Zinqatshelwe Izingane Ukuba Zize Emihlanganweni?

‘IZINSANA nezingane akumelwe zilethwe endlini kaNkulunkulu.’ Lena kwakuyimizwa yomhlaziyi owaziwayo weBhayibheli uAdam Clarke. Yebo, wamvumela umame ompofu ‘owayengenamuntu wokumbhekela ingane yakhe lapho engekho.’ Abanjalo bangavunyelwa ukuletha izingane zabo esontweni “nakuba kuphazamisa ibandla, nabanye abefundisi, ukuzwa ingane ikhala.”

UClarke wasekela ukubandlulula kwakhe izingane embhalweni weBhayibheli okuNehemiya 8:2, ofundeka kanje: “UEzra umpristi wawuletha umthetho phambi kwebandla, abesilisa nabesifazane nabo bonke ababenengqondo yokuzwa.” Nokho, incazelo enjalo iyawuphikisa umqondo okuDuteronomi 31:12: “Butha abantu, amadoda, nabesifazane, nabantwana . . . ukuba bezwe, bafunde.”—Bheka futhi eyesi-2 Thimothewu 3:15.

Ngenxa yalokhu, akubonakali ukuthi lapho ehlela lomhlangano, uNehemiya wayecabanga ukuvimbela noma ubani. Kunalokho, ngokunokwenzeka inhloso yesimemo yayiwukuhlanganisa bonke labo “ababenengqondo yokuzwa,” ukuze akhuthaze ukuhlanganyela okugcwele! Yeka ukuthi kwakuyoba okungenangqondo kangakanani ukucela abazali ukuba bashiye izingane zabo zingabhekiwe!

Ngokuthakazelisayo, oFakazi BakaJehova namuhla bakhuthazwa ukuba beze nezinsana nezingane zabo emihlanganweni yobuKristu. Iqiniso, ngezinye izikhathi lokhu kungase kubangele ukuphazamiseka okuncane nesilinganiso esithile sokucindezeleka ngabazali. Kodwa abazali abangama Kristu benza umzamo wokuqeqesha izingane zabo ukuba zihlale zithule. Ngesikhathi esifanele izingane zabo ziyoba “nengqondo yokuzwa” futhi zingenise ukwaziswa okunikeza ukuphila.—Heberu 10:24, 25.