Inkonzo Yokuthuthukisa Umphakathi—Indlela Ethinta Ngayo Abantu

EQALA ngezinkwa eziyisihlanu kuphela zebhali nezinhlanzi ezimbili ezincane, uJesu Kristu wondla ngokumangalisayo amadoda ayizi-5 000, abesifazane, nabantwana ngesikhathi sePhasika (March-April) ngo-32 C.E. (Mathewu 14:14-21; Johane 6:1-13) Beqaphela amandla amakhulu uJesu ayenawo, abantu bafuna ukumenza inkosi yabo. Mhlawumbe babenomuzwa wokuthi wayeyobakhulula ejokeni lamaRoma futhi athuthukise ukuphila kwabo. UJesu wasabela kanjani?

Kunokuba avumele isicelo seningi, uJesu “wamonyukela futhi entabeni yena yedwa.” (Johane 6:15) Kodwa isixuku asizange sidele kalula. Sabuyela kuye ngakusasa. Azi isisusa saso esiyisisekelo, uJesu wathi kuso: “Aningifuni ngokuba nabona izibonakaliso, kepha ningifuna ngokuba nadla izinkwa, nasutha.” Khona-ke wanezela: “Ningasebenzeli ukudla okuphelayo kepha ukudla okuhlala kuze kube-ngukuphila okuphakade.”—Johane 6:25-27.

Yini esingayifunda kulendaba? Phakathi kwezinye izinto, ibonisa ngokucacile ukuthi kulula ukukhanga abantu ngezinzuzo ezibonakalayo. Nokho, ukwakha ukwazisa kwangempela ngezinto ezingokomoya—izinto ezinokubaluleka okuhlala njalo—kuyindaba ehluke ngokuphelele. Namuhla, mkhulu ngisho nangokwengeziwe umkhuba wabantu wokubheka izinto ngombono wezinto ezibonakalayo kuphela.

Ithonya Elinamandla Lenkonzo Yokuthuthukisa Umphakathi

Ngokwabantu basemazweni athuthukayo, izizwe ezithuthukile zaseNtshonalanga zinikeza wonke amathuba nezinzuzo ezibonakalayo umuntu angazifuna—amathuba angatholakali ezweni labo siqu. Kuba nomhawu ngokuchuma, kubangiswana ngendlela yokuphila. Cishe wonke umfundi ubekelwa ithuba lemfundo ephakeme ngaphambi kwakhe njengencwadi yemvume yokungena ekuthuthukeni nasempumelelweni. Njengoba kunesizinda esinjalo akunzima ukuqonda ukuthi kungani izimiso zokuthuthukisa umphakathi zamasonto akwamanye amazwe zibe nethonya elinamandla kangaka kulamazwe. Kodwa iyini imiphumela?

Ngokwesibonelo, eMpumalanga, ukuzimisela kwabantu ukwenza cishe noma yini amasonto ayifunayo ukuze bafanelekele ukuthola izipho noma izabelo kuye kwaveza igama lokweyisa lokuthi “amaKristu elayisi.” Yebo, okudabukisa kakhulu ukuthi lapho usizo olunjalo noma ukusekela kunqamuka, nesithakazelo sabantu siyanqamuka. AmaKristu amaningi elayisi amane anyamalale. Ngakho, phakathi kwabantu baseCanton, kune sisho esaziwayo esihumusheka ngalendlela: “UNkulunkulu uthanda izwe, kodwa izwe lithanda ubisi oluyimpuphu.”

Nakuba amaqembu amaningi amasonto engasenazo izimiso zosizo, ngaphandle mhlawumbe kwezikhathi zenhlekelele, lokho okwenzeka esikhathini esidlule kwashiya uphawu lwakho. Kubantu abaningi baseMpumalanga, amasonto ayefana nezinhlangano zezenhlala-kahle, futhi ukuphela kwesizathu sokuya esontweni siwukwamukela, hhayi ukupha. Abasiboni isidingo sokwenza noma ikuphi ukuzidela komuntu siqu ngenxa yesonto. Ngowesibonelo, lesimo sengqondo sibonakala ekunqikazeni kwabo ukunikeiela izincwadi zeBhayibheli ngoba, ezingqondweni zabo, into ekhiqizwa isonto kumelwe ibe isihle.

Ukusebenzisa isonto njengokuthile okusiza ekufinyeleleni umgomo kubonakala kalula kakhulu endabeni yemfundo. Emazweni amaningi asathuthuka, ukuthola imfundo enjengeyaseNtshonalanga kubhekwa njengendlela eqinisekile eya ekubeni nodumo nasempumelelweni. Ngokomunye umthombo, ngesikhathi sokuthola kweNdiya uzibuse eBrithani, amaphesenti angama-85 amalungu ephalamende alesosizwe ayefunde “ezikoleni zobuKristu.” Futhi, ngokwemiqondo kaConfucius, eMpumalanga Ekude, ukuba nemfundo enhle kungomunye wemigomo ephakeme kakhulu ekuphileni. Ngokwemvelo, abaningi babheka ezikoleni zamasonto, ngokuvamile ezisebenzisa izindlela nezimiso zaseNtshonalanga, njengendlela abangazithuthukisa ngayo. Futhi, bethemba ukufaka abantwana babo kwesinye sezikole zamasonto futhi mhlawumbe babayise phesheya kwezilwandle kamuva, abazali abaningi baseMpumalanga ngokuvamile abalandela izinkonzo zamasiko baya ngenjabulo esontweni futhi bakhuthaze abantwana babo ukuba benze okufanayo.

Ziyini Izithelo?

Lapho kuqhathaniswa namasonto asemuva emakhaya, amasonto anezithunywa zevangeli ngokuvamile aba nabantu abaningi. Ngaleyondlela abantu abaningi bafundiswa izimfundiso zesonto nomqondo othile wobuKristu. Kodwa ingabe lamathuba aye abenza baqonda iBhayibheli nesigijimi salo? Ingabe ngempela aye abenza baba amaKristu, okungukuthi, abalandeli bakaJesu Kristu?

Cabangela ngokwesibonelo, uKuo Tung, insizwa okukhulunywe ngayo ngaphambili. Lapho ebuzwa ukuthi manje useyakholelwa yini kuNkulunkulu ngemva kokuba eye esontweni isikhathi esithile, waphendula: “Cha. Akukaze kukhulunywe ngobufakazi bokuthi uNkulunkulu ukhona.” Eqinisweni, wavuma ukuthi wayengaqiniseki ukuthi bakhona kubangane bakhe ababekholelwa kuNkulunkulu ongumuntu, ngisho nakuba babeya naye esontweni. Wathi, babeya kuphela ngenjongo yokufunda isiNgisi.

Enye insizwa yafika ekhaya izochitha iholide isuka ekholiji eUnited States. Lapho omunye woFakazi BakaJehova eyivakashela, yabuza ukuthi oFakazi babeyiqhuba ngesiNgisi yini imihlangano yabo. Kungani? Yathi, “Ukuze ngikwazi ukulondoloza isiNgisi sami.” Lapho itshelwa ukuthi imihlangano yayiqhutshwa ngolimi lwendawo ukuze bonke bazuze ngokomoya, lensizwa yathi yayizoya lapho imihlangano yesiNgisi yayiqhutshwa khona kabili ngesonto.

Ngisho nalabo asebeye baba amalungu esonto futhi babhapathizwa babonisa ushintsho oluncane esimweni sabo. Abaningi babo basabambelele ezinkolelweni zabo noma emikhubeni yangaphambili, ngokuvamile ngokuvunyelwa, uma kungekhona futhi nangesibusiso, sesonto labo. Ngokwesibonelo, eChina, amaRoma Katolika ayavunyelwa ukuqhubeka nokukhulekela kwawo okhokho, nakuba lokhu kuvinjelwe kwezinye izindawo. Izinsimbi ezinxusa isibusiso sikankulunkulu womnyango ngokuvamile zibonakala eminyango yamakhaya “obuKristu.” Futhi eOkinawa, izifanekiselo zezilwane zonkulunkulu besizwe zibekwa emagumbini ophahla ukuze zivikele umkhaya.

Kuthiwani ngalabo abaye bazuza ezinhlelweni zesonto? Ekulondekeni kwabo okusha okungokwezimali nokungokwezinto ezibonakalayo, kungokuvamile ukubezwa bethi impendulo ezinkingeni zanamuhla iwukuthembela kuwe ngokwakho. Umphumela uwukuthi abaningi babo baye bazehlukanisa ngokuphelele nanoma ikuphi ukuzihilela esontweni, noma bazigcina bengasondele kakhulu kulo.

Izithunywa zevangeli zamasonto ziye zaba namathuba amaningi amahle okufundisa abantu lokho iBhayibheli elikufundisayo. Kodwa kunokuba zibafundise ukulandela umyalo kaJesu othi “funani kuqala umbuso kaNkulunkulu nokulunga kwakhe, khona konke lokhu kuyakwenezelwa nina,” baye bagcizeiela ‘kwezinye izinto.’ (Mathewu 6:33, qhathanisa neNW.) Ngezinhlelo zabo zokuthuthukisa umphakathi, baye benza okuningi ukuba basize abantu ngokomzimba, ngokwezokwelapha, nangokwemfundo, kodwa izinzuzo ngokuyinhloko ziwuhlobo oluphelayo. Ngaphandle kokunikeza umbono ongokomoya, ngokuvamile izinhlelo ezinjalo zimane zibe isisusa sokulwela izinzuzo ezengeziwe zesikhashana, noma zezwe.

Amasonto ayaphuma ayoshumayela ivangeli. Kodwa lokho okuye kwaba umphumela, ezimweni eziningi, ukukhuthazwa kwendlela yokuphila yaseNtshonalanga, yokuthanda izinto ezibonakalayo. Yebo, aye aphendula abantu abaningi. Kodwa njengoba sibonile, abaningi balaba baye bathambekela ezweni nasezintweni ezibonakalayo kakhulu kunanini ngaphambili. Ngosuku lukaJesu, wathi ngabaholi benkolo: “Nihamba ulwandle nomhlaba ukuba nithole nokuba iproselite lilinye, lithi selabanjalo nilenze indodana yesihogo ngokuphindiwe kunani!” (Mathewu 23:15) Ngalomqondo, umzamo weLobukholwa wokushumayela ivangeli ngezindlela zokuthuthukisa umphakathi uye waba nomphumela ongemuhle. Liye lashiyeka kakhulu ekuthunyweni okukhulu okwanikezwa uJesu Kristu: “Hambani nenze izizwe zonke abafundi, . . . nibafundise ukugcina konke enginiyale ngakho.”—Mathewu 28:19, 20.