Ukuvuka KukaJesu Kristu—Akuyona Inganekwane

INGABE umlando weBhayibheli wokuvuka kukaJesu umane uqanjiwe nje? Muva nje i-International Herald Tribune iye yabika ngokuhlola okwenziwa umlobi ongumJuda othiwa uPinchas Lapide. Siyini isiphetho sakhe? Ukuvuka kwakungeyona inganekwane.

Kunezinto eziningana ezaholela uLapide kulesiphetho. Phakathi kokunye, imilando yeVangeli ilandisa ukuthi abesifazane abathathu baya ethuneni likaJesu futhi babona ukuthi alinalutho. Kodwa ezikhathini zasendulo, abesifazane babebhekwa “njengabangenakubunikeza ubufakazi obukholisayo,” kusho umbiko weTribune. Ngempela, abafundi bakaJesu uqobo abazange babakholelwe laba besifazane! Ngakho, cishe akunakwenzeka ukuthi indaba enjalo yayingamane iqanjwe nje.

ULapide ulandisa futhi ngomphumela oshukumisayo ukuvuka kukaJesu okwaba nawo kubafundi baKhe. Ukusuka ekubeni iqembu labantu ababenovalo kangangokuba baze bashiya uJesu lapho eboshwa, “bashintshwa ngobusuku obubodwa baba abantu benkolo abaqinisekile, bekholisekile ngensindiso.” ITribune ibika ngombono kaLapide: “Awukho umbono noma amanga okwanele ukuba kuchaze ukuguqulwa isimo ngalendlela.”

Okokugcina, kunecala abafundi bakaJesu ababekwa lona lokuthi bamane beba umzimba wakhe. Kulokhu, uMnu. Lapide uyaphendula: “Abakhohlisi bangakuvumela yini ukuba bashushiswe futhi bahlushwe egameni lento engamanga, baze babe abafel’ ukholo abajabulayo?” Nakuba uMnu. Lapide engakabonakalisi ukholo kuJesu njengoMesiya, akanakungabaza ngokuthi lokho ingelosi eyakumemezela eminyakeni eyizinkulungwane ezimbili edlule kwakuyiqiniso: ‘UKristu uvukile.’—Mathewu 28:6.