Ingabe ‘Ukukhuthalele Ukungenisa Izihambi’?
KWAKUWUSUKU olufudumele. Iqembu loFakazi BakaJehova, abancane nabadala, lalisebenza kanzima, lihlanza, lipenda, lenza neminye imisebenzi ehlukahlukene ekuvuseleleni iHholo LoMbuso. Ngesikhathi santambama, base bekhathele, futhi abanye babehlala phansi ukuze baphumule isikhashana.
Khona-manjalo, kwangena odadewabo abathathu abangoFakazi bephethe amasemishi, amakhekhe, ikhofi, itiye, nezinye iziphuzo. Yeka injabulo emangalisayo ngaleyomiphefumulo ekhathele! Ukubonakaliswa okuzenzakalelayo kokungenisa izihambi nothando kwalabodade abathathu akuzange nje kuphela kuqabule izisebenzi ngokwenyama kodwa futhi kwenezela okuningi emoyeni ofudumele nonothando phakathi kwayo yonke inhlangano yabazalwane nodade lapho ngaleyontambama.
Uphawu LobuKristu Beqiniso
Yebo, ukungenisa izihambi nothando akugcini kwezinjalo izenzakalo ezikhethekile. Ngokuphathelene nabalandeli bakhe beqiniso, uMqalisi wobuKristu beqiniso, uJesu Kristu, waphawula: “Ngalokho bonke bayakukwazi ukuthi ningabafundi bami; uma nithandana.” Ngokufanayo, umphostoli uPawulu wayala amaKristu akanye naye: “Nikhuthalele ukungenisa izihambi.” (Johane 13:35; Roma 12:13) Ngamanye amazwi, ukukhuthalela ukungenisa izihambi okuqhutshwa uthando olungenabugovu ngabanye kuyindlela yokuphila yamaKristu eqiniso.
Nokho, izimfanelo ezinjalo, azimane nje zizivelele lapho umuntu eba ngumKristu. Kunalokho, umuntu kumelwe asebenze kanzima ukuba azihlakulele. Lokhu kunjalo ikakhulukazi kulelizwe lanamuhla, lapho uthando lwabaningi selupholile, njengoba nje iBhayibheli labikezela. (Mathewu 24:12) Kodwa yeka umahluko lapho lezozimpawu zikhona! Emkhayeni obumbene, amalungu ajabulela ukuhlangana futhi ayokuthokozela ukuchitha isikhathi ndawonye. Ngokufanayo, uma amalungu ebandla lobuKristu ehlanganyela njalo emihlanganweni, enkonzweni yasensimini, nakweminye imibuthano, ngempela ayazana. Aba ngabangane beqiniso, mhlawumbe aze ngisho asondelane kunamalungu omkhaya. (IzAga 18:24) Lesisibopho sobungane phakathi koFakazi BakaJehova sisebenza njengesivikelo esinamandla ekumelaneni namathonya angalungile alelizwe.
Indima Yabesifazane AbangamaKristu
Ngisho nakuba wonke amaKristu eyalwa ukuba ‘akhuthalele ukungenisa izihambi,’ abesifazane abangamaKristu benza indima ebalulekile kulendaba. Eqinisweni, akubona yini abesifazane ngokuvamile, ikakhulukazi abafazi, okumelwe benze omningi womsebenzi ongokoqobo ophathelene nokubonisa umoya wokungenisa izihambi? Uma indoda imemela abathile basebandleni ekhaya ngenjongo yokuhlangana kobuKristu, akuyena yini umkayo ovame ukuhlanza indlu, alungise ukudla neziphuzo futhi kamuva aqoqe? Ngisho nakuba indoda nezingane bengase bakwazi, futhi bakulungele ukufaka isandla, kungokungenakugwenywa ukuthi umfazi othwala umthwalo wokubona ukuthi yonke into inakekelwa ngokufaneleyo.
Ngokutusekayo, abafazi abaningi abangamaKristu bazikhandla ngokuzithandela ukuze babonakalise umoya weqiniso wokungenisa izihambi kubafowabo nodadewabo abangokomoya. Ngokwesibonelo, cabangela uDip Yee, isikhonzi sesikhathi esigcwele esiyiphayona eHong Kong ondoda yakhe ingumdala ebandleni lakuleyondawo. Ngisho nakuba kusho umsebenzi owengeziwe ngaye lapho bemema abazalwane nodade, ngezinye izikhathi ngisho neqembu lonke lesifundo sencwadi, ekhaya labo, uwubonisa ngentokozo umoya wokungenisa izihambi. Uthi: “Silungiselela okujwayelekile. Kuhle ukubona abazalwane bekujabulela kangaka ukuhlangana futhi bakhiwa yikho.” Ngempela, ngokungenisa kwabo izihambi abesifazane abangamaKristu benza ingxenye enkulu ekwakheni umoya ofudumele ebandleni.
Ngokubheka konke okuhilelekile ekuboniseni umoya wokungenisa izihambi, ngokuqinisekile kudinga inkuthalo nokuzidela kwabesifazane abangamaKristu. Kodwa bangaqiniseka ngokuthi imisebenzi yabo yothando yaziswa kakhulu ngabayeni babo kanye nabanye abaphiwayo ababongayo. Yebo, ngezinye izikhathi abanye bangase bangakubonisi ukwazisa okufanele ngalokho abakwenzelwayo, kodwa lokho ngokuqinisekile akuyona imbangela yokudumala noma ukucasuka, noma ukuyeka ukungenisa izihambi. Khumbula, nakuba kwanelisa ukwamukela amazwi okubonga avela kwabanye nokuqaphela ukuthi imizamo yethu iyaziswa, sifuna ukubonakalisa umoya wokungenisa izihambi ikakhulukazi ngoba kuyinto enothando nefanele ukwenziwa. Ngaphezu kwakho konke, kujabulisa uJehova uNkulunkulu ukwenza kwethu kanjalo.
Ukuba Nombono Olinganiselwe
Kulezinsuku zamanani akhuphukayo, abanye bangase bangabaze ukubonisa umoya wokungenisa izihambi ngoba benomuzwa wokuthi abanamandla okwenze njalo. Yilapho-ke lapho kubaluleke khona ngathi ukuba sibe nombono elinganiselwe ngendaba. Nakuba okudliwayo nokuphuzwayo okwenziwe ngendlela ekhethekile kungase kwenezele ebumnandini bombuthano, akukhona okuyisici esibaluleke kakhulu. IZwi likaNkulunkulu likuphawula ngokuhlakanipha lokhu: “Isidlo semifino lapho kukhona uthando singcono kunenkabi ekhuluphalisiweyo kanye nenzondo.” (IzAga 15:17) Lokho esinakho noma esikunika abanye akuyona into ebalulekile. Okubalulekile nokwaziswayo ukuhlangana kokwakhana nomoya wothando esiwubonakalisayo.
Cabangela indaba kaFung King, udade oneminyaka esema-40 onomyeni ophikisayo. Uhlala endlwaneni yekamelo elilodwa kwenye yezindawo ezinkulu zezindlu zomphakathi eHong Kong. Umpofu. Empeleni, kumelwe abambe itoho ukuze anezele eholweni lomkhaya. Nokho, uyaphana nganakho. Uma oFakazi basebandleni lakubo bezokwenza umsebenzi wokushumayela endlini ngendlu endaweni akhelene nayo, ngokuvamile ubamemela ekhaya lakhe ukuze bathole ukudlana okuqabulayo. Izenzo ezinjalo zothando azaziswa ngamaKristu akanye naye kuphela kodwa zisebenza futhi njengesibonakaliso sokuthi umuntu akudingi ukuba abe ngocebile ukuze abonise umoya weqiniso wokungenisa izihambi.
Ngisho singazama kangakanani ukulinganisela ekuzilibaziseni kwethu, nokho, singase sithole kusadingekile ukuyeka izinto ezithile ukuze sikwazi ukubonisa umoya wokungenisa izihambi. Ingabe kukufanele lokho? Yebo, uma siqhutshwa uthando lobuKristu lweqiniso. Ngoba yiluphi uthando oluboniswayo ngaphandle kokuzidela? Bobabili uJehova noJesu babonisa uthando lwabo ngesintu ngokwenza ukuzidela okukhulu—uJehova enikela ngeNdodana yakhe, noJesu ngokuphila kwakhe okuphelele kobuntu.—Johane 3:16; 15:13.
AmaKristu akuqala nawo alandela indlela yothando. Ngokuphathelene nabazalwane eMakedoniya, umphostoli uPawulu wabhala: “Ekuvivinyweni okukhulu kosizi ukuthokoza kwawo okuvamileyo nobumpofu bawo obukhulu kwenza ukuba avame kakhulu ekuphaneni okupheleleyo; ngokuba ngokwawo anikela njengamandla awo, yebo, ngiyafakaza ngithi, nangaphezu kwamandla awo; asinxusa kakhulu ecela umusa.” (2 Korinte 8:2-4) ‘Ubumpofu babo obukhulu’ nokunikela ‘ngaphezu kwamandla abo’ kwenza ukuphana kwabo kwaba qotho futhi kwathinta inhliziyo.
Nokho, kungakhathaliseki ukuthi umuntu umpofu noma ucebile uma kulinganiswa, futhi naphezu kwezindlela zesimanje ezisizayo, kusadinga isikhathi, amandla, nemali ukubonisa umoya wokungenisa izihambi. Khona-ke, ngokuyisisekelo, umbuzo uwukuthi: Siyafisa yini ukuzikhandla ukuze abanye bajabulele izibusiso zokuhlangana kobuKristu? Khumbula, isaga seBhayibheli sithi: “Umphefumulo ophanayo uyakukhuluphaliswa; ophuzisayo uyakuphuziswa naye.” Singaduduzeka futhi ngomcabango wokuthi uma sibonisa umoya wokungenisa izihambi ngokulalela umyalo kaJehova oshiwo futhi silingisa isibonelo sakhe esihle, cishe ngokuphelele sitsheleka uJehova.—IzAga 11:25; 19:17.
Obani Abangamenywa?
UJesu wake wathi, “Uma wenza isidlo sasemini noma esakusihlwa, ungabizi abahlobo bakho, nabafowenu, nomndeni wakho, nabakhelwane bakho abacebileyo.” Ngani? “Funa nabo babuye bakumeme, kube-khona ukwenanana.” (Luka 14:12) Iphuzu uJesu alivezayo lapha akukhona ukungamemeli abangane bethu noma izihlobo esidlweni. Ngezinye izikhathi wajabulela isidlo nabangane bakhe njengakubo kaMariya noMarta. Iphuzu liwukuthi ukubonisa kwethu umoya wokungenisa izihambi akumelwe kushukunyiswe umqondo wokubuyelwa okuthile.
Njengoba uJesu aqhubeka ebonisa, abantu okumelwe sibacabangele kuqala lapho simema yilabo abayozuza kakhulu ngokuhlangana. (Luka 14:13) Bangase bahlanganise labo abadinga ukukhuthazwa, abasha eqinisweni, abanamahloni noma abavame ukuba onkom’ idla yodwa. Umphumela owakhayo ukuhlangana okunjalo okungaba nawo uphawuleka emazwini kaOi Yuk, udade osemdala oshiseka kakhulu kodwa onempilo ebuthakathaka: “Abazalwane ngokuvamile bangimemela emibuthanweni yabo futhi bangibonisa umusa ngezindlela eziningi. Kungenza ngijabule kabi ukuba yingxenye yomkhaya omkhulu!”
Ngokusobala, injongo yemibuthano enjalo ifinyelela ngale kokuhlangana nje. Kunalokho, iwukwakhana nokuqinisa isibopho sothando phakathi kwabakhulekeli bakaJehova esikanye nabo. Ngakho-ke kumelwe kugcizelelwe ukulondolozwa komoya wokwakhana nokukhuthazana kunobuhle bokudla neziphuzo. Ngokufanayo, kumelwe kucatshangelwe imisebenzi nezingxoxo emibuthanweni enjalo. Nakuba kungesiyo yonke imisebenzi edinga ukugxiliswa eBhayibhelini noma zonke izingxoxo okumelwe zisekelwe emiBhalweni, kungaba ukuhlakanipha nothando ukuzigcina njalo zakha futhi zikhuthaza. Imidlalo yokuncintisana, inhlebo, noma izinkulumo ezijivazayo kumelwe zigwenywe ngokuqinisekile.—Efesu 4:29, 31.
Imivuzo Ecebile Elindele Abangenisa Izihambi
Nakuba kungamelwe umuntu abonise umoya wokungenisa izihambi ngengqondo yokubuyelwa okuthile, lokhu akusho ukuthi umuntu ongenisa izihambi akatholi mvuzo ngokuphelele. Ngokuphambene, ukubonisa umoya weqiniso wokungenisa izihambi kuletha imivuzo eminingi, nakuba ingafunwa. Kusiza umuntu ukuba abe nabangane abasha futhi aqinise izibopho ezindala. Kushukumisela nabanye futhi ukuba bahlakulele umoya wokuphana nowokungenisa izihambi. (Luka 6:38; IzAga 11:25) Ngaphezu kwakho konke, umuntu ongenisa izihambi kunabo bonke endaweni yonke, uMdali wethu onothando uJehova uNkulunkulu, uyoqaphela ukuba abangenisa izihambi ngeqiniso bangasweli lutho ngoba uyabazisa labo ‘abakhuthalela ukungenisa izihambi’ njengoba enza.