“Hambani Ngokufanele Ivangeli”
“Kuphela hambani ngokufanele ivangeli likaKristu.”—FILIPI 1:27.
1. Isehlakalo samuva nje eDolobheni laseNew York sabangela ziphi izinkulumo ezinhle ezivela kumphathi-dolobha? (Roma 13:3)
“OFAKAZI abangaphezu kwe-1 000” beza eHholo LeDolobha eManhattan esezansi ngoSeptember 29, 1988, kwabika iNew York Times. Beza ukuzosekela isihlongozo sokwakha esasibekwe ezithebeni zoMkhandlu wedolobha Wabahloli Bezokwakha. Nakuba singamukelwanga lesihlongozo sokuba kwakhiwe isakhiwo esisha sokuhlala endlunkulu yomhlaba wonke yoFakazi BakaJehova, umphathi-dolobha “wabatusa oFakazi ngokuthi ‘baqonde njengothi lomkhonto’ futhi wathi kumelwe ‘banconywe ngempela.’”
2. Imikhuba yokuziphatha yoFakazi ihluke ngayiphi indlela, futhi ngani?
2 Ngokuvamile, yini engalindelwa lapho abantu abangaphezu kwenkulungwane behlangane ukuze babonise ukusekela isenzo esingathandwa? Ukududulana, ukumemeza, ngisho nokuboniswa kwamandla nobudlova akukhona okungavamile. Kungani oFakazi behlukile? Kungenxa yokuthi bayaqaphela ukuthi ngazo zonke izikhathi ukuziphatha kwabo kubonisa ukholo lwabo. Basikhumbula kahle iseluleko esingokomBhalo: “Nibe-nenkambo enhle phakathi kwabezizwe, ukuze kuthi lapho benihleba ngokungathi ningabenzi bokubi, ngokubona imisebenzi yenu emihle badumise uNkulunkulu ngosuku lokuhanjelwa.”—1 Petru 2:12.
Imikhuba Emihle Idumisa UJehova
3. Imikhuba yethu inayiphi indima ekudumiseni uJehova?
3 Ukudumisa uJehova uNkulunkulu ngokuziphatha okuhle ngokucacile kuyingxenye yomthwalo wethu wemfanelo wobuKristu. (Mathewu 5:16) Yiqiniso, ukuziphatha okuhle kuhlanganisa izinto eziningi—ngokwesibonelo, ukuthembeka, inkuthalo, izimiso ezinhle zokuziphatha. Nokho, lezimfanelo ngokuvamile zaziswa yilabo abasazi kahle kuphela noma labo esisebenzelana nabo njalo, njengabangane bethu, izihlobo, abaqashi, esisebenza nabo, nothisha. Kuthiwani ngoquqaba lwabantu esithuka sithintana nalo nje kuphela? Yilapha lapho imikhuba yethu ingenela khona ngokukhethekile. Ngoba njengephepha elihle lokusonga elenza isipho esiyigugu sikhange ngokwengeziwe, imikhuba emihle yenza lokho esikunikezayo kukhange ngokwengeziwe. Kungakhathaliseki ukuthi sinaziphi ezinye izimfanelo ezinhle zobuKristu noma ukuthi izinjongo zethu zingezituseka kangakanani, kuyoba kuncane kakhulu okuhle ezikwenzayo uma imikhuba yethu imibi. Ngakho imikhuba yethu ingayiletha kanjani inkazimulo kuJehova?
4. Kukuziphi izici zokuphila lapho kufanele sinake khona imikhuba yethu?
4 “Kuphela hambani ngokufanele ivangeli,” kusho uPawulu. (Filipi 1:27) Yiqiniso, lokhu kuhilela inkonzo yethu yasobala. Kodwa ukuziphatha kwethu nemikhuba yethu endaweni yethu yokukhulekela, endaweni esihlala kuyo, emsebenzini, esikoleni, yebo, kuzo zonke izici zokuphila kwethu, nakho kuthintana ngokuqondile nokuphumelela kwenkonzo yethu. “Asibekeli-muntu nasinye isikhubekiso nangokukodwa, funa inkonzo yethu isolwe,” kubhala uPawulu. (2 Korinte 6:3) Singaqiniseka kanjani ukuthi siyawusebenzisa lowomyalo? Yini esingayenza ukuze sisizane, ikakhulukazi abasha abaphakathi kwethu, ukuba sibonise imikhuba emihle yobuKristu ngazo zonke izikhathi?
EHholo LoMbuso
5. Yini okufanele siyiqaphele lapho siseHholo LoMbuso?
5 IHholo LoMbuso liyindawo yethu yokukhulekela. Silapho ngoba simenywe uJehova neNdodana yakhe, uJesu Kristu. Ngalowomqondo, siyizimenywa endlini kaJehova. (IHubo 15:1; Mathewu 18:20) Ingabe uba yisimenywa esihle uma uza eHholo LoMbuso? Ukuze sibe abanjalo, kumelwe sibonise ukucabangela okufanele nenhlonipho hhayi ngalowo osimemile kuphela kodwa nangezinye izimenywa. Kuhilelani lokho?
6. (a) Ukufika njalo sekwephuzile emihlanganweni kubonisa ukuntula ini? (b) Yini engenziwa ukuze kunqotshwe lenkinga?
6 Okokuqala, kukhona indaba yokugcina isikhathi. Kuyavunywa ukuthi akulula ngaso sonke isikhathi ukwenza kanjalo. Abanye bahlala kude; abanye banemikhaya nabantwana okumelwe babalungise. Umzamo abawenzayo wokuza njalo emihlanganweni yobuKristu uyancomeka ngempela. Nokho, kuye kwaqashelwa ukuthi abanye sebengene emkhubeni wokufika sekwephuzile emihlanganweni. Yini abangayenza ukuze bakulungise lokhu? Okokuqala umuntu kumelwe aphawule ukuthi ukujwayela ukufika sekwephuzile emihlanganweni yobuKristu akubonisi ngaso sonke isikhathi ukuntula ukwazisa ngokubaluleka kwemihlangano. Abanye abavame ukufika sekwephuzile babonakala beyijabulela imihlangano njenganoma ubani omunye—uma nje sebefikile. Kunalokho, inkinga ingase ibe umphumela wokungahleli kahle nokuntula ukucabangela amaKristu esikanye nawo. Esinye sezizathu zokuba siyalwe ukuba “singakuyeki ukuhlangana kwethu” siwukuba ‘siqaphelane, ukuze kuvuswe uthando nemisebenzi emihle.’ (Heberu 10:24, 25) Asinakukwenza lokho uma, ngokuphindaphindiwe, siphuza ukufika kanjalo sidale ukuphazamiseka. Izingcweti zisikisela ukuthi, ukuze sifike ngesikhathi kufanele sizimisele ukufika ngaphambi kwesikhathi kunokuba sifike ngaso kanye isikhathi. Ingabe uyakudinga ukuzijwayeza lokhu?
7. Chaza ukuthi ukulalelisisa emihlanganweni kuhlangene ngani nemikhuba emihle.
7 Imikhuba emihle idinga ukuba sibanake abantu lapho bekhuluma nathi. (IzAga 4:1, 20) Lokhu kuyasebenza nasemihlanganweni yobuKristu, lapho izikhonzi zikaNkulunkulu zikhuluma ukuze zidlulisele isipho esingokomoya sokusakha. Ngempela kungaba ukubonisa imikhuba emibi kakhulu ngathi uma singozela, silokhu sihlebela ohlezi eduze kwethu, sihlafuna ushingamu noma amaswidi, sifunda ezinye izincwadi, noma senze ezinye izinto phakathi nomhlangano. UElihu osemusha akahlalanga nje kuphela ngokubekezela lapho kuqhubeka izinkulumo ezinde zikaJobe nabangane abathathu kodwa futhi ‘wabeka indlebe’ kulokho ababekusho futhi ‘wabalalela.’ (Jobe 32:11, 12) Imikhuba emihle yobuKristu iyosishukumisela ukuba sibonise inhlonipho efanele ngesikhulumi nangesigijimi saso esisekelwe eBhayibhelini ngokusilalela ngezingqondo ezingaphazanyisiwe nangokusisekela.
8. Sibonisa kanjani ukuthi sonke singabafundi bakaJesu Kristu?
8 Ngaphambi nangemva kwemihlangano, imikhuba emihle yobuKristu ihlanganisa ukuba kwethu nesithakazelo sentshiseko kwabanye abakhona eHholo LoMbuso. UPawulu waqaphela ukuthi amalungu agcotshiwe ebandla lobuKristu ‘awaseyibo abafokazi nezihambi . . . kodwa angabendlu kaNkulunkulu.’ (Efesu 2:19) Ingabe uphatha oFakazi okanye nabo njengezihambi nabafokazi noma njengamalungu endlu eyodwa? Ukubingelela kobungane, ukuxhawula okufudumele, ukumamatheka okunomusa—mhlawumbe, konke kuyizinto ezincane kodwa ziyingxenye yobufakazi bokuthi sonke singabafundi bakaJesu Kristu. Uma senza izenzo ezinjalo lapho sihlangana nabantu esingabazi, akufanele yini sikwenze lokho “ikakhulu kwabendlu yokukholwa”?—Galathiya 6:10.
9. Abantwana bangafundiswa kanjani ukubonisa isithakazelo kwabanye abantu ngaphandle kontanga yabo?
9 Ingabe abantwana bangafundiswa ukubonisa loluhlobo lwesithakazelo kwabanye abantu ngaphandle kontanga yabo? Abanye abantu abadala bangase babe nomuzwa wokuthi abantwana badinga ukuhamba bayodlala nabangane babo abancane ngemva kokuhlala ihora noma amabili belalele emihlanganweni. Kodwa iHholo LoMbuso aliyona indawo yokudlala. (UmShumayeli 3:1, 17) Lapho umfana othile oneminyaka emine nengxenye ebuzwa uthisha wakhe ukuthi unabafowabo nodadewabo abangaki, waphendula: “Baningi kakhulu angikwazi ukubabala.” Kamuva, lapho abazali bakhe bembuza ngalokhu, lomfanyana wachaza: “Angazi ukuthi nginabafowethu nodadewethu abangaki. Uma ngiya eHholo LoMbuso, baningi kakhulu.” Kuyena, bonke ababa khona bangabafowabo nodadewabo.
Enkonzweni Yethu Yasobala
10. Imuphi umyalo ovela kuJesu ongasisiza ukuba ‘sihambe ngokufanele ivangeli’ lapho sisenkonzweni yethu?
10 Ngokufanelekile ‘ukuhamba ngokufanele ivangeli’ kuhilela inkonzo yethu yasobala. Kumelwe sikhumbule ukuthi lokhu esikuphethe kuyisigijimi sokuthula, futhi imikhuba yethu kufanele ikubonise lokho. (Efesu 6:15) Umyalo ovela kuJesu uthi: “Ekungeneni kwenu endlini niyibingelele. Uma indlu ifanele, ukuthula kwenu makuze phezu kwayo.” Ngokuba nemfudumalo, nobungane, nenhlonipho, sazisa umninikhaya ukuthi sinesithakazelo sakhe soqobo ezinhliziyweni zethu. Nokho, ngezinye izikhathi umuntu esimthola emnyango angase angabi nobungane, abe ngisho nanobudlova. Ingabe kufanele siphazamiseke bese siqala ukuziphatha ngendlela efanayo? Phawula lokho uJesu aqhubeka wakusho: “Uma [abendlu be]ngafanele, ukuthula kwenu makubuyele kini.” (Mathewu 10:12, 13) Imikhuba yethu eminyango kumelwe ngaso sonke isikhathi ifanele “inkonzo yokubuyisana.”—2 Korinte 5:18.
11. Indlela yethu yokugqoka nokubonakala iyithinta kanjani indima yethu njengezikhonzi zikaNkulunkulu?
11 Imikhuba yethu ikhuluma ngathi ngezinye izindlela futhi. Ngokwesibonelo, ingabe ukubonakala kwethu komuntu siqu kuyayifanela indima yethu njengezikhonzi zeZwi likaNkulunkulu? Kuthiwani ngezinto esizisebenzisayo—isikhwama sezincwadi, iBhayibheli, nezincwadi zeBhayibheli? Umhleli wephephandaba unikeza osomabhizinisi leseluleko: “Gqokela umsebenzi, hhayi idili, umcimbi olula noma umdlalo.” Ngani? Ngoba ukugqoka nokubonakala kwakho “kuwumbhalo womphakathi ofushanisiwe onikeza abantu abakuzungezile ukwaziswa ngokuthi ungubani nokuthi uyini nokuthi ufaneleka kuphi ohlelweni lwezinto.” Ngakho lapho ‘sisemsebenzini’ wethu wenkonzo, ukugqoka nokubonakala kwethu akufanele kube okobuvila noma okobudlabha, kungabi ubukhazikhazi noma okokweqisa, kodwa ngaso sonke isikhathi kube “ngokufanele ivangeli.”—Qhathanisa neyoku-1 Thimothewu 2:9, 10.
12. Imikhuba emihle ingaboniswa kanjani ngokuqondene namalungelo nempahla yomninikhaya?
12 Nakuba kufanele ‘sihlale singabalungele ukubaphendula’ ngezindaba ezinhle, imikhuba emihle yobuKritu idinga ukuba senze kanjalo “ngobumnene nangokwesaba.” (1 Petru 3:15, 16) Lokho kuhlanganisa nokuhlonipha amalungelo omninikhaya nempahla yakhe. Ingabe siyawuhlela umsebenzi wethu ukuze simhambele ngesikhathi esihle? Ingabe siphapheme ukuze sibone ukuthi asiphazamisi umsebenzi othile obalulekile? Ingabe sivamile ekusebenziseni amazwi anjengokuthi “Ngicela,” nokuthi “Ngiyabonga”? Ingabe siyakulwela ukumfaka umninikhaya engxoxweni noma ingabe iba ngeyethu yonke ngenxa yokwesaba ukuthi singase singabe sisakwazi ukukusho konke ebesilungiselele ukukusho?
13. Bonisa indlela imikhuba emihle enkonzweni ngokuvamile eletha ngayo imiphumela emihle.
13 Imikhuba emihle, ihambisana nokukhathalela komuntu siqu okuqotho, ngokuvamile ivula indlela yobufakazi obuhle. Yingakho ngokuvamile abantwana abanemikhuba emihle bezuza ukunakwa nesithakazelo sabaninikhaya lapho abadala behluleka ukwenza kanjalo. UFakazi oneminyaka eyi-13 ubudala eMexico wahlangana nentombazane encane eyayifuna ukufunda. Nokho, lentombazane yathi kuyodingeka ifunde uyise engazi. Kodwa lommemezeli osemusha waba nomuzwa wokuthi, kulendaba, ngenxa yokuhlonipha uyise walentombazane, kufanele ayithole yena ngokwakhe imvume yakhe. Ngakho wazicelela ukukhuluma noyise futhi wamtshela ukuthi lokho ababezokufunda kwakubaluleke kakhulu. Ebona ukuthi wayezimisele kangakanani udade osemusha futhi azisa ukuthi weza kuye ngokuqondile, wathi: “Uma lokho enizokufunda kubaluleke kangako, khona-ke wonke umkhaya wami kufanele ukufunde.” Umphumela waba ukuthi lona oneminyaka eyi-13 waqalisa isifundo seBhayibheli nawo wonke umkhaya, kuhlanganise nendodana eshadile nomkayo nabanye abantwana asebekhulile.
Imikhuba Emihle Iqala Ekhaya
14. Imikhuba emihle iqalaphi, futhi isiphi isici esinendima ebalulekile?
14 Ngokuvamile imikhuba emihle yoFakazi abasebancane iwubufakazi obuhle bokuqeqeshwa ngokusobala abakuthola ekhaya. Ngempela, imikhuba yethu iyisibonakaliso sendlela yethu yokuphila. Ngalesizathu, ngokuphambene nalokho abanye abangase bakucabange, imikhuba emihle kufanele ibe nendawo ebalulekile ekhaya. Kulokhu, njengakwezinye izici zokuphila komkhaya, isibonelo somzali sibaluleke kakhulu. (2 Thimothewu 1:5) Ukutshela abantwana ukuthi, “Yenza njengoba ngisho, hhayi njengoba ngenza” ngokuqinisekile akuyona indlela yokubafundisa imikhuba emihle. Imininingwane engenakubalwa yemikhuba emihle ayifundwa nje ngeziyalezo zomlomo, kodwa ngokubheka nangokulingisa. “Abazali ababona nje kuphela abafundisi bokugcina; kodwa futhi bayizibonelo, ngoba abantwana bethu bafunda ngokulingisa izindlela zethu,” kuphawula uBeverley Feldman, umbhali wencwadi iKids Who Succeed. Hlobo luni lwemikhuba abantwana bakho abayibona kuwe?
15. Abazali bangabasiza kanjani abantwana babo ukuba bahlakulele izijwayezi zemikhuba emihle zakho konke ukuphila?
15 Ukuthi “nani-boyise, ningabathukuthelisi abantwana benu” kuwumyalo weBhayibheli. (Efesu 6:4) Kuyobathukuthelisa futhi kubakhungathekise abantwana ukutshelwa ukuthi kufanele babe nomusa futhi babe ababonelelayo, kodwa babe bebona abazali babo bephikisana, behleba, bedelela, noma becasuka kalula. Ingabe bangabekwa icala uma benza ngendlela efanayo? Ngakolunye uhlangothi, umbhalo uyaqhubeka uthi: “Kodwa nibondle ngokuyala nangokuqondisa kweNkosi.” Futhi lokho kuhlanganisa izisekelo zemikhuba emihle, njengokuthi, “Sawubona” “Ngicela,” “Ngiyabonga,” nokuthi “Ngiyaxolisa,” ukuhlonipha abantu abadala, nokuhlanganyela izinto nabanye. (Levitikusi 19:32; Roma 16:3-7) Lezimfanelo ezifundwa ekhaya ebuntwaneni ziyoba usizo kukho konke ukuphila.—IzAga 22:6.
16. Imiphi imizamo edingekayo, kube namiphi imiphumela?
16 Ngakho abazali nabantwana ngokufanayo kufanele bazijwayeze imikhuba emihle njengengxenye yesimiso sabo sansuku zonke kunokuba balinde kuze kube isikhathi esithile esikhethekile. Ekwenzeni kanjalo, abazali kufanele babe nesineke futhi bawabekezelele amaphutha abantwana babo abayowenza nakanjani. Batshele ukuthi ukuziphatha kwabo okuhle kusho okukhulu kangakanani kuwe, futhi usheshe ukuyitusa intuthuko abayenzayo. Yiqiniso, lokhu kudinga umzamo omkhulu ngawe. Kodwa imiBhalo ayishongo yini ukuthi ukufaka izimfanelo zokwesaba uNkulunkulu kubantwana kufanele kwenziwe “lapho uhlezi endlini yakho, nalapho uhamba endleleni, nalapho ulala, nalapho uvuka”? (Duteronomi 6:7) Ukwenza kanjalo kwakha isimo esihle ekhaya, okuhamba ibanga elide ekondleni abantwana bakho njengoba bekhula beba ngabantu abadala abanosizo, abakhathalelayo, nabanemikhuba emihle. Khona-ke bayoba umthombo wokutuswa nokudunyiswa kuwe nakuMdali wabo, uJehova uNkulunkulu.
Abantu Abanemikhuba Emihle
17. Yini ephawulwa emaHholo oMbuso oFakazi BakaJehova?
17 “OFakazi abangaphezu kwe-1 000” ababebuthene ngaphandle kweHholo LeDolobha eDolobheni LaseNew York ngaleyontambama yangoSeptember bamane nje babonisa ngezinga elincane indlela oFakazi BakaJehova abaziphatha ngayo njalo. Kwenye indawo, indoda ethile yeza eHholo LoMbuso okokuqala futhi kamuva yathi: “Ngihlangene nabantu abengeziwe abanothando loqobo, abantu engingabazi nhlobo, ngosuku olulodwa kunengake ngahlangana nabo esontweni engakhuliselwa kulo.” Waba yini umphumela? “Kwaba sobala ukuthi ngangilitholile iqiniso,” yasho. Lendoda yaguqula indlela yayo yokuphila, futhi ezinyangeni eziyisikhombisa kamuva yanikezela ukuphila kwayo kuJehova futhi yabhapathizwa.—Qhathanisa neyoku-1 Korinte 14:25.
18. Izinga lemikhuba emihle yoFakazi BakaJehova liye labathinta kanjani abantu abangaphandle?
18 Izinga lemikhuba emihle nokuhloba koFakazi emihlanganweni yabo yesizwe neyezizwe liye laba indaba ekhulunyelwa kahle ezikhathini eziningi. Kwesinye isehlakalo esinjalo muva nje eJapane, umqondisi ebhasini lezivakashi wathi: “Njengoba nanehla ebhasini, ngamunye wenu, kuhlanganise nabancane, wathi kimi, ‘Ngiyabonga kakhulu.’ Lokho kwangijabulisa kakhulu!” Komunye umhlangano, umlindi esiteshini sikaloliwe esiseduze watshela uFakazi: “Kwakuyinhlekelele eyisiphithiphithi ngesikhathi kubuthene abantu abayizi-12 000 eOsaka Castle Hall.” Kodwa waqhubeka wathi: “Nina nihleleke ngempela, futhi sikhululekile. Sizani nisikhonzele kulowo ophethe.”
19. Yini ngamunye wethu okufanele azimisele ukuyenza ngokuqondene nemikhuba emihle?
19 Ukukhulumela okunjalo kubonisani? Ukuthi oFakazi BakaJehova bebonke ‘bahamba ngokufanele ivangeli.’ Kuthiwani ngathi ngabanye? Njengabantwana abathembele kuyise onothando, sengathi sonke, abasha nabadala, singathembela kuBaba wethu wasezulwini, uJehova, ukuze sifundiswe ukuba abantu abanemikhuba emihle, ngisho nasezweni elingenayo imikhuba emihle.—Duteronomi 8:5; IzAga 3:11, 12.
Ingabe Uyakhumbula?
◻ Kungani imikhuba emihle idingekile njengengxenye yokuziphatha okuhle?
◻ Imiphi imikhuba emihle efanelekile endaweni yethu yokukhulekela?
◻ Imikhuba emihle ingaboniswa kanjani ensimini?
◻ Abazali bangabasiza kanjani abantwana babo ukuba bahlakulele imikhuba emihle?
◻ Iyiphi indinganiso ephakeme yemikhuba emihle okufanele silwele ukuyilondoloza?