Imibuzo Evela Kubafundi
◼ Ingabe kungakhulunywa yini ngomKristu onamathemba asemhlabeni njengoyingxenye ‘yesixuku esikhulu’ manje, ngokucabangela iqiniso lokuthi akakasindi “osizini olukhulu”?—IsAmbulo 7:9, 14.
Yebo, lokho kufanelekile ngokucabangela amathemba akhe.
IsAmbulo isahluko 7 sikhuluma ngamaqembu amabili. Elokuqala elabayizi-144 000 “ababekwa uphawu ezizweni zonke zabantwana bakwaIsrayeli.” (IsAmbulo 7:4) Ukuqhathanisa nesAmbulo 14:1-5 kubonisa ukuthi abayizi-144 000 ‘bathengwa emhlabeni,’ ukuba babe “ulibo kuNkulunkulu.” Ngakho-ke, laba yilabo abayobusa ezulwini noKristu. (Galathiya 6:16; 2 Thimothewu 4:18) Iqembu lesibili “isixuku esikhulu, ebesingenakubalwa-muntu,” ‘esiphuma osizini olukhulu.’
Esingenisweni saso, isAmbulo 7:9-17 sichaza abantu basemhlabeni abasinde osizini olukhulu oluzayo. Ngakho othile ofuna ukunemba ngokweqile angase athi igama elithi “isixuku esikhulu” lisebenza kuphela kubantu abasinde osizini. Kodwa ingabe kudingekile ukweqisa kanjalo? Asikholelwa kulokho. Ngokusobala, labo abayosinda kuyodingeka ukuba baqoqwe ngaphambi ‘kosizi olukhulu’ ukuze bafanelekele ukusinda. Ngakho, siye sasebenzisa igama elithi “isixuku esikhulu” kumaKristu athembekile lawo manje akhonza uJehova uNkulunkulu enethemba lokusinda ‘nelokuholelwa emithonjeni yamanzi okuphila’ emhlabeni. (IsAmbulo 7:17) Uma othile ‘wesixuku esikhulu’ efa manje, ngaphambi nje ‘kosizi olukhulu,’ sinesizathu esihle sokubheka phambili ekuvukeleni kwakhe ekuphileni kwasemhlabeni.
Kungavezwa amaphuzu afanayo ngokuqondene negama elithi “ezinye izimvu.” KuJohane 10:7-16 okokuqala uJesu wakhuluma ‘ngezimvu’ zakhe, esiziqonda ‘njengezingumhlambi omncane’ omiselwe ukuphila kwasezulwini. UJesu wabuye wathi: “Nezinye izimvu nginazo ezingesizo ezalesisibaya [sasezulwini]; nalezo ngimelwe ukuziletha; ziyakuzwa izwi lami, kube-mhlambi munye nomalusi munye.” Ezikhathini eziningi siye saveza ubufakazi obungokomBhalo obubonisa “ezinye izimvu” njengalezo ezithemba lazo lingelokuphila kwasemhlabeni.—Luka 12:32.
Omunye angase acabange athi: UJesu wayekhomba ekuqoqweni kwesikhathi esizayo ‘kwezinye izimvu,’ ngakho-ke leligama lisebenza kuphela kulabo, ngemva kokuba uJesu ekhulumile, ababeyokwamukela ithemba elingokomBhalo lokuphila okuphakade emhlabeni. Nokho, kubonakala kungokungadingekile ukulinganisela lelogama ngaleyondlela, njengokungathi uJesu wayechaza indaba ngokulandelana kwezikhathi noma kwezenzakalo. Sikholelwa ukuthi wayegcizelela ukuthi wayengumalusi wezimvu ezinobunye. Abanye abantu abanjengezimvu bangena kulesisibaya ukuze baye ezulwini. Kunezinye futhi izimvu eziyomamukela njengomalusi; lezi ziyoba sebunyeni nalezo okukhulunywe ngazo kuqala. Sinalombono, igama elithi “ezinye izimvu” lihlanganisa amadoda okholo afa ngaphambi kokuba uJesu avule indlela yokuya ezulwini, njengoNowa, uAbrahama, uJobe, uDavide, noJohane uMbhapathizi. (Mathewu 11:11; IzEnzo 2:29; Heberu 10:19, 20) Lapho lawa evuswa esimisweni esisha sezinto, angemukela uMalusi Omuhle futhi abe nethemba lokuphila kwasemhlabeni okungapheli “nezinye izimvu” zikaJesu.