“Phuma Ezweni Lakini Nasezihlotsheni Zakho”

NGONOVEMBER 1981, uTony nomkakhe, uMargaret, kanye nabantwana babo ababili, abaneminyaka eyisi-9 neyi-11, bathutha eNgilandi baya entshonalanga yeIreland. Kungani? Ukuze basize emsebenzini wokufundisa obala woFakazi BakaJehova. Emasontweni ambalwa nje kamuva, babebhekene nobunzima. Kwakuwubusika obushubisa umnkantsha. Amathemba okuthola umsebenzi awazange afezeke, ngakho uTony wayeseqale ibhizinisi lokuhlanza oshimula. Njengoba ayengakabi nekhono elikhulu, waphindela ekhaya egcwele umsizi ngemva komsebenzi wosuku onzima. Cabanga ngokwethuka kwakhe lapho ethola ukuthi onke amapayipi amanzi ayeqinile eneqhwa, futhi wayenegedlela elincane kuphela elalinamanzi okuba ageze! Wavuma: “Okwesikhashana nje ngaqala ukuzibuza ukuthi kungani sasiye sathutha ekhaya lethu nasezihlotsheni zethu.”

Ukuthuthela kude nekhaya nabangane ukuze uyokhonza uNkulunkulu ngokugcwele, bese uqhubeka naphezu kobunzima, kudinga ukholo lwangempela. Othile owabonisa ukholo olunjalo cishe eminyakeni eyizi-4 000 edlule, kwakuyinzalamizi uAbrahama. Umfundi uStefanu wathi ngaye: “UNkulunkulu wenkazimulo wabonakala kubaba u-Abrahama eseMesopotamiya, engakakhi eHarana, [uNkulunkulu] wathi kuye: Phuma ezweni lakini nasezihlotsheni zakho, uye ezweni engizakukukhombisa lona.”—IzEnzo 7:2, 3.

Yebo, akekho namuhla onokuthunywa okunjalo okuvela kuNkulunkulu ngokuqondile kokuba athuthele kude nezwe lakubo. Nokho, izinkulungwane zamaKristu kulelikhulu lama-20 leminyaka, ziye zahlela izimo zazo ukuba zenze lokho uAbrahama akwenza—ukuthuthela ezindaweni ezintsha ukuyoqhubekisela phambili izithakazelo zikaNkulunkulu. (Mathewu 24:14; 28:19, 20; Roma 10:13-15) Ziye zaqaphela ukuthi “insimu yizwe” nokuthi izindawo eziningi zinesidingo esikhulu sosizo olwengeziwe. (Mathewu 13:38) NjengoIsaya, ziye zasabela ngentshiseko emazwini kaJehova, “Ngiyakuthuma bani, ngubani oyakusiyela na?” Zibona isidingo, nazo ziye zaphendula, “Nangu mina; ngithume mina.”—Isaya 6:8.

Kungani Zikwenza?

Luhlobo luni lwabantu olwenza ukuthutha okunjalo? Abaveli eqenjini lobudala obukhethekile noma isizinda, futhi abanawo amakhono angavamile. Bangabantu nje, phakathi kokunye, abazimisele ukubekela eceleni izifiso zabo siqu nokunethezeka ngenxa yezithakazelo zoMbuso kaNkulunkulu. Kunjengo-Abrahama lapho ethuthela kude nomuzi ochumayo nonethezekile ngokwezinto ezibonakalayo waseUri ukuze ahlale emathendeni ezweni angalazi.—Heberu 11:8-10.

“Sasisibona njalo isidingo sokwenza okwengeziwe ngangokunokwenzeka enkonzweni kaJehova,” kusho omunye umbhangqwana owathutha namadodana awo aneminyaka eyeve eshumini nambili ngo-1983. “Sazizwa njengomphostoli uPawulu lapho ethi, ‘Isikhathi sesinciphile’; ngakho-ke sanquma ‘ukuwelela eIreland’ ukuyosiza ngomsebenzi lapho.” (1 Korinte 7:29; Qhathanisa nezEnzo 16:9.) Ngokwenye inguqulo ekhululekile, umqondo wamazwi kamphostoli uPawulu kwaboku-1 Korinte 7:29 uwukuthi: “Into okubalulekile ukuyikhumbula ukuthi isikhathi sethu esisele sifushane kakhulu,” kanjalo namathuba ethu okwenza umsebenzi weNkosi. (The Living Bible) AmaKristu amaningi athembekile aye athuthela nomaphi lapho edingeka khona ukuze awasebenzise lamathuba ngaphambi kokushabalala okunjalo nokuba asisebenzise ngokunenzuzo isikhathi esiyigugu esisele.

“Sakubona lokhu kuyithuba elihle ‘lokuvama njalo emsebenzini weNkosi.”’ (1 Korinte 15:58) “Sasifuna ukukhonza uJehova lapho esasingenza khona okuhle kakhulu.” “Sasinomuzwa wokuthi ngokwezimali sisesimweni sokuba sithuthe nokuthi uma sasingase sikwazi ukugcwalisa isidingo kwenye indawo, kwakuyoba okungalungile ngathi ukuba singakwenzi.” Amazwi anjalo achaza imizwa yabaningi abaye bathatha izinyathelo zokukhonza lapho bedingeka khona ngokwengeziwe. LamaKristu aye azindla ngeseluleko esitholakala kuzAga 3:9, 27: “Dumisa uJehova ngempahla yakho, nangolibo lwazo zonke izithelo zakho. Ungagodleli abaninikho okuhle, lapho kusemandleni esandla sakho ukukwenza.” Njengoba beye bazihlola ngokunakekela izimo zabo, baye banquma ukuthi ‘kusemandleni ezandla zabo’ ukudlulisela izindaba ezinhle komakhelwane babo abakwezinye izingxenye zezwe.—Bheka futhi abaseRoma 1:14, 15; Luka 10:27-37.

Ungase ube sesimweni sokwenza ukuthutha okunjalo. Uma kunjalo, uyothakazeliswa yindlela abanye asebethuthile kakade abaphendula ngayo imibuzo elandelayo.

Yini Okumelwe Icatshangelwe Ngaphambi Kokuthutha?

Ngaphambi kokuthutha, thintana nabadala basebandleni lakini. Thola ukuthi bacabangani ngalokho ohlela ukukwenza. (IzAga 24:6) Kungase kube nezizathu zokuthi ukuthutha okunjalo kungatuswa endabeni yakho, futhi bayokusiza ukuba usihlolisise kahle isimo sakho. Ngokwesibonelo, umuntu othuthayo kumelwe aqine ngokomoya uma efuna ukuba insika futhi angabi umthwalo endaweni entsha.

Sebenzelana nehhovisi legatsha loFakazi BakaJehova elisezweni ofisa ukuthuthela kulo—noma ngehhovisi legatsha lendawo yakini uma ufisa ukuthuthela endaweni esezweni lakini. Uma kunokwenzeka, hambela indawo ocabangela ukuthuthela kuyo ukuze wazi okuthile ngaleyondawo nabantu bakhona ngaphambi kokuba wenze isinqumo esiwujuqu.

Hlolisisa izisusa zakho ngaphambi kokuba uthuthe. UAbrahama wathutha ngenxa yokuba wayenesifiso esijulile sokufeza injongo kaNkulunkulu, kungengenxa yomoya wokufuna ukuvakasha ngenxa yokufuna ukuthola okuhlangenwe nakho noma umcabango wokuthatheka komuntu siqu. Zihlole ngokunakekela zonke izici ezihilelekile. Zingaba khona yini izinkinga zolimi? Ungazijwayelanisa yini nomkhuba wendawo nesimo sezulu esihlukile? Unazo yini noma yiziphi izidingo zempilo ezikhethekile? Ingabe onke amalungu omkhaya azimisele ngenhliziyo ephelele ukuthutha? Ingabe uye wazihlela izindaba zakho zezimali ukuze wenze ukuthutha okunjalo ngokuphumelelayo? (Qhathanisa noLuka 14:28.) Lezi nezinye izici eziningi zidinga ukucatshangelwa ngokunakekela nangomthandazo.—Efesu 6:18.

Ibuphi Ubunzima Okungabhekanwa Nabo?

Ngisho nangaphambi kokuthutha, ungase ubhekane nobunzima. Akubona bonke abayobona izinto njengawe. Ungase uzwe izinkulumo ezingenangqondo noma eziphambene. Nokho, khumbula ukuthi ngisho nomphostoli uPetru wasabela ngokuphambene lapho ezwa okwakuzokwenzeka kuJesu. Kunokukhuthaza uJesu ukuba agxile ekwenzeni intando kaJehova, uPetru wathi: “Musa, Nkosi, lokho akusoze kwenziwa kuwe.” NjengoJesu, zimisele ukumelana nanoma iyiphi inkulumo enjalo ephambene.—Mathewu 16:22, 23.

Ngemva kokuzinza endaweni entsha, ukukhumbula ekhaya kungase kube inkinga enkulu. Uthando ngoJehova nangabantu okudingeka bezwe ngezindaba ezinhle zoMbuso wakhe kuyokusiza ukuba ubhekane nalokhu. Izinkinga eziningi zingancishiswa uma indawo entsha ohlala kuyo uyenza ibe ikhaya lakho ngempela. Gwema ukuyiqhathanisa ngokuphambene nekhaya lakho langaphambili, njengoba ukwenza kanjalo kungabangela ukunganeliseki nokuzisola ngesinqumo owasenza. Lapho ubhekene nobunzima, khumbula isimemo sikaJehova kuMalaki 3:10: “Ningivivinye . . . uma ngingayikunivulela amafasitele asezulwini, nginithululele isibusiso kunokwaneleyo.”

Iziphi Izibusiso Ezingajatshulelwa?

Njengoba ukuhlanganyela kwakho emsebenzini wokushumayela izindaba ezinhle kukhula, kanjalo nezinga lenkonzo yakho liyokhula. Uyoba namakhono engeziwe njengomfundisi weZwi likaNkulunkulu. Lokhu ngeke kulethe izinzuzo kuwe nje kuphela kodwa futhi nakubo bonke abakulalelayo. (1 Thimothewu 4:15, 16) Yeka ukuthi kuyilungelo kanjani ukuqhuba izifundo zeBhayibheli zasekhaya nokusiza ekukhululeni abantu abanhliziyo ziqotho ezimfundisweni zamanga zaseBabiloni! Ungaba nenjabulo eyachazwa umphostoli uPawulu lapho ebhalela abanye ayebasize ukuba babe amaKristu: “Ngokuba liyini ithemba lethu, nokuthokoza, nomqhele wokuzibonga . . . kungeyinina na?” (1 Thesalonika 2:19) Yebo, kuyinjabulo nesibusiso ukuhlanganyela ekusizeni abantu ngabanye namabandla ukuba bachume ngokomoya.

UAbrahama wabizwa ngokuthi “umhlobo kaNkulunkulu” ngenxa yokuthi wasilalela ngokuzimisela isiqondiso sikaNkulunkulu. (Jakobe 2:21-23; Isaya 41:8) Nawe futhi ungabujulisa ubuhlobo bakho bomuntu siqu noNkulunkulu. Njengoba uzikhandla enkonzweni yakhe, uyoba nokuhlangenwe nakho kokunakekela kwakhe kothando nokusekela. Uyokuqonda ngokugcwele ngokwengeziwe okwakushiwo umhubi lapho ethi: “Yizwani nibone ukuthi uJehova muhle.”—IHubo 34:8.

UTony, uMargaret, nabantwana babo babhekana nezinkinga lapho bethutha ukuze bayokhonza uJehova ngokwengeziwe. Kodwa ngosizo lukaJehova, bazisingatha ngokuphumelelayo. Bathi: “Asibuvumelanga ubunzima ukuba busiphange injabulo yethu. Ezimweni ezinjengalezo esabhekana nazo, safunda ukuncika kuJehova ngokwengeziwe, futhi sasibona isandla sakhe kukho konke njengoba izinkinga zazinyamalala ngokulandelana.” Izinkulungwane zezinceku zikaJehova zosuku lwanamuhla ziye zabonisa ukholo olufanayo ngokuthuthela nomaphi lapho kukhona isidingo esikhudlwana. Ingabe ungenza okufanayo?

[Isithombe ekhasini 23]

Ingxoxo yomkhaya ingenza ukuthutha kube okuphumelela ngokwengeziwe