Ukuhola KukaKristu Ngenkuthalo Namuhla

“Mina nginani izinsuku zonke kuze kube-sekupheleni kwezwe [“sesiphelweni sesimiso sezinto,” NW].—MATHEWU 28:20.

1. Kungayiphi indlela uKristu aphathisa abafundi bakhe “impahla” yakhe?

LAPHO uKristu esezoshiya abafundi bakhe abuyele ezulwini ngo-33 C.E., ‘wabanika impahla yakhe.’ Lokhu kwakuhilela ukuba “amanxusa kaKristu” nokuqhubeka nomsebenzi wokushumayela ayewuqalile, bawuqhube “kuze kube-sekugcineni komhlaba.” Ngaphambi kokubashiya, wayebayale ukuba ‘benze izizwe zonke abafundi.’ Ingabe sinabo ubufakazi bokuthi wayeyiqaphele indlela ababefeza ngayo lokhu kuthunywa? Ngempela sinabo!—Mathewu 25:14; 2 Korinte 5:20; IzEnzo 1:8; Mathewu 28:19.

2. Yini ebonisa ukuthi uKristu wayelandelela ngokunakekela imisebenzi yamabandla ekhulu lokuqala?

² Eminyakeni engaphezu kwama-60 ngemva kokuba uKristu enyukele ezulwini, wabonisa ukuthi wayekade elandela ngokunakekela imisebenzi yamabandla obuKristu emhlabeni. Esambulweni esanikezwa umphostoli uJohane, ilungu lendikimba ebusayo yekhulu lokuqala, UJesu Kristu wathumela izigijimi emabandleni ayisikhombisa ayeseAsia Minor. Kwayisihlanu awo wathi: “Ngiyayazi imisebenzi yakho.” Futhi waboni sa ukuthi wayejwayelene kakhulu nokwakwenzeka kwamanye amabili, elaseSmirna nelasePhergamu. Wanikeza isikhuthazo neseluleko esiqondile ebandleni ngalinye. Kwakungenakuba nakungabaza ezingqondweni zabo ngokuthi ubani owayewuMholi wabo okhuthele.—IsAmbulo 1:11; 2:1–3:22.

3. Zaziya kubani ngempela izigijimi eziyisikhombisa, futhi yini efakazela lokhu?

³ Eqinisweni, lezozigijimi eziyisikhombisa zazingalinganiselwe nje kuphela emabandleni ayisikhombisa aseAsia. Iseluleko esihle nezixwayiso ezaziziqukethe zazisebenza kuwo wonke amabandla, kusukela ekhulwini lokuqala kuze kufike ‘osukwini lweNkosi,’ esikulo manje.a Amehlo kaKristu, afaniswa ‘namalangabi omlilo,’ aye abukela ngokuqhubekayo lokho obekwenzeka ‘emabandleni onke.’—IsAmbulo 1:10; 2:18, 23.

INkosi Nenceku Yayo

4. UKristu ‘waya kanjani ezweni elikude’ futhi wabuya “emva kwesikhathi eside”?

⁴ Ngemva kokuba ezifanise “nomuntu , owathi eyakuhambela kwelinye izwe wabiza izinceku zakhe, wazinika impahla yakhe,” uKristu wanezela: “Emva kwesikhathi eside yafika inkosi yalezozinceku, yalandisana nazo.” (Mathewu 25:14, 19) Ngo-33 C.E. uKristu ‘wenyukela ezulwini,’ lapho ahlala khona “ngakwesokunene sikaNkulunkulu.” (1 Petru 3:22) “Emva kwesikhathi eside,” ngemva kokubekwa kwakhe esihlalweni sobukhosi ngo-1914, uKristu waqala ‘ukubusa phakathi kwezitha zakhe’ ngokulahlela uSathane namademoni akhe emhlabeni. (IHubo 110:1, 2; IsAmbulo 12:7-9) Khona-ke waphendulela ukunaka kwakhe ezincekwini zakhe. Isikhathi sokuba alandisane nazo sase sifikile. Kunanini ngaphambili, wayenguMholi wazo okhuthele.

5. Safika nini isikhathi sokulandisa, futhi abathembekile bavuzwa kanjani?

⁵ Umlando wanamuhla wabantu bakaNkulunkulu ubonisa ukuthi le sikhathi sokulandisana safika ngo-1918-19. Umfanekiso wamathalenta ubonisa indlela iNkosi eyayizolandisana ngayo nensali yezinceku zayo ezigcotshiwe. Kwakuyodingeka ukuba zilandise ngokomuntu ngamunye ngendlela ezazisebenzisé ngayo impahla yayo, “yileyo naleyo njengamandla ayo,” noma amakhono angokomoya. Lezo ezazikhiqizile zangena ekuthokozeni kwenkosi yazo, eyathi kuzo: “Uthembekile ezintweni eziyingcosana; ngizakukubeka phezu kokuningi.”-Mathewu 25:15, 20-23.

6. Yini lawomaKristu athembekile agcotshiwe ayakha njengeqembu, futhi yini iNkosi yawo eyawaphathisa yona?

⁶ LawomaKristu agcotshiwe ngokomuntu ngamunye atholakala engamanxusa athembekile eNkosi ebusayo manje, azimisele ukwenza abafundi beNkosi yawo. Njengeqembu atholakala ‘eyinceku’ iNkosi yawo eyathi ngawo: “Pho, ngubani oyinceku ethembekileyo neqondayo, inkosi yayo eyimisile phezu kwabendlu yayo ukuba ibanike ukudla ngesikhathi sakho na? Ibusisiwe leyonceku, okuyakuthi kufika inkosi yayo, iyifumane yenze njalo. Ngiqinisile ngithi kini: Iyakuyimisa phezu kwakho konke enakho.”—Mathewu 24:45-47.

7. (a) “Impahla” kaKristu iye yanda kanjani kusukela ngo-1914? (b) Yini ebonisa ukuthi uKristu unguMholi okhuthele futhi ‘wezinye izimvu’?

⁷ Lokhu uKristu ‘anakho’ kuye kwaba kuningi kakhulu kusukela ngo-1914. Uye wembathiswa “amandla obukhosi,” ahilela igunya elandisiwe nemithwalo yemfanelo emikhulu. (Luka 19:11, 12, qhathanisa neNW.) Okokuqala waqoqa insali ‘yabantwana bombuso,’ amaKristu agcotshiwe ayizi-144 000 ‘athengwe ebantwini’ ukuba abe amakhosi nabapristi kanye naye ezulwini. (Mathewu 13:38; IsAmbulo 14:1-4; 5:9, 10) Khona-ke, njengoba kubonakala emlandweni kusukela ngo-1935, ubeqoqa “isixuku esikhulu” ‘sezinye izimvu’ athi ngazo: “Nalezo ngimelwe ukuziletha.” (IsAmbulo 7:9, 10; Johane 10:16) Yebo, nguYe oletha ‘lezimvu,’ futhi uba uMholi wazo okhuthele. Ngokuthakazelisayo, ngokwezwi nezwi umbhalo wesiGreki usho ukuthi, “Nalezo kudingekile ukuba ngizihole.” Uzihola kanjani ngenkuthalo zonke “izimvu” zakhe namuhla?

Ababonisi Abasesandleni SikaKristu Sokunene

8, 9. (a) Yimuphi umbono umphostoli uJohane awamukela? (b) Zazifanekiselani izinti zezibani eziyisikhombisa nezinkanyezi eziyisikhombisa?

⁸ Umphostoli uJohane, ilungu lendikimba ebusayo yebandla lamaKristu okuqala, wamukela umbono abona kuwo “izinti zezibani eziyisikhombisa zegolide, nofana nendodana yomuntu ephakathi kwezinti zezibani . . . Futhi wayephethe izinkanyezi eziyisikhombisa esandleni sakhe sokunene.” UJesu Kristu wachazela uJohane: “Imfihlakalo yezinkanyezi eziyisikhombisa ozibonileyo esandleni sami sokunene, nezinti zezibani eziyisikhombisa zegolide yile: izinkanyezi eziyisikhombisa ziyizingelosi zamabandla ayisikhombisa, nezinti zezibani eziyisikhombisa zingamabandla ayisikhombisa.”—IsAmbulo 1:12-20.

⁹ Ikhulumela lengxenye, incwadi ethi “Then Is Finished the Mystery of God” ithi: “Ingabe ‘lezozingelosi’ zingezingabonakali? Cha. Umphostoli uJohane wamukela sonke isAmbulo kuJesu Kristu ngengelosi yasezulwini, futhi bekuyoba okungenangqondo ngaye ukuphinde abhale le izingelosi ezulwini, endaweni engabonakali. Azizidingi izigijimi ezilotshelwe amabandla ayisikhombisa aseAsia. Incazelo eyisisekelo yesiqu esithi ‘ingelosi’ isho ‘isithunywa; umphathi wesigijimi.’ . . . Njengoba lezinkanyezi eziyisikhombisa ezingokomfanekiso zibonakala zisesandleni sokunene sikaJesu, zisekunakekeleni kwakhe nangaphansi kokuqondisa kwakhe, njengoba ‘isandla sokunene’ sokusetshenziswa kwamandla sikwazi ukuziqondisa nokuzivikela. . . . Njengoba ‘izinti zezibani eziyisikhombisa’ ‘ezisosukwini lweNkosi’ olusembonweni zazifanekisela wonke amabandla amaKristu eqiniso ‘kulolusuku lwenkosi’ lwamanje, olungokoqobo kusukela ngo-1914 C.E., kanjalo ‘izinkanyezi eziyisikhombisa’ zifanekisela bonke ababonisi abanjengezingelosi abazelwe ngomoya, abagcotshiwe bamabandla anjalo anamuhla.b—Amakhasi 102-4.

10. Iyiphi “impahla” eyandisiwe eye yaphathiswa inceku?

¹⁰ Bonke lababonisi abagcotshiwe abasesandleni sikaKristu sokunene bayingxenye ‘yenceku’ ayimisé “phezu kwakho konke [a]nakho.” Ngenxa yokuthi iNkosi yenceku ngokwayo iye yaba nemithwalo yemfanelo eyandisiwe kusukela ngo-1914, “konke enakho” kumelwe kuhilele ezinye izinto ezengeziwe ngenceku kunasesikhathini esidlule. Phakathi kokunye, “njengamanxusa kaKristu,” insali manje ingamanxusa eNkosi ebusayo ebusa phezu koMbuso omisiwe. (2 Korinte 5:20) Aye abekwa ukuba anakekele zonke izinto ezingokomoya ezingezeNkosi emhlabeni. Kumelwe akhonze ukuze kugcwaliseke iziprofetho ezisebenza kusukela ekumisweni koMbuso. Lokhu kuhlanganisa ukushumayela “lezi zindaba ezinhle zombuso . . . kuwo wonke umhlaba owakhiwe ngenjongo yobufakazi.” (Mathewu 24:14, NW) Kunanini ngaphambili, kumelwe aqhubeke “enze izizwe zonke abafundi,” ngaleyondlela eqoqa “isixuku esikhulu” esingenasibalo. (Mathewu 28:19, 20; IsAmbulo 7:9) Yebo, lokhu “okunxanelekayo kwabo bonke abezizwe” kuyingxenye ‘yempahla’ kaKristu eyandisiwe emhlabeni.—Hagayi 2:7.

11. (a) ‘Lezimpahla’ ezandisiwe zenza kube nesidingo sani? (b) Ubani oqondisa umsebenzi, futhi kanjani?

¹¹ Konke lokhu kusho umsebenzi owengeziwe ‘ngenceku’ eyiqembu, indima enkulu yemisebenzi, enwebekela ngokoqobo “kuwo wonke umhlaba owakhiwe.” Kudinga futhi indlu nkulu eyandisiwe nezakhiwo zamagatsha ngenjongo yokuqondisa umsebenzi nokunyathelisa nokusakaza izincwadi zokushumayela nesifundo somuntu siqu. Njengasekhulwini lokuqala, lomsebenzi ufezwa ngaphansi kokuhola ngenkuthalo kukaJesu Kristu, ngokomfanekiso ‘ophakathi kwezinti zezibani,’ noma amabandla. Uwaqondisa ngababonisi abagcotshiwe, ngokomfanekiso abaphethe “esandleni sakhe sokunene.” (IsAmbulo 1:13, 16) Njengasezikhathini zamaKristu okuqala, iqembu lalababonisi abagcotshiwe lakha iNdikimba Ebusayo ebonakalayo yebandla likaKristu emhlabeni. ‘Isandla sakhe sokunene’ sokusetshenziswa kwamandla siqondisa lamadoda athembekile njengoba eqondisa umsebenzi woMbuso.

Ngomoya

12, 13. (a) Ngenxa yokwanda okukhulu, yimuphi umbuzo ophakamayo? (b) UKristu uwusebenzisa kanjani umoya ekugcwaliseni isidingo sababonisi phakathi kwabafundi bakhe emhlabeni?

¹² Njengoba “ezinye izimvu” manje sezingaphezu kwezigidi ezintathu, zihlelwe zaba ngamabandla ayizi-52 000, kusobala ukuthi insali egcotshiwe idinga usizo ekunakekeleni impahla yeNkosi yasemhlabeni. Abangaphansi kwezi-9 000, kuhlanganise nodade abaningi, badla izifanekiselo zeSikhumbuzo, ngakho akukho ngisho noyedwa wombonisi ogcotshiwe ebandleni ngalinye. Ingabe lokhu kusho ukuthi uJesu Kristu akawaphethe amabandla angenayo “ingelosi,” noma ‘inkanyezi’ ezelwe ngomoya?

¹³ Phinde! Njengoba sibonile esihlokweni esandulelayo, ekhulwini lokuqala uKristu wahola ngenkuthalo ibandla ngomoya ongcwele. Namuhla usebenzisa amalungu azelwe ngomoya eNdikimba Ebusayo ukuba amise ababonisi abakhethwe phakathi ‘kwezinye izimvu.’ Laba kumelwe bahlangabezane nezimfuneko ezifanayo nezabadala abagcotshiwe, njengoba zihlelwe emibhalweni enjengeyoku-1 Thimothewu 3:1-7 noThithu 1:5-9. Lezimfanelo ezingokomBhalo zalotshwa ngaphansi kokuqondisa komoya ongcwele. Ukutuswa nokumiswa kwenziwa ngemva komthandazo nangaphansi kokuqondisa koMoya oNgcwele. Kubadala abanjalo abangagcotshiwe iseluleko sikaPawulu sisebenza ngezinga elifanayo: “Ziqapheleni nina nomhlambi wonke anibeke kuwo uMoya oNgcwele ukuba nibengababonisi.”—IzEnzo 20:28.

14. (a) Sigcwaliseka kanjani kakade isiprofetho sikaIsaya 32:1, 2? (b) Kukanjani bonke abadala kumelwe bazithobe ‘esandleni sikaKristu sokunene’?

¹⁴ Ngakho, emashumini ezinkulungwane amabandla, iNkosi elungile nebusayo uJesu Kristu isebenzisa ‘ezinye izimvu’ ‘njengezikhulu’ ekuvikeleni “izimvu” zakhe esiphephweni, esishingishaneni, nasesichothweni esi ngokomoya. (Isaya 32:1, 2) NjengoDavide wasendulo, abadala, kungakhathaliseki ukuthi bangabagcotshiwe noma “ezinye izimvu,” bathandaza kuJehova: “Umoya wakho omuhle mawungihole emhlabathini olelezekileyo.” (IHubo 143:10) Futhi uJehova uyawuzwa umthandazo wabo. NgeNdodana yakhe, ubanikeza umoya waKhe, futhi uJesu usebenzisa lokhu ngenkuthalo ukuze ahole abafundi bakhe emhlabeni. Eqinisweni, bonke abadala kumelwe bazithobe ‘esandleni sikaKristu sokunene’ sokulawula nokuqondisa, asisebenzisayo ngomoya nangamalungu azelwe ngomoya eNdikimba Ebusayo.

Ngezingelosi

15. Yiziphi ezinye izindlela uKristu anazo zokuhola ngenkuthalo abafundi bakhe emhlabeni?

¹⁵ Isihloko esandulelayo siphawule ukuthi izingelosi zazisetshenziswa ekhulwini lokuqala ekuqondiseni nasekukhululeni amaKristu okuqala futhi ziwasize emsebenzini wawo wokushumayela. Ingabe bekuyoba oku nengqondo ukucabanga ukuthi iNkosi yethu ebusayo uJesu Kristu ayisazisebenzisi izingelosi ekuholeni ngenkuthalo abafundi bayo namuhla? Akukhona nje kuphela ukuthi bekuyoba okungenangqondo kodwa futhi bekuyoba okungekho ngokomBhalo.

16, 17. Yibuphi ubufakazi esinabo bokuthi uKristu usebenzisa izingelosi ekuvuneni “abantwana bombuso” nasekuqoqeni “ezinye izimvu”?

¹⁶ Ngokomfanekiso kaJesu wamabele nokhula, isikhathi sokuvuna sasiyofika ‘esiphelweni sesimiso sezinto,’ esaqala ngo-1914. Phakathi nokuvuna, “abantwana bombuso” babeyokwahlukaniswa ‘ebantwaneni bomubi.’ Ubani iNkosi eyayizomsebenzisa ekuvuneni? “Abavuni yizingelosi.” UKristu wanezela: “INdodana yomuntu iyakuthuma izingelosi zayo, zibuthe, zikhiphe embusweni wayo konke okukhubekisayo nabenza okubi.” (Mathewu 13:37-41, qhathanisa neNW.) UKristu usebenzisa izingelosi ekuvikeleni abafowabo emhlabeni.

¹⁷ Kodwa kuthiwani ‘ngezinye izimvu’? Ingabe uKristu usebenzisa izingelosi ekuziqoqeni? Ngokuqinisekile! Umfanekiso wakhe wezimvu nezimbuzi uthi: “Kepha nxa iNdodana yomuntu iza ngenkazimulo yayo nezingelosi zonke ezingcwele kanye nayo, khona izakuhlala esihlalweni sayo senkazimulo; kuzakubuthelwa phambi kwayo izizwe zonke, ibahlukanise abanye kwabanye, njengomalusi ahlukanisa izimvu nezimbuzi.” (Mathewu 25:31, 32) UKristu usebenzisa izingelosi zakhe kulomsebenzi wokwahlukanisa. Njengoba nje ingelosi yaqondisa izinyathelo zikaFiliphu kumthenwa wase-Etiyopiya, kanjalo namuhla kunobufakazi obukhulu bokuthi uKristu usebenzisa izingelosi zakhe ekuqondiseni izinyathelo zoFakazi bakhe kubantu abanjengezimvu. Abantu abaningi baye bathi bebethandazele usizo ngaphambi nje kokuba uFakazi angqongqoze emnyango wabo.—IzEnzo 8:26, 27.

Ukuthembela Ngokuphelele Ekuqondiseni KukaKristu

18, 19. Ngesisekelo salokho okwenzeka ekhulwini lokuqala, yini esinethemba ngayo?

¹⁸ Ekhulwini lokuqala, izimo azivumanga ngaso sonke isikhathi ukuba uKristu asebenzise indikimba ebusayo yaseJerusalema ekuxazululeni inkinga ethile. Lapho uPawulu eyedwa enyakatho yeAsia Minor futhi edinga ukwazi ukuthi iyiphi insimu okwakumelwe ayiqale ngokulandelayo, uKristu wasebenza ngomoya. (IzEnzo 16:6-10) Namuhla oFakazi BakaJehova banethemba lokuthi noma yibaphi babazalwane babo abahlukana neNdikimba Ebusayo okwesikhashana ngenxa yoshushiso basengaphansi kokuhola ngenkuthalo kukaKristu, ngomoya nangokusekela kwezingelosi.

¹⁹ Emuva ezikhathini zamaKristu okuqala, kungenzeka ukuthi kwakunzima ukuqonda ezinye zezinqumo ezenziwa yindikimba ebusayo ngalesosikhathi. Ngokungangabaze ki yilokho okwenzeka ngenkathi uPawulu ethunyelwa emuva eTarsu noma ngenkathi ethunyelwa ethempelini ngemva kohambo lwakhe lwesithathu lwezithunywa zevangeli. (IzEnzo 9:30; 21:23-25) Nokho, eqinisweni uKristu owayeshukumisela lezinqumo. (IzEnzo 22:17-21; 23:11) Namuhla singaba nethemba lokuthi noma yini uKristu ayivumela ukuba yenzeke phakathi kwabafundi bakhe emhlabeni inenjongo enhle, njengasekhulwini lokuqala.

20. Yini esiqiniseka ngayo, futhi kuyini ukuzimisela kwethu?

²⁰ Ngakho, lapho sifunda eBhayibhelini ukuthi uKristu ‘uyinhloko yomzimba, ibandla,’ siyaqiniseka ukuthi akayona nje iNhloko ngegama. (Kolose 1:18) Ngokuhlangenwe nakho, siyazi ukuthi uyiNhloko yangempela, ekhuthele. Lapho sifunda incwadi yezEnzo futhi sibona indlela uKristu aqondisa ngayo izindaba phakathi kwamaKristu okuqala, singabona ukuthi usebenzisa izindlela ezifanayo namuhla. Sibona ubufakazi bokusebenzisa kukaKristu umoya ongcwele, izingelosi, ‘nenceku ethembekileyo neqondayo’ neNdikimba yayo Ebusayo, ekumiseni abadala abafanelekayo ngokomoya. Sinethemba ekuqondiseni ngenkuthalo kukaKristu izinto, sizimisele ukuqhubeka “sikhuluma iqiniso” futhi sikhula ngothando “ngakho konke kuye oyinhloko, uKristu.”—Efesu 4:15.

[Imibhalo yaphansi]

Amaphuzu Ayinhloko Okumelwe Akhunjulwe

◻ Yibuphi ubufakazi esinabo bokuthi uKristu walandelela ngokunakekela imisebenzi yamabandla ekhulu lokuqala?

◻ Ubani uKristu ammisa phezu kwakho konke ‘anakho’, futhi lokhu kuhlanganisani?

◻ Obani abafanekiselwa yizinkanyezi eZiyisikhombisa ezisesandleni sikaKristu sokunene?

◻ UKristu uwusebenzisa kanjani umoya ongcwele, izingelosi, neNdikimba Ebusayo egcotshiweyo ekuholeni ibandla lakhe namuhla?

◻ Kungani singaba nokwethembela okuphelele ekuqondiseni kukaKristu izinto namuhla?

[Ibhokisi ekhasini 20]

Ukuvivinywa okuza ngenxa yezimpi, ukuvukela noma ukushushiswa okusobala nokuvinjelwa okungokomthetho kungase kwenze kungabi nakwenzeka ngawe ukuqhubeka nokukhulekela kobuKristu ngendlela ehleleke ngokugcwele. Kungase kuphakame izimo ezikwenza kungabi nakwenzeka ukuba nemihlangano emikhulu yebandla. Ukuthintana nehhovisi legatsha kungase kunqamuke okwesikhashana. Ukuhambela kwababonisi besifunda kungase kuphazamiseke. Izincwadi ezintsha zingase zingafiki. Uma noma ikuphi kwalokhu kwenzeka kuwe, yini okumelwe uyenze?

Impendulo iwukuthi: Ngaphansi kwalezozimo, yenza noma ikuphi onga kwenza, futhi ngangokusemandleni akho, ngendlela yoku khulekela kweqiniso. Kumelwe ukwazi ukuba nesifundo somuntu siqu. Ngokuvamile amaqembu amancane abazalwane angahlangana ukuze atadishe emakhaya. Izincwadi eziye zafundwa esikhathini esidlule neBhayibheli ngokwalo kungasetshenziswa ekuqhubeni imihlangano. Ungethuki noma ukhathazeke. Ngokuvamile, ngesikhathi esifushane ukuxhumana nabazalwane abanomthwalo wemfanelo kuyokwenzeka.INdikimba Ebusayo ifuna izindlela zokuthintana nabazalwane.

Kodwa ngisho noma uzithola UWedwa ungenakuthintana nabafowenu abangamaKristu, khumbula ukuthi awukude noJehova neNdodana yakhe uJesu Kristu.—Ukuhlelelwa Ukufeza INkonzo Yethu, ikhasi 168.

[Isithombe ekhasini 17]

Ngokomfanekiso uKristu uphakathi kwamabandla, ephethe ababonisi ngesandla sakhe sokunene