Singabutholaphi Ubunye Kulelizwe Elihlukaniswe Izingxabano?
“Ngiyakubabeka ndawonye njengezimvu [esibayeni].”—MIKA 2:12.
1, 2. Kungani singenakubheka kubabusi bezwe ukuba bahlanganise umkhaya wesintu?
IZINKULUNGWANE zeminyaka umkhaya wesintu uye waba ngohlukene ngokwesabekayo. Ukungezwani ngokombangazwe, ngokwezomnotho nangokwezokuhlalisana kuye kwahlukanisa isintu saba amaqembu axabanayo nalwayo. Ikhulu lethu lama-20 leminyaka liye labona imiphumela emibi kakhulu yalokhu. Ngokwesibonelo, iMpi Yezwe II iyodwa yabulala abantu abalinganiselwa ezigidini ezingama-55, yafinyelela umvuthwandaba lapho kubhujiswa iHiroshima neNagasaki ngamabhomu eathomu.
2 Emashumini amuva eminyaka, izingxabano eziningi ezengeziwe ziye zabulala izigidi zabantu eziningi ngokwengeziwe. Manje, izikhali zenyukliya zezimiso zezombangazwe eziphikisanayo zisongela bona kanye ubukhona bokuphila emhlabeni. Futhi, njengoba iThe Guardian yaseNgilandi iphawula, amalungiselelo empi, “ebonakalayo nengokwengqondo, athuthukiswa ngamandla” izizwe, ezinkulu nezincane. Ngokuqinisekile-ke, asinakubheka kubaholi bezwe ukuba bahlanganise umkhaya wesintu.
Umbhalo Wenkolo Yezwe
3, 4. Umlando usitshelani ngenkolo yezwe njengomhlanganisi onamandla wabantu?
3 Nokho, ingabe singabheka ezinkolweni zalelizwe ukuba zihlanganise abantu? Ingabe umbhalo wazo unikeza noma ikuphi ukuqiniseka okukhulu? Umlando uphei ndula ngokuthi cha. Uhla lomhleli kuyiChicago Tribune lwaphawula: “Zonke izinkolo ezinkulu zishumayela ukuthula nobuzalwane nomusa. Kodwa ukucindezela okuthile okunonya nokungabekezeleleki emlandweni kuye kwenziwa ngegama likaNkulunkulu.” Umhleli wephephandaba uC. L. Sulzberger waphawula ngokufanayo: “Nakuba lendaba ingase ingathandeki, ingabe akumelwe yini kuqashelwe ukuthi ekunezeleni kwezinye izimbangela—ubukhosi bokubusa izizwe, ubandlululo lobuzwe, isimo sobumpi—inkolo iye yakhula yaba ukusongela okukhulu ngokuqhubekayo ekuphileni kwabantu?”
4 Yebo, umlando ungcoliswe yigazi lezingxabano ezishoshozelwa noma zivunyelwe ngokwenkolo. Ekhulwini lethu leminyaka nje, phakathi nezimpi zobuzwe zezwe nezinye, siye sabona umkhuba ohlambalaza uNkulunkulu womKatolika ebulala umKatolika, umProthestani ebulala umProthestani, umMoslemu ebulala umMoslemu, umJuda ebulala umJuda. Ngempela, amaqiniso omlando abonisa iqiniso lokuthi, kunokuba amandla ahlanganisa umkhaya wesintu, inkolo yezwe inecala lokunezela ekuhlukaneni kwawo.
5. Izinkolo zalelizwe ezihlukene zidabukaphi?
5 Isimo sokudideka nesokuhlukana sezinkolo zalelizwe sibonisa ngokucacile ukuthi uNkulunkulu akazisekeli. Lokhu kungase kubamangaze labo abacabanga ukuthi yonke inkolo kumelwe ibe ngelungile uma ithi imelele uNkulunkulu. Kodwa iZwi likaNkulunkulu eliphefumlelwe lisho ngokucacile: “UNkulunkulu kasiye owesiyaluyalu kepha ngowokuthula.” (1 Korinte 14:33) Akuwona umoya kaNkulunkulu ongengcwele, noma amandla ayisiphekupheku, kodwa umoya ongengcwele noma amandla ashukumisayo, abangela ‘ubutha, ukulwa, ukubanga, ukwahlukana, namahlelo.’ (Galathiya 5:19, 20) UJakobe 3:14, 15 uchaza lokhu kuhlakanipha okuhlangene nalowomoya omubi ‘njengokwamademoni,’ okuvela ‘kunkulunkulu walelizwe,’ uSathane uDeveli.—2 Korinte 4:4.
Indlu Ehlukene
6. Isiphi isimiso esanikezwa uJesu esisebenza kulelizwe?
6 Isimo sokwehlukana komkhaya wesintu sikhumbuza lamazwi kaJesu: “Yilowo nalowombuso owahlukene wodwa uyachitheka, nalowomuzi nokuba indlu eyahlukene yodwa ingeme.” (Mathewu 12:25) Ngaleso sisekelo, lelizwe elihlukene kumelwe liwe. Eqinisweni, ngisho nezizwe ziyavumelana nalesisisho, “Siyonqoba simunye.”
7. Isiphi isidingo sokuzama ukuvimbela inhlekelele abanye abantu abaye basibona?
7 Ukuze bazame ukuvimbela ukuwa okuyinhlekelele, abantu abadumile babizela ushintsho olukhulu ekucabangeni komuntu. Usosayensi wenyukliya uHarold Urey waphawula: “Alikho ikhambi elakhayo ezinkingeni zezwe ngaphandle kokuba ekugcineni kube nohulumeni wezwe okwazi ukumisa umthetho phezu kwawo wonke umhlaba.” Ngokufanayo, uAlbert Einstein “waqinisa ngokuthi ukuthula phakathi kwezizwe kungalondolozwa kulenkathi ye-athomu kuphela ngokuhlanganisa bonke abantu ngaphansi kwesimiso somthetho womhlaba wonke.” Wabuye wanxusa: “Kumelwe sinqobe izithiyo ezesabekayo zemingcele yobuzwe.” Yebo, abantu abaningi bayasibona isidingo sikahulumeni womhlaba wonke.
8. Ingabe lelizwe elihlukene lingakugwema ukuwa?
8 Kodwa kungenzeka yini ukuba izizwe zalelizwe ziyeke ukubusa kwazo? Uma kunjalo zikuyekele kubani? Ngokuqinisekile hhayi eNhlanganweni yeZizwe Ezihlangene. Izizwe ngokuvamile ziya empini kunokuba zizithobe esinqumweni seUN. Kanjalo, lelizwe, nezimiso zalo ezihlukene zezombangazwe, ezentengiselwano, ezokuhlalisana nezingokwenkolo, liya ekuweni.—Zefaniya 3:8; 1 Johane 2:15-17.
Abantu Abanobunye Ngempela
9. Yikuphi ukwenzeka okukhona komkhaya wesintu onobunye?
9 Ingabe lokhu kusho ukuthi ubunye bezwe abunakwenzeka? Lutho neze! Ngokuphambene, ubunye bezwe abuyona into engenzeka nje kuphela kodwa buqinisekile! Eqinisweni isisekelo sobunye bezwe sesiye sabekwa kakade! Kakade kunabantu abenza lokho uEinstein akusho, ‘ukunqoba izithiyo zobuzwe.’ Kakade abantu abamunye ngempela bakhona emhlabeni wonke. Kakade ukhona uhulumeni wezwe ophakeme onezigidi zabantu ababeka wona kuqala ekuphileni kuzo zonke izizwe.
10. Yiziphi izici uhulumeni woqobo okumelwe ube nazo?
10 Abaningi bayoba nomuzwa wokuthi umbono onjalo uzwakala ungakholeki. Bangase babuze: ‘Ingabe ukhuluma ngohulumeni ongokoqobo, onemithetho engokoqobo nezakhamuzi ezingokoqobo? Konke lokho kumelwe ukuba kwenzeke kuphi? Obani abahilelekile?’ Nokho, yini eyenza uhulumeni? Izinto eziningana: (1) Kumelwe ube nabaholi abangokoqobo nabaphilayo; (2) indawo obusa ukuyo nayo kumelwe ibe engokoqobo; (3) isizwe kumelwe sibe nemithetho engokoqobo yokugcina ukuhleleka; (4) kumelwe ube nezikhonzi ezingokoqobo—abantu. Ngokwesibonelo, eUnited States kunomphathi wombuso (umongameli) oneWashington D.C., njengeziko likahulumeni. Kunesishaya-mthetho esenza imithetho. Kunamajaji (izinkantolo zomthetho) ezinakekela ukugcinwa kwemithetho yezwe. Futhi kunabantu abangaphezu kwezigidi ezingama-230 abayizikhonzi. Ingabe ukhona obengaphika ukuthi konke lokhu kungokoqobo?
11. Ngisho nephephandaba lezwe liye lavuma kanjani ukuthi abantu abanobunye ngempela bakhona?
11 Ngokuqiniseke ngokufanayo abantu abamunye bakhona ngempela namuhla! Bakuphi? Imuphi uhulumeni abawukhonzayo? Kungani sithi bamunye ngokugcwele? Iphephandaba laseBrazil iO Tempo lakhomba labantu abavelele lapho libhala: “Nakuba kunezinkolo eziningi ezinkulu ezinezimfundiso ezithile kuzo zonke izingxenye zembulunga, ayikho neyodwa ebusweni bomhlaba namuhla ebonisa uthando olufanayo nobunye njengenhlangano engokwasezulwini yoFakazi BakaJehova.”
12. Yimuphi umbono owabekwa ephephandabeni laseBelgium ovumelana nobuqobo obuqashelwa ngoFakazi BakaJehova?
12 EBelgium, iphephandaba iLa Nouvelle Gazette lalinalesihloko: “Ukuze Kugwenywe Impi Yenyukliya Eminyakeni Engama-25 Ezayo, Izazi ZaseMelika Ziye Zathola Ikhambi Elilodwa Kuphela: Lelo LoFakazi BakaJehova!” Lesosihloko saphawula ukuthi okuwukuphela kwekhambi kungaba “ushintsho oluyinhloko endleleni yokuphila kwesintu . . . ngenxa kahulumeni wezwe.” Leliphephandaba laphetha ngokuthi lombono uvumelana ncamashí “nesiphakamiso esiphakanyiswa oFakazi BakaJehova.” Futhi isiphi ‘lesosiphakamiso’? Leso uJesu asenza isihloko esikhulu sokufundisa kwakhe: Uhulumeni omusha kaNkulunkulu wawo wonke umhlaba, uMbuso waKhe wasezulwini onoKristu njengombusi. Lowohulumeni uyikhambi likaNkulunkulu, ukuphela kwekhambi lobuthakathaka besintu, kuhlanganise nesimo sokwehlukana kwaso. UJesu wafundisa abantu ukuba bathandazele lowohulumeni ngenkathi ethi: “Mawufike umbuso wakho; mayenziwe intando yakho emhlabeni njengasezulwini.” (Mathewu 6:10) Futhi, njengoba inguqulo iJerusalem Bible yamaKatolika ihumusha isiprofetho sikaDaniyeli 2:44, lowohulumeni kaNkulunkulu masinya “uzochitha . . . yonke imibuso yangaphambili, futhi wona uqobo ume phakade.”
Ukubonakalisa Uthando Lweqiniso Nobunye
13. Ngokuphathelene nohulumeni wezwe wokuhlanganisa abantu, kuye kwenzekani kusukela ngo-1914?
13 Izenzakalo zezwe ekugcwalisekeni kwesiprofetho seBhayibheli ziyabonisa ukuthi uhulumeni kaNkulunkulu wasezulwini waqala ukubusa ngo-1914. Ngalesosikhathi uNkulunkulu wamisa iNkosi yakhe evivinyiwe, uJesu Kristu njengombusi. (Mathewu 24:3-14; 2 Thimothewu 3:1-5; IsAmbulo 12:10) Lowohulumeni unemithetho ephakeme nezimiso, njengoba zilotshwe encwadini engcwele kakhulu kunazo zonke, iZwi likaNkulunkulu eliphefumlelwe, iBhayibheli. (2 Thimothewu 3:16, 17) Futhi kusukela ngo-1914 uMalusi Omuhle, uJesu Kristu, ubeqoqa izakhamuzi zoHlelo Olusha lukaNkulunkulu. Ngakho njengamanje isisekelo salowomphakathi omusha womhlaba siyabekwa! Yebo, konke lokhu kungokoqobo ngempela. Akulona nje iphupho.—Mathewu 25:31-46; Johane 10:14-16; 2 Petru 3:13.
14. Yisiphi isici esihlukanisayo oFakazi BakaJehova abaye basinqoba?
14 Njengezakhamuzi zoHlelo Olusha, oFakazi BakaJehova kuwo wonke amazwe babeka uhulumeni woMbuso kaNkulunkulu ongokwasezulwini kuqala ekuphileni kwabo. Kanjalo, lapho oFakazi BakaJehova befunda umyalo kaJesu othi, “Nithandane, njengalokhu nginithandile,” bawuthatha njengoba unjalo, futhi bawenze ngesilinganiso somhlaba wonke. (Johane 15:12) Ngenxa yalokho, baye bazigqashula ngempela izibopho ezivimbelayo zobuzwe. Bayakwazi ukubonisa uthando lweqiniso ngaso sonke isintu, kungakhathaliseki ubuhlanga bomuntu, isizwe noma ubuzwe.
15, 16. Ukunqoba ubuzwe kuye kwaqashelwa kanjani ngabanye?
15 Maqondana nalokhu, kumagazini wesonto laseItaly iAndare alle genti indela engumRoma Katolika yabhala okulandelayo ngoFakazi BakaJehova: “Kufanele sibancome ngendlela abenqaba ngayo noma iluphi uhlobo lobudlova futhi babekezelele ukulingwa okuningi abalingwa ngakho ngenxa yezinkolelo zabo ngaphandle kokudala uthuthuva . . . Yeka ukuthi umhlaba ubungahluka kanjani ukuba sonke besingavuka ekuseni sesinqume ngokuqinile ukungathathi izikhali futhi, kungakhathaliseki ukuthi iyini imiphumela, njengoFakazi BakaJehova!”
16 Iphephandaba laseItaly i-Il Corriere di Trieste laphawula: “OFakazi BakaJehova kumelwe banconywe ngokuqina nokubumbana kwabo. Ngokuphambene nezinye izinkolo, ubunye babo njengabantu bubavimbela ukuba bakhuleke kuNkulunkulu ofanayo, egameni likaKristu ofanayo, ukuba abusise izinhlangothi ezimbili eziphikisanayo zempi, noma ekuxubeni ezombangazwe nenkolo ukuze bakhonze izithakazelo zikaHulumeni noma amaqembu ezombangazwe.”
17. Eyoku-1 Johane 3:10-12 noJohane 13:35 ihlukanisa kanjani phakathi kwabantwana bakaNkulunkulu nabantwana bakaSathane?
17 Phawula ukuthi lokhu kuvumelana kanjani nokubhalwe ku-1 Johane isahluko 3 amavesi 10 kuya ku-12. Lapho kuthi: “Ngalokho kubonakala abantwana bakaNkulunkulu nabantwana bakaSathane; lowo ongenzi ukulunga akasiye okaNkulunkulu, naye ongamthandi umzalwane wakhe. Nanti izwi enalizwayo kwasekuqaleni lokuba sithandane, kungabi-njengoKayini owab-ngowomubi, wabulala umfowabo.” Cha, abantwana bakaNkulunkulu abababulali abafowabo. Abantwana bakaSathane abenza lokho.—Johane 13:35.
18. Kwenzekani kubantu ababehlukene ngaphambili uma beba oFakazi BakaJehova?
18 Kanjalo, lapho ama-Arabhu, amaJuda nabathi bangamaKristu kwaIsrayeli naseLebanoni beba oFakazi BakaJehova, bahlangana esibophweni esinganqamukiyo sothando nobunye. Kungokufanayo ngababengamaKatolika namaProthestani eNyakatho Ireland. Kungokufanayo ngabamhlophe nabaNsundu eUnited States. Kungokufanayo ngamalungu ezizwe ezihlukene zaseAfrika ezazizondana futhi zilwa zodwa. Umagazini waseBrithani iNew Society waphawula: “OFakazi mhlawumbe baphumelela kakhulu kunanoma iliphi elinye iqembu ekushesheni ukususa ukubandlululana kwezizwe phakathi kwabasanda kubajoyina.”
Umthombo Wobunye
19. Kukuziphi izici ezimbili ezibalulekile oFakazi BakaJehova abavelele kuzo?
19 Kungani oFakazi BakaJehova bekwazi ukubonisa uthando olunjalo nobunye? Ingabe kungenxa yemfundo yabo yezwe, ukuqhama, umnotho noma ukuhlakanipha? Cha, bangabantu nje abavamile. Kodwa bavelele ezicini ezimbili ezibalulekile. Okokuqala, oFakazi bakaJehova bamukela iBhayibheli lonke njengeZwi likaNkulunkulu eliphefumlelwe, futhi benza okusemandleni abo ukuba baphile ngalo. Njengoba umphostoli uPawulu asho: “Lapho namukela izwi likaNkulunkulu enalizwa ngathi, anilamukelanga njengezwi labantu kepha njengezwi likaNkulunkulu, njengokuba liyilo isibili, elona lisebenza futhi phakathi kwenu nina enikholwayo.” (1 Thesalonika 2:13) Okwesibili, oFakazi BakaJehova bathatha isimo esifanayo naleso sabaphostoli bakaJesu abathi kubabusi: “Simelwe ukulalela uNkulunkulu kunabantu.”—IzEnzo 5:29.
20. Uyini umthombo wangempela wobunye phakathi koFakazi BakaJehova?
20 Kwenzekani kubantu abamukela lonke iBhayibheli njengeZwi likaNkulunkulu, baphile ngalo futhi balalele uNkulunkulu njengombusi kuzo zonke izinto? IzEnzo 5:32 ziphawula ukuthi uNkulunkulu unikeza umoya wakhe ongcwele onamandla, noma amandla ayisiphekupheku, “labo abamlalelayo.” Lokhu kuwumthombo wamandla enza oFakazi BakaJehova bakwazi ukufinyelela futhi balondoloze ubunye bomhlaba obungenakwenzeka kwabanye.
21, 22. (a) Khona-ke, obani abagcwalisa isiprofetho sikaIsaya 2:2-4? (b) Ikuphi ukugcwaliseka okungokwesiprofetho oFakazi BakaJehova abakubonayo manje?
21 Khona-ke, ngokucabangela lobufakazi, obani abagcwalisa isiprofetho sikaIsaya isahluko 2, amavesi 2 kuya ku-4? Lapho sikhuluma ngesikhathi esiphila kuso, leso siprofetho simemezela ukuthi ukukhulekelwa kweqiniso kukaJehova kwakuyomiswa ngokuqinile ngaphansi kokubusa koMbuso, nokuthi abaningi babeyothi: “Wozani sikhuphukele entabeni kaJehova . . . uyakusifundisa izindlela zakhe, sihambe emikhondweni yakhe.” Lesiprofetho futhi sithi: “Uyakwahlulela phakathi kwezizwe, anqume phakathi kwabantu abaningi; bayakukhanda izinkemba zabo zibe ngamakhuba, nemikhonto yabo ibe-ngocelemba; isizwe asiyikuphakamisela isizwe inkemba, zingabe zisafunda ukulwa.”
22 Obani abaye bavumela uNkulunkulu neZwi lakhe ukuba “anqume” phakathi kwabo? Obani abaye basabela ngempela emyalweni kaNkulunkulu ‘wokungasafundi ukulwa’? Obani abaye bachitha ingqikithi yezinkulungwane zeminyaka emajele nasemakamu okuhlushwa esikhathini sethu kunokuba babulale omakhelwane babo? Obani ababonisa inhlonipho ngeBhayibheli njengeZwi likaNkulunkulu eliphefumlelwe futhi abalalela uNkulunkulu njengoMbusi? Obani ababonisa ubuzalwane bezizwe zonke obuyingqayizivele kulelizwe elihlukaniswe izingxabano? Impendulo ingathi kuphela, oFakazi BakaJehova. Futhi manje “ezinye izimvu,” ngamakhulu ezinkulungwane, ziyaqoqwa njengabangane babagcotshiwe abasasele ‘bomhlambi omncane.’ (Johane 10:16; Luka 12:32) Laba nabo bayazuza ekugcwalisekeni kwesiprofetho esanikezwa esikhathini sikaHoseya. Sabikezela ukuthi zonke izinceku zikaJehova ‘zazizobuthelwa ndawonye ebunyeni’ ngaphansi kweNhloko eyodwa, uJesu Kristu, emandleni oMbuso. (Hoseya 1:11) Babona futhi kugcwaliseka ebunyeni babo amazwi kaJesu ngenkathi ethandaza kuNkulunkulu ukuthi abalandeli bakhe “babe-munye, njengalokho wena-Baba ukimi, nami ngikuwe.” (Johane 17:20-22) Kanjalo, kubona uNkulunkulu uye wagcina isithembiso sakhe sakudala: “Ngiyakubabeka ndawonye njengezimvu [esibayeni].”—Mika 2:12.
Ingabe Uyawakhumbula Lamaphuzu?
□ Kungani kumelwe siphethe ngokuthi uNkulunkulu akayena umsekeli wezinkolo zezwe?
□ Eyoku-1 Johane 3:10-12 ibachaza kanjani labo abamunye kulelizwe elihlukaniswe izingxabano?
□ Uyini umthombo wangempela wamandla owenza izinceku zikaJehova zibe nobunye emhlabeni wonke, futhi kungani zinalowomthombo wamandla?
□ Yiziphi iziprofetho ezinhle esizibona zigcwaliseka namuhla ngokuphathelene nobunye bezinceku zikaNkulunkulu?
[Isithombe ekhasini 24]
Isisekelo sobunye bomhlaba sesibekiwe kakade!