Isizathu Sokuba IRéunion Ibe NamaHholo OMbuso Amaningi Kangaka
AMAKHILOMITHA acishe abe ngu-640 ukuya empumalanga yeMadagascar, isiqhingi esincane saseRéunion sivela ngokungazelelwe kudeda ngendlale woLwandlekazi i-Indian. Nakuba singamakhilomitha angu-60 ubude namakhilomitha angu-50 kuphela ububanzi, sidumile ngezintaba-mlilo nangemibukiso yomlilo eyenzeka ngezikhathi ezithile. Isiqongo esiphakeme kunazo zonke, esiphakeme ngamamitha angu-3 069 ngaphezu kolwandle, yintaba-mlilo engasaqhumi iPiton des Neiges (Isiqongo Samaqhwa). Eningizimu-mpumalanga yesiqhingi kunentaba-mlilo esaqhuma engamamitha angu-2 625 ukuphakama ebizwa ngokufanelekile ngokuthi iPiton de la Fournaise (Isiqongo Somlilo). Yeka umbukwane eba yiwo uma iqhuma ebusuku! Imigwaqo eminingi igwinciza yehla yenyuka emaweni, ibonisa izindawo ezihlaba umxhwele zalokho okuye kwabizwa ngokuthi ubuhle obesabekayo beRéunion.
Kungani KunamaHholo OMbuso Amaningi Kangaka?
Nokho, ubuhle bangempela beRéunion, busendleleni abaningi abahlala esiqhingini abasabela ngayo ‘ezindabeni ezinhle zoMbuso’ ezimenyezelwa oFakazi BakaJehova. (Mathewu 24:14) Umsebenzi wabo wokushumayela waqala ngo-1960, lapho kufika izikhonzi ezimbili zesikhathi esigcwele zivela eFrance. Manje eminyakeni engu-30 kamuva, oFakazi abangu-1 665 bamatasa ekusakazeni isigijimi soMbuso phakathi kwabantu abangu-582 000 abakhe kulesiqhingi—isilinganiso sikaFakazi oyedwa kubantu abangu-350 esiqhingini.
Ukwanda okungako kuye kwadinga ukuba kwakhiwe izindawo ezifanelekayo zokuhlangana ukuze oFakazi baqhubeke nokukhulekela kwabo nemfundo engokomoya. (Heberu 10:24, 25) Kakade, amabandla angu-13 kwakungu-19 asewakhile amaHholo awo oMbuso. Ngenxa yeziphepho ezenzeka njalo kulendawo, lezi izakhiwo zamatshe aqinile ezidinga isikhathi esiningi—nezindleko ezengeziwe—ukuze zakhiwe. Ngakho kuye kwenzeka kanjani ukuba kwakhiwe amahholo anjalo, njengoba oFakazi abaningi kulesiqhingi behola amaholo alinganiselwe futhi benemikhaya emikhulu abayondlayo? Ngamazwi eBhayibheli, impendulo ingukuthi ‘isandla sikaJehova asifinyele.’—Isaya 59:1.
Izithiyo Ziyanqotshwa
Ngokwesibonelo, cabangela indlela uJehova ashukumisa ngayo izinhliziyo zabantu ukuba basize ekwakhiweni kweHholo LoMbuso edolobheni elincane laseSaint-Louis, eningizimu-ntshonalanga yeRéunion. Lapho amapulani ngokokuqala evunyelwa ngokomthetho, uFakazi osemusha watshela umfundisi wakhe wekilasi lokwakha ngamatshe ukuthi iHholo LoMbuso lalizokwakhiwa izisebenzi zokuzithandela. Umfundisi akanikelanga nje kuphela ngaye siqu kodwa futhi waletha nekilasi lakhe lonke esakhiweni ukuba lizosiza ngokumba isisekelo. Kamuva, wanikela ngezinsimbi ezazidingeka esisekelweni.
Lapho izisebenzi zokuzithandela ezingaphezu kwekhulu zifika ngeholide lomphakathi ukuzothela ukhonkolo endaweni engamamitha-skwele angu-190, kwazimangaza ukuthola ukuthi umasipala wayewavalile amanzi. Zazizowulungiselela kanjani ukhonkolo ngaphandle kwamanzi? Esinye sezisebenzi esasazi owayephethe emnyangweni wezomlilo sanquma ukuyochaza lesimo esibucayi kulendoda enomusa. Isikhashana kamuva, iloli lomlilo lafika esakhiweni. Inqola yayinamanzi anele okwenza umsebenzi, futhi umnyango wezomlilo wayivumela ukuba ihlale lapho usuku lonke! Ngokuqondakalayo, zonke izisebenzi zokuthandela zashukumiseleka ukuba zisebenze ngenhliziyo yonke.
Usizo lukaJehova lwabonakala endleleni izithiyo ezanqotshwa ngayo. Ngokwesibonelo, kwelinye izinga lokwakha, uphahla lwangaphakathi lwase lukulungele ukuba kufakwe izibani ezingu-22 ezikhethekile ezazi-odwe ezinyangeni eziyisishiyagalombili ngaphambili. Kodwa inkampane yazisa abazalwane ukuthi uhlobo ababelufuna lwalungasenziwa. Yini eyayingenziwa? Ingabe wonke umklamo nalo lonke uphahla lwangaphakathi kwakuzoshintshwa? Cha, ngoba ngaso kanye isikhathi esifanele, abazalwane bezwa ngomnini wenkontilaki yasendaweni owayenamalambu afanayo esakhiwo esingazange siphumelele.
Wabuzwa: “Mangaki onawo?”
Waphendula: “Angu-25.”
Ngaphandle kokuchitha isikhathi izibani zathengwa futhi zafakwa.
Njengoba isakhiwo sasiqhubeka, umuntu owayesanda kuqala ukutadisha iBhayibheli noFakazi BakaJehova wahlatshwa umxhwele ngokujulile yilesakhiwo esihle.
“Ngitsheleni,” ebuza, “ingabe kukhona okunye enikudingayo?”
“Yebo,” kuphendula omunye umzalwane, “sidinga imishini yokukhulisa izwi.”
Ngalokho, lomuntu owayesanda kuthakazela wakhipha incwadi yakhe yamasheke wanikela cishe ngemali eyanele lonke uhlelo lokukhulisa izwi olusha. Iminikelo enjalo, kanye nomnikelo obolekwayo endlunkulu yeWatch Tower eUnited States, yasiza ibandla ukuze liqede leliHholo LoMbuso elihle.
Ngaphezu kwakho konke lokhu, iBandla laseSaint-Louis lajabula ngokufika kukaMzalwan’ uCarey W. Barber, ilungu leNdikimba Ebusayo yoFakazi BakaJehova, ezonikezela leliHholo LoMbuso ngoDecember 1988. UMzalwan’ uBarber wayehlelelwe ukuba eze evela endlunkulu yeNhlangano eBrooklyn, eNew York, azonikezela izakhiwo zegatsha elisha esiqhingini esingumakhelwane iMauritius. Lapho abazalwane eSaint-Louis bezwa ngalokhu, ngamaviki amathathu nje, bahlanganisa imali eyanele ukubhekana nezindleko zakhe zendiza nezelungu leKomiti yeGatsha yaseMauritius ukuze bakwazi ukusuka eMauritius beze eRéunion. Ngenxa yokwanda kusukela ngalesosikhathi ibandla laseSaint-Louis kuye kwadingeka lihlukane. Manje, amabandla amabili ahlanganyela leliHholo LoMbuso elisha.
Udumo Luya KuJehova
Kuthiwani ngamanye amabandla eRéunion? Ngenxa yokusabela okuhle emsebenzini wokushumayela ngoMbuso, inani lababa khona emihlanganweni liye lasukela emaphesentini angu-150 kuya kwangu-200 esibalo soFakazi BakaJehova abahlala kulesiqhingi. Ngakho kuyakhanya ukuthi kungani kudingeka amaHholo oMbuso eRéunion. Eqinisweni kuye kwakhiwa amanye amathathu emva kwelaseSaint-Louis, futhi lokho kuye kwenza isibalo sawo wonke saba ngu-13 emabandleni angu-19 esiqhingini.
Ngakho konke lokhu, udumo luya kuJehova, owabikezela: “Omncane uyakuba-yinkulungwane, ophansi abe-yisizwe esinamandla; mina nginguJehova, ngiyakukusheshisa ngesikhathi sakho.” (Isaya 60:22) Njengakwezinye izingxenye zomhlaba, lesiprofetho siye sagcwaliseka kulesiqhingi esihle.