekele kuzo, futhi umsebenzi wendlu ngendlu waqhubeka uba nemiphumela emihle kulo lonke izwe. Phakathi nalesosikhathi, eziningi zezindlu zabafowethu zashiswa noma zacekelwa phansi ngamabhomu. Omunye udade washona.
Sabheka kuJehova siqiniseka ngokuthi sizothola usizo nesiqondiso. Amaphayona anesibindi avuma ngokuzithandela ukuhambisa ukudla okungokomoya, kanye nokudla namanzi, kubafowethu abasezindaweni ezivinjezelwe. Eshukunyiswe uthando ngoJehova nangabazalwane, azifaka ngisho nasengozini yokunqamula imigwaqo okwakugqitshwe kuyo amabhomu. Kwanikezwa ubufakazi obuhle njengoba abantu babebona kuzosizwa imikhaya yabafowethu. Babona lokho uthando lweqiniso olungakwenza uma bonke bemunye ekukhulekeleni uNkulunkulu oyedwa weqiniso, uJehova.—Johane 13:34, 35; 15:13.
Phakathi nalonyaka wenkonzo, akukho neyodwa ikhophi kamagazini wethu abazalwane abangazange bayithole. Njengoba kwase kwenziwa ngeNqabayokulinda, umagazini wePhaphama! ngesiArabhu waqala ukukhishwa ngesikhathi esisodwa nowesiNgisi, kusukela kumagazini kaJanuary 8, 1990. OFakazi nabantu abathakazelayo bajabula kakhulu. Kwakuhlaba umxhwele futhi ukubona izincwadi ezintsha ezakhululwa ngesiArabhu, njengencwajana engangomagazini ethi Ingabe Kufanele Ukholelwe KuZiqu-zintathu? kanye nencwadi ethi IBhayibheli—Izwi LikaNkulunkulu Noma Elomuntu? nethi INcwadi Yami Yezindaba ZeBhayibheli.
Lezizipho ezingokomoya zalungiselelwa naphezu kokuvalwa kwamafekthri amaningi neminye imisebenzi eBeirut. Isimo sezomnotho sibi kulo lonke izwe. Izindawo eziningi azinawo ugesi, amanzi nezinkonzo zocingo. Manje, abanye babafowethu ake basho ukuthi bayithole kanjani injabulo ngisho nalapho bebhekene nomonakalo wempi ebiqhubeka iminyaka engu-15.
“Uhlangothi Oluhle”
UMzalwane eBeirut uyabhala: “Okokuqala, ngibonga uJehova ngokusuka enhliziyweni ngoba uye wasigcina siphephile phakathi kwenhlangano yakhe yokukhulekela okumsulwa naphezu kwazo zonke izimo ezinzima esiye sabhekana nazo. Phakathi nezenzakalo zamuva, ngiye ngaba nokuhlangenwe nakho okuthile okungilethele injabulo, futhi ngikubheka njengokuwuhlangothi oluhle lwempi.
“Phakathi nokuhlasela ngamabhomu okunzima, sasihlala nomakhelwane ezitebhisini, njengoba leyo kuyindawo ephephe kakhulu phakathi nokudubulana ngezimbumbulu. Sasikhuluma njalo nabo ngoMbuso kaNkulunkulu njengowukuphela kwekhambi lezinkinga zesintu, futhi sasithandaza njalo kuNkulunkulu wethu, uJehova. Lokhu kwaziwa yibo bonke.
“Ngezinye izikhathi ukudubulana ngezimbumbulu kwakuthatha izinsuku eziningi, futhi sasingakwazi ukuya emihlanganweni. Ngakho ngangiza nomagazini wami weNqabayokulinda futhi ngiwutadishe lapho ngihlezi ezitebhisini. Lokho kwavusa isithakazelo somakhelwane bethu. Abanye babo babengasikhulumisi ngoba singoFakazi BakaJehova. Kodwa lapho indlu yethu ishaywe ngembumbulu, bamangala ngothando olwaboniswa abafowethu. Manje bafuna ukusikhulumisa. Lokho kwenza sakwazi ukubahambisela izikhokhelo zePhaphama!
“Lokhu okuhlangenwe nakho kwangenza ngazimisela ukuba ngiqhubeke ngikhuluma ngeqiniso. UJehova ufanelwe yikho konke ukukhulekela kwethu nayo yonke inhlonipho yethu nalo lonke udumo.”
“Igama LikaJehova Lasindisa Ukuphila Kwami”
Umzalwane waseBandleni laseRas Beirut uyalandisa: “Mina nomkami, nabafanyana bethu ababili, saqalisa usuku lwethu enkonzweni yendlu ngendlu engxenyeni esentshonalanga yeBeirut. Ntambama, saba nomhlangano oqhutshwa ngolimi lwesiNgisi ekhaya lami. Ngo-6:30 p.m. kwase kumnyama. Okuwukuphela kwabantu ababesemgwaqweni kwakungamadoda ahlomile. Amabhomu ayehla njengemvula. Izakhamuzi eziningi ezihlala esakhiweni esikuso zase zibalekile. Ayengekho amanzi nogesi. Khona-ke sezwa ukungqongqoza emnyango.
“Sicabanga ukuthi kungase kube omunye womakhelwane bethu odinga amanzi noma isinkwa, umkami wavula umnyango. Lapho kwakumi amadoda amane ahlomile. Akhomba umkami ngezibhamu futhi afuna mina engibiza ngegama. Ngalelosonto amadoda amane ayethathiwe emakhaya awo ngalendlela futhi abulawa ngokushesha. Lapho lamadoda ahlomile engibona, angikhomba ekhanda ngezibhamu zawo ezizishintshayo ayesethi ngihambe nawo. Ngathi kuwo: ‘Ngizohamba nani. Kodwa ake ngigqoke kuqala.’ Ngathandaza kuJehova ngayo yonke inhliziyo yami, ngicela usizo lwakhe. Njengoba ngangiqeda ukuthandaza, ngazizwa ngikhululeke kakhulu futhi ngaqala ukubheka lamadoda ahlomile nasabekayo njengabantu abavamile. Ngangingakhuluma nawo ngesibindi.
“Ngawabuza: ‘Yini eniyifunayo kimi? Ake sixoxe kancane endlini ngaphambi kokuba sihambe.’ Lapho sesisendlini yokuphumula, umholi wawo wangibuza: ‘Unaliphi igunya lokungena emizini futhi ushumayele kubantu?’ Ngaphendula: ‘Uphethe isibhamu ukuze uphoqelele intando yakho, futhi akukho muntu okuvimbelayo. Ngiphethe izindaba ezinhle zokuthula uJesu asiyala ukuba sizishumayele.’ Ngase ngichaza izinkolelo nomsebenzi woFakazi BakaJehova. Ngokushesha lapho ngithinta igama elithi Jehova, athi: ‘Sizokwaneliswa ukukubuza khona lapha. Asikho isidingo sokuba sihambe nawe.’ Ngokusobala, omunye wawo wayejwayelene nomzalwane othile. Wathi: ‘Lona ufana noJarjoura.’
“Safakaza kulawomadoda aphethe izibhamu futhi saphendula imibuzo yawo isikhathi esingangehora nengxenye. Khona-ke, kunokuba ahambe nami ngisebhuthini yemoto yawo njengoba ayenzile ngabanye, axolisa, angiqabula, athi ngiwazise uma ngidinga usizo lwawo, ayesehamba. Phakathi naso sonke lesosikhathi, ngangisizwa isivikelo sikaJehova. Ukuhlanganyela emsebenzini wendlu ngendlu ekuseni ngalelolanga nokuba khona emhlanganweni ntambama kwangiqinisa ukuba ngime ngiqine. Ngempela, igama likaJehova lasindisa ukuphila kwami.”—IzAga 18:10.
“Ukunakekela KukaJehova Kwasizungeza”
Omunye umzalwane eBeirut uyabhala: “KwakungoLwesithathu, ngomhla ka-31 January, 1990. Lapho ngisebenza nomfowethu endlini kadade, ukulwa kwaphinde kwaqala futhi. Kwaqhuma amabhomu yonke indawo. Ngenxa yempi esabekayo, sasingenakubuyela ekhaya. Lodade wayenomoya wokungenisa izihambi ngisho nakuba ayenezingcezu ezimbalwa kuphela zezinkwa.
“Ngangikhathazeke kakhulu ngomkami ngoba ungowasePhilippine futhi akabujwayele ubudlova bempi. Nokho, ngosuku lwesibili ngakwazi ukuhamba ngiye endlini yami. Izinqwaba zempahla yasendlini zazivimbe imigwaqo, kodwa ngosizo lukaJehova, umkhaya wami wawuphephile. Ngemva kokuzola kwesikhashana, ukudubulana ngezimbumbulu okukhulu kwaphinde kwaqala futhi. Sacasha ekhaya lomzalwane elaliseduze kwelethu. Sasibahlanu—umkami, indodana yami eneminyaka emibili, yimina, umfowethu kanye nomkakhe. Amabhomu, izimbumbulu, namarokhethi kwawela yonke indawo, kodwa ukunakekela kukaJehova kwasizungeza. Zadlula izinsuku ezimbili zokudubulana ngezimbumbulu okunzima, njengoba sasilokhu silele phansi sinukelwa umusi wamabhomu.
“Njengoba sasilalele iziqhumane, sakhumbula amazwi kaDavide akumaHubo 18:1-9, 16-22, 29, 30. Kulezozikhathi ezinzima, naphezu kwakho konke lokho okwakwenzeka, sasijabule futhi sasisakwazi ukumamatheka. Sathandaza kuJehova ukuthi uma singafa, kwangathi singafa kahle, singezwa ubuhlungu. Ithemba lethu ovukweni laliqinile.
“Usuku olulandelayo lwalungakholeki. Amabhomu acishe abe u-25 awela eduzane nendlu esasicashe kuyo, kodwa akukho noyedwa kithi owalimala. Ingabe ungacabanga indlela esazizwa ngayo njengoba sasizwa isivikelo sikaJehova? Ekuseni ngosuku olulandelayo, ngokushesha sanquma ukuba sibaleke. Imoto yami kwakuyiyo yodwa emgwaqweni eyayingashiswanga. Ngashayela phakathi kwamabhomu agqitshwayo kanye namanye amabhomu, futhi ngosizo lukaJehova, sakwazi ukubalekela endaweni eyayizole kangconywana kuneyethu. Lapho, abafowethu ngothando basinikeza izimpahla, ukudla nemali.
“Naphezu kwabo bonke ubunzima, sazizwa sijabule ngoba uJehova wayenathi. Cishe kwakusengathi wayethumele izingelosi zakhe ukuba zidedisele amabhomu kude nathi. (IHubo 34:7) Yebo, injabulo yethu yayinkulu. Kodwa injabulo yethu iyoba nkulu kakhulu ngemva kokusinda eArmagedoni.”
Usizo Lwesimo Esiphuthumayo Luyasebenza!
Ezinye izindawo eBeirut zazibukeka sengathi zaba nokuzamazama komhlaba. Eziningi zezindlu zabafowethu zacekelwa phansi noma zadilizwa. Lapho kuphakama isimo esibucayi samuva, iKomiti Yegatsha yahlela ikomiti yosizo lwesimo esiphuthumayo ukuze inakekele izidingo zabazalwane. Yaqala ukusebenza ngoFebruary 16, 1990, cishe ngesikhathi lapho ekugcineni sasithuthela ezindaweni ezazithintekile. Injongo yalekomiti yayikathathu: ukunikeza isikhuthazo esingokomoya kubazalwane; ukunakekela izidingo zabo zemali, ukudla namanzi; nokubasiza ukuba balungise noma bakhe kabusha amakhaya abo.
Sasingekho isidingo sokucela izisebenzi zokuzithandela. Usuku ngalunye abaningi babefika ekuseni kakhulu bezosiza. Nanka amanye amazwi alabo abasizwa:
Omunye udade, njengoba indlu yakhe yayihlanzwa futhi ivuselelwa, wathi: “Ngangizwile ngosizo olunikezwa abazalwane lapho kwenzeka inhlekelele. Manje ngiyalubona futhi ngiyaluzwa.” Ngisho nomakhelwane wakhe, owesifazane ongumMuslim, watshela lodade: “Nithandana ngempela. Eyenu inkolo ngeyeqiniso. Manje ngizohamba ngiye edolobhaneni lakithi futhi ngitshele bonke abantu ngalokho enikwenzayo lapha.” Lomakhelwane wazilethela ukudla izisebenzi zokuzithandela.
Udade osekhulile waphawula: “Ngangilindele ukuthi nizoza ningivakashele, kodwa angizange ngilindele ukuthi iNhlangano yayizothumela othile ukuba angilethele amanzi.” Wayekhala njengoba ayeqabula umzalwane owayezile ezomsiza.
Umkhaya wabantu abathathu—indoda nomfazi ababengabamemezeli abangabhapathiziwe kanye nomfanyana wabo—wavakashelwa futhi wanikezwa ibhokisi elikhulu lobisi, isinkwa, amanzi okuphuza nemali. Lapho betshelwa ukuthi oFakazi BakaJehova babenze lelilungiselelo, indoda yathi: “NgangiseSontweni LabaVangeli iminyaka engu-11 futhi ngangishiseka kakhulu. Kodwa kuleminyaka yempi engu-15 eLebanon, abazange bake bacabange ukwenzela amalungu abo into efana nalena.” Uyaqhubeka: “Lena ngempela ukuphela kwenhlangano kaNkulunkulu.” Lendoda nomkayo babhapathizwa emhlanganweni ngoMay 1990.
Omunye umdala waphawula: “Asinawo amazwi anele okuzwakalisa ukubonga kwethu ngemisebenzi yothando enayenzela abazalwane abathintekile. Ngahlabeka umxhwele kakhulu kangangokuba ngakhala lapho ngibona iqembu labazalwane abasebasha, izisebenzi zokuzithandela, bakha kabusha indlu yabazali bami. Ngisho nomakhelwane bethu abangebona oFakazi bazwakalisa ukwazisa kwabo. Siyambonga ngempela uJehova nenhlangano yakhe ngokusekela okungokoqobo okuye kwanikezwa. Yeka indlela ayiqiniso ngayo amazwi omhubi kumaHubo 144:15: ‘Babusisiwe abantu abaNkulunkulu wabo unguJehova.’”
“Niluhlobo Luni Lwabantu?”
Omunye udade onomkhaya wabhala: “Ngithanda ukuzwakalisa ukwazisa kwami okujulile ngothando lukaJehova nenhlangano yakhe. Indlu yami yashaywa ngezimbumbulu eziningi futhi yashiswa. Abaningi basitshela ukuthi yayingeke ilungiseke. Nokho, nansi manje imile ilungiswe ngokuphelele njengokungathi akuzange kwenzeke lutho kuyo, izungezwe amakhulukhulu ezindlu emgwaqweni wethu ezishisiwe nezidiliziwe.
“Ngisho nomakhelwane bethu, abangebona oFakazi BakaJehova, bayabuza: ‘Luvelaphi loluthando? Niluhlobo luni lwabantu? Bangobani labantu abasebenza ngentshiseko engaka futhi abathule nabaziphethe kahle kangaka? Makabong uNkulunkulu oninikeze loluthando nalomoya wokuzidela.’ Yeka indlela afaneleka ngayo amazwi eHubo 84:11, 12: ‘Ngokuba uJehova uNkulunkulu uyilanga nesihlangu; uJehova uyakupha umusa nodumo; akayikubenqabela okuhle abahamba ngobuqotho. Jehova-Sebawoti, ubusisiwe umuntu okwethembayo.’”
Indoda emkayo nabantwana bangoFakazi BakaJehova yabhala: “Ngithanda ukunibonga ngosizo lwenu lokulungisa indlu yethu. Umsebenzi wenu ubonise uthando oluqotho lobuKristu olungavamile neze kulezinsuku. Kwangathi uNkulunkulu angabusisa imizamo yenu.”
Ngemva kokuba indlu yomunye umdala isivuselelwe, wathi: “Siswele imilomo yokuzwakalisa lokho okusezinhliziyweni zethu. Asinawo amazwi okunitshela ngokwazisa kwethu ngoJehova nenhlangano yakhe. Sezwa ukuba seduze kukaJehova ekucindezelekeni kwethu. Uthando lwenu luye lwakhuthaza wonke amalungu omkhaya wami ukuba ahlanganyele ekusizeni abanye abahluphekile.”
Phakathi noApril, abantu abangu-194 eLebanon bajabulela umsebenzi wamaphayona asizayo. Ubusuku bangeSikhumbuzo babuzole kakhudlwana kunobunye ubusuku, futhi iSikhumbuzo saqhutshwa kunengqikithi yabangu-5 034 ababekhona. Yonke imihlangano eyayihleliwe yaqhutshwa, futhi inani labantu ababhapathizwe kulonyaka libe u-121, naphezu kwesiphithiphithi esikulelozwe. Imikhaya eminingi emabandleni yahamba unomphelo kulelizwe. Kodwa abasanda kuthakazela bathuthukela ekubhapathizweni, futhi abamemezeli boMbuso abangu-2 726 bayaqhubeka banda ngenani. Phakathi nonyaka wenkonzo ka-1990, bonke abantu bakaJehova eLebanon babona ukwethembeka kukaJehova njengoba ayesinakekela kahle futhi esiqondisa phakathi nezikhathi ezineziphithiphithi.—IHubo 33:4, 5, qhathanisa neNW; 34:1-5.