Iziphi Ezinye Izinzuzo Ezivela KuNkulunkulu?

INGABE uyazijabulela izimbali ezinhle, iphunga lamaroses, umculo wezinyoni? Ingabe kwakujabulisa ukumamatheka kokuqala kwengane yakho? Awuwazisi yini amaphunga aconsisa amathe? Futhi ubani ongababazi ngothingo, ukushona kwelanga okukhazimulayo, noma izinkanyezi ngobusuku obucwathile? Amalungiselelo kaNkulunkulu amangalisayo asinakuwaqeda, akunjalo?

Kodwa kukhona usizi oluningi kakhulu. Naphezu kwamandla omhlaba okukhiqiza okuningi kwabo bonke, izigidi ziyalamba. Izigidi ezengeziwe zibulawa ukungcola komoya. Futhi izinkulungwane zezigidi namuhla zithintwa ubugebengu, ukuhaha, ubugovu, nokwesaba lokho okuyolethwa ikusasa.

Njengoba uMdali eye waphana kangaka, kungani kunokungathokozi okungaka? Lonozungezilanga uyindawo emangalisayo, eyenzelwa thina ukuba siyijabulele. Kodwa izwe—isintu—lisesimweni esidabukisayo. Ngabaningi abakhé emhlabeni, ikusasa limnyama, liyasabisa. Kungani? Konakalaphi? Ingabe uNkulunkulu wenza umuntu wayesemlahla? Ingabe kukhona ukwaziswa ngalesisimo esididayo? Ingabe sinalo ithemba ngekusasa?

Umthombo Wokukhanya Nethemba

Cishe eminyakeni eyizi-2 000 edlule kwazalwa umntwana womfana ohlukile—ohlukile ngoba unina, uMariya, wayengumuntu, kanti uyise kunguNkulunkulu uqobo! Ingabe abanye bathi ‘Akunakwenzeka!?’ Cha, akunjalo ngoMqalisi wokukhulelwa, uMenzi wazo zonke lobo zokuphila okuyinkimbinkimbi. Lowomfana omncane wakhula waba ‘umuntu ophelele, uKristu Jesu.’—1 Thimothewu 2:5; Mathewu 1:18-25.

Kwakuwukuzalwa okubaluleke kakhulu emlandweni. Eqinisweni, izizwe eziningi ziyakuvuma lokhu ngokuphawula izehlakalo zomlando zangaphambi kosuku lwakhe ngokuthi B.C.—before Christ. Futhi wachitha iminyaka yakhe yobusha engaziwa esebenza njengombazi ongumsizi emzini kasingayise eNazaretha. Kwadlula iminyaka engamashumi amathathu. Khona-ke emfuleni iJordani, uJesu waziletha ukuba enze intando kaNkulunkulu futhi wabhapathizwa, nomoya kaJehova uNkulunkulu wehlela phezu kwakhe. (Mathewu 3:13-17) UJesu wabe eseqalisa umkhankaso onamandla wokushumayela nokufundisa. Njengoba kwaprofetha uIsaya, “isizwe esasihlezi ebumnyameni sibonile ukukhanya okukhulu.”—Mathewu 4:14-17; Isaya 9:2.

UJesu waba uMfundisi odume kakhulu nohlonishwa kakhulu kunowanoma isiphi isikhathi. Akekho omunye umfundisi ongumuntu owaba nethonya elinamandla kangaka esintwini noma owaletha ukukhanya okungaka okungokomoya nethemba. Yayiyini incwadi yakhe yokufundisa? IBhayibheli, njengoba lalinjalo ngalesosikhathi—imiBhalo yesiHeberu, noma ‘iTestamente Elidala.’ UJesu wayenza yaphila. Iziprofetho eziningi zamandulo zagcwaliseka kuye. (Qhathanisa uMika 5:2 noMathewu 2:3-6.) Waqinisekisa umlando kaGenesise ngokuphathelene nesiqalo somuntu. (Genesise 2:24; Mathewu 19:3-6) UJesu waqhuba, wandisa, futhi wasakaza kabanzi isihloko esikhulu seBhayibheli—ukulwelwa kukaJehova ngoMbuso kaNkulunkulu. (Mathewu 4:23; 6:10) Ngaphezu kwalokho, izindaba zokuphila nemisebenzi kaJesu Kristu ziyizingxenye ezivelele emiBhalweni yamaKristu yesiGreki, noma “iTestamente Elisha.” Yebo, iBhayibheli liyisipho esimangalisayo esivela kuNkulunkulu, ukukhanya okukhazimulayo ezweni elilufifi nelidabukile.—IHubo 119:105.

Kungani Isintu Sisodakeni?

Ingabe iBhayibheli liyawuphendula lowombuzo? Yebo. Liyabonisa ukuthi kwakungeyona indaba yokulahla kukaNkulunkulu umuntu, kodwa kunalokho, eyokulahla komuntu uNkulunkulu. Futhi, kwakuhileleke isimiso senkululeko yokuzikhethela esiyisisekelo. Abantu abadalwanga befana namarobhothi, behleliwe ukuba balalele. Singakhetha ukulalela noma ukungalaleli.

Lapho uNkulunkulu edala abantu ababili bokuqala ePharadesi elihle lase-Edene, yeka ukuthi kufanele ukuba babejabula futhi bengenankinga kanjani! Kwakungekho kugula, nakwesaba, nakukhathazeka. Kwakukhona izinyoni nezilwane ezijabulisayo, futhi kunenala yokudla okumnandi. (Genesise 1:26; 2:7-9) Nokho, ngokuhamba kwesikhathi kwavela isitha esingabonakali. Isidalwa somoya esinamandla saba nobugovu, sihahela ukulawula umkhaya wesintu wesikhathi esizayo. Ngokuqamba amanga okuqala, sayenga uEva, noAdamu. Sabanxenxela ukuba bephule umthetho kaNkulunkulu wokuthi bangasidli isithelo esenqatshelwe. (Genesise 3:1-7) Njengabaningi namuhla, abantu bokuqala bacabanga ukuthi babeyokwenza abakuthandayo. Kodwa ngokwenza kanjalo eqinisweni bazibeka ngaphansi kokulawula kukaSathane, unkulunkulu wesimiso esibi sezinto samanje.—2 Korinte 4:4.

Lokhu kwaphakamisa impikiswano enkulu nebalulekile: Ingabe umuntu angazibusa ngokuphumelelayo ngaphandle kukaNkulunkulu? Kwakuyodinga isikhathi esiningi ukuphendula lombuzo ngokwanelisayo. Okwangalesisikhathi, uAdamu noEva kwakufanele bakhokhe inhlawulo uNkulunkulu ayeyinqumile—ukufa. Futhi njengoba base beyizoni eziwohlokayo, bona nenzalo yabo babengasenathemba lokuphila okuphakade ngaphandle kukaNkulunkulu.—Roma 5:12; 1 Korinte 15:21, 22.

Ikusasa Elikhazimulayo

Kusukela osukwini luka-Adamu izizukulwane eziningi ziye zafika zadlula. Futhi enkundleni eshintshashintshayo yezindaba zesintu, kuye kwazanywa izinhlobo eziningi zohulumeni babantu—umbuso wobushiqela, umbuso wentando yeningi, umbuso wesimiso sokusebenzela uhulumeni, ubukhomanisi, nezinye. Kodwa zonke zihlulekile. Izinkinga zezombangazwe, ezenhlalo, nezezizwe zikhula ngokushesha; ngokunjalo nezikhali ezishaqisayo zokubhubhisa abantu abaningi ezisongela ukubhubhisa umhlaba wonke. Phakathi neMpi Yezwe II, abezombangazwe baseNtshonalanga bathembisa ukuthi ukunqoba kuyoletha ukukhululeka ekusweleni nasekwesabeni; kodwa kokubili kuyanda.

Liyini ikhambi? Inkinga enkulu idinga ikhambi elikhulu—elingengaphansi kokuhlanzwa komhlaba wonke nokulethwa kwezwe elisha. Ubani ongafeza lokho? Ngokuqinisekile akuzona iZizwe EzihIangene noma iyiphi enye inhlanganisela yemibuso yezombangazwe leyo ngokuvamile ephula izivumelwano zokuthula cishe ngaphambi kokuba uyinki okusayinwe ngawo wome! Imane iyizisulu ezingenakuzisiza ezibanjwe emandleni kaSathane. (1 Johane 5:19) UJehova kuphela, uMninimandla onke, ongabhubhisa uSathane namademoni akhe, aqede izwe lamanje elonakele, futhi alethe elisha elikhazimulayo ngaphansi koMbuso wasezulwini neNdodana yakhe uJesu Kristu, njengeNkosi yamakhosi.—Mathewu 6:9, 10; Daniyeli 2:44; IsAmbulo 20:1-3.

Uyofezani loMbuso? Ubani oyosinda ekuhlanzweni komhlaba okubhubhisayo, noma iHarmagedoni? Iqiniso elithakazelisa kakhulu abantu abengeziwe abaya beliqaphela ukuthi lohulumeni wasezulwini usuyasebenza kakade futhi ulungiselela abantu ukuba basinde iHarmagedoni! (IsAmbulo 16:14-16) Kumelwe babe luhlobo luni lwabantu? UJesu Kristu wathi: “Babusiswe abamnene [abathobile], ngokuba bayakudla ifa lomhlaba.” (Mathewu 5:5) Ngaleyondlela waqinisekisa lesiprofetho samandulo: “Lungakafiki phezu kwenu usuku lolaka lukaJehova. Funani uJehova nina nonke-bathobekileyo bomhlaba enisebenzile ukwahlulela kwakhe; funani ukulunga; funani ukuthobeka; mhlawumbe niyakusitshekelwa ngosuku lolaka lukaJehova.”—Zefaniya 2:2, 3.

Abathobekileyo abayikusinda iHarmagedoni kuphela, kodwa ngokuhlala bethembekile kuNkulunkulu, bayodla futhi ifa lokuphila okuphakade. Kanjani? Njengoba sekushiwo kakade, umkhaya omkhulu wenzalo ka-Adamu walahlekelwa ithemba lokuphila okuphakade ngenxa yokungalaleli kwakhe kokona. Ukufa kwehlela phezu kwalo lonke uhlanga lwesintu ngoAdamu. Njengoba ayengumuntu ophelele, kwakudingeka omunye umuntu ophelele ukuba ahlenge, noma athenge lokho uAdamu akulahla. UJesu Kristu wasigcwalisa lesosidingo futhi wanikela ngokuphila kwakhe “ukuba yilowo nalowo okholwa [nguye] angabhubhi, kodwa abe-nokuphila okuphakade.”—Johane 3:16.

Lelilungiselelo lesihlengo liyisipho esikhulu kakhulu sikaNkulunkulu kubantu. Aliyikusebenza nje kuphela kulabo abasindela ukungena ezweni elisha kodwa futhi nakulabo ababuya kwabafileyo. Ingabe lokho kuzwakala kumangalisa kakhulu? UJesu wathi: “Ningamangali ngalokho, ngokuba isikhathi siyeza, lapho bonke abasemathuneni beyakulizwa izwi layo, abenzé ukulunga baphumele ekuvukeni kokuphila, abenzé okubi ekuvukeni kokulahlwa.” Yeka injabulo! Yeka ukuthi bayojabula kanjani abayosinda eHarmagedoni, abayokwazi ukwamukela abathandekayo babo bevela kwabafileyo!—Johane 5:28, 29.

Yeka ithemba elikhazimulayo! Futhi konke lokhu kulungiselelwe uMdali onothando, uJehova, ngeNdodana yakhe ethandekayo, uJesu. Nakuba namuhla umbono umnyama futhi wethusa, ikusasa ligcwele ukukhanya nethemba ngalabo abatadisha iBhayibheli futhi benze ngokuvumelana nesigijimi salo esikhuthazayo. Siphila ezikhathini ezijabulisayo. UMbuso kaNkulunkulu useduze. (Mathewu 24:33, 34) Dumisani uJehova, uMuphi ‘wezipho zonke ezinhle neziphiwo zonke ezipheleleyo’!—Jakobe 1:17.

Njengoba uzindla ngezindlela eziningi esizuza ngazo emalungiselelweni nasezinjongweni zikaNkulunkulu, ungase ube nomuzwa ojulile wokubonga nesifiso sokuwubonisa ngendlela ethile. Kodwa uma usaqala nje ukuqonda nokwamukela ithemba langempela lesikhathi esizayo, ungase usizwe isidingo sokuhlola ngokujulile kancane. Sikukhuthaza ukuba wenze khona lokho. Qhubeka utadisha iZwi likaNkulunkulu kanye nezincwadi ezinjengalena ezingakusiza ukuba wandise ulwazi lwakho nokwazisa ngezinjongo zikaNkulunkulu ezikhazimulayo.

Labo asebekholwa ngokungathandabuzi ukuthi uMbuso kaNkulunkulu uwukuphela kwekhambi komaye besintu bangazizwa njengomhubi ophefumlelwe owathi: “Ngiyakubuyiselani kuJehova ngazo zonke izenzo zakhe ezinhle kimina na?” (IHubo 116:12) Abanjalo bayothola ukuthi ukutshela abanye ngalokho uNkulunkulu asenzele khona nangekusasa elikhazimulayo alibekele labo abamthandayo nabamkhonzayo kuletha ukwaneliseka okujulile nenjabulo yoqobo. Ngani? Ngoba, njengoba uJesu asho: “Kubusisekile ukupha kunokwamukela.”—IzEnzo 20:35.

[Ibhokisi ekhasini 5]

UJESU KRISTU—

◆ Wagcwalisa iziprofetho eziningi zasendulo, ngokwesibonelo, uMika 5:2; Mathewu 2:3-6

◆ Waqinisekisa ukulandisa kukaGenesise ngesiqalo somuntu—Mathewu 19:3-6

◆ Wandisa futhi wasakaza isihloko esikhulu seBhayibheli, ukulwelwa kukaJehova ngoMbuso—Mathewu 4:23; 6:9, 10; Luka 8:1

◆ Wabuyisela lokho uAdamu akulahla, ukuphila kobuntu okuphelele, ngaleyondlela enza kube nokwenzeka ngalabo ababonisa ukholo kuYe ukuthola ukuphila okuphakade—Johane 3:16

[Isithombe ekhasini 7]

“Uyobuyiselani kuJehova ngazo zonke izenzo zakhe ezinhle?’