Incwadi Entsha Yenkonzo Yasensimini

EMIHLANGANWENI Yesigodi “Yabagcina Ubuqotho” engamakhulu phakathi kuka-1985-1986, incwadi entsha yenkonzo yasensimini yakhululwa ngezilimi eziningi. Ingeyokusetshenziswa ekusizeni abantu ukuba bathole izimpendulo ezanelisayo iBhayibheli elizinikezayo emibuzweni yabo. Lencwadi inamakhasi angama-448, inesihloko esithi Ukubonisana NgemiBhalo. Yiziphi ezinye zezihloko zayo?

◻ “Izingeniso Zokusetshenziswa Enkonzweni Yasensimini” Lezi ziye zathathwa kubabonisi besifunda nabesigodi, kumaphayona, nakwabadala abaye baba nokuhlangenwe nakho kweminyaka eminingi nabathola imiphumela emihle enkonzweni yabo.

◻ “Indlela Ongasabela Ngayo Kwabafuna Ukuvimba Ingxoxo.” “Anginasithakazelo,” “Nginenkolo Yami,” “Ngimatasatasa,” nezinye eziningi zithintiwe lapha. Uma lezindlela zokwenqaba zikuphazamisa ekunikezeni ubufakazi ensimini yakini, uyothola izingeniso eziwusizo eziqabulayo lapha. Lengxenye iqukethe futhi ukwaziswa okuwusizo ngokuqondene nezingxoxo namaBuddha, amaHindu, amaJuda, namaMuslim.

◻ Kunezihloko ezinkulu ezingaphezu kwama-70. Phakathi kwazo kukhona ezithi “Ukukhipha Isisu.” “Izidakamizwa,” “Ubulili,” “Imimoya Yabafile,” “Amaholide,” “Ukuhlwithwa,” “Ukuphindukuzalwa,” “UZiqu-zintathu,” nezinye eziningi. Ngaphansi kwazo kusikiselwe izindlela zokuphendula imibuzo yohlobo oluvame ukubuzwa manje ngawo-1980. Ngokwesibonelo: “Singaqiniseka kanjani ukuthi iBhayibheli alizange lishintshwe?” “Ingabe wonke umuntu unesikhathi sokufa esinqunywe ngaphambili?” “Kungani uNkulunkulu evumela ukuhlupheka?” Kusikiselwe futhi izindlela okungaboniswana ngazo nomuntu othi “iBhayibheli labhalwa ngabantu,” “Nami nginowami umbono ngoNkulunkulu,” “Ngiphila ngendlela elungile. Ngibaphatha kahle omakhelwane bami. Lokho kwanele kimina,” nokunye okuningi. Lokhu kuye kwaqoqwa emazweni ayi-18. Ukusebenzisa lencwadi kungakusiza ukuba uzuze kokuhlangenwe nakho abaningi abaye bakuzuza emashumini amaningi eminyaka ekubonisaneni ngemiBhalo:

◻ Lencwadi ayilungiselelwanga ukuba isize noma ubani ukuba “aphumelele empikiswaneni” nabantu abangabonisi-nhlonipho ngeqiniso. Kunalokho, inikeza ukwaziswa okuwusizo okuqondwe ukuba kusetshenziswe ekubonisaneni nabantu abayokuvumela ukuba wenze kanjalo. Abanye babo bangase babuze imibuzo abafuna izimpendulo ezanelisa ngempela kuyo. Abanye, phakathi nengxoxo, bangase basho izinkolelo zabo, futhi bakwenze lokho ngokuqiniseka okuthile. Kodwa mhlawumbe bangabantu abacabangayo abazimisele ukulalela omunye umbono. Uma kunjalo, lencwadi ingaba usizo olukhulu ekuhlanganyeleni nabo izincazelo ezikhanyayo zeqiniso leBhayibheli. Ungangabazi ukubabonisa lokho okuqukethwe yilencwadi nokuyifunda kanye nabo.

◻ Ngokuvumelana nesibonelo esabekwa umphostoli uPawulu lapho eshumayela eGrisi, kuye kwasetshenziswa ngokufanelekile izingcaphuno ezivela emlandwini wezwe, kumaencyclopedia, izincwadi zenkolo ezinezikhombo. izichazamazwi zolimi lweBhayibheli, nokunye. Konke kutholakala eduze.

◻ Izikhombo zezihloko nemibhalo esemakhasini ayisikhombisa zihlanganisiwe ukuze zikusize uthole izimpendulo ngokushesha.

◻ Phatha lencwadi eyigugu njalo enkonzweni yasensimini. Inikeze ofunda nabo iBhayibheli ababonisa isifiso sokuxoxa nabanye ngalokho abakufundile. Ayinakuhanjiswa njengokujwayelekile emphakathini. Kodwa uma umuntu ecela ukuba nayo, ungangabazi ukumtholela eyakhe.