Izibusiso Zaphezulu ‘Ngabahlakaniphileyo’
“Abahlakaniphileyo bayakukhanya njengokukhazimula kwesibhakabhaka, nabaphendulela abaningi ekulungeni njengezinkanyezi kuze kube-phakade naphakade.”—DANIYELI 12:3.
1. Ngemva kokuchaza isikhathi sokuhlupheka kwabaqhathi bempi, ngokulandelayo ingelosi ikuphendulela kuphi ukunakekela kwayo?
ISIPROFETHO sengelosi kuDaniyeli siye sasihola kusukela ekhulwini lesine B.C.E. kuya eArmagedoni. Siye sabonisa ukuthi kunendlela eyodwa kuphela uMikayeli ayoletha ngayo ukuthula emhlabeni: ngokubhubhisa abaqhathi bempi. Manje, ngemva kwalokhu kuhlolwa okuphawulekayo komlando kusengaphambili, ingelosi ibikezela ezinye zezibusiso ezicebile ezijatshulelwa abantu bakaNkulunkulu “engxenyeni yokugcina yezinsuku.”—Daniyeli 10:14, NW.
Isikhathi Sovuko
2. Abanye abafileyo ‘bavuka’ kanjani phakathi ‘nengxenye yokugcina yezinsuku’?
2 Ingelosi itshela uDaniyeli: “Abaningi abalele emhlabathini wothuli bayakuvuka, abanye bavukele ukuphila okuphakade, abanye ihlazo nokunengwa okuphakade.” (Daniyeli 12:2) Ngokusobala, ‘ingxenye yokugcina yezinsuku’ iyisikhathi sovuko, sokuvusa labo “abalele emhlabathini wothuli.” Okunye kwalokho kuvuka kwaqala ngokushesha ngemva kokuba uJesu ebe yiNkosi ngo-1914. (Mathewu 24:3) Ebheka phambili kulesosikhathi, umphostoli uPawulu waloba: “Thina, esisekhona sisasele kuze kubesekufikeni kweNkosi, asiyikubandulela nempela abaleleyo. . . . Nabafileyo kuKristu bayakuvuka kuqala.” (1 Thesalonika 4:15, 16; IsAmbulo 6:9-11) Khona-ke, ngokusobala, ngokushesha ngemva kuka-1914 uJesu wavusela ekuphileni komoya emazulwini labo ‘bakaIsrayeli kaNkulunkulu’ kakade abase befé bethembekile. (Galathiya 6:16) Kubona, ukuvuka kwakuwuku vukela ‘ekuphileni okuphakade.’
3, 4. Kwenzeka kanjani ukuba iqembu lezinceku ezithembekile zikaNkulunkulu ‘life’ ngo-1918?
3 Kodwa ngokungangabazeki amazwi engelosi ahlanganisa nolunye uvuko. Cishe eminyakeni engama-40 eyandulela u-1914, iqembu elincane lamaKristu lalixwayisa ngokuthi lowonyaka wawuyophawula ukuphela kweZikhathi Zabezizwe njengoba zaprofethwa uJesu. (Luka 21:24) LamaKristu ayeneZion’s Watch Tower Tract Society eyamiswa ngokomthetho ngo-1884, futhi akhipha imiphumela yokuhlola kwayo iBhayibheli kumagazini okwakuthiwa iZion’s Watch Tower and Herald of Christ’s Presence.
4 Ngo-1914 iqiniso lesigijimi sawo lafakazelwa ngokoqobo lapho kugqashuka impi yezwe yokuqala, futhi ‘imihelo’ eyabikezelwa uJesu yaqala. (Mathewu 24:7, 8) Nokho, izitha zabo ezingokwenkolo zasebenzisa usizi lwempi ekubashushiseni kwaze kwathi ekugcineni, ngo-1918, umsebenzi wabo wokushumayela wacishe wama, futhi izinceku eziyinhloko ze Watch Tower Society zaboshwa ngokungemthetho. Abanye abantu bakujabulela kakhulu lokhu. Futhi kwagcwalisa isiprofetho esilotshwe encwadini yesAmbulo: “Kuyakuthi sebebuqedile ubufakazi babo, isilo esiphuma kwalasha siyakulwa nabo, sibanqobe, sibabulale.”—IsAmbulo 11:7.
5, 6. Okuhlangenwe nakho kwaleliqembu ngo-1919 kwakunikeza kanjani ukugcwaliseka kwesiprofetho esithi “abaningi abalele emhlabathini wothuli bayakuvuka”?
5 Nokho, ngokwesiprofetho, babengeke bahlale ‘befile.’ “Kwathi emva kwalezozinsuku ezintathu nengxenye umoya wokuphila ovela kuNkulunkulu wangena kubo; base bema ngezinyawo zabo, nabababonayo behlelwa ngukwesaba okukhulu. . . . Base benyukela ezulwini ngefu, nezitha zabo zababona.” (IsAmbulo 11:11, 12; Hezekeli 37:1-14) Ngokusobala uvuko lwabo lwalungokomfanekiso, ngoba ukuvukela ngokoqobo ekuphileni komoya ezulwini kwakuyoba okungabonakali ezitheni zabo. Kunalokho, bavuswa esimweni esinjengesokufa sokungenzi lutho bavuselwa esimweni esiphapheme somsebenzi wentshiseko labo ababebophé icebo lokubaqeda bebona. Ngo-1919 abameleli beWatch Tower Society bakhululwa etilongweni, umsebenzi wokushumayela wahlelwa kabusha, futhi umhlaba wabona ukuqala komkhankaso omkhulu kakhulu emlandweni wokufakaza ngoMbuso.—Mathewu 24:14.
6 Ngalomqondo ongokomfanekiso, ‘abaningi ababelele emhlabathini wothuli bavuka.’ Khona-ke, kusukela ngo-1919, leloqembu elincane, eliphapheme labaFundi BeBhayibheli laqala ukufuna nokuqoqa abaseleyo babafowabo bakaJesu ukuze isibalo esigcwele sezi-144 000 sipheleliswe. (Mathewu 24:31; IsAmbulo 7:1-3) Njengoba abantu babesabela, bazinikezela kuNkulunkulu ngoKristu futhi baba amalungu enhlangano kaJehova ebonakalayo emhlabeni. Lapho sebamukele isipho somusa somoya ongcwele, balungisiswa ngesisekelo sokholo lwabo emhlatshelweni wesihle ngo kaJesu futhi bamukelwa njengabantwana bakaNkulunkulu ngendlela engokomoya.—Roma 8:17; Galathiya 2:16; 3:8.
7. Kwabaningi balaba, lokhu kuyobonakala kanjani kuwukuvukela “ukuphila okuphakade”?
7 Labo abahlala bethembekile kuze kube sekupheleni kokuphila kwabo kwase mhlabeni banethemba eliqinile lokuthatha izindawo zabo ezulwini babe noJesu Kristu. (1 Korinte 15:50-53) Ngakho, ukuvuka kwabo okungokomoya kuwukuvukela ekuphileni okuphakade. Lapho besaphila emhlabeni, bajabulela ukuthula phakathi kwabo ngisho nakuba bephila ezweni elinezimpi. (Roma 14:19) Kodwa okubaluleke ngokwengeziwe, bajabulela ukuthula noJehova uNkulunkulu ngokwakhe, “ukuthula kukaNkulunkulu okudlula ukuqonda konke.”—Filipi 4:7.
Ukuvukela “Ihlazo”
8, 9. Kungayiphi indlela lokhu kuvuka okungokomoya kungaba ukuvukela “ihlazo nokunengwa okuphakade”?
8 Kungani-ke abanye ‘bevukela ihlazo nokunengwa okuphakade’? Iqiniso liwukuthi, akubona bonke abamukela isimemo sokuba yingxenye yalesosigaba soMbuso abahlala bethembekile. Abanye bavumela ukholo lwabo lube buthaka futhi bayehluleka ukukhuthazela. (Heberu 2:1) Abanye baze babe yizihlubuki futhi kudingeke ukuba basuswe ebandleni lobuKristu. (Mathewu 13:41, 42) Abanjalo uJesu ubachaza ngokuthi ‘yileyonceku embi’ iNkosi yayo eyijezisa ‘ngokuyinqamula kabili,’ iyabele nabazenzisi. “Lapho kuyakubakhona ukukhala nokugedla amazinyo.”—Mathewu 24:48-51; Efesu 4:18; 5:6-8.
9 Yeka into edabukisayo, ukwamukela ilungelo eliphakeme kunawo wonke ake anikezwa abantu abangaphelele bese ulifulathela! Ngalabo abenza ngalendlela, umphostoli uPawulu wathi: “Akunakwenzeka ukuba labo asebaké bakhanyiswa banambitha isiphiwo sasezulwini, benziwa abahlanganyeli kuMoya oNgcwele, banambitha izwi elihle likaNkulunkulu namandla ezwe elizayo, babuye bahlubuka—akunakwenzeka ukuba babuye bavuswe, baphenduke, lokhu sebezibethelela iNdodana kaNkulunkulu, bayithela ngehlazo obala.” (Heberu 6:4-6) Ngalendlela, ukuvuka kwabo kuba ukuvukela “ihlazo nokunengwa okuphakade.” Abasenalo elinye ithemba lokuphila okuphakade.
‘Ukukhanya Njengezinkanyiso’
10. Obani “abahlakaniphileyo,” futhi ‘bakhanya kanjani njengezinkanyiso’?
10 Kodwa ngalabo abahlala bethembekile, isiprofetho sithi: “Abahlakaniphileyo bayakukhanya njengokukhazimula kwesibhakabhaka, nabaphendulela abaningi ekulungeni njengezinkanyezi kuze kubephakade naphakade.” (Daniyeli 12:3) Ngokusobala “abahlakaniphileyo” bangamalungu athembekile asele ebandla lamaKristu agcotshiwe, ‘agcwele ukwazi intando yakhe ngokuhlakanipha konke nokuqonda okungokomoya.’ Beqiniswe nguJehova, ‘banokubekezela konke nokubheka kade ngokujabula; bebonga uYise owabenza bafanela isabelo sefa labangcwele ekukhanyeni.’ (Kolose 1:9, 11, 12) Kusukela ngo-1919, nakuba ‘ubumnyama busibekele umhlaba, nesigayegaye abantu,’ bebelokhu ‘bekhanya njengezinkanyiso’ phakathi kwesintu. (Isaya 60:2; Filipi 2:15; Mathewu 5:14-16) ‘Bakhanya njengelanga embusweni kaYise.’—Mathewu 13:43.
11. Kungayiphi indlela “abahlakaniphileyo” beye babonakala beyilabo “abaphendulela abaningi ekulungeni”?
11 Bazibonakalisa kanjani beyilabo “abaphendulela abaningi ekulungeni”? (Daniyeli 12:3) Ngenxa yokufakaza kwabo ngokwethembeka, abokugcina bakaIsrayeli ongokomoya baye baqoqwa futhi balungisiswa kukho ukuphila emazulwini. Ngaphezu kwalokho, isixuku esikhulu ‘sezinye izimvu’ siye sazibonakalisa, sithuthelekela ekukhanyeni okuvela kuJehova njengoba kuboniswa ‘ngabantu bakaDaniyeli.’ (Johane 10:16; Zakariya 8:23) Lezi “ezinye izimvu” ziye zazihlanganisa ngokuzithandela nabagcotshiwe emsebenzini wabo wokushumayela “izindaba ezinhle.” (Mathewu 24:14, NW; Isaya 61:5, 6) Nabo, ngokufanayo, banokholo egazini elachitheka likaJesu Kristu, ngalokho bayalungisiswa ukuze bajabulele ubungane noNkulunkulu. (IsAmbulo 7:9-15; qhathanisa noJakobe 2:23.) Uma behlala bethembekile kuze kube sekupheleni, amagama abo ayoqhubeka ‘efunyanwa elotshiwe encwadini.’ Ngalokho, bangalindela ukusinda esikhathini sokuhlupheka okukhulu kunakho konke okwake kwagadla ezizweni.—Daniyeli 12:1; Mathewu 24:13, 21, 22.
“Bayakukhanya . . . Phakade”
12, 13. (a) Kukanjani “abahlakaniphileyo” bekwazi ‘ukukhanya . . . phakade’? (b) Bayobonakala kanjani, ngenye indlela, beyilabo “abaphendulela abaningi ekulungeni”?
12 Ingelosi yatshela uDaniyeli: “Abahlakaniphileyo bayakukhanya njengokukhazimula kwesibhakabhaka . . . , njengezinkanyezi kuze kube-phakade naphakade.” (Daniyeli 12:3) Abagcotshiweyo bangakhanya kanjani phakade, njengoba ekugcineni ngamunye wabo eyokufa? Ngokuthi bayoqhubeka ‘bekhanya’ ngisho nangemva kokufa. Ebachaza esimweni sabo sasezulwini, uJesu uyasitshela encwadini yesAmbulo: “Isihlalo sobukhosi sikaNkulunkulu neseWundlu siyakuba-kuwo [umuzi], nezinceku zakhe ziyakumkhonza, zibone ubuso bakhe, negama lakhe liyakuba-semabunzini azo. Ubusuku abusayikuba-khona; abadingi ukukhanya kwesibani nokukhanya kwelanga, ngokuba iNkosi uNkulunkulu iyakubakhanyisela; bayakubusa phakade naphakade.”—IsAmbulo 22:3-5.
13 Yebo, laba abavusiwe bayobusa njengamakhosi njengezinkanyezi emazulwini, “phakade naphakade.” Ukukhanya kwabo okungokomoya kuyoletha izibusiso ezinkulu esintwini. (IsAmbulo 14:13) Ibachaza ‘njengeJerusalema Elisha,’ incwadi yesAmbulo iyabika: “Umuzi awudingi ilanga nenyanga ukuba kukhanye kuwo, ngokuba inkazimulo kaNkulunkulu iyawukhanyisa, nesibani sawo siyiWundlu. Izizwe ziyakuhamba ekukhanyeni kwawo, namakhosi omhlaba aletha kuwo ubukhosi bawo.” (IsAmbulo 21:2, 9, 23, 24) Abavusiwe bayosiza ekusebenziseni izinzuzo zomhlatshelo wesihlengo ngenjongo ‘yokuphulukisa izizwe.’ (IsAmbulo 22:2) Lapho, ngasekupheleni kokuBusa Kweminyaka Eyinkulungwane, uJesu namakhosi nabapristi abakanye naye abayizi-144 000 sebebuyisele abantu abathembekile ekupheleleni, ngempela bayobe sebelethe “abaningi ekulungeni.” Ngemva kovivinyo lokugcina ngalesosikhathi, isintu esibuyiselwe siyokwakha umphakathi wesintu ophelele ophila emhlabeni oyipharadesi phakade. (IsAmbulo 20:7-10; IHubo 37:29) Ngalendlela, imiphumela ebonakalayo yenkazimulo yasezulwini ‘yabantu bakaDaniyeli’ nayo iyohlala “kuze kube-phakade naphakade.”
Olunye Uvuko
14. Obani abanye abayohlanganiswa yisiprofetho esithi “abaningi abalele emhlabathini wothuli bayakuvuka”?
14 Ngaleyondlela, amazwi engelosi asidlulisela ngalé kwesikhathi ‘sokuma’ kukaMikayeli ‘nesikhathi sokuhlupheka’ esingenakufaniswa asiyise esimisweni esisha sezinto. Ngaphezu kwalokho, izibusiso eziza ngalaba abakhanya “njengezinkanyezi” ngeke zibe ngezalabo abasinda ‘esikhathini sokuhlupheka’ kuphela. UJesu, lapho ese ngumuntu emhlabeni, wathi: “Isikhathi siyeza, lapho bonke abasemathuneni beyakulizwa izwi layo, abenze ukulunga baphumele ekuvukeni kokuphila, abenzé okubi ekuvukeni kokulahlwa.” (Johane 5:28, 29) Lamazwi akhomba ekuvukeni okungokoqobo kwesintu esifile, futhi ngokungangabazeki loluvuko, nalo, lungokunye ukugcwaliseka kwamazwi engelosi: “Abaningi abalele emhlabathini wothuli bayakuvuka.”—Daniyeli 12:2.
15. Ngalabo abavuswa ngalesosikhathi, kungabonakala kanjani kuwukuvukela “ukuphila okuphakade”?
15 Phakathi kwalabo abahlanganiswe kulokhu kuvuka kuyoba uDaniyeli ngokwakhe. Ingelosi yamtshela: “Hamba wena kuze kubesekupheleni; usuphumulile [usulele ekufeni] uyakuma esabelweni sakho ngasekupheleni kwezinsuku.” (Daniyeli 12:13) Labo abanjengoDaniyeli abavuswa ngalesosikhathi nabasabelayo enkonzweni kaJesu nabafowabo ezulwini bayovuselwa ekupheleleni kobuntu. Uma bephumelela ovivinyweni lokugcina, amagama abo ayolotshwa phakade encwadini yokuphila. (IsAmbulo 20:5) Ngokufanayo, ukuvuka kubo kuyoba ukuvukela “ukuphila okuphakade.”
16. Obani ukuvuka kwabo esimisweni esisha sezinto kuyobonakala kuwukuvukela “ihlazo nokunengwa okuphakade”?
16 Nokho, akubona bonke abayosabela kanjalo. Ngokungangabazeki abanye bayozama ukubuyisa imikhuba eye yaphuca abantu ukuthula isikhathi eside. Kunesixwayiso esihle ngabanjalo eBhayibhelini: “Amagwala, nabangakholwayo, nabanengekayo, nababulali, nezifebe, nabathakathi, nabakhonza izithombe, nabo bonke abaqamba amanga, isabelo sabo siyakubasechibini elivutha umlilo nesibabule, okungukufa kwesibili.” (IsAmbulo 21:8) Lokhu “kufa kwesibili” kuyisahlulelo esiqondile esivela kuJehova esingenalo uvuko. Siwukukhohlakala kwaphakade, okungenakuphela. Labo abavusiwe abazibonakalisa bengenakwazisa bayothola lokhu kufa kwesibili; ngakho-ke, ukuvuka kwabo kuyoba ukuvukela “ihlazo nokunengwa okuphakade.”—Daniyeli 12:2.
“Ukwazi Kube-Kuningi”
17. Sazi kanjani ukuthi isiprofetho ngenkosi yasenyakatho nenkosi yaseningizimu sasilotshelwe kakhulukazi inzuzo yethu namuhla?
17 Khona-ke ingelosi inikeza uDaniyeli amazwi eseluleko: “Kepha wena-Daniyeli, gcina amazwi, unamathelise incwadi kuze kube-sesikhathini sokugcina; abaningi bayakwehla benyuka, ukwazi kube-kuningi.” (Daniyeli 12:4) Lamazwi athumba ukunakekela kwethu. Nakuba isiprofetho sengelosi esiphathelene namakhosi amabili saqala ukugcwaliseka cishe eminyakeni eyizi-2 300 edlule, ukuqondakala kwaso kuye kwaba sobala ngokuyinhloko phakathi “nesikhathi sokuphela,” ikakhulukazi kusukela ngo-1919. Kulezinsuku, ‘abaningi behla benyuka’ eBhayibhelini, futhi ngempela ulwazi lweqiniso luye lwaba luningi. Manje sekuyisikhathi uJehova anikeze ngaso ulwazi kwabaqondayo.
18. (a) Yiziphi izingxenye eziyinhloko zesiprofetho ezigcwalisekayo manje noma esezizogcwaliseka? (b) Lokhu kusinika muphi umbono olinganiselwe?
18 Iqiniso lokuthi izici eziningana zesiprofetho zagcwaliseka emakhulwini amaningi eminyaka adlule liqinisa ukholo lwethu ezingxenyeni zesiprofetho ezisazogcwaliseka. (Joshuwa 23:14) Umhlaba namuhla uhileleke emzabalazweni wempi phakathi kwenkosi yasenyakatho nenkosi yaseningizimu, njengoba nje ingelosi yabikezela. Ngaphezu kwalokho, isiprofetho sixwayisa ngezikhathi eziyingozi ngisho nangokwengeziwe ezingaphambili. Ngakho sisizwa ukuba sigcine ukulinganisela kwethu futhi sigweme ukukhukhulwa amanga anoma iyiphi yalamakhosi. Lesi isikhathi sokuqinisa ithemba lethu kuJehova. Ungalokothi ukhohlwe ukuthi “uMikayeli . . . isikhulu esiqhamileyo” ‘umile’ ngenxa yabantu bakaNkulunkulu. Ukuphela kwensindiso yethu eqinisekile isekuzithobeni eMbusweni kaNkulunkulu ngaphansi kukaKristu Jesu.—IzEnzo 4:12; Filipi 2:9-11.
19. Yikuphi ukubaluleka amazwi engelosi kuDaniyeli anakho kithi ngabanye?
19 Khona-ke, hlala useduze ‘nabahlakaniphileyo,’ ‘abakhanya njengokukhazimula kwesibhakabhaka.’ Hlala ukhuthele ekusebenzeleni uMbuso kaNkulunkulu. (1 Korinte 15:58; Roma 15:5, 6) Julisa uthando lwakho lweqiniso le Zwi likaNkulunkulu, futhi ukwazise ngokujulile ukuthula okukhona ngisho kwamanje enhlanganweni kaNkulunkulu. (IHubo 119:165; Efesu 4:1-3; Filipi 2:1-5) Khona-ke, lapho uMikayeli ‘ema’ ukuba abhubhise izitha zikaJehova, kwangathi ungasinda, kanye nabo bonke abantu bakaNkulunkulu abamagama abo ‘afunyanwa elotshiwe encwadini.’
Ungaphendula?
◻ Kungayiphi indlela ka kade sekubé nokuvuka ‘kwabaningi abalele emhlabathini?’
◻ Lokhu “kuvuka” kungaphenduka kanjani “ihlazo”?
◻ “Abahlakaniphileyo” bakhanya kanjani njengezinkanyiso futhi balethe abaningi ekulungeni?
◻ Yikuphi ukugcwaliseka kwesikhathi esizayo okuyoba khona ngokuphathelene nokuvuka kwalabo “abalele emhlabathini?”
◻ UDaniyeli 12:4 ugcwaliseka kanjani?
[Isithombe ekhasini 23]
Kusukela ngo-1919 abahlakaniphileyo bebekhanyisa iqiniso elinikeza ukuphila
[Umthombo]
NASA photo