Ukwenza Umsebenzi KaNkulunkulu Ngendlela KaNkulunkulu ENigeria
KWAKUNGUMBUKWANE ohlaba umxhwele. Izinqwaba ezinkulu zemishayo yensimbi—cishe ezingamakhilogremu ayingxenye yesigidi—ezazibekwe ethekwini laseHouston, eTexas, zeluleke zisuka kolunye uhlangothi ziya kolunye. Umlayishi wemikhumbi wayesebenza ukwamukela izimpahla eziningi ezizothunyelwa. Njengoba ayesebenza, wamangala ukubona ukuthi zonke zazibhalwe ukuthi “Watchtower.” Ekugcineni waya kumuntu owayengamele izinto ezithunyelwayo futhi wabuza: “Pho, yinde kangakanani yona lewatchtower [lenqabayokulinda]?”
Khona-ke umlayishi wemikhumbi wathola ukuthi lezinsimbi zazingeke zenziwe zibe inqabayokulinda engokoqobo. Kunalokho, zazizothunyelwa eIgieduma, eNigeria, lapho zazizosetshenziswa khona ekwakheni isakhiwo esisha segatsha leWatch Tower Society—idolobha elincane ngempela elisenkabeni yamahlathi aseAfrika.
Eminyakeni eyisithupha edlule lesisiza eIgieduma ngokuyinhloko sasiyihlathi eliminyene nemithi yenjoloba. Manje lendawo iyanakekelwa futhi yinhle; kunezimbali, amasimu, futhi ngisho nendawo eyipaki enezinyamazane! Nokho, emagcekeni kumi isakhiwo sokunyathelisa esingaphezu kwaso sonke isiqephu somhlaba esasinegatsha langaphambili eLagos. Ngaphakathi efekthri, kusebenza imishini emithathu yokunyathelisa, ngamunye wayo okwazi ukukhiqiza omagazini abangu-17 000 ngehora. Izakhiwo zokuhlala zingahlalisa abantu abangaphezu kuka-400. Isakhiwo sezinkonzo ezihlukahlukene sinegumbi elikhulu lokudlela nekhishi kanye nendawo yokunakekela abagulayo neyokunakekela amazinyo. Kunezimiso ezizimele zokuhambisa amanzi nokuthutha indle. Isiteshi sikagesi esilawulwa icomputer siphehla ugesi. KuneHholo LoMbuso, isakhiwo samahhovisi, nomnyango wezomlilo. Futhi uzothola imigwaqo nezibani zasemgwaqweni. Akumangalisi ukuthi abantu babiza lesisakhiwo seBethel eIgieduma ngokuthi idolobha. Futhi yakhiwa ngokuphelele yizisebenzi zokuzithandela ezingakhokhelwa futhi yaxhaswa ngokwezimali ngeminikelo yokuzithandela.
Ukwanda Okusheshayo
Nakuba leBethel inkulu kunawo wonke eNigeria, ayiyona eyokuqala. Eyokuqala yamiswa uMzalwan’ uWilliam R. Brown, owathuthela eLagos ngo-1930 yena nomkakhe nendodakazi yakhe. Amagumbi ambalwa akhokhelwayo ababehlala kuwo asebenza njengendlunkulu yegatsha leNhlangano eNtshonalanga Afrika, ngalesosikhathi eyayinakekela umsebenzi woMbuso eNigeria, eGhana, naseSierra Leone. Ngalesosikhathi, kwakunabamemezeli abayisikhombisa kuphela abakhuthele bezindaba ezinhle eNigeria.
UBible Brown, njengoba ayedume kanjalo, wayengumshumayeli okhuthele nonesibindi wezindaba ezinhle. Enganelisiwe ukuhlala isikhathi eside ehhovisi, wahambahamba ezweni ngemoto nangesitimela, enikeza izinkulumo zasobala futhi esakaza izincwadi eziningi kakhulu.
Njengoba isigijimi soMbuso esinamandla sasamukeleka ezingqondweni nasezinhliziyweni ezisabelayo, abantu abengeziwe baba abamemezeli boMbuso abashisekayo. Iminyaka eyishumi eyalandela yafana naleyonkathi ekhulwini lokuqala leminyaka eJerusalema lapho ‘izwi likaNkulunkulu landa, umumo wabafundi ukhula.’ (IzEnzo 6:7) Ngo-1940 inani labadumisi bakaJehova abakhuthele eNigeria lalenyuke ngokushesha lisuka kwabangu-7 liya kwabangu-1 051!
‘Omncane wayebe inkulungwane,’ kodwa lokhu kwakumane nje kuyisiqalo. (Isaya 60:22) Ngo-1947 iNhlangano yathumela eLagos izithunywa zevangeli ezintathu eziqeqeshwe eGileyadi. Omunye walezi, uAnthony Attwood, namanje usakhuthele esabelweni sakhe. Ukhumbula iBethel yangalesosikhathi: “Kwakuyindlu engaphezu kwesitolo sezicathulo. Kwakunamakamelo amathathu okulala, ikamelo lokuphumula eliyihhovisi, negumbi lokudlela. UMzalwane noDade Brown nomkhaya wabo basebenzisa amakamelo amabili okulala, futhi sobathathu thina esasiyizithunywa zevangeli saminyana ekamelweni lesithathu lokulala. Kwakunendawo eyanela imibhede emithathu kuphela elala umuntu oyedwa kanye nendawo yezimpahla eyakhelwe odongeni.”
Isidingo sendawo eyengeziwe sabangela ukuba kuthuthelwe esakhiweni esinezitezi ezintathu ngo-1948. Ngalesosikhathi inani labamemezeli eNigeria lase lifinyelele ku-6 825. Eminyakeni eyisishiyagalombili kamuva, lelinani lase liphindeke kathathu, ngakho iBethel yaphinda yathuthwa, yayiswa eShomolu, eLagos. Lapho, ngokokuqala eNigeria, iNhlangano yakha ikhaya layo siqu laseBethel, isakhiwo esinamakamelo okulala ayisishiyagalombili esiqeshini somhlaba esingamahektare angu-0,6. Uhulumeni wasendaweni wabiza umgwaqo wakhona ngokuthi iWatch Tower Avenue. Ensimini kwakunemithi eminingi, kuhlanganisa imithi kakhukhunathi kanye nezithelo ezinompe, ibreadfruit, imithi kakotapeya, nekamango. Kodwa phakathi neminyaka engu-33 eyalandela, izakhiwo zanezelwa futhi zandiswa. Phakathi nawo-1970, izakhiwo zazimboze cishe yonke indawo. Kwaphinda futhi kwadingeka ukuba kuthuthwe.
Izinkumbulo Zangesikhathi Sokwakha
Okokuqala, isiqephu somhlaba esingamahektare angu-31 satholwa eOtta, enyakatho yeLagos. Kodwa izinkinga zaqhubeka zivimba intuthuko. Ekugcineni, kwaba sobala ukuthi kwakungeyona intando kaJehova ukuba sithuthele lapho. Ngokulandelayo ukufunwa komhlaba kwelulelwa kuyo yonke ingxenye yezwe eseningizimu, futhi ngo-1983 iNhlangano yathola isiqephu somhlaba esingamahektare angu-57 eIgieduma, eZweni laseBendel.
Phakathi neminyaka eyisithupha eyalandela, izinhlwathi nezimfezi zazithutha njengoba abazalwane babefika nezinto zokusebenza ezisindayo. Inselele enkulu kulomsebenzi yayiwukuthi kwakunzima, noma cishe kungenakwenzeka, ukuthenga amathuluzi amaningi nezinto zokwakha endaweni. Kwakudingeka usizo lwangaphandle. Ngakho iqembu loFakazi eUnited States lacelwa ukuba lithole, lithenge, futhi lithumele izinto zokusebenza. UTerry Dean, umxhumanisi walomsebenzi omkhulu, uyalandisa: “Okwenza lomsebenzi waba mkhulu kakhulu kwakungukuthi cishe yonke into kwakumelwe ithunyelwe. Abazalwane eNigeria basitshela ukuthi okuwukuphela kwezinto zokwakha ababenazo kwakuyisihlabathi, usemende, namanzi!”
Kwaba kuhle ukuthi izinto zokwakha eziyisisekelo zazikhona, njengoba umsebenzi wokwakha wasebenzisa amathani kasemende angu-7 500, amathani esihlabathi angu-55 000, namathani angu-35 000 amatshe amancane. Futhi kwatholakala nenqwaba yamapulangwe. Nokho, phakathi neminyaka emihlanu eyalandela, amakhilogremu ayizigidi ezingu-4,5 ezinto zokwakha athunyelwa esuka eUnited States, enele ukuba agcwalise amabhokisi amakhulu emithwalo angu-347, okwakungathi uma ebekwe alandelana ayengaba amakhilomitha angu-3,5 ubude!
Amanye amagatsha nawo ngomusa anikela izinto ezazidingeka. INgilandi yanikela ngesimiso esiphelele sikagesi, kuhlanganisa nezinjini ezinkulu eziyisithupha zokusinika amandla. ISweden yanikela ngomshini wokuphakamisa izinto ezisindayo, ogandaganda, umshini wokumba, iloli, amathuluzi, impahla yasekhishini, nesiteshi sezingcingo. Lapho isitolo sezinto ezenziwe ngensimbi sasidayiswa, abazalwane baseSweden basithenga futhi bathumela konke okwakuphakathi kuso eNigeria. Cishe okuwukuphela kwezinto kulesitolo abangazithumelanga kwakungamahalavu eqhwa—ngokungangabazeki awusizo kakhulu eSweden kunaseAfrika!
Yebo, oFakazi basendaweni nabo banikela ngokwamandla abo. Abangaphezu kuka-125 000 babonisa ukuwusekela kwabo lomsebenzi ngokuba beze esakhiweni phakathi nesikhathi sokwakha. Abaningi basiza ngokwezimali. Omunye umnikelo wamasenti angu-50 wawuvela kumfana oneminyaka eyisikhombisa. Wayithola kanjani lemali? Uyise wamnika ucezu lukabhatata ukuba alupheke futhi aludle; kunalokho lomfana walulondoloza futhi walutshala phakathi nenkathi efanele. Kamuva wavuna ubhatata wakhe, wawuthengisa, futhi wanikela leyomali emsebenzini waseIgieduma.
Abanye oFakazi BakaJehova banikela ngamakhono abo, beqeqesha ngisho nabanye ukuba babe namakhono okwakha. Abaningi, abafinyelela ku-500 ngesikhathi esisodwa, banikela ngokusebenza kanzima, bekhandleka phansi kwelanga elishisa kakhulu nasezimvuleni zamazwe ashisayo ukuze baqede umsebenzi. Ngokwesibonelo, cabanga nje ngomsebenzi ohilelekile ekwakheni udonga oluzungeza isiza. Ezinyangeni eziyisikhombisa okwazithatha ukuqeda loludonga olucishe lube amakhilomitha amathathu, abazalwane ngabanye benza futhi bakhonkela kulendawo amabhuloko kakhonkolo angaphezu kuka-57 000! Omunye umzalwane wenza ihlaya: “Okwangenza ngaqhubeka kwakuwukubona amanqe ezungeza phezulu elindele ukuba ngiwe!” Eqinisweni, njengabanye abayizinkulungwane abanikela empumelelweni yaseIgieduma, washukunyiswa futhi wasekelwa umoya ongcwele kaJehova.
Ukuqashelwa Ngokomthetho
Izikhulu zikahulumeni zabambisana nathi ekusekeleni lomsebenzi. IHhovisi likaMongameli lakhipha imvume yokuthi zonke izinto zokwakha ezidingekayo ezivela ngaphandle mazingabizwa intela. Izikhulu zendawo azizange zizibize izimali zokuthuthukiswa komhlaba nezokusayinwa kwamapulani. Yimadlana encane kuphela yokwakha eyafuneka. Ngesinye isikhathi, lapho kunempikiswano ngokuphathelene nalomhlaba, iOmo N’oba, noma inkosi, yayo yonke leyondawo yangenela futhi yayala: “Lomsebenzi akumelwe umiswe ngoba lona umsebenzi kaNkulunkulu.”
Ukuthi lomsebenzi wawusekelwe ngokwaphezulu kwaqashelwa ngabanye ababengebona oFakazi BakaJehova. Lapho inkampane yaseMelika iletha insimbi yokuba kwakhiwe igalaji, yathumela enye yamadoda ayo, umKatolika, ukuze isize ekuyigxumekeni. Phakathi nokuhlala kwayo okungamasonto amabili eIgieduma, ngokushesha yazizwa isekhaya, ibiza ngisho nezisebenzi ekanye nazo ngokuthi mzalwane nokuthi dade. Ngemva kokuphindela ekhaya, yabhalela ihhovisi lethu laseNigeria: “Angikaze ngijabulele umsebenzi kakhulu njengangenkathi ngilapho ngenza umsebenzi kaNkulunkulu ngendlela kaNkulunkulu.”
Usuku Lokunikezela
NgoJanuary 20, 1990, lesisakhiwo esihle saseBethel sanikezelwa kuJehova uNkulunkulu, esaqedwa ngenxa yomoya wakhe. Izivakashi zeza zivela kuzo zonke izingxenye zeNigeria, nakuba izimemo kwadingeka ukuba zilinganiselwe kulabo okungenani abase beneminyaka engu-35 bebhapathiziwe noma labo abase beneminyaka okungenani engu-20 besebenza enkonzweni yesikhathi esigcwele. Odade babevunule ngezingubo ezinkulu, ezinemibala egqamile nemishuqulo ehambisana nazo, futhi iningi labazalwane laligqoke izingubo ezinhle zaseAfrika. Bebonke, abangu-4 209 abavela emazweni angu-29 baba khona ekunikezelweni. Phakathi kwabo okungenani kwakunezithunywa zevangeli ezingu-80, iningi lazo elalivela kwamanye amazwe aseNtshonalanga Afrika. Okwakuhlanganisiwe esimisweni kwakuyimibiko eyanikezwa ngabameleli abahlanu bamagatsha ababevakashile, abagcizelela ubunye benjongo nokuzwelana okukhona phakathi kwabantu bakaJehova. Imikhonzo ebhaliwe nezincwadi zocingo kwafika kuvela kubazalwane emazweni angu-21, kuhlanganisa nesigijimi esishukumisa inhliziyo esivela “kubazalwane nodade abangu-400 eMoscow, eSoviet Union.”
Amalungu amabili eNdikimba Ebusayo yoFakazi BakaJehova eBrooklyn, eNew York, nawo ayekhona. UAlbert Schroeder wakhuluma ngesihloko esithi: ‘Okufunekayo Kuwukuba Ufunyanwe Ukholekile,’ egcizelela isidingo sokuthembeka okuqhubekayo kubantu bakaNkulunkulu. (1 Korinte 4:2) Inkulumo yokunikezela yanikelwa uLyman Swingle, owaxoxa ngokwakhiwa kwethempeli elikhazimulayo losuku lukaSolomoni. Nakuba ithempeli lasekelwa futhi lavunyelwa uNkulunkulu, uJehova wakwenza kwacaca ukuthi okwakubaluleke kakhulu kunesakhiwo kwakuwukuthembeka nokulalela kwabantu bakhe abazinikezele. Ngalendlela uMzalwan’ uSwingle wabonisa ukuthi lesisakhiwo esihle segatsha eIgieduma sona ngokwaso sasingesona isiphetho kodwa indlela yokuqhubekisela phambili ukukhulekela kweqiniso.
Ngosuku olulandelayo, imihlangano ekhethekile emayelana nalokho kunikezelwa yenziwa emadolobheni amathathu aseNigeria. Abangaphezu kuka-60 000 baba khona kulezimiso.
Ezikhathini zasendulo, lapho abantu baseNigeria abakhuluma isiEdo beza ukuzohlonipha inkosi enkulu, kwakuba nomkhosi omkhulu nokujabula. Elithi Igieduma (ekuqaleni elalingu-ugie dunai) kwakuyigama elalisetshenziswa ekuchazeni isiphetho esiphumelelayo salowomhlangano ojabulisayo. Kubantu bakaJehova abeza ngalolosuku lokunikezela ukuzohlonipha iNkosi Yendawo Yonke, uJehova uNkulunkulu, ambalwa amazwi ayengaba afaneleke kahle njengaleli. Kubamemezeli boMbuso abangu-139 150 eNigeria, igama elithi “Igieduma” libakhumbuza indawo okuvela kuyo isiqondiso neseluleko esingokwasezulwini, kanye nokwaziswa okunyathelisiwe okuzobasiza ukuba baqhubeke benza umsebenzi kaNkulunkulu ngendlela kaNkulunkulu eNigeria.
[Izithombe ekhasini 24, 25]
1. Izakhiwo zokuhlala
2. IHholo LoMbuso
3. Isakhiwo sezinkonzo ezihlukahlukene
4. Ihhovisi
5. Ifekthri
6. Igalaji
7. Indlu enezinjini zikagesi
[Izithombe ekhasini 26]
Umzalwane noDade Brown ngaphambi kwehhovisi legatsha ngawo-1940
Indawo yokwamukela izihambi efekthri egatsheni elisha
Igumbi lokuhlala laseBethel
[Izithombe ekhasini 27]
Umshini onyathelisa ngemibala emibili
Kulayishwa izincwadi
IHholo LoMbuso
UMnyango Wenkonzo