Kwenzekeni Ekwethembekeni?

IMBONI ethile eUnited States yawa. Iminyaka engaphezu kwama-60 yayiye yathengisa izimbewu zasengadini. Izisebenzi zayo zazingabafana namantombazane aye-oda imbewu ngokubhala, eyithengisa komakhelwane bawo futhi athumele ingxenye yemali emuva embonini. Kungani lemboni yawa? Ngoba izisebenzi ezingabantwana zazingathembekile. Eziningi zazo zazingayibuyiseli emuva imbewu noma zigcine imali ezaziyithole ngokuyithengisa.

Yini obungaphetha ngayo ngeqiniso lokuthi imboni encike ekwethembekeni kwabantwana yakwazi ukusebenza iminyaka engama-60 kodwa manje isiphoqeleleka ukuwa? Kubonakala sengathi abantwana abasathembekile njengoba babenjalo, akunjalo? Nokho, abantwana akubona kuphela abangathembekile ngokwengeziwe. Abantu bobudala beminyaka ephakathi basakhumbula isikhathi lapho babengashiya ngokuqiniseka izindlu zabo umnyango wangaphambili ungakhiyiwe, noma bashiye ibhayisikili eceleni komgwaqo futhi lingantshontswa. Akusenjalo ezindaweni eziningi.

Ekuhloleni okwenziwa umagazini iPsychology Today, abaningi ezinkulungwaneni ezasabela bavuma ukungathembeki okuncane noma okukhulu. Amaphesenti angamashumi ayisishiyagalolunye nantathu avuma ukuthi ngezinye izikhathi ashayela ngejubane elidlula ijubane elinqunyiwe. Amaphesenti angamashumi ayisithupha nesishiyagalombili ayethathe izinto zasehhovisi noma ezinye izimpahla. Amaphesenti angamashumi ayisithupha nesikhombisa ayekhohlisile lapho kunokwenzeka ezivivinyweni noma ezabelweni zesikole. Amaphesenti angamashumi amane nanhlanu ayekhohlise abangane bawo bomshado. Futhi abaningi babeye bathumela ukubuyiselwa kwentela okungamanga, babeye behluleka ukubika impahla okumelwe ikhokhelwe intela emthethweni, babeye basebenzisa ucingo lwenkampane ngokungafanele ukuba bashayele kude noma bakhwabanise kuakhawunti yezindleko.

Kungani Kukhona Ukungathembeki Okungaka?

Kuye kwasikiselwa izizathu eziningi zokungathembeki. Nazi ezinye zazo.

Isibonelo sabazali: Lapho imboni yembewu ibhalela abazali babantwana ababeyikweleta imali, ngokuvamile yayamukela incwadi ethi: ‘Niyinkampane enkulu; aniyidingi imali futhi nizama nje ukukhohlisa umntanami.’ Akunzima ukubona ukuthi kungani labo bantwana bafunda ukungathembeki.

Ngoba kulula: Ekuphenduleni lokhu kuhlola okushiwo ngenhla umfundi osemusha wabhala: “Njalo kunokucindezeleka kokuba uvelele ukuze uthole amamaki aphezulu, futhi ngisho noma ngikulungiselele ukuhlolwa ngingase ngikhohlise nokho . . . Abafundi bakhohlisa obala nothisha abaningi benza okuncane noma bangenzi lutho ngakho. Ngamafuphi: Ngiyakwenza ngoba ngingaphumelela ngakho.”

Ubumpofu: Ngokungangabazeki, ubumpofu—noma ukwesaba ubumpofu—kuholela ekuntshontsheni okuningi nasekukhohliseni, nakuba abantu ngokuvamile bebonakala beye baba abathembeke ngokwengeziwe phakathi neminyaka yokuCindezeleka yangaphambi kwempi naphezu kobumpofu obabusakazeke kabanzi. Futhi abantu abaningi abangathembekile bakude nobumpofu. Cabangela indaba eyabikwa ivela eJapane. Iqembu lamadoda latholwa liphamba inkampane kajantshi. Babeye bathola indlela yokukhokha kancane kunalokho okumelwe bakukhokhe ngohambo lokuya ekhaya ngemva kokudlala igalofu kosuku. Ingabe baphamba ngenxa yobumpofu? Phinde. Omunye wabaphambi wayengumongameli wenkampane!

Ukuhaha: Umhleli wephephandaba wabhala: “Lokhu kuhahela imali okusobala kuyisisekelo sezinkinga eziningi kakhulu zokuziphatha zesizwe.”

Isibonelo esibi: Yena lomhleli ofanayo wabhala: “Bheka, uma uthanda, kubaholi bethu. IziKhulu zethu zombuso, ngezimali eziqoqelwa ukufumbathisa iziphathimandla zomphakathi nezinhlobonhlobo ‘zamalungelo,’ zishiya lokho ezijabulela ukukubiza ngokuthi ‘inkonzo yomphakathi’ zicebe ngokungafanelekile, zinemali yomhlalaphansi eningi. Futhi kuthiwani ngokaputeni bethu bezemisebenzi? Umphangi omkhulu usekhona. Akukho sicebi kwezebhizinisi esingenzanga imali yaso ngokuphamba iMelika.”

Isimo esizungezile sokungathembeki: Umbiko kumagazini iNewsweek wathi: “Abaningi babantu abafanayo baseMelika abakhonona kakhulu ngezelelesi ezihloniphekayo bona ngokwabo bangabakhuthuzi bangempela besikhathi esincane. Abantu baseMelika abampofu baphamba isimiso sezenhlalakahle futhi izakhamuzi ezinemali engenayo ephakathi nephakeme ngokufanayo zisingatha ama-akhawunti ezindleko ‘njengamaphepha okukhohlisa’ futhi zibike elincane iholo lazo elikhokhelwa intela kuInternal Revenue Service. ‘Kulenhlangano, wonke umuntu uyahlanganyela.’”

Nokho, kungakhathaliseki izimbangela, uzizwa kanjani ngokungathembeki? Ingabe uyakujabulela ukutshelwa amanga noma ukukhohliswa? Ingabe uyajabula ngokukhokha imali yomshuwalense ephakeme ngenxa yokukhohliswa kwemishuwalense okwandile, noma amanani entengo ephakeme ukuze kuhlangatshezwane nokuntshontsha esitolo nobusela bezisebenzi? Ubungavumela ukuba umkakho noma umyeni wakho akukhohlise? Ngokunokwenzeka ngeke. Kodwa lokhu ilokho okwenzekayo namuhla, futhi sonke siyathinteka ngandlela thile. Ezweni elinje, ngubani ongamethemba? Ingabe izinto kumelwe zibe ngalendlela?