Abamemezeli BoMbuso Bayabika

Ngezinsuku Eziyisishiyagalolunye Kuphela!

“KUYAMANGALISA!” Lelogama laliyisihloko esigqamile sohlu lomhleli wephephandaba langoAugust 14, 1985 esiQhingini saseVancouver, eCanada. Lolohlu lomhleli lwachaza ukwakhiwa kweHholo LoMhlangano elingamamithaskwele ayizi-2 300 ngezinsuku eziyisishiyagalolunye kuphela.

Eminyakeni eyishumi edlule, oFakazi BakaJehova baye basungula icebo lokwakhiwa okusheshayo kwamaHholo oMbuso endawo. Futhi leliHholo LoMbuso loFakazi BakaJehova elisesiQhingini saseVancouver manje liyisakhiwo sesibili eCanada esakhelwa ngokuyinhloko imihlangano yesifunda eba kabili ngonyaka yamaqembu ahlukahlukene amabandla. iHholo LoMbuso elisha liseCassidy, eBritish Columbia lakhiwe endaweni engamahektare amathathu. Izihlahla ezingawohloki amakhasi zenza indawo yangemuva ebukeka kahle, kanti futhi kunomfudlana ojikeleza ngemva kwesakhiwo. Lesakhiwo sihlanganisa ihholo elihlala abantu abangama-900, indlu yokudlela ehlala abantu abangama-250, indawo yokuphuzwayo, indawo encane yokubhapathizela efakwe amatiles, neHholo LoMbuso elihlala abantu abangama-200 elisetshenziswa amabandla endawo. Ngisho nalabo abahlanganyela ekulakheni bathi kunzima ukukholelwa ukuthi lakhiwa futhi laqedwa ngezinsuku eziyisishiyagalolunye.

Yebo, ngaphambi kwezinsuku eziyisishiyagalolunye zokwakha, kwenziwa umsebenzi omkhulu wokulungiselela. Lapho lina izikhukhula, isakhiwo esasikulesiza sadilizwa futhi kwathathwa lokho okungase kuphindwe kusetshenziswe. Izisebenzi zokuzithandela zabhekana nesimo sezulu esinemvula, esibandayo sango-October ukuze ziyohlahla imithi yokwenza amapulangwe emisedari—okungamapulangwe emvelo enziwa ngomsedari obomvu wasentshonalanga. Kwakumelwe kulungiselelwe ukufakwa kwamapayipi, ezokufudumalisa, ezokubandisa, ugesi, nezinye izinto. Phakathi kwezinye izinto—kwakumelwe kulungiselelwe isiza bese kuthelwa ukhonkolo ongamamitha-skwele ayizi-2 300.

Nokho, ekugcineni kwase kulungile. NgoMgqibelo, mhlaka 3 August, ngo-8:00 ekuseni, ngemva, kokufunda itekisi lokusuku, izisebenzi zokuzithandela ezaziphethe izando zase zikulungele ukuqala umsebenzi endaweni eyayizothelwa ukhonkolo. Kwezwakala izwi elalivela emshinini wokukhulisa izwi, “Bafowethu, bethelani!” Kwakhala isipikili njengoba izisebenzi zokuzithandela ezilinganiselwa kweziyizi-4 400 zase zithe shí emsebenzini. Izisebenzi zokuzithandela eziningi nemikhaya yazo zazivela eUnited States futhi ezinye zazivela ezindaweni ezikude njengaseNewfoundland, eNorway, naseNgilandi. Omakhelwane abanozwela banikela ngamasimu abo ukuba kupakwe futhi kukaniswe kuwo, futhi endaweni engamahektare ayi-14 ezungeze isiza kwakunamatende, abakanisile, amaloli, nezimoto.

Izibukeli zahlabeka umxhwele ngokujulile. Enye inkontileka yaletha izisebenzi zayo ukuba zizobuka umsebenzi nomoya wakhona. Omakhelwane abanomusa banikela ngezithelo emnyangweni elungiselela njalo izisebenzi ukudla. Abanye omakhelwane beza bazosiza ngomsebenzi uqobo. Enye indoda, ngemva kokuvakashela isakhiwo, yathi: “Ngiyabona ngempela ukuthi uNkulunkulu unani.” Lendoda manje yenza intuthuko enhle ekutadisheni iBhayibheli noFakazi.

Uhla lomhleli ephephandabeni iLadysmith-Chemainus Chronicle lwaphawula: “Naphezu kwethonya lenu lenkolo, noma ukuntuleka kwalo, kumelwe nibatuse oFakazi BakaJehova abayizi-4 500 abasebenza ubusuku nemini phakathi nesonto elidlule nengxenye bakha iHholo LoMhlangano elingamamitha-skwele ayizi-2 300 eCassidy . . . Ukwenza lokhu ngenjabulo ngaphandle kokuphikisana, ukwehlukana noma ukuzifunela udumo kuwuphawu lobuKristu beqiniso.”

NgeSonto, mhlaka-11 August, ngo-6:00 ntambama, kwenziwa umhlangano wokuqala eHholo LoMhlangano elaseliphelile, linamagceke alungiswe kahle!