Ukuqondisisa Izindaba

“Isizukulwane” Siselapha

“Lesisizukulwane asiyikudlula kungakenzeki konke lokhu,” kwasho uJesu lapho echaza “isiphelo sesimiso sezinto.” (Mathewu 24:3, 34, “NW”) Izinto athi zazizokwenzeka—izimpi ezinkulu, ukuswelakala kokudla, ukuzamazama komhlaba, ukwesaba okusakazeke kabanzi, izifo ezidlangayo nokushunyayelwa koMbuso—ziye zagcwaliseka zonke kusukela ngonyaka ka-1914, lapho kuqala impi yokuqala yembulunga. (Mathewu, isahluko 24; Luka, isahluko 21) Kodwa siyohlala isikhathi eside kangakanani isizukulwane? Ingabe sisenathi?

Umbiko wokubalwa kwabantu kwango-1980 osanda kukhishwa, ephephandabeni laseNingizimu Afrika i“Die Vaderland,” unikeza ubufakazi bokuthi abaningi baleso sizukulwane sika-1914 basenathi namuhla. Inani elikhulu labantu baseNingizimu Afrika lingabantu ababeneminyaka eyi-14 noma ngaphezulu ubudala ekugqashukeni kwempi yezwe ngo-1914. Ngesikhathi salokhu kubalwa kwabantu, cishe amadoda nabesifazane abayizi-50 000 abazalwa ngo-1900 noma ngaphambili bebesaphila—abangaba ngoyedwa enanini labantu abangama-500 lapho. “Izibalo zokubalwa kwabantu futhi ziyabonisa ukuthi manje kunabantu abayizi-10 480 abangaphezu kobudala beminyaka eyi-100 eNingizimu Afrika,” kubika leliphephandaba.

Uma izibalo ezinjalo zenani labantu zifana ngenxenye enkulu yezwe, kuba sobala ukuthi inani elikhulu lesizukulwane sika-1914 lisaphila namuhla. Nokho, amanani abo ancipha njalo, ngakho-ke, futhi, esikhathini esithile esizayo esiseduze, singalindela ngokuqiniseka ukuba “ukuphela” kufike, kulandelwe isikhathi lapho uMbuso kaNkulunkulu wobuMesiya uyoba ukuphela kukahulumeni obusa umhlaba.—Mathewu 24:14; IsAmbulo 21:1-5.