Khumbula UMdali Wakho Omuhle Ebusheni Bakho

“INTSHA Enganelisekile: Iqiniso Lokuphila Lezizwe Zonke.” Sasifundeka kanjalo isihloko esikhulu ephephandabeni laseGoli iStar, eNingizimu Afrika. Amazwana ethula lesihloko ayefundeka kanje: “Njengoba kunamanani aphakeme entsha manje ebhekene namathuba amancane aqhubeka encishiswa ukuwohloka kwezomnotho emhlabeni wonke, ukunganeliseki kwentsha emadolobheni aphuphumayo kuye kwaba iqiniso elisobala lokuphila lezizwe zonke. Emibhikishweni yaseMiami, eSan Salvador, eManagua, eTeheran naseKapa kwakunesici esisodwa esivamile—esimweni ngasinye owokuqala ukuba abulale nokuba abulawe kwakungosemusha.”

Lokho kwanyatheliswa eminyakeni engaba yishumi edlule, futhi izimo ziye zaba zimbi kakhulu kusukela ngalesosikhathi. Kungani kunokunganeliseki okungaka phakathi kwentsha emhlabeni wonke? Ukuntengantenga okukhulayo kwalesimiso sezinto ngokuqinisekile kuyimbangela. Ukungabibikho komsebenzi kuye kwafinyelela emazingeni amakhulu. Futhi njengoba kunokuwohloka okusheshayo kokuphila komkhaya, yikuphi ukulondeka okukhona ngentsha? Akumangalisi ukuthi abanye bayo bagxeka izwe abangenakulilawula. Ingabe lokhu akwenziwa ukuthi bantula ithemba eliqinisekile abangagxilisa kulo ukuphila kwabo?

Umuntu ubengalindela ukuba izinkolo zezwe zinike ithemba elinjalo. Nokho, omunye osemusha wabhala: “Angive ngididekile. . . . Nginabangane abaningi, abangamalungu ezinkolo eziningi ezihlukahlukene, futhi bayafana nje nami. Ngempela ngidideke kangangokuthi angisazi ukuthi yini okumelwe ngiyikholelwe. Ingabe ubungasiza unginike iseluleko?” Yisiphi iseluleko obungasinika osemusha onjalo?

Intsha enamathela ngokuseduze eZwini likaNkulunkulu nasebandleni lobuKristu leqiniso iyavikeleka ekudidekeni nasenkathazweni enjalo. Njengoba intsha eningi ingenalo ithemba eliqinisekile ngekusasa, intsha engamaKristu ithembela kuJehova uNkulunkulu naseZwini lakhe leqiniso eliqinisekile. Ngakho-ke, inethemba lokusinda ekupheleni kwalesimiso sezinto inombono wokuphila okuphakade. Ngemva kwalokho, emhlabeni osuswe ukungalungi nobubi, iyoba ingxenye yesisekelo ‘somhlaba omusha okukhona kuwo ukulunga.’ (2 Petru 3:13; Johane 17:3) Ukuze amathemba anjalo akhazimulayo abe ngokoqobo, intsha iyalwa ukuba ‘ikhumbule uMdali wayo oMuhle.’ (UmShumayeli 12:1) Futhi iseluleko esingcono kakhulu esingase sinikezwe esokuba ibe futhi ihlale iyingxenye ephelele yebandla lobuKristu. Kungani kunjalo?

Iningi lenu nina bantu abasebasha ebandleni lobuKristu ninabazali abakholwayo, abanithandayo nabaninakekelayo. Ibandla ngalinye linabadala balo abamisiwe, abayithakazelela ngentshiseko inhlala-kahle yenu engokomoya. Usizo nokunakekela okunjalo akumelwe kudelelwe. Iqiniso elivela eZwini likaNkulunkulu, kanye nesiqondiso esingokwasezulwini, lizoninika ukulondeka, ukukhululeka ekukhungathekeni, kanye nethemba eliqinisekile ngekusasa. Konke lokhu kuzonisiza ukuba nibe “nokukholwa nonembeza omuhle” futhi ninamathele ethembeni elinjengehange elivikela umkhumbi ekuphahlazekeni ezilwandle ezinezivunguvungu.—1 Thimothewu 1:18, 19; qhathanisa namaHeberu 6:19.

Kubalekele Ukuyenga Kwezwe

Naphezu kwezibusiso eziningi ezingokomoya lezo nina basha eningazijabulela ebandleni lobuKristu, abanye bathambekele ekulandeleleni izindlela zezwe. Kunjengokungathi bazizwa bentula okuthile okubalulekile okungatholakala kuphela ezweni elingaphandle kwebandla lobuKristu. Kodwa ingabe ngempela izwe linakho okuthile okubalulekile elingakunikeza?

Ngemva kokusebenzisa iminyaka engaphezu kuka-40 enkonzweni yesikhathi esigcwele, enye yezinceku zikaNkulunkulu ibeka indaba ngalendlela: “Okuwukuphela kwengxenye yokuphila kwami engizisolayo ngayo yingxenye engayiphila ngaphambi kokuba ngingene eqinisweni. Ngalesosikhathi ngangiyingxenye yezwe. Ngangiphilela izwe kuphela. Lapho ngifinyelela eminyakeni engu-18 futhi ngibheka emuva ekuphileni kwami, ngabona ukuthi kwakungenalutho. Kwakungekho-mgomo, kungekho-njongo, ekuphileni kwami. Ngempela izinjabulo zezwe engangicabanga ukuthi ngangizijabulela zangilethela ukukhungatheka nosizi kuphela. Ngaqala ukufuna iqiniso. Ngalithola futhi esikhathini esingangonyaka kamuva ngaqala ukuhlanganyela enkonzweni yesikhathi esigcwele. Ngangingenamali, nginokuhlangenwe nakho konyaka owodwa nje kuphela ngiseqinisweni nokholo lokuthi uJehova uyongisekela. Manje lapho ngibheka emuva ekuphileni kwami, izingxenye ezimbili kwezintathu zakho engiye ngazichithela enkonzweni yesikhathi esigcwele, ngijabula kakhulu. Ngeke ngize ngivume ukushintsha lokho engiye ngakuzuza ekukhonzeni uJehova nganoma yini izwe elingayinikeza.” Ngempela, lokhu kubonisa imizwa yezinkulungwane zoFakazi BakaJehova.

Ngakho kungani ufisa izinto amanye amaKristu aye azishiya ngemuva? Kungani ulangazelela izinto zezwe eliya ekubhujisweni? (1 Johane 2:15-17) Njengomuntu osemusha, mhlawumbe unomuzwa wokuthi ukukhonza uJehova kubeka imingcele eminingi futhi kuzokubangela ukuba ulahlekelwe yinjabulo izwe eliyinikezayo. Kodwa ingabe kuwukuhlakanipha ukubheka abazali bakho kanye nabadala njengababeka imingcele eminingi uma befuna ukukusiza ukuba ujabulise uJehova futhi uzuze ukuphila okuphakade?

Uma umama othuma ingane yakhe esitolo esiseduze eyikhumbuza ukuba ime futhi iqalaze nhlangothi zombili ngaphambi kokuba yeqe umgwaqo, ingabe ubungambheka njengobeka imingcele eyeqile? Kunalokho, ingabe akazami ukuvikela ingane yakhe ngothando? Kuthiwani uma ingane ingasinakanga isixwayiso futhi yashayiswa yimoto futhi yafa? Ingabe ubungaqhubeka unomuzwa wokuthi umama wayebeke imingcele eyeqile? Phela, ubungase ucabange ukuthi kumelwe ngabe wayethathe izinyathelo ezengeziwe ukuze avikele ukuphila kwengane yakhe! Ngokufanayo, izikhumbuzo ezivela eZwini likaNkulunkulu nasenhlanganweni yakhe zinikezwa ngothando, hhayi njengemingcele kodwa ukuze sivikeleke.

Ukukhulela ekhaya lamaKristu akwanele ukuba kukwenze ukwazi ukumelana nokucindezela kwalelizwe. Udinga futhi ukuba ulikholelwe ngokomuntu siqu iqiniso leZwi likaNkulunkulu. Ukukholelwa komuntu siqu okunjalo nothando ngoMdali kwakha isisekelo sokuba unikezele ukuphila kwakho kuNkulunkulu. Lokhu kukholelwa komuntu siqu kuyadingeka futhi ukuze ukwazi ukulwela ukholo lwakho kwabanye. (1 Petru 3:15) Ukuqondiswa yiZwi likaNkulunkulu kuyisisekelo sokuphila okuphumelelayo. (Joshuwa 1:8; IHubo 119:9) Kodwa ukuze uphumelele ekuphileni, udinga futhi nokuqeqeshwa okuhle.

Ukunika Ukuqeqeshwa Okuqondile

Ngokuqinisekile, nina bazali abangamaKristu ningajabula ukubona izingane zenu zithatha ukuma okuqinile ngeqiniso futhi zihlale zisebunyeni kanye nani ekukhulekeleni kweqiniso. Ngokuyinhloko kungumthwalo wemfanelo kababa ukukhulisa izingane “ngokuyala nangokuqondisa kweNkosi.” (Efesu 6:4) Kodwa ingabe ningazibona izindawo enidinga ukuthuthuka kuzo ekuqeqesheni izingane? Ingabe nichitha isikhathi esanele nezingane zenu? Ingabe nenza izinto njengomkhaya? Futhi ingabe nijabulela ukuzilibazisa okuqabulayo ndawonye?

Ningakhohlwa ukuthi ukubeka kwenu isibonelo esihle kunomphumela onamandla ezinganeni zenu. Uma nifuna ukuba zithathe iqiniso ngokungathi sína, khona-ke leyo yindlela okumelwe nilibheke ngayo. (3 Johane 2-4) Futhi uma nifuna ukuba zibe nenhlonipho ejulile ngenhlangano kaJehova nangabadala, khona-ke njalo kumelwe nina ngokwenu nibe nesimo sengqondo esinempilo esinjalo.

Nakuba ngokuyinhloko ukuqeqesha izingane kungumsebenzi wabazali, abadala nabo banomthwalo wemfanelo ngentsha esebandleni. Ekunakekeleni umhlambi kaNkulunkulu, ababonisi badinga futhi nokwalusa izimvu. (1 Petru 5:1-3) Yeka isibonelo esihle uJehova aye wasibeka ekunakekeleni ngomusa ngisho nabantwana! (Isaya 40:11) Besabela esibonelweni sakhe, abelusi abangaphansi abangamaKristu nabo bazofuna ukubonisa isithakazelo esifudumele, sothando entsheni futhi bayenze izizwe iyingxenye yebandla. Enye intsha iye yabonisa isifiso sokuba abadala baxoxe nayo izikhathi ezengeziwe futhi bayisize enkonzweni yasensimini.

Ukuqeqesha osemusha kusho okungaphezu kokugxisha ikhanda lakhe ngolwazi lwemiBhalo. Ngokusuka enhliziyweni yakhe, kumelwe azonde lokho uNkulunkulu akuzondayo futhi athande lokho uNkulunkulu akuthandayo. (Amose 5:14, 15) Uma efuna ukukhumbula uMdali wakhe ebusheni, udinga ukuyalwa ngokomBhalo ngokuhamba endleleni kaJehova yokulunga. (IzAga 22:6; 2 Thimothewu 3:16) Abazali akumelwe bagodle ukuyala okudingekile. Abanye abazali abafuna ukulondoloza ubungane nengane yabo kungakhathaliseki ukuthi kwenzekani bathambekele ekubeni bangabunaki ububi, belulaza ukungathi sína kwabo. Bathonywa ukuyekelela kwezwe. Kodwa ngumzali onothando oyinakayo imibiko yokuthi ingane yakhe ibiziphethe ngokungafanele futhi anikeze ukuyala okufanele njengoba kudingeka. (IzAga 13:24) Ngempela, yimuphi umzali ongumKristu ofuna ukulondoloza ubungane obusekelwe ekuyekeleleni kodwa alahlekelwe yingane yakhe ngenxa yokuntula ukuyala okufanele?—IzAga 22:15.

Yiba Nenjongo Ekuphileni

UJehova uNkulunkulu wasenza ngendlela yokuba sithole injabulo yethu enkulu nokwaneliseka ekumkhonzeni. Cabangani ngensimu enkulu leyo nina basha eningayihlakulela. Cishe ingxenye yenani labantu emhlabeni ineminyaka engu-20 nangaphansi. Lentsha iphuphutheka olwandle oluyisintu. Njengoba ingenathemba, nina basha abangamaKristu ninethemba eliqinisekile kanye nokuthile okubalulekile eningakuhlanganyela nayo. Ngenkambo yenu yobuKristu enhle nangentshiseko yenu ngenkonzo kaJehova, ningadonsela abaningi bayo eqinisweni. Kanjalo ningabasiza ukuba bahambe endleleni eyisa ekuphileni.

Yimuphi umgomo eningaba nawo obaluleke kakhulu kunalowo wokunikela ukuphila kwenu enkonzweni kaJehova uNkulunkulu? Ingabe uke wacabanga ngokungenela umsebenzi wokushumayela wesikhathi esigcwele osindisa ukuphila? Mhlawumbe ungahlanganyela ekusakazeni izindaba ezinhle njengephayona, noma ungakhonza kwelinye lamahhovisi egatsha eWatch Tower Society lapho kunyatheliswa khona izincwadi zeBhayibheli. Ngisho nakuba ungenakukwenza lokho, ingabe ubungeke yini wenze ukukhulekela uJehova kube umgomo oyinhloko ekuphileni kwakho, ngaleyondlela ukhumbula uMdali wakho oMuhle? Unomsebenzi obalulekile okumelwe uwenze. Ngakho-ke, kuze kube sekupheleni kwalesimiso sezinto, zimisele ukuba ‘ngovame njalo emsebenzini weNkosi.’—1 Korinte 15:58.

Ngakho nina basha abangamaKristu phikelelani phambili. Khumbulani uMdali wenu oMuhle manje, futhi uyonilondoloza lapho eqeda lelizwe elingamesabi uNkulunkulu. Yebo, uJehova uyonivikela ngalesosikhathi futhi anibusise ngekusasa elingenasiphelo nelikhazimulayo.