Ukuphila NeNkonzo KaJesu

Uhambo Lokuya EJerusalema

INTWASAHLOBO isifikile. Futhi sekuyisikhathi ngomkhaya kaJosefa, kanye nabangane nezihlobo, ukuba uthathe uhambo lwawo lwaminyaka yonke lokuya eJerusalema ukuba uyogubha iPhasika. Njengoba uhamba cishe uhambo lwamakhilomitha ayi-105, kunenjabulo evamile. UJesu manje useneminyaka eyi-12 ubudala, futhi ubheke phambili ngesithakazelo esikhethekile kulomkhosi.

KuJesu nasemkhayeni wakubo, iPhasika akuyona indaba yosuku olulodwa. Bahlalela futhi ezinye izinsuku ezilandelayo eziyisikhombisa zoMkhosi Wesinkwa Esingenamvubelo, abawubheka njengengxenye yenkathi yePhasika. Khona-ke uhambo lwabo selulonke ukusuka ekhaya eNazaretha, kuhlanganise nokuhlala kwabo eJerusalema, luthatha cishe amasonto amabili. Kodwa kulonyaka, ngenxa yokuthile okuthinta uJesu, luthatha isikhathi esijana.

Inkinga ibonakala lapho sebebuya eJerusalema. UJosefa noMariya bacabanga ukuthi uJesu useqenjini lezihlobo nabangane abahamba nabo. Nokho akabonakali lapho bema ebusuku ukuba balale, futhi bayamfuna phakathi kwalabo abahamba nabo. Akatholakali ndawo. Khona-ke uJosefa noMariya bahamba yonke indlela bebuyela eJerusalema beyomfuna.

Bamfuna usuku lonke kodwa abamtholi. Nangosuku lwesibili abamtholi. Ekugcineni, ngosuku lwesithathu, baya ethempelini. Lapho, kwelinye lamahholo alo, babona uJesu ehlezi phakathi kwabafundisi abangamaJuda, ebalalele futhi ebuza imibuzo.

‘Mntanami, ukwenzeleni lokhu okunjena kithi?’ Kubuza uMariya. ‘Mina noyihlo bese sikhathazeke kakhulu, sihamba sikufuna yonke indawo!’

UJesu kuyammangalisa ukuthi bebengazi lapho bengamthola khona. ‘Beningifunelani?’ uyabuza. ‘Beningazi yini ukuthi kumelwe ngibe lapha endlini kaBaba?’

UJesu akaqondi ukuthi kungani abazali bakhe bengakwazi lokhu. Ngenxa yalokho, uJesu ubuyela ekhaya nabazali bakhe futhi uyaqhubeka ebathobela. Uyaqhubeka ekhula ngokuhlakanipha nangokomzimba futhi ethandeka kuNkulunkulu nakubantu. Yebo, kusukela ebuntwaneni, uJesu ubeka isibonelo esihle hhayi kuphela ekufuneni izithakazelo ezingokomoya kodwa futhi nasekuboniseni inhlonipho kubazali bakhe. Luka 2:40-52; 22:7.

◆ Yiluphi uhambo lwasentwasahlobo uJesu ayelwenza njalo nomkhaya wakubo, futhi lwaluthatha isikhathi eside kangakanani?

◆ Kwenzekani phakathi nohambo lapho uJesu ayeneminyaka eyi-12 ubudala?

◆ Isiphi isibonelo uJesu asibekela intsha namuhla?