Uthando Lweqiniso Luyavuza
“UNkulunkulu kasiye ongalungile ukuba akhohlwe umsebenzi wenu nothando enalubonakalisa ngakulo igama lakhe.”—HEBERU 6:10.
1, 2. Kungani uthando lweqiniso lusivuza ngokomuntu siqu?
UTHANDO olungenabugovu luyimfanelo enkulu kakhulu, enhle kakhulu, eyigugu kakhulu esingayibonisa. Loluthando (ngesiGreki, a·gaʹpe) luhlala lufuna okuningi kithi. Kodwa ngoba sadalwa uNkulunkulu wokwahlulela ngokulunga nothando, sithola ukuthi uthando olungenabugovu luyavuza ngempela. Kungani lokhu kunjalo?
2 Esinye isizathu sokuba uthando lweqiniso luvuze sihilela isimiso sengqondo nomzimba, umphumela wemicabango nemizwelo emizimbeni yethu. Isazi sokucindezeleka sathi: “[Ukuthi] ‘Thanda umakhelwane wakho’ kungesinye sezeluleko ezincane ezihlakaniphe kakhulu zezokwelapha ezake zanikezwa.” Yebo, “umuntu onesihawu wenzela okuhle umphefumulo wakhe.” (IzAga 11:17) Lamazwi anokubaluleka okufanayo: “Umphefumulo ophanayo uyakukhuluphaliswa; ophuzisayo uyakuphuziswa naye.”—IzAga 11:25; qhathanisa noLuka 6:38.
3. Yini uNkulunkulu ayenzayo ukuze enze uthando lweqiniso lube oluvuzayo?
3 Uthando luyavuza futhi ngoba uNkulunkulu uyakuvuza ukungabi nabugovu. Siyafunda: “Onomusa kompofu utsheleka uJehova, nomsebenzi wakhe [uNkulunkulu] uyawubuyisela kuye.” (IzAga 19:17) OFakazi BakaJehova benza ngokuvumelana nalamazwi lapho bememezela izindaba ezinhle zoMbuso kaNkulunkulu. Bayazi ukuthi ‘uNkulunkulu kasiye ongalungile ukuba akhohlwe umsebenzi wabo nothando abalubonakalisa ngakulo igama lakhe.’—Heberu 6:10.
Isibonelo Sethu Esihle Kakhulu
4. Ubani onikeza isibonelo esihle kakhulu sokuthi uthando lweqiniso luyavuza, futhi ukwenze kanjani lokho?
4 Ubani onikeza isibonelo esihle kakhulu sokuthi uthando lweqiniso luyavuza? Phela, akekho omunye osinikezayo ngaphandle kukaNkulunkulu ngokwakhe! “Walithanda izwe [lesintu] kangaka, waze wanikela ngeNdodana yakhe ezelwe yodwa.” (Johane 3:16) Ukunikela ngeNdodana yakhe ukuze labo abamukela lowomhlatshelo wesihlengo bathole ukuphila okuphakade ngokuqinisekile kwamlahlekisela kakhulu uJehova, futhi kwabonisa ngokucacile ukuthi unakho kokubili uthando nozwela. Lokhu kuboniswa ngokwengeziwe iqiniso lokuthi ‘ezinhluphekweni zonke zikaIsrayeli eGibithe, wahlupheka naye.’ (Isaya 63:9) Kumelwe ukuba kwamhlupha kakhulu kangakanani uJehova ukubona iNdodana yakhe ihlupheka esigxotsheni sokuhlushwa nokuyizwa ikhala: “Nkulunkulu wami, Nkulunkulu wami, ungishiyeleni na?”—Mathewu 27:46.
5. Yini eye yenzeka ngenxa yokuthi uNkulunkulu wasithanda isintu kangangokuthi wanikela ngeNdodana yakhe njengomhlatshelo?
5 Ingabe uJehova wakuthola kuvuza ukubonakalisa kwakhe siqu uthando lweqiniso? Yebo kunjalo ngempela. Ngokuvelele, yeka impendulo uNkulunkulu akwazi ukuyijikijela ebusweni bukaDeveli ngoba uJesu wazibonakalisa ethembekile naphezu kwakho konke lokho uSathane akwazi ukukwenza kuye! (IzAga 27:11) Eqinisweni, konke lokho uMbuso kaNkulunkulu oyokufeza ekususeni isihlamba egameni likaJehova, ekubuyiseleni iPharadesi kulomhlaba, nasekunikezeni izigidi ukuphila okuphakade kuyokwenzeka ngoba uNkulunkulu wasithanda isintu kangangokuthi wanikela ngegugu lenhliziyo yakhe alithanda kakhulu njengomhlatshelo.
Isibonelo SikaJesu Esihle
6. Uthando lwashukumisela uJesu ukuba enzeni?
6 Esinye isibonelo esihle esibonisa ukuthi uthando lweqiniso luyavuza yileso seNdodana kaNkulunkulu, uJesu Kristu. Uyamthanda uYise wasezulwini, futhi lolothando luye lwashukumisela uJesu ukuba enze intando kaJehova kungakhathaliseki ukuthi kwenzekani. (Johane 14:31; Filipi 2:5-8) UJesu waqhubeka ebonisa uthando lwakhe ngoNkulunkulu ngisho nakuba ngezinye izikhathi lokho kwakusho ukuba anxuse uYise “[ngo]kudazuluka okukhulu, nezinyembezi.”—Heberu 5:7.
7. Kungaziphi izindlela uJesu eye wathola uthando lweqiniso luvuza?
7 Ingabe uJesu wavuzwa ngothando olunjalo lokuzidela? Ngempela kunjalo! Cabanga ngenjabulo ayithola kuzo zonke izinto ezinhle azenza phakathi nenkonzo yakhe yeminyaka emithathu nengxenye. Yeka indlela abasiza ngayo kakhulu abantu ngokomoya nangokwenyama! Ngaphezu kwakho konke, ngokubonisa ukuthi umuntu ophelele wayengabugcina ngokuphelele ubuqotho kuNkulunkulu naphezu kwakho konke lokho uSathane ayengakwenza kuye, uJesu waba nokwaneliseka kokubonisa uDeveli njengomqambimanga. Ngaphezu kwalokho, njengenceku kaNkulunkulu ethembekile, uJesu wathola umvuzo omkhulu wokungafi lapho evuselwa ekuphileni kwasezulwini. (Roma 6:9; Filipi 2:9-11; 1 Thimothewu 6:15, 16; Heberu 1:3, 4) Futhi yeka amalungelo amangalisayo angaphambi kwakhe eArmagedoni naphakathi kokuBusa kwakhe kweMinyaka Eyinkulungwane, lapho iPharadesi liyobuyiselwa emhlabeni futhi izinkulungwane zezigidi ziyovuswa kwabafileyo! (Luka 23:43) Akukho kungabaza ngokuthi uJesu uye wathola uthando lweqiniso luvuza.
Isibonelo SikaPawulu
8. Kwaba yini okuhlangenwe nakho kukaPawulu ngenxa yothando lwakhe lweqiniso ngoNkulunkulu nangomakhelwane wakhe?
8 Umphostoli uPetru wake wabuza uJesu: “Bheka, thina sishiyé konke, sakulandela. Pho, siyakutholani na?” Ngokwengxenye, uJesu waphendula: “Nalowo oshiyé izindlu, noma abafowabo, noma odadewabo, noma uyise, noma unina, noma abantwana, noma amazwe ngenxa yegama lami, uyakwamukeliswa okuphindwé kaningi, adle ifa lokuphila okuphakade.” (Mathewu 19:27-29) Sinesibonelo esivelele salokhu kumphostoli uPawulu, owajabulela izibusiso eziningi, njengoba zilotshwe ikakhulukazi uLuka encwadini yezEnzo. Uthando lweqiniso ngoNkulunkulu nangomakhelwane wakhe lwabangela uPawulu ukuba ashiye umsebenzi wakhe njengomFarisi ohlonishwayo. Futhi, cabanga ngalokho uPawulu akukhuthazelela ngokushaywa, izingozi zokufa, izingozi, nokuswela—konke ngenxa yothando lweqiniso ngoNkulunkulu nenkonzo yaKhe engcwele.—2 Korinte 11:23-27.
9. UPawulu wavuzwa kanjani ngokubonakalisa uthando lweqiniso?
9 Ingabe uJehova wamvuza uPawulu ngokuba isibonelo esihle kanjalo ekubonakaliseni uthando lweqiniso? Nokho, cabanga ngendlela inkonzo kaPawulu eyayinezithelo ngayo. Wakwazi ukumisa amabandla amaningi obuKristu ngokulandelana. Futhi yeka izimangaliso uNkulunkulu amnika amandla okuba azenze! (IzEnzo 19:11, 12) UPawulu waba nelungelo futhi lokuthola imibono engaphezu kweyemvelo nokubhala izincwadi ezingu-14 manje eziyingxenye yemiBhalo YamaKristu YesiGreki. Ekugcineni, wanikezwa umklomelo wokungafi emazulwini. (1 Korinte 15:53, 54; 2 Korinte 12:1-7; 2 Thimothewu 4:7, 8) Ngokuqinisekile uPawulu wathola ukuthi uNkulunkulu uyaluvuza uthando lweqiniso.
Uthando Lweqiniso Luyavuza Osukwini Lwethu
10. Ukuba umfundi kaJesu nokubonakalisa uthando lwethu ngoJehova kungase kube naziphi izindleko?
10 Ngokufanayo oFakazi BakaJehova namuhla baye bathola ukuthi uthando lweqiniso luyavuza. Ukubonisa uthando lwethu ngoJehova ngokuthatha ukuma kwethu ngasohlangothini lwakhe futhi sibe abafundi bakaJesu kungase kusilahlekisele ngisho nangokuphila kwethu njengabagcini bobuqotho. (Qhathanisa nesAmbulo 2:10.) Yingakho uJesu athi kumelwe sibale izindleko. Kodwa lokho asikwenzi ukuze sithole ukuthi ukuba umfundi kuyavuza yini noma cha. Kunalokho, lokho sikwenza ukuze sizilungiselele ukukhokha noma yini ukuba umfundi okungase kuyibize.—Luka 14:28.
11. Kungani abanye behluleka ukuzinikezela kuNkulunkulu?
11 Namuhla, abaningi—ngokungangabazeki izigidi—bayasikholelwa isigijimi oFakazi BakaJehova ababalethela sona sivela eZwini likaNkulunkulu. Kodwa bayanqikaza ekuzinikezeleni kuNkulunkulu futhi babhapathizwe. Kungenzeka yini ukuthi lokhu kungoba bantula uthando lweqiniso ngoNkulunkulu abanye abanalo? Abaningi bayehluleka ukuthatha izinyathelo zokuzinikezela nobhapathizo ngoba bafuna ukuhlala bamukeleka kumngane ongakholwa. Abanye abasondeli kuNkulunkulu ngoba banesimo sengqondo somunye usomabhizinisi owatshela uFakazi: “Ngiyasithanda isono.” Ngokusobala, abantu abanjalo abakwazisi konke lokho uNkulunkulu noKristu ababenzele khona.
12. Yini lomagazini oye wayisho eqokomisa imivuzo yolwazi olusisondeza kuNkulunkulu ngothando lweqiniso?
12 Uma sinokwazisa okuqotho ngakho konke lokho uJehova uNkulunkulu noJesu Kristu abasenzele khona, lokhu siyokubonisa ngokukhokha ngokuzithandela noma yiziphi izindleko zokukhonza uBaba wethu wasezulwini futhi sibe abanye babafundi bakaJesu. Ngenxa yothando lweqiniso ngoNkulunkulu, amadoda nabesifazane kuzo zonke izizinda zokuphila—osomabhizinisi abachumayo, abadlali abavelele, njalonjalo—baye badela imisebenzi yokuzifunela okwabo ngenxa yenkonzo yobuKristu, njengoba kwenza umphostoli uPawulu. Futhi akukho lutho abayoluthatha esikhundleni semivuzo yokwazi nokukhonza uNkulunkulu. Kulokhu, iWatch Tower yake yathi: “Ngezinye izikhathi siye sabuza, Bangaki abazalwane abebengathanda ukwenana lokho abakwaziyo ngeQiniso [ngoR2 600]? Asikho isandla esaphakama! Ubani obengakwenana [ngoR26 000]? Akekho! Ubani obengakwenana [ngoR2 600 000]? Ubani obenganana lokho akwaziyo ngomuntu waPhezulu neCebo Laphezulu ngezwe lonke? Akukho-muntu! Sase sithi, Bangane abathandekayo, anisona isixuku esingenelisekile neze. Uma nizizwa nicebe kangangokuthi akukho lutho eninganana ngalo ulwazi lwenu ngoNkulunkulu, khona-ke nizizwa nicebile njengathi.” (December 15, 1914, ikhasi 377) Yebo, ulwazi oluqondile ngoNkulunkulu nezinjongo zakhe lusisondeza kuye ngothando lweqiniso olunomvuzo ngempela.
13. Kumelwe sisibheke kanjani isifundo somuntu siqu?
13 Uma sithanda uNkulunkulu, siyolwela ukwazi nokwenza intando yakhe. (1 Johane 5:3) Siyoba nombono ongathi sína ngesifundo somuntu siqu, umthandazo, nokuba khona emihlanganweni yobuKristu. Konke lokhu kudinga ukuzidela, ngoba lemisebenzi ihilela ukudela isikhathi, amandla, nokunye. Kungase kudingeke ukuba sikhethe phakathi kokubuka uhlelo oluthile lwethelevishini nokuhileleka esifundweni seBhayibheli somuntu siqu. Kodwa yeka indlela esiqina kakhulu ngayo ngokomoya, yeka indlela esikwazi kangcono ngayo ukufakaza kwabanye, futhi yeka indlela esithola okuningi ngokwengeziwe ngayo emihlanganweni yobuKristu uma sithatha isifundo esinjalo ngokungathi sína futhi sibekela eceleni isikhathi saso esanele!—IHubo 1:1-3.
14. Ubaluleke kangakanani umthandazo nobuhlobo obuhle noJehova uNkulunkulu?
14 Ingabe sikujabulela njalo ukukhuluma noBaba wethu wasezulwini ‘ngokuqinisela njalo ekukhulekeni’? (Roma 12:12) Noma ingabe ngokuvamile simatasa kakhulu ukuba sibonise ukwazisa okufanele ngalelilungelo eliyigugu? ‘Ukukhuleka ngokungaphezi’ kuyindlela ebalulekile yokuqinisa ubuhlobo bethu noJehova uNkulunkulu. (1 Thesalonika 5:17) Futhi ayikho into engasisiza lapho sibhekene nezilingo njengobuhlobo obuhle noJehova. Yini eyenza uJosefa wakwazi ukwenqaba lapho elingwa umkaPotifari? Futhi kungani uDaniyeli engazange ayeke ukuthandaza lapho umthetho wamaMede namaPheresiya umenqabela ukuba acele kuJehova? (Genesise 39:7-16; Daniyeli 6:4-11) Phela, ubuhlobo obuhle noNkulunkulu obasiza lawomadoda ukuba anqobe, ngisho nanjengoba buyosisiza nathi ukuba senze okufanayo!
15. Kumelwe siyibheke kanjani imihlangano yobuKristu, futhi ngani?
15 Khona-ke, sikuthatha ngokungathi sína kangakanani ukuba khona emihlanganweni yethu emihlanu yamasonto onke? Ingabe sivumela ukukhathala, ukugula okuncane okungokomzimba, noma isimo sezulu esithanda ukuba sibi kuphazamise isibopho sethu sokungakuyeki ukuhlangana nesikholwa kanye nabo? (Heberu 10:24, 25) Omunye osebenza ngemishini waseMelika owayethola iholo elihle wabona ukuthi umsebenzi wakhe ngokuphindaphindiwe wawuphazamisa ukuba khona kwakhe emihlanganweni yobuKristu. Ngakho washintsha umsebenzi wakhe, evuma ukulahlekelwa ngokwezimali ukuze akwazi ukuba khona njalo kuyo yonke imihlangano yebandla. Imihlangano yethu isenza sikwazi ukujabulela ukukhuthazana nokuqinisa ukholo lomunye nomunye. (Roma 1:11, 12) Kuzo zonke lezindaba, asitholi yini ukuthi “ohlwanyela kakhulu uyakuvuna kakhulu”? (2 Korinte 9:6) Yebo, ukubonakalisa uthando lweqiniso ngezindlela ezinjalo kunomvuzo kakhulu.
Uthando Lweqiniso Nenkonzo Yethu
16. Ungaba yini umphumela uma uthando lusishukumisela ukuba sifakaze ngokwethukela?
16 Uthando lusishukumisela ukuba sishumayele izindaba ezinhle njengabantu bakaJehova. Ngokwesibonelo, lusishukumisela ukuba sihlanganyele ekufakazeni ngokwethukela. Singase singabaze ukufakaza ngokwethukela, kodwa uthando luyosiqhubela ekubeni sikhulume. Ngempela, uthando luyosibangela ukuba sicabange ngezindlela eziwubuhlakani zokuqalisa ingxoxo bese siyiqondisa eMbusweni. Ngokwesibonelo: Esendizeni, umdala ongumKristu wake wazithola ehlezi eceleni kompristi ongumRoma Katolika. Ekuqaleni, umdala wahlohla umpristi ngemibuzo engacasuli. Nokho, ngesikhathi umpristi ehla endizeni, isithakazelo sakhe sasesimshukumisele ekubeni athathe ezimbili zezincwadi zethu. Yeka umphumela omuhle wokufakaza ngokwethukela!
17, 18. Yini uthando oluyosishukumisela ukuba siyenze ngokuphathelene nenkonzo yobuKristu?
17 Uthando lweqiniso lusishukumisela futhi ukuba sihlanganyele njalo emsebenzini wokushumayela wendlu ngendlu nakwezinye izinhlobo zenkonzo yobuKristu. Ngezinga esikwazi ngalo ukuba nezingxoxo zeBhayibheli, siyoletha udumo kuJehova uNkulunkulu futhi siyosiza abanjengezimvu ukuba bangene endleleni eya ekuphileni okuphakade. (Qhathanisa noMathewu 7:13, 14.) Ngisho noma sehluleka ukuba nezingxoxo zeBhayibheli, imizamo yethu iyobe ayenzelwanga ize. Khona kanye ukuba khona kwethu emakhaya abantu kusebenza njengobufakazi, futhi thina ngokwethu siyazuza enkonzweni, ngoba ngeke simemezele amaqiniso eBhayibheli ukholo lwethu lungaqini. Yiqiniso, ukuhamba indlu ngendlu kudinga ukuzithoba, ‘senze konke ngenxa yevangeli, ukuze nathi sibe ngabahlanganyela nabanye kulona.’ (1 Korinte 9:19-23) Kodwa ngenxa yothando ngoNkulunkulu nabantu esikanye nabo, ngokuzithoba senza umzamo futhi sivuzwa ngezibusiso ezicebile.—IzAga 10:22.
18 Futhi kudinga uthando lweqiniso ngezinceku zikaJehova ukuqikelela ukwenza izimpindelo kubantu abanesithakazelo eqinisweni leBhayibheli. Ukuqhuba izifundo zeBhayibheli masonto onke nazinyanga zonke kuwukubonakaliswa kothando ngoNkulunkulu nomakhelwane, ngoba lomsebenzi udinga ukudela isikhathi, umzamo, nezinto ezibonakalayo. (Marku 12:28-31) Nokho, lapho sibona omunye walabafundi beBhayibheli ebhapathizwa futhi mhlawumbe engenela ngisho nenkonzo yesikhathi esigcwele, akusiqinisekisi yini ukuthi uthando lweqiniso luyavuza?—Qhathanisa neyesi-2 Korinte 3:1-3.
19. Yikuphi ukuhlobana okukhona phakathi kothando nenkonzo yesikhathi esigcwele?
19 Uthando olungenabugovu lusishukumisela ukuba sidele ukunethezeka ngokwezinto ezibonakalayo ngenxa yenkonzo yesikhathi esigcwele uma kunokwenzeka ngathi ukuba sihlanganyele emsebenzini onjalo. Izinkulungwane ngezinkulungwane zoFakazi zingafakaza ukuthi ukubonakalisa uthando lwazo ngalelozinga kuye kwaba nomvuzo kakhulu. Uma izimo zikuvumela ukuba uhlanganyele enkonzweni yesikhathi esigcwele kodwa ungalibambi lelothuba, awuzazi izibusiso ezikuphuthelayo.—Qhathanisa noMarku 10:29, 30.
Luyavuza Ngezinye Izindlela
20. Uthando lusisiza kanjani ukuba sithethelele?
20 Enye indlela uthando lweqiniso oluvuza ngayo ukuthi lusisiza ukuba sithethelele. Yebo, uthando “alunagqubu.” Eqinisweni, “uthando lusibekela inqwaba yezono.” (1 Korinte 13:5; 1 Petru 4:8) Ukuthi “inqwaba” kusho ukuthi izono eziningi, akunjalo? Futhi yeka indlela okuvuza ngayo ukuba othethelelayo! Uma uthethelela, lokhu kwenza wena kanye nalowo okonile nizizwe kangcono. Kodwa okubaluleke kakhulu iqiniso lokuthi ngaphandle kokuba sesibathethelele kakade labo abasonayo, asinakulindela uJehova ukuba asithethelele.—Mathewu 6:12; 18:23-35.
21. Uthando lweqiniso lusisiza kanjani ukuba sizithobe?
21 Ngaphezu kwalokho, uthando lweqiniso luyavuza ngoba lusisiza ukuba sibe abazithobayo. Uma sithanda uJehova, siyozithoba ngaphansi kwesandla sakhe esinamandla. (1 Petru 5:6) Uthando ngaye luyosishukumisela futhi ukuba sizithobe ethuluzini lakhe elikhethiwe, “inceku ethembekileyo neqondayo.” Lokhu kuhlanganisa ukuzithoba kulabo abaholayo ebandleni. Lokho kuyavuza ngoba ukwehluleka ukwenza kanjalo ‘akunakusisiza.’ (Mathewu 24:45-47; Heberu 13:17) Yebo, lesimiso sokuba abazithobayo siyasebenza futhi phakathi kweqembu lomkhaya. Inkambo enjalo iyavuza ngoba ikhuthaza injabulo, ukuthula, nobunye emkhayeni kuyilapho isinikeza ukwaneliseka okuhambisana nokwazi ukuthi sithokozisa uNkulunkulu.—Efesu 5:22; 6:1-3.
22. Singaba kanjani abajabula ngempela?
22 Ngokucacileyo-ke, imfanelo enkulu kakhulu esingayihlakulela ia·gaʹpe, uhlobo lothando olungenabugovu, olunezimiso. Futhi akunakuba nakungabaza ngokuthi uthando lweqiniso luyavuza. Ngakho-ke, siyojabula ngempela uma sihlakulela futhi sibonakalisa lemfanelo ngesilinganiso esikhulu kunanini ngaphambili kube inkazimulo kuNkulunkulu wethu onothando, uJehova.
Ubungaphendula Kanjani?
◻ Kungaziphi izindlela uJehova uNkulunkulu eye wabonakalisa ngazo uthando lweqiniso?
◻ UJesu Kristu uye walubonisa kanjani uthando?
◻ Yisiphi isibonelo umphostoli uPawulu asibeka ekuboniseni uthando lweqiniso?
◻ OFakazi BakaJehova bebelokhu belubonakalisa kanjani uthando?
◻ Kungani ubungathi uthando lweqiniso luyavuza?
[Isithombe ekhasini 16]
Uthando lukaJehova ngesintu lwamshukumisela ukuba anikele ngeNdodana yakhe ukuze sizuze ukuphila okuphakade. Ingabe uyalwazisa uthando olunjalo?
[Isithombe ekhasini 18]
Uthando lweqiniso ngoJehova luyosishukumisela ukuba ‘ekukhulekeni siqinisele njalo’