Abamemezeli BoMbuso Bayabika
‘Okunxanelekayo Kuyafika’
UMPROFETHI uHagayi wabhala lamazwi ngo-520 B.C.E.: “Ngizamazamise nabo bonke abezizwe, kufike okunxanelekayo kwabo bonke abezizwe, ngiyigcwalise lendlu ngenkazimulo, usho uJehova-Sebawoti.” (Hagayi 2:7) “Okunxanelekayo” kwazo zonke izizwe okugcwalisa indlu kaJehova ngenkazimulo kungabakhulekeli bakhe abamesabayo. Abanjalo abanhliziyo ziqotho bayasabela ezindabeni ezinhle eItaly, kangangokuthi manje kunoFakazi abayizi-166 000 abafundisa abantu iBhayibheli kulesosizwe. Abefundisi bamaKatolika eItaly babheka ukukhula kwethu okuyingqayizivele ‘njengesehlakalo esethusa ngokuqhubekayo’ ‘esibakhathazayo nesibadumazayo.’ Omunye umfuni weqiniso lapho makasilandise okwenzeka kuye.
“Ngangingumfundisi wekhathekizimu iminyaka eyishumi, futhi ngangiqiniseka ukuthi lena kwakuyindlela yokubonisa uthando lwami ngoNkulunkulu nangomakhelwane. Nakuba nganginomngane owayengomunye woFakazi BakaJehova, ngangingakaze ngizinike isikhathi sokulalela isigijimi seBhayibheli. Nokho, esikhathini esithile esidlule lapho oFakazi bengivakashela, ngabangenisa endlini. Ngangifuna ukubatshela ukuthi bangaphinde bamvakashele umamezala wami, njengoba ayezizwa edidekile. Ngathi kubo, ‘esikhundleni sokuba nivakashele abantu abakhulile, khulumani nabantu abanjengami.’ Kusukela ngalesosikhathi bangivakashela njalo ekhaya lami, kodwa isikhathi ngasinye lapho bethinta iphuzu lemfundiso yenkolo, ngangibacela ukuba bayimise ingxoxo kuze kube esinye isikhathi ukuze ngikwazi ukucwaningisisa ngaleyondaba.
“Ngakhuluma nabefundisi abaningana futhi ngaphawula ukuthi babengenayo impendulo yeBhayibheli. Omunye wabo, oyisithunywa sevangeli, wangitshela ukuthi kwakungabalulekile kangako ukuba khona eMiseni. Wathi, ‘Futhi-ke, ngokwesibonelo, emazweni anjengeBrazil abantu benza ezinye izinto esikhundleni sokuya eMiseni. Into ebalulekile iwukuba umuntu akhonze uNkulunkulu ngokusemandleni akhe.’ Lawomazwi anginika amandla okunqamula izibopho zami neSonto lamaKatolika. Omunye umfundisi watshela umyeni wami, naye owayengumKatolika, ukuthi uma ngifuna ukuba omunye woFakazi BakaJehova, kufanele angivumele ngenze kanjalo ngoba oFakazi BakaJehova banephutha elilodwa kuphela, eliwukushiseka kakhulu. Ngisanda kubhapathizwa kanye nenye yamadodana ami. Umyeni wami naye utadisha iBhayibheli futhi ubonisa isithakazelo esigijimi soMbuso.”
Njengoba uJehova ezamazamisa izizwe ngokuba izahlulelo zakhe zimenyezelwe emhlabeni, abantu abaningi abathambekele ekulungeni bayayishiya imikhuba yokungathembeki ukuze balandele izimiso zeBhayibheli. Ngaphambi kokufunda iqiniso, enye indoda engumNtaliyane yangena yacwila ezikweletini, ithi ingakwazi ukukhokha isikweleti sayo ngemali yomholo wayo ovamile nangama“tip” okungathembeki eyayiwathola. Njengoba yayithola ulwazi lweqiniso, yenza isinqumo esinzima futhi yakuyeka ukwamukela ama“tip” okungathembeki. Yona nomkayo babhapathizwa futhi zisuka nje baqala ukukhonza enkonzweni yesikhathi esigcwele. Esibhedlela lapho isebenza khona, ngokuvamile kudingeka ukuba ikhumule izidumbu, futhi kaningana iye yathola izimali ezinkulu kuzo. Ngokwesibonelo, yake yathola u-150 000 lire (okucishe kube ngu-R290), futhi ngesinye isikhathi yathola u-600 000 lire (okucishe kube ngu-R1 160). Ngokwethembeka, yayibuyisela leyomali, futhi lokhu kwayinikeza ithuba lokuba ikhulume nabaphathi besibhedlela nodokotela ngeqiniso. Abaphathi besibhedlela bayithumela izincwadi zokuyitusa ngokuthembeka kwayo nokuziphatha kwayo okuqotho.
Lokhu okuhlangenwe nakho okuvela eItaly kumane kuyisibonelo sendlela ‘izinto ezinxanelekayo’ ezisishiya ngayo lesimiso esikhohlakele, esinobudlova futhi zize enhlanganweni kaJehova ehlanzekile, enokuthula ngaphambi kokuba ekugcineni azamazamise isimiso sikaSathane sezombangazwe asibhubhise eArmagedoni.