Abavangeli Bavuna Isivuno Somhlaba Wonke
“Njengoba isikhathi seArmagedoni sisondela, oFakazi BakaJehova bandisa imisebenzi yabo ukuze basindise abaningi bethu ngangokunokwenzeka kuleyombubhiso esatshwayo.”—Ihlelwe nguIan Boyne ku“The Sunday Gleaner,” kaMarch 15, 1987, eKingston, eJamaica.
UMHLELI ocashunwe ngenhla uqinisile. OFakazi BakaJehova bakholelwa ukuthi iArmagedoni, lapho uNkulunkulu eyobhubhisa khona ababi, iseduze nokuthi isintu siphila esikhathini sokwahlulelwa kwaphezulu. (IsAmbulo 14:6, 7) Ngakho-ke, kunesidingo sokuba abantu balalele isigijimi sezindaba ezinhle. UJesu Kristu, umvangeli omkhulu kunabo bonke abake baba khona, wamisa inhlangano eyashumayela ‘kwaze kwaba sekugcineni komhlaba’ ekhulwini lokuqala. (IzEnzo 1:8; Kolose 1:23) Wabikezela umsebenzi ofanayo wokushumayela ivangeli osukwini lwethu. (Mathewu 24:14) Inhlangano eyenza lokho manje yakhiwa oFakazi BakaJehova, abashumayela izindaba ezinhle zoMbuso kaNkulunkulu ngokuphuthumayo emazweni nasezindaweni ezingama-210.
Nokho, oFakazi BakaJehova bangokungaphezu kwenhlangano eshumayelayo. Bangefundisayo futhi. UJesu wathuma abalandeli bakhe ethi “nenze izizwe zonke abafundi, . . . nibafundise ukugcina konke enginiyalé ngakho.” (Mathewu 28:19, 20) Singathanda ukukwethulela abanye abantu abaye bazuza emsebenzini wabo wokushumayela nokufundisa.
EMexico
Lona uVirginia. Uneminyaka eyi-110 futhi ufuna ukukutshela ukuthi “akwephuzile neze kakhulu ukuba wazi futhi ukhonze uJehova.” Njengowesifazane osemusha, wayeshiseka kakhulu kangangokuthi eminyakeni emine wayegqoka izembatho ezikhethekile zenkolo. Uthi: “Kodwa kwakunokuthile okwakuntuleka.” Akukho lapho ayengathola khona izimpendulo ezanelisayo emibuzweni yakhe yeBhayibheli. Ngokwesibonelo, lapho ebuza abafundisi esontweni lakhe ukuthi, “Lingubani igama likaNkulunkulu?” baphendula bathi, “Igama likaNkulunkulu nguNkulunkulu.”
Kodwa izinto zashintsha ngo-1983 lapho umzukulu wakhe eqala ukutadisha iBhayibheli noFakazi BakaJehova. Umzukulu waphendula umbuzo kaVirginia ngokuthi igama likaNkulunkulu nguJehova. (IHubo 83:18) Lokhu kwashukumisela uVirginia ukuba abe nesifundo sakhe siqu seBhayibheli noFakazi. Eminyakeni emibili kamuva, ngoJune 2, 1985, wabhapathizwa eneminyaka eyi-108.
Uthi: “Ngikhumbula lolosuku ngenjabulo ngoba ngaqala ngalo ukuphila. Nginaleminyaka, ngishumayela amahora ayisihlanu noma ayisithupha ngenyanga futhi ngiyadondolozela. Ngithanda ukuhamba kunokugibela imoto. Ngalendlela ngihlala ngisesimweni esihle esingokomzimba.”
ENdiya
Indoda eyayiyisithunjwa semikhuba emibi eminingi ithi: “Ngangiyisixhwanguxhwangu sendawo futhi ngiyindoda embi. Ngangithenga ngithengisa ngomshoshaphansi imilaliso kwamanye amazwe, ngidlala imutka (ukugembula), futhi ngibhema ogwayi bamahhala ababelethwa ngabathengi bami bomshoshaphansi. Futhi ngangiwumlutha wotshwala—konke lokhu ngangikwenza naphezu kweqiniso lokuthi ngangiyilungu elikhuthele lesonto.” Kodwa lapho omunye woFakazi BakaJehova evakashela endlini yayo futhi yaqala ukutadisha iBhayibheli nokusebenzisa iseluleko salo, ukuphila kwayo kwashintsha. (IzAga 2:1-22; 2 Thimothewu 3:16) Manje yona, umkayo, namadodakazi amabili basiza abanye ukuba bagqashule emikhubeni enjalo emibi.
EBelgium
Umbhangqwana osemusha wamthukuthelela kabi uNkulunkulu. Ngani? Izibulo lawo lentombazane, lafa ezinsukwini eziyishumi ngemva kokuzalwa. Ingane yawo yesibili yazalwa ikhubazekile. Futhi eyesithathu, eyayibonakala inamandla futhi iphilile, yafa ngokungazelele ngemva kwezinyanga eziyisihlanu. Umama wayengakholelwa ukuthi uNkulunkulu onothando angaluvumela usizi olunjalo lwenzeke kubo kuyilapho abantu abaningi abaphila impilo yokuzitika kokubi benezingane eziphilile.
Ngokushesha ngemva kwalokho, omunye woFakazi BakaJehova wayeshumayela endlini ngendlu komakhelwane futhi wafika endlini yakhe. Njengoba uFakazi ayekhuluma ngezithembiso zikaNkulunkulu zekusasa elijabulisayo lesintu, owesifazane wamelana nomqondo wokuthi uNkulunkulu unguBaba onothando wasezulwini. (IHubo 37:10, 11) Kodwa wavuma ukwamukela izincwadi zeBhayibheli. Kancane kancane, ngemva kokuvakasha kaningana kukaFakazi, isigijimi seBhayibheli sezindaba ezinhle sayithambisa inhliziyo yakhe futhi sakha ukuthembela kwakhe kuNkulunkulu. Manje bobabili nomyeni wakhe abanalo nje kuphela ithemba eliqinile lokuthi uJehova uyophulukisa indodana yabo ekhubazekile emhlabeni oyiPharadesi esikhathini esizayo kodwa futhi nokuthi uyovusa nezinye izingane zabo ezimbili.—Johane 5:28, 29; IsAmbulo 21:1-4.
EPortugal
Ngolunye usuku lwangeSonto ekuseni, inkosikazi eyayiphethe isikhwama esigcwele ukudla yama ukuze ikhulume nombhangqwana oshadile. Lokhu kubonana kwabo kwakungokokuqala kodwa kwakungekhona okokugcina. Umbhangqwana, ongoFakazi BakaJehova, wawusemsebenzini wokushumayela ivangeli. Bamncoma umthengi ngokunakekela izidingo ezibonakalayo zomkhaya wakhe. Kodwa bambuza ukuthi, ngubani onganelisa izidingo zesintu? Bawuphendula ngokwabo umbuzo ngokuthi uNkulunkulu ongakwenza. (IHubo 107:8, 9; Isaya 33:24) Inkosikazi yabuza ngokumemeza: “Ingabe unalo ikhambi lezinkinga zami?” OFakazi baphendula ngoyebo futhi yabamemela endlini yayo, lapho kwaqaliswa khona isifundo seBhayibheli. Umyeni wayo, eqaphela ushintsho olungcono esimweni sengqondo somkakhe, wahlanganyela esifundweni seBhayibheli futhi ngesikhathi esifushane naye washintsha endleleni yakhe yokuphila.
Kamuva, inkosikazi yatshela oFakazi ukuthi ngaphambi kokukhuluma nabo ngalolosuku lwangeSonto ekuseni, yayiye yazama ukuzibulala kabili. Yayidumele kakhulu ngoba yona nomyeni wayo babenqume ukwahlukana. Nokho, manje yona, umyeni wayo, nabantwana babo ngobunye bayathuthuka ekwazini ngezindaba ezinhle.
EThailand
Esikhathini esiningi sokuphila kwakhe, owesifazane ohlala engxenyeni esenyakatho yalelizwe wayehlushwa ngamademoni. Lapho ehlangana nomunye woFakazi BakaJehova esemsebenzini wokushumayela ivangeli, wathola ezinye izincwadi zeBhayibheli futhi wavuma ukuqhutshelwa isifundo seBhayibheli sasekhaya. Ngemva kwezinyanga ezimbili efunda, wafinyelela ekuqondeni izizathu ezingokomBhalo zokususa zonke izinto zokukhulekela kwamanga endlini yakhe, njengezithombe, nokubhidliza indlu yakhe eyaziswayo yemimoya eyayakhelwe ukuvikela umkhaya wakhe emimoyeni emibi. (IzEnzo 19:19; 1 Korinte 10:21; 1 Johane 5:21) Manje akasahlaselwa amademoni futhi uyakwazi ukuqondisa ukunakekela ekusizeni abanye ukuba bazi ngoNkulunkulu oyedwa weqiniso, uJehova.
EKenya
Lapho umholi weqembu lezigebengu etshelwa ukuthi wayebhekwa njengoyingozi kangangokuthi amaphoyisa ayeyalwe ukuthi uma embona amdubule, wavele wahleka usulu. Nokho, ngokushesha ngemva kwalokho okunye kokuhlasela kweqembu lakhe akuhambanga ngendlela okwakuhlelwe ngayo. Wazithola eyedwa, ehaqwe isixuku esasithukuthele sikulungele ukumahlulela ngendlela yaso. Ngalesosikhathi, amaphoyisa amsindisa, amthatha, futhi amvalela ejele ukuze alindele ukuthethwa kwecala enkantolo.
Ummeli wakhe wameluleka ngamasu ahlukahlukene okuliphika icala. Kodwa lapho esejele, wakhumbula ukuvakasha okwakwenziwa ngomunye woFakazi BakaJehova eminyakeni eminingi edlule. Waqala ukuzisola ngezindlela zakhe ezingenamthetho futhi wathandazela usizo kuNkulunkulu. Eqinisweni, wathandaza kuJehova esebenzisa igama lakhe. (Qhathanisa nezEnzo 10:1, 2.) Okwamangalisa umahluleli ukuthi, lesigebengu salivuma icala laso enkantolo. Ngakho-ke umahluleli wakhipha isigwebo esingenzima ngokulinganiswa; kunokuba sibe ngukufa, isigwebo saso saba iminyaka eyishumi ejele okungenakweqiwa kulo.
Lapho sisejele, safunda ngentshiseko izincwadi zeBhayibheli futhi sathandaza ngokuphindaphindiwe kuNkulunkulu, sicela ukuthi, uma kunokwenzeka, saphulelwe isikhathi ukuze sikhonze Yena. Ngokungalindelekile, satshelwa ukuthi isigwebo saso siye sancishiswa ngengxenye. Ngakho, ngemva kokuvalelwa iminyaka eyisihlanu, sakhululwa futhi ngokushesha saqala ukutadisha iBhayibheli noFakazi BakaJehova. Ngokushesha ngemva kwalokho sabhapathizwa, manje sinomgomo wokushumayela ivangeli isikhathi esigcwele.
Okungenhla kumane kuyizibonelo nje ezimbalwa zendlela oFakazi BakaJehova abafeza ngayo ukuthunywa kwabo nesibopho sokushumayela ivangeli “kuze kube-sekugcineni komhlaba.” Lokhu okuhlangenwe nakho kungaphindwa kaningi. Khona-ke, ingabe uyakungabaza ukuthi oFakazi BakaJehova bangabavangeli beqiniso banamuhla?