UJehova ‘Uyakusheshisa’
“Mina nginguJehova, ngiyakukusheshisa ngesikhathi sakho.”—ISAYA 60:22.
1. Isimo sabantu bakaJehova sihluke kanjani kwesezwe likaSathane, futhi ngani?
NAMUHLA, injabulo nentokozo akutholakali, nje kuphela enhlanganweni kaJehova yasezulwini kodwa futhi kuyo yonke inhlangano yoFakazi BakaJehova lapha emhlabeni. Injabulo yethu ingephambene kakhulu nesimo esingenathemba esikhungethe izwe likaSathane. (IHubo 144:15) Sinenala yokudla okungokomoya nokuphuzwayo, ngakho ‘siyajabula ngokwenama kwenhliziyo.’ (Isaya 65:13-19) Asibona abangenalwazi ngesizathu salolusizi lwezwe. Ithemba lethu lokukhululwa ngokushesha nguMbuso kaNkulunkulu liyaqina njengoba sibona iziprofetho zeBhayibheli zigcwaliseka ngokuncipha kwesikhathi okusisondeza eArmagedoni. Siyazi ukuthi ‘lempi yosuku olukhulu lukaNkulunkulu uMninimandla onke’ iyofika ngokuqondile ‘ngesikhathi esimisiwe,’ ngoba umbono “uphuthuma ekupheleni, awuyikukhohlisa.”—IsAmbulo 16:14, 16; Habakuki 2:3.
2. Iziphi izimo ezivamile enhlanganweni kaJehova, okuholela kumuphi umbuzo?
2 Njengasezulwini, nasemhlabeni inhlangano kaJehova engokwasezulwini iyohlala phakade. Ngokungaphezulu, njengoba uJehova enguMthombo wamandla amakhulu, ‘ubapha amandla abathemba kuye.’ (Isaya 40:29-31) Inhlangano yakhe ikhuthele emsebenzini futhi iqhubeka njalo. (Qhathanisa noHezekeli 1:15-21) Amabandla oFakazi BakaJehova ayizi-47 869 emazweni angama-203 kuwo wonke umhlaba ahleleke kahle ukuba aqhubekele phambili ngentshiseko emsebenzini woMbuso. (Mathewu 24:14) Lenhlangano ekhuthele yembulunga yonke yavela kanjani?
3. (a) UIsaya 60:17 uye wagcwaliseka kanjani ezikhathini zanamuhla? (b) Yimaphi amalungiselelo afanayo aletha ukuchuma ezikhathini zeBhayibheli?
3 “INhlangano” kwakuyisihloko esifundwayo kuNqabayokulinda yesiNgisi kaJune 1, no-15, 1938. Zaxoxa kabanzi ngoIsaya 60:17, lapho uJehova ekhuluma nenhlangano yakhe yasezulwini, ethi: “Esikhundleni sethusi ngiyakuletha igolide, nasesikhundleni sensimbi ngiyakuletha isiliva, esikhundleni somuthi ithusi, nasesikhundleni samatshe insimbi ngibeke ukuthula kube-ngababonisi bakho.” Ngokucabangela lesisimo esingcono, inhlangano kaJehova emhlabeni yavuseleleka amandla. Njengoba igolide liyigugu kakhulu kunethusi, (futhi kungokufanayo nangezinye izinto ezishiwo lapha), ngakho ilungiselelo lenhlangano elingokwasezulwini iWatch Tower Society eyalichazela amabandla abantu bakaNkulunkulu emuva ngo-1938—nalelo alemukela ngenhliziyo yonke—lingelingcono kakhulu kunezinqubo zangaphambili zokukhetha kweningi. LingokomBhalo. Lenza kube nokuhleleka okuhle ekufezeni umsebenzi kaNkulunkulu, njengoba nje amalungiselelo afanayo aletha ukuchuma esikhathini sikaMose nasezinsukwini zokuqala zebandla lobuKristu.—Eksodusi 18:25; IzEnzo 6:3-7; Thithu 1:5; 1 Petru 5:1-3.
4. (a) OFakazi BakaJehova baqiniselwa kanjani izilingo zika-1939-45? (b) Yini eyafakazela ukuthi isibusiso sikaJehova sasikulelolungiselelo elingo-kwasezulwini?
4 Kanjalo, ngo-1938, unyaka ongaphambi kokugqashuka kweMpi Yezwe II, “ababonisi” ‘nababusi’ kuwo wonke amabandla baba “ukuthula” “nokulunga.” Ilungiselelo eliqinile nelinobunye lenhlangano laqhubekela phambili nokwanda okukhulu. UJehova wababusisa ofakazi bakhe abanobunye. Inani labo lacishe laphindwa kabili, kusukela kwabayizi-71 509 kuya kwabayizi-141 606 phakathi kuka-1939 no-1945, naphezu kokucindezeleka nokushushiswa ngaleyominyaka yempi.
‘Abusekho Ubudlova’
5. Ngokuqondene “nokuthula,” abantu bakaJehova bahluke kanjani ezweni?
5 Nokho, kuthiwani ngenkathi engemva kweMpi Yezwe II? Bekungekho ukuthula phakathi kwezizwe zomhlaba. Eqinisweni, kuye kwabikwa ukuthi abantu abangaphezu kwezi-30 000 000 baye bafa ezimpini “ezincane” eziye zalwiwa kusukela ngo-1945. “Izimpi ezincane” ezingaba ama-40 ziye zalwiwa embulungeni yonke ngesikhathi esisodwa. Ngakho-ke, yeka ukujabula esinakho ngokukhonza nenhlangano eye yenqaba ubudlova! (Isaya 2:4; IzAga 20:22) Futhi, njengenhlangano yembulunga yonke, sijabulela ukuthula phakathi kwethu. Ngokuhamba ‘noNkulunkulu wokuthula,’ siye sathola “ukuthula kukaNkulunkulu okudlula ukuqonda konke.”—Filipi 4:7-9.
6, 7. (a) Yini eyenza abantu bakaNkulunkulu bavelele njengabahlukile? (b) UIsaya 60:18 uye wagcwaliseka kanjani kithi? (c) Sihluke ngayiphi indlela evelele emakholweni amanga?
6 Njengoba “ukuthula” “nokulunga” kuchuma phakathi kwabantu bakaJehova, sihluke kakhulu ezweni likaSathane. Ngokuqaphela lokhu, abanye omakhelwane bethu baye bathi, ‘Siyanazisa, kodwa asiyithandi inkolo yenu.’ Nokho, ingabe akusiyo inkolo yethu esenze saba abantu esiyibo? Asinasithakazelo emibonweni ephikisanayo nenzondo ehlukanisa izizwe. Kunalokho, isithakazelo sethu esikabili yilesi (1) ukufundisa abantu abathobekileyo ngendlela yokusinda ngoMbuso kaKristu (2) nokudumisa uJehova, ukwazisa bonke abantu igama lakhe njengobufakazi. ‘Asisibo abezwe.’—Johane 17:14, 16.
7 Kanjalo, siye sahlanganyela ekugcwalisekeni kwesithembiso sikaJehova: “Indluzula, ubudlova, ayisayikuzwakala ezweni lakho, nencithakalo nokubhubhisa phakathi kwemikhawulo yakho, kepha uyakubiza izingange zakho ngokuthi iNsindiso, namasango akho ngokuthi iNdumiso.” (Isaya 60:18) Lonke udumo luya kuNkulunkulu wethu uJehova! Abaholi benkolo beLobukholwa (nabo bonke abangane babo abayizihlubuki) bayalihlaza lelogama—kangangokuba baze bazame ngobuqili ukulisusa ezinguqulweni zeBhayibheli. “Kepha thina siyakuhamba ngegama likaJehova uNkulunkulu wethu kuze kube-phakade naphakade.”—Mika 4:5.
8. (a) Isiphi isikhuthazo uJehova asinikeza abantu bakhe kuIsaya 60:19-21? (b) Yikuphi ‘ukuvela kwegatsha’ okudumisa uJehova, futhi kanjani?
8 UJehova usikhuthaza ukuba sihambe ngegama lakhe. KuIsaya 60:19-21, uqinisekisa inhlangano yakhe yasezulwini ngokuthi “uyakuba-ngukukhanya okuphakade” kuyo, okudlula ngisho nokukhanya kwelanga nenyanga. Ngokomoya, uyenza ibe yinhle, egcwalisa isithembiso sakhe kubantu bayo: “Bayakuba-ngabalungileyo bonke, badle ifa lezwe kuze-kube phakade, igatsha lokutshala kwami, umsebenzi wezandla zami, ukuba ngidunyiswe.” Ngokuqinisekile, uJehova uye wachumisa ‘izwe,’ noma umsebenzi wofakazi bakhe. Ngokuqhubekayo, ‘inamagatsha’ athelayo njengoba iningi labasha liqoqelwa ohlangothini loMbuso futhi lisizwa ukuba lembathe ubuntu bobuKristu. (Kolose 3:10, 12-14) Lokhu ‘kudumisa’ uJehova, kuletha udumo egameni lakhe eliyigugu.
9. (a) UJehova ubabusisa kanjani OFakazi bakhe eMexico, futhi ngani? (b) Yini eyashiwo elinye iphephandaba ekuphawuleni ubuqotho babo?
9 Isibonelo samuva iMexico. Eminyakeni emibili edlule, inani eliphakeme labamemezeli kulelozwe liye lanyuka lisuka kwabayizi-113 823 laba izi-151 807—amaphesenti angama-33 ancomekayo! (Umkhosi wayo ka-1984 weSikhumbuzo sokufa kukaJesu wawunabayizi-695 369.) Abazalwane baseMexico bakhuthele kakhulu emsebenzini wabo wensimu. Iphephandaba laseMonterrey muva nje laphawula futhi, ngobuqotho babo ekuhlangabezaneni nempikiswano yokungathathi-hlangothi, lithi phakathi kwezinye izinto: “Yeka inhlonipho ejulile ukuqina kwabo nesibindi sokholo okuyifaka kithi. Ngisho noma abantwana babo bexoshwa esikoleni bakhetha ukuhlala bethembekile okholweni lwabo, enkolelweni yabo. Bekungaba njani uma sonke thina maKristu besingaba njalo, ngaphandle kokubandlululana kwamaqembu nenkolo? IMexico ibingaba ihhovisi legatsha lasezulwini.”
10. (a) Yini ebonisa ukuthi oFakazi BakaJehova bayanda naphezu kokuvinjelwa? (b) Yimuphi umbuzo ophakanyiswa lapha?
10 OFakazi BakaJehova bayaqhubeka bethela lesisithelo sodumo, ngisho nasemazweni lapho ukushushiswa kungapheli khona. Yeka ukuthi kwakuvusa amadlingozi kanjani ukuphawula eMbikweni Wonyaka Wenkonzo Ka-1984 ukuthi, emazweni angama-28 lapho kukhona ukuvinjelwa ngohulumeni noma eminye imingcele, ingqikithi seyiyonke yabamemezeli iye yenyuka ngamaphesenti ama-3,1, kuya enanini elingaphezu kwezi-250 000, futhi amaphayona anda ngamaphesenti angama-23! Ungake ucabange nje uphayona ngaphansi kwalezozimo? Isilinganiso sabazalwane nodade abayizi-6 905 kulamazwe bebenza kanjalo inyanga ngayiye! Uma unenkululeko enkudlwana lapho uhlala khona, ingabe ungabungenela ubuphayona obuvamile, noma okungenani ukuba yiphayona elisizayo ngezikhathi ezithile?—Qhathanisa noLuka 17:5, 6.
‘Ukuba Inkulungwane’
11, 12. (a) Iyiphi ingxenye yokuqala yesithembiso uJehova ayigcwalisayo manje? (b) Yiziphi izibonelo ezithile ‘zomncane oba inkulungwane’? (c) Kungani kuye kwaba nokukhula okushesha kanjalo?
11 Egameni lakhe siqu eliyigugu, uJehova manje wenza isithembiso esikathathu. (Isaya 60:22) Okokuqala uyasitshela: “Omncane uyakuba-yinkulungwane.” Njengoba ufunda iYearbook of Jehovah’s Witnesses ngayinye, ingabe uye waphawula indlela isiqalo esenziwa ngayo ummemezeli oyedwa nje woMbuso noma abambalwa, emazweni athile lapho manje kunezinkulungwane? Ngokwesibonelo, umzalwane oyiphayona owayengowokuqala ukufakaza eChile, waqasha ikamelo elithile futhi wamema abantu ukuba beze emhlanganweni wangeSonto. Ekugcineni omunye umuntu othakazelayo wafika. Lendoda yabuza lombuzo, ‘Abanye bazofika nini?’ Iphayona layiqinisekisa: “Bazofika.” Futhi beza. Ngemva kweminyaka engama-50, lowo omncane uye waba izi-23 985.
12 EItaly, oFakazi BakaJehova babeshushiswa kakhulu umbuso wobushiqela kaMussolini. Ngonyaka ongemva kwempi ka-1946, babeyi-120 kuphela ababebika inkonzo. Kodwa khumbula ukuthi babeyi-120 kuphela ababekhona ngePentekoste lonyaka ka-33 C.E. Futhi cabanga ngokwaqaliswa ngalesosikhathi! (IzEnzo 1:15; 2:1-4, 41) Manje, ngenye indlela, umoya kaJehova uye wathululelwa eItaly. Eminyakeni engama-38 abamemezeli baye bafinyelela inani eliphakeme labayizi-119 408, ngokombiko wokugcina, cishe ngokuphindwe ngenkulungwane. Njengasemazweni amaningi amaKatolika kuwo wonke umhlaba, oFakazi BakaJehova eItaly banda ngokumangalisayo.—Qhathanisa neHubo 69:9; Isaya 63:14.
“Isizwe Esinamandla”
13, 14. (a) Ingxenye yesibili yesithembiso sikaJehova iye yagcwaliseka kanjani? (b) Ngokuqondene nalokhu, eyoku-1 Petru 2:9 noIsaya 59:21 zisebenza kanjani? (c) Yini eye yafaka umfutho owengeziwe ekushumayeleni kwethu?
13 Ingxenye yesibili yesithembiso sikaJehova esikathathu yilena: “Ophansi abe-yisizwe esinamandla.” Ngempela ‘kwakungophansi,’ insali ehlakazekile yabagcotshiwe, eyabuyiselwa ‘ezweni’ likaJehova lomusa ngo-1919. Kodwa yanda, kwaze kwaba yilapho wonke uIsrayeli ongokomoya eseqoqiwe—inani eligcwele lezindlalifa zoMbuso eziyizi-144 000. (Roma 11:25, 26) Ngempela, njengengxenye ‘yesizwe esingcwele’ sikaNkulunkulu, insali egcotshiwe emhlabeni iye yakhishwa ebumnyameni yangeniswa ekukhanyeni kwakhe okumangalisayo. Iye yajabulela ukumemezela kabanzi ubuhle bukaNkulunkulu wayo, uJehova. (1 Petru 2:9) Nakuba incane ngenani, iye yaba namandla ngenxa yomoya kaNkulunkulu. “Mina-ke, lokhu kuyisivumelwano sami nabo, usho uJehova, sokuthi umoya wami ophezu kwakho namazwi ami engiwabeké emlonyeni wakho akuyikusuka emlonyeni wakho, nasemlonyeni wenzalo yakho, nasemlonyeni wenzalo yenzalo yakho, usho uJehova, kusukela manje kuze kube-phakade.”—Isaya 59:21.
14 Ngalenkulumo uJehova usiqinisekisa ukuthi ukumemezela kwethu “izindaba ezinhle” kuyoba nempumelelo nakanjani, futhi sithandazela lokhu ngentshiseko “kulolusuku lukaJehova.” Ukushumayela kwethu kuye kwaba nomfutho njengoba “inzalo” engokomfanekiso yensali egcotshiwe, “isixuku esikhulu,” ‘nenzalo’ yaso (abasha esiye sabaqondisa enhlanganweni kaNkulunkulu) baye bathatha lesisigijimi sosindiso emilonyeni yabo, basimemezela obala. Ngenxa yalokho, wonke amabandla ayaqhubeka ekhula ngokomoya, nangamanani—Roma 10:10, 15; IHubo 118:24, 25; 1 Thesalonika 3:12.
15. Siye sanda kakhulu kangakanani “isizwe” sikaNkulunkulu esingokomfanekiso, futhi kungani sijabula?
15 Ezikhathini zamuva, yeka indlela emangalisayo izithelo zoMbuso eziye zanda ngayo! Ngokwenezelwa kwamanani amakhulu ‘esixuku esikhulu,’ isizwe esingokomfanekiso sikaNkulunkuiu manje lifinyelela inani eliphakeme loFakazi abakhuthele abayizi-2 842 531. ‘Lesisizwe’ sinabantu abaningi kakhulu kunezizwe ezingaba ama-92 nezindawo ezihlukaniswe imingcele yezwe yezombangazwe. Ngenjabulo, sisho amazwi omhubi ojabulayo: “Icebo likaJehova limi phakade. nemicabango yenhliziyo yakhe ezizukulwaneni ngezizukulwane. Sibusisiwe isizwe esiNkulunkulu waso nguJehova, isizwe asikhethileyo sibe-yifa lakhe.”—IHubo 33:11, 12.
‘Ukukusheshisa’
16, 17. (a) Yini ebonisa ukuthi ingxenye yesithathu yesithembiso sikaJehova iyagcwaliseka manje? (b) Uthando ngoNkulunkulu noKristu luye lwaboniswa kanjani? (c) Yimuphi umsebenzi ojabulisayo nomoya oye wasiza ‘ekusheshiseni’? (d) UMathewu 9:35-38 usebenza kanjani namuhla?
16 UJehova unezela ingxenye yesithathu esithembisweni sakhe: “Mina nginguJehova, ngiyakukusheshisa ngesikhathi sakho.” Njengoba simi onqenqemeni ‘losizi olukhulu,’ isikhathi salokhu SIMANJE! (Marku 13:10, 18, 19) Ukushesha okukhulu komsebenzi woMbuso phakathi neminyaka emibili edlule kufakazela lokhu. ‘Lokhu kusheshisa’ kumelwe kuphawulwe emhlabeni wonke, ngisho nasemazweni lapho oFakazi BakaJehova kumelwe babonise uthando lwabo ngoJehova uNkulunkulu ngoKristu nangokushumayela ngaphansi kokushushiswa noma ezinye izimo ezifaka ukuphila kwabo engozini. Njengoba abamemezeli besikhathi esigcwele banda njalo, amaphayona ayahola. Futhi yeka injabulo ayitholayo enkonzweni kaJehova!—IzAga 10:22.
17 Lomoya wamaphayona wokujabula uye wakhuthaza amabandla kuyo yonke indawo ukuba asheshise ingxenye yawo ekuqoqeni kokugcina. Naphezu kwalokhukwanda okuhle, singathi “ukuvuna kukhulu, kodwa izisebenzi ziyingcosana.” Kulelizwe lanamuhla elingenathemba, singabadabukela abantu, njengoba noJesu enza lapho esemhlabeni, ngoba ngempela ‘bakhathazekile, bahlakazekile njengezimvu ezingenamalusi.’ Ngakho ‘sinxusa iNkosi yokuvuna ukuba ithumele izisebenzi ziye ekuvuneni kwayo,’ futhi siyajabula ngokubona imithandazo yethu iphendulwa ngokumangalisayo.—Mathewu 9:35-38.
18, 19. Yimiphi eminye imibiko ebonisa ukuthi insimu yezwe ‘isimhlophe, ilungele ukuvunwa’?
18 Ake sikhethe isibonelo esisodwa nje kweziningi ezishukumisayo: NgoApril ka-1984, iEcuador yabika amaphayona asizayo ayi-1 048 ensimini, amaphesenti ayi-106 ngaphezu kuka-April odlule. NgoJune lelizwe lalibika izifundo zeBhayibheli zasekhaya eziyizi-12 238, ukwanda ngamaphesenti angama-24 onyakeni, nabamemezeli abayizi-8 044, ukwanda ngamaphesenti ayi-17. Ababekhona eSikhumbuzweni babe yizi-40 728, isilinganiso sabangaphezu kwabahlanu ngommemezeli ngamunye. Kuyo yonke imbulunga yethu kuvela imibiko efanayo, futhi inani lomhlaba wonke lababakhona emkhosini weSikhumbuzo ngoApril 15, 1984, laba izi-7 416 974, elibonisa ukuthi amasimu “asemhlophe aselungele ukuvunwa” kwalabo abaqoqelwa ukuzuza “ukuphila okuphakade.”—Johane 4:35, 36.
19 Ngokuvamile uJehova ‘usheshisa’ ngezindlela ezimangalisayo. Umbonisi ojikelezayo ubhala lokhu okuvela emahlanzeni asenyakatho nePapua New Guinea: “Umuntu othile owashunyayezwa iphayona elikhethekile wabuyela ekhaya lakubo elikude endaweni esezintabeni. Eminyakeni eminingana kamuva, wavela futhi emhlanganweni wesifunda—enesicelo esithile. Lendoda eyayingakabhapathizwa yayifakaze endaweni yakubo nasezindaweni ‘eziyihlane’ ezizungezile ngokuphumelela kangangokuba abadala besigodi manje bafuna ukuba oFakazi BakaJehova beze futhi banakekele isithakazelo esingokomoya sayo yonke lendawo.” Uma imbewu isitshaliwe, uNkulunkulu ‘oyikhulisayo.’—1 Korinte 3:6.
20. Amagatsha eWatch Tower aye andiswa kanjani ukuze asingathe ukwanda?
20 Ngezindlela eziningi, uJehova ubelungiselela abantu bakhe ukwanda okuhle manje okwenzekayo. Siyajabula ngokuthi, eminyakeni yamuva, uJehova uye wanakekela ngokumangalisayo ukwanda kwezakhiwo zamagatsha eWatch Tower. Namuhla, lamagatsha ahlonyiselwe ukusiza imihlambi emikhulu ‘yamajuba.’
21. Singaqhubeka kanjani sihlanganyela ‘ekukusheshiseni’?
21 Ngakho-ke, sonke masihlanganyele ekukhanyiseni ukukhanya kwezindaba ezinhle zombuso ezigidini ezengeziwe! Masibonise wonke “amajuba” abuyela ezidlekeni indlela ‘yosindiso’ ngalé kwezindonga ezivikelayo zenhlangano kaJehova futhi sandise “udumo” lwakhe emasangweni ayo. Masithandazele ukuba iNkosi yamakhosi uJehova nenhloko yebandla lobuKristu iNkosi yethu ethandekayo uJesu Kristu, iqhubeke ‘ikusheshisa’ njengoba ukumenyezelwa koMbuso kuqhubekela phambili emvuthwandaba wakho!
Ukubukeza Lesisifundo:
◻ Yikuphi ukugcwaliseka okuphawulekayo kukaIsaya 60:17 okwenzeka ngo-1938?
◻ Ngokuvumelana noIsaya 60:18, yisiphi isithakazelo esinaso?
◻ Imibiko evela ensimini ‘imdumisa’ kanjani uJehova?
◻ Isithembiso esikathathu sikaIsaya 60:22 siqhubekela kanjani emvuthwandaba waso?
[Isithombe ekhasini 17]
Izembozo zeNqabayokulinda yesiNgisi yawo-1930 zabonisa umbono kaHezekeli ngenhlangano kaJehova enamandla
[Isithombe ekhasini 20]
Umoya ophilayo wobuphayona uye wasiza ‘ekusheshiseni’ umsebenzi wokuvuna