Ukuqondisisa Izindaba

‘Abayona Ingxenye Yalelizwe’

Lapho abantu abangaphezu kwezinkulungwane eziyikhulu bebuthene eNkundleni yeOlympic yaseNtshonalanga Berlin bezothamela umhlangano wokugcina weNgqugquthela yaseJalimane yesonto Labavangeli, umongameli waleloSonto uHelmut Simon wabanxusa ukuba bahileleke kwezombangazwe.

USimon wabala izimpikiswano ezinjengokusetshenziswa kahle kwengcebo yesizwe, ukulondolozwa kwemvelo nezilwane nendawo yazo, ukumiswa kwesimiso esilungile sezomnotho, ukupheliswa komncintiswano wezikhali, nokuqedwa kokuntuleka kwemisebenzi. Wayenomuzwa wokuthi lokhu kwakuphakathi kwezinto ezingaxazululeki ezisongela isintu. Ukuze ashukumisele izilaleli zakhe ekubeni zibone ukuphuthuma kwalezinto, iphephandaba laseJalimane iFrankfurter Allgemeine Zeitung libika ukuthi “wathi akukho okungcono okwakungenzeka emphakathini eNtshonalanga naseMpumalanga kunokuba izakhamuzi zakhona zihileleke kwezombangazwe.” USimon wakhuthaza bonke ababekhona “ukuba babheke ukuhileleka okunjalo njengokuyisibopho nokuba babheke ingqungquthela yesonto njengomzabalazo wamaProthestani wokulwela amalungelo ezakhamuzi.”

Nokho, ingabe amaKristu eqiniso angazihilela ngokufanelekile kwenjalo imizabalazo yezombangazwe? UJesu akashongo yini ukuthi abalandeli bakhe “abasibo abezwe, njengalokho na[ye ayenge]siye owezwe”? (Johane 17:16) UJesu wafundisa abalandeli bakhe ukuba bathandazele uMbuso kaNkulunkulu njengowukuphela kwethemba langempela lesintu. Ngani? Ngoba, njengoba umprofethi uDaniyeli abikezela esikhathini eside esidlule, uMbuso kaNkulunkulu “uyakuchoboza, uqede” ohulumeni bezwe abangaphumeleli, “wona uqobo ume phakade.”—Daniyeli 2:44.

Ingabe Ukweba Akusona Isono?

Ingabe ukweba kuyisono? Akusona ngaso sonke isikhathi, ngokompristi ongumKatolika uIvo Storniolo. Iphephandaba laseBrazil, iO Estado de S. Paulo, licaphuna uStorniolo ethi “uNkulunkulu ubusisa futhi enze ukweba okwenziwa ompofu kube semthethweni.” Kamuva, wathi wayebhekisela “kuphela kulabo abampofu abebayo ukuze baqhubeke bephila.” Ngombono walompristi, intsha engamahlongandlebe eyebayo akufanele ijeziswe, ngoba “esikhathini esidlule iye yaphangwa ngabanamandla.” “Ngombono wakhe,” kuphawula iO Estado, “amamarginais [abaxoshiwe emphakathini noma abangafaneleki, ngokuvamile abampofu, abangasebenzi] nawo aphakathi ‘kwabakhethiweyo bakaNkulunkulu.’”

Ingabe iBhayibheli liyawusekela umbono onjalo? Aliwusekeli nakancane. Nakuba uJesu akhuthaza abalandeli bakhe ukuba babonise isihe kwabampofu, akazange athi izinkinga zezenhlalo, ezinjengobumpofu, zazenza ukweba kube okufanelekile. Kunalokho, njengoba umphostoli uPawulu abhala: “Noma ubani owayeyisela kumelwe angabe eseba, kunalokho kumelwe azikhandle ngezandla zakhe emsebenzini wokwethembeka, ukuze abe nokuthile azokuhlanganyela nabasweleyo.”—Efesu 4:28, The New Jerusalem Bible.

Ezohwebo Eziphingayo

Umbukiso wezwe wokukhangisa ngemifanekiso nefenisha yenkolo, owenzelwa enyakatho yeItaly, wavumela izinkampane ezingama-97 ukuba zikhangise ngemikhiqizo yazo. Phakathi kwezinto ezabekwa kwakuyindawo okuvunyelwa kuyo izono efudumele, engawukhiphi umsindo ehlukaniswe ngesisefo esingahlalwa amagciwane nesihlalo esintofontofo. Kwakukhona namakhandlela anganuki akhanyiswa uma kufungwa “kaPope John” akhanya amahora angama-40; izinsimbi zesonto ezisebenza ngecomputer ezikhala kanye kanye; amabhokisi eminikelo avikelekile “anjengesisefo semali”; amavideo afundisa abantwana (okungukuthi, The Bible According to Johnny); nezikhwama zesikhumba-mbumbulu ezinezinto ezidingeka ekwenzeleni iMisa ngaphandle.

Imfashini yabefundisi nayo yayikhona embukisweni. ‘Abaklami bemisiko ababili bemfashini yenkolo’ bachaza ephephandabeni laseItaly iLa Stampa ukuthi ‘okuphambili kunakho konke, abapristi abasebasha bafuna ukubukeka okusha, imfashini kavolo wangempela efekethiswe ngendlela yaseJalimane, iyunifomu, enemithende, enokufana, engenamicikilisho kodwa ebizayo. Futhi ngosizo lukaNkulunkulu, lelibhizinisi lihamba kahle.’

Ukuvakasha ngezizathu zenkolo nakho kwakhela ezohwebo imali eshisiwe. “Unyaka ngamunye kunabantu abayizigidi eziyi-15 abathatha uhambo ngenxa yezizathu ezingokwenkolo, futhi abezinto zokuhamba, kungakhathaliseki ukuthi bayakholwa noma cha, babangisana ngokubathutha,” kubika iphephandaba laseItaly iLa Repubblica. Lenza isibonelo salokhu, iphephandaba laseItaly iIl Messaggero lithi ngokuqondene nesonto ‘likaSaint’ Anthony ePadua “abantu bafaka izigidi hhayi emahhotela kuphela kodwa ikakhulukazi emabhokisini emali esontweni ukuze kuthengwe izithombe ezingcwele nezinto ezigcinwayo njengeziyizikhumbuzo.”

Akumangalisi ukuthi lapho eLobukholwa, nayo yonke inkolo yamanga, libhujiswa, ‘abathengisi bomhlaba bayolikhalela balililele.’ Njengoba isAmbulo 18:11 siqhubeka: “Impahla yabo ayisathengwa-muntu.”