Abamemezeli BoMbuso Bayabika
Basithola Isizathu Sokushintsha
INGABE amalungu amaqembu ezigebengu nezidlova bangakushintsha ukuziphatha kwabo? Yini engabasiza ukuba benze kanjalo? Izinguquko ezinkulu ekuziphatheni zingenzeka njengoba kubonakala endabeni kaSawulu waseTarsu, owashintsha ekushushiseni amaKristu waba umKristu ngokwakhe. Ngemva kwalokho waziwa ngokuthi umphostoli uPawulu. (Galathiya 1:13, 14; 1 Thimothewu 1:13) Kubikwa izinguquko ezinkulu ezinjengalena eKenya.
◻ Enye insizwa yayiyilungu leqembu lezigebengu endaweni yaseNairobi futhi yathunyelwa entshonalanga yeKenya ukuba iyofuna izindlela zokuphanga amabhange lapho. Yahlala nendoda eyayisikhulile futhi yathola nenqwaba yomagazini abadala bePhaphama! endlini yayo. Lensizwa yathatheka yilokho eyayikufunda kulabomagazini kangangokuthi yakhohlwa nyá ngamacebo ayo okuphanga amabhange. Lapho isibafunde bonke, yacela abengeziwe, futhi lendoda esikhulile yayitshela ukuthi kuzofika owodwa njalo ngemva kwamasonto amabili ngeposi. Kusukela lapho lensizwa yacela lendoda esikhulile ukuba iye eposini nsuku zonke iyobheka omagazini abengeziwe. Phakathi nalesikhathi, yenza isinqumo sokushiya izindlela zayo ezimbi, ilandele lokho eyayikufunde komagazini, futhi ibe uFakazi kaJehova. Yaqala ngisho nokutshela omakhelwane ukuthi ingomunye woFakazi BakaJehova. Kamuva, iphayona elikhethekile lasebenza leyonsimu futhi lamangala ukuthola lensizwa ezibiza ngoFakazi. Isifundo seBhayibheli saqaliswa nayo, yathuthukela ekuvuthweni, futhi namuhla iyiphayona elivamile. Ulwazi lweBhayibheli oluqondile lwayinikeza isizathu sokuguqula ukuphila kwayo.
◻ Indoda ethile eArgentina nayo yathola isizathu sokushintsha indlela yayo yokuphila yobudlova. Eminyakeni engama-20, yayimxhaphaza kabi umkayo, owayenguFakazi. Kwathiwa yamba ngisho nokumba umgodi egcekeni layo yabeka isiphambano ngenhla kwawo, inombono wokubulala umuntu owayeba izinkukhu zayo futhi imngcwabe lapho. Ngenxa yokuba nonya kwalendoda, bonke omakhelwane bayo babeyigwema.
Umbonisi wesifunda wayihambela. Ngesikhathi elapho, umbonisi wesifunda wasikisela isifundo seBhayibheli kulendoda futhi wamangala lapho ithi yayingajabulela ukutadisha iBhayibheli. Umzalwane wayiqhubela isifundo ngencwajana ethi Jabulela Ukuphila Emhlabeni Phakade! Lendoda yathuthuka olwazini lweBhayibheli nasekuqondeni okungokomoya. Manje iba khona kuyo yonke imihlangano. Ithanda imihlangano nokuhlanganyela nabazalwane kakhulu kangangokuthi yathi, “Yilapha lapho ngifuna ukuhlala khona.”
Ushintsho kulendoda lwaluphawuleka kakhulu kangangokuthi omakhelwane babuza umkayo ukuthi yayelashwa yimuphi udokotela. Lapho echaza ukuthi ushintsho lwenzeka ngenxa yokuthi yayitadisha iBhayibheli noFakazi BakaJehova, omunye umakhelwane wahlabeka umxhwele kakhulu kangangokuthi wacela iBhayibheli. Omunye umakhelwane wenza isikhokhelo somunye womagazini bethu.
Ulwazi oluqondile lweBhayibheli lwanikeza lamadoda isizathu sokushintsha indlela yawo yokuphila, futhi lungasiza noma ubani ofisa ukuphila okunengqondo ngokwengeziwe manje nethemba lokuphila okuphakade ezweni elisha likaNkulunkulu lenjabulo.—Johane 17:3.