Imibuzo Evela Kubafundi
◼ Njengoba uDaniyeli ayethe wayengeke amukele izipho ezivela eNkosini uBelishasari ngenxa yokuchaza umbhalo osodongeni, kungani kamuva atholakala egqoke izingubo nomgexo?
Ngaphambi nje kokuba amaMede namaPheresiya aketule iBabiloni, iNkosi uBelishasari nezinduna zayo babezitika ngedili. Phakathi nedili yathatha izitsha ezazivela ethempelini likaJehova yazisebenzisela ukuphuza iwayini, idumisa onkulunkulu baseBabiloni. Kodwa ngokungazelele idili laphazamiseka lapho isandla esingesona esomuntu wemvelo sibhala izinto ezimangalisayo odongeni.—Daniyeli 5:1-5.
Amadoda ahlakaniphileyo nosonkanyezi baseBabiloni bahluleka ukuwuchaza umbhalo, ngisho nakuba uBelishasari ayethembise ukunikeza noma ubani owayengakwazi ukufunda futhi achaze umbhalo wesandla omangalisayo umgexo wegolide nesikhundla esivelele ebukhosini.—Daniyeli 5:7-9.
Lapho umHeberu obizwa ngokuthi uDaniyeli engeniswa ekugcineni, inkosi yaphinda yamemezela isipho sayo—ukugqokisa uDaniyeli okububende, ukumgqokisa umgexo wegolide, nokumenza abe umbusi wesithathu embusweni. Umprofethi waphendula ngenhlonipho: “Izipho zakho mazibe-kuwe, umuphe omunye imivuzo yakho, nokho ngiyakufundela inkosi umbhalo, ngiyazise incazo.”—Daniyeli 5:17.
Ngakho-ke uDaniyeli wayengadingi ukufumbathiswa noma ukukhokhelwa ukuze anikeze incazelo. Inkosi yayingazigcina izipho zayo noma izinikeze omunye umuntu. UDaniyeli wayeyonikeza incazelo, hhayi ngenxa yomvuzo, kodwa ngenxa yokuthi wayenikezwe amandla okwenza kanjalo uJehova, uNkulunkulu weqiniso, lowo osahlulelo sakhe ngeBabiloni sasisondela.
Njengoba sifunda kuDaniyeli 5:29, ngemva kokuba uDaniyeli efundile futhi wachaza amazwi njengoba ayeshilo ukuthi wayezokwenza, inkosi yayaleza ukuba okungenani imivuzo inikezwe uDaniyeli. UDaniyeli akazigqokanga ngokwakhe izingubo nomgexo. Wazigqokiswa ngokusho kombusi ongenakuphikiswa, iNkosi uBelishasari. Kodwa lokhu akuphikisani noDaniyeli 5:17, lapho umprofethi akwenza kwakhanya ukuthi isisusa sakhe sasingesona esobugovu.
UJesu kamuva wathi “owamukela umprofethi ngegama lomprofethi uyakuzuza umvuzo womprofethi.” (Mathewu 10:41) Lokho kwakungabhekiseli neze kuBelishasari, njengoba wayengaphathi uDaniyeli ngomusa noma ngenhlonipho ngoba ehlonipha lendoda ethembekile njengomprofethi kaNkulunkulu weqiniso. Inkosi uBelishasari yayizimisele ukunikeza lezipho ezifanayo kunoma ubani owayengakwazi ukuxazulula imfihlakalo yombhalo wesandla, ngisho nosozinkanyezi ongeyena umKristu. Inkosi yathola umvuzo ofanele, owawuvumelana nombhalo ongokwesiprofetho osodongeni: “Ngalobobusuku uBelishasari inkosi yamaKaledi wabulawa. UDariyu umMede wamukela umbuso.”—Daniyeli 5:30, 31.