Ukuzamazama Komhlaba—Usizi Phezu Kolunye Usizi

“KWAKUTHUSA. Sasilahlekile. Kwakufana nolwandlekazi, ulwandlekazi, konke kunyakaza.”

Kwasho kanjalo owayesinde kokunye ukuzamazama okubulala kakhulu emlandweni. Lokho kuzamazama komhlaba okubhubhisayo kwenzeka ngo-1976 eChina, kwacekela phansi idolobha laseTangshan futhi kwabulala cishe abantu abayizi-800 000. Ngokumangalisayo, lowo owasinda waphumelela ekuzameni ukuphuma ehamba ngezinyawo ehhotela elalidilike laphela kanye nomfanekiso owawudwetshiwe walelodolobha owawungamamitha-skwele ayi-52.

Izenzakalo ezinjalo zokuzamazama komhlaba ziye zathinta abantu abaningi esikhathini sethu ukwedlula noma iliphi elinye ikhulu leminyaka emlandweni, zenza umhlaba wonke wakukhathalela ukuzamazama komhlaba. Izigidi ziye zalimala futhi zalahlekelwa, futhi izigidi ezengeziwe ziye zafa. Ukuzamazama okukhulu kuyizihloko eziqhamile zamaphephandaba emhlabeni wonke. Ukuzamazama komhlaba ngo-1985 okwabulala abantu abangaphezu kwezi-9 000 eDolobheni laseMexico kwathinta izwe ngokomzwelo, kwashukumisela izizwe ukuba ziphuthumise usizo kulelodolobha.

Ukuhlolwa okungokwesayensi kokuzamazama komhlaba kuye kwaba kukhulu, kusetshenziswa izindlela zobuchwepheshe zanamuhla. Ubukhulu bokuzamazama komhlaba bulinganiswa ngokuvamile ngesilinganiso okuthiwa iRichter scale, esinezibalo ezinkulu ezibonisa ukukhishwa okukhulu kwamandla. Nokho, uma wawungehlelwa ukuzamazama komhlaba, ingabe ucabanga ukuthi wawuyozikhathaza ngesilinganiso sakho ngokweRichter? Akunakwenzeka. Wawuyozikhathaza ngokusinda. Wazi ukuthi isilinganiso ngokweRichter ngeke sikushintshe okuhlangenwe nakho kwakho siqu.

Ukuzamazama Komhlaba Esiprofethweni SeBhayibheli

Esiprofethweni esinezici eziningi, uJesu Kristu wahlanganisa ukuzamazama komhlaba, ethi: “Kube-khona . . . nokuzamazama komhlaba izindawo ngezindawo.” Futhi wabikezela: “Kuyakuba-khona ukuzamazama okukhulu komhlaba. ” Ukuphawuleka kwakho kwakuyoba okuhlangene nezinye izingxenye zesiprofetho sakhe esibikezela ngesizukulwane esasiyobonakala ngenhlanganisela engavamile yezimpi, indlala, izifo, ukungabi-namthetho, ukwesaba nosizi emhlabeni wonke. Ukugcwaliseka kwakho kwakuyokwakha “isibonakaliso” sokubekwa kukaJesu njengeNkosi yoMbuso kaNkulunkulu futhi kwakuyophawula ukungena kwesimiso sezwe ezinsukwini zaso zokugcina. “Isibonakaliso,” esihlanganisa isici saso sokuzamazama komhlaba, siye saba sobala kusukela ngo-1914.—Mathewu 24:3, 7-12; Luka 21:11, 25, 26, 31, 32.

Abacwaningi abaningi bokuzamazama komhlaba bakholelwa ukuthi ukuzamazama komhlaba manje akukwedluli ngobukhulu noma ngobuningi okwesikhathi esidlule. Ngokuphambene, abanye baphetha ngokuthi isizukulwane sethu siye sabhekana nokuzamazama komhlaba okuvame kakhulu kunezizukulwane zangaphambili. Ngokwamarekhodi, ikhulu lama-20 leminyaka liwadlula ngokuphawulekayo amakhulu adlule ngokuzamazama komhlaba. Izincwadi zeWatch Tower Society ziye zakuletha ngokuphindaphindiwe ukunakekela kulokhu, ziqokomisa ukubaluleka okungokomBhalo kokuzamazama komhlaba okwenzeka kusukela ngo-1914.a

Nokho, amarekhodi okuzamazama komhlaba angaphambi kuka-1914 awaphelele. Futhi izizukulwane zangaphambili azikaze zibe namathuluzi angokwesayensi okulinganisa angasenza sikwazi ukuqhathanisa ngokunembile ubungako bokuzamazama komhlaba kwesikhathi esidlule nokwamanje. Ingabe lokhu kusho ukuthi asinakukuqaphela ukugcwaliseka kwesiprofetho sikaJesu?

Cha, akunjalo neze. Ngokusobala uJesu wabona kusengaphambili ukuthi umlando wawungeke ukugcine konke ukuzamazama komhlaba kwangaphambi kuka-1914 nokuthi izizukulwane zangaphambili zazingenakuba nawo amathuluzi ashaya emhloleni okulinganisa ukuzamazama komhlaba, njengoba nje azibona kusengaphambili ezinye izimo zesikhathi sethu. Kanjalo, akazange asisho lesiprofetho ngendlela yokuthi ukugcwaliseka kwaso kwakuyodinga amarekhodi okuzamazama komhlaba athathelwe emakhulwini eminyaka ngaphambili noma ngokufundwa kwemishini ethile. UJesu akazange asho ukuthi inani lokuzamazama komhlaba “ezinsukwini zokugcina” laliyoba likhulu ngezikhathi ezithile kunenani lesikhathi sangaphambili, futhi akazange asho ukuthi sasiyobona ukuzamazama okukhulu okungakaze kwenzeke. (2 Thimothewu 3:1) Akazange akhulume njengomcwaningi wokuzamazama komhlaba.

UJesu wagxila kokuhlangenwe nakho kwabantu. Ukuzamazama komhlaba kwakuyoba yi_ ngxenye ‘yokuqala kwemihelo [“Usizi,” NW].’ (Mathewu 24:8) Usizi alulinganiswa ngemishini. Ubuhlungu obuzwiwa ngabantu buwukuphela kwe silinganiso sosizi, oluhlanganisa nokuzamazama komhlaba. Ukuze isiprofetho sikaJesu sigcwaliseke, usizi olubangelwa ukuzamazama komhlaba kwakuyomelwe lube khona ngendlela ephawulekayo. Khona-ke ukuqashelwa kwesici sesiprofetho sokuzamazama komhlaba asixhomekile emibhalweni yabantu egciniwe engaqinisekile noma ezilinganisweni ezingokwesayensi zamandla aphumayo. Imibiko yanamuhla yokuzamazama komhlaba inikeza umbono okhanyayo wosizi oluzwiwa ngabantu olubangelwa ukuzamazama komhlaba.

Isizathu Sokwanda Kokuzamazama Komhlaba

Ngokusobala uJesu wayazi ukuthi iningi labantu emhlabeni ‘laliyokwanda’ nokuthi izenzo zomuntu zaziyothambekela ‘ekubhubhiseni umhlaba.’ (IsAmbulo 11:18) Eqinisweni, inani labantu emhlabeni wonke cishe liye laphindeka kathathu kusukela ngo-1914. Emakhulwini eminyaka ngaphambili, ukuzamazama komhlaba okusesilinganisweni esithile ngokuvamile kwakuthinta abantu abambalwa kunokuba kungenza manje.

Cabanga ngeTangshan. Kwakuyidolobhana nje elincane kwaze kwaba iminyaka yawo-1870. Ukuba ukuzamazama komhlaba ngo-1976 kwenzeka ngalesosikhathi, inani labalimala lalingeke lidlule inani elincane lezakhamuzi. Ngo-1879 kwaqala intuthuko yezemisebenzi. Ngawo-1970 inani labantu lase likhule laba ngaphezulu kwesigidi, lilungiselela inhlekelele enkulu ngo-1976.

Ngaphezu kwalokho, ukuqhathanisa okungasekelwa kuphela esilinganisweni iRichter kungase kukhohlise. Ngokwesibonelo, ukuzamazama komhlaba eAlaska okwenzeka ngo-1964 kwabulala abantu abayi-115 futhi ngokwesilinganiso iRichter kwakuyi-8,5. Isilinganiso sokuzamazama komhlaba saseTangshan saba ngaphansi saba yi-8,2. Isiphi esasisikhulu ngempela? Uma kulinganiswa ngokosizi lwabantu kunangesilinganiso iRichter, ngokusobala isehlakalo saseTangshan sasisibi, singesikhulu kunazo zonke ekhulwini lama-20 leminyaka. Imishini ngeke ibulinganise ubungako bosizi lwabantu.

Ukukhululeka Kulo Lonke Usizi

Njengoba nje uJesu abikezela, okuhlangenwe nakho kwesintu kusukela ngo-1914 kuye kwaba “imihelo yosizi,” kanye nokuzamazama komhlaba kunezela ingxenye yakho. Wabonisa ukubaluleka kwakho, ethi: “Nxa nibona lezozinto zenzeka, yazini ukuthi umbuso kaNkulunkulu useduze. Ngiqinisile ngithi kini: Lesisizukulwane asiyikudlula, kungakenzeki konke.” Lokho kwakuyosho ukuthini ngabafundi bakaJesu? Wathi, “nxa kuqala ukuvela lokho, niphakamise amakhanda enu, ngokuba kusondele ukukhululwa kwenu.”—Luka 21:28, 31, 32.

Ngokushesha manje, usizi, kuhlanganise nalolo olubangelwa ukuzamazama komhlaba, ngeke luphinde lukhathaze isintu. Ngaphansi koMbuso kaNkulunkulu, zonke izinyembezi zokudabuka ziyokwesulwa phakade. Yilelo ithemba labantu balesizukulwane. Futhi kungase kube ithemba lakho uma usabela ekugcwalisekeni kwenye ingxenye yesiprofetho sikaJesu, isigijimi esimenyezelwa manje emhlabeni wonke oFakazi BakaJehova: “Lelivangeli lombuso liyakushunyayelwa ezweni lonke, kube-ngubufakazi ezizweni zonke, andukuba kufike ukuphela.”—Mathewu 24:14; IsAmbulo 21:3, 4.

[Umbhalo waphansi]