Ukuqondisisa Izindaba

Ukulunga Okwenzelwa Isisulu

“Enye inkinga yethu enkulukazi emthethweni wobugebengu imbuyiselo yesisulu,” kwasho uMahluleli uMichael Beal waseNyakatho Carolina, eU.S.A. Njengoba noma ngubani oke wagqekezelwa, wagetshengwa, webelwa noma wamoselwa ngandlela-thile azi, akukhona kuphela ukuthi isisulu akuvamile ukuba sikhokhelwe ngalokho esliahlekelwe yikho, kodwa, eqinisweni, kuyaye kufuneke sikhokhe ngezintela zaso imali yokunakekela izigebengu uma zithunyelwa ejele. Sinjalo isimo sokulunga okwenzelwa izigebengu.

Manje ngokweTimes, yaseNew York, eNyakatho Carolina kuzanywa isu lokulungisa lenkinga. Esikhundleni sokuwathumela ejele noma esikoleni sokwenza ngcono, amachwensa asemasha athunyelwa emafamu ngezinsuku zamaholide nangeMigqibelo ukuba asebenze lapho, ahlwanyele amasimu noma agawule izingodo. Ingxenye enkulu yeholo lesigebengu lithunyelwa kumuntu olahlekelwe, bese kuthi ingxenye encane ibekelwe eceleni esikhwameni sesehlakalo esingalindelwe, isigebengu esiyoyithola ngemva kokuba isisulu sesiye sakhokhelwa ngokugcwele. Onyakeni wokuqala walelisu, kwasetshenziswa abafana abangama-34, abobudala beminyaka eyi-10 kuya kwe-15. Bonke, ngaphandle koyedwa owathutha, bakhokhela izisulu zabo ngokugcwele. Ekugcineni, ukulunga kwakwenzelwe izisulu!

Nokho, ukulunga okunjalo kwakuyingxenye yoMthetho uNkulunkulu awunikeza isizwe sakwaIsrayeli. Ezimweni zokweba noma ukucekela phansi, uMthetho wawufuna ukuba isoni esingakwazi ukukhokhela isisulu saso inhlawulo elinganiselwe, sasingase sithengiswe njengesigqila, ngaleyondlela kubuyiselwe isisulu futhi kwenziwe ukuba isigebengu sisebenzele ukuziphilisa. (Eksodusi 22:1-6) Lemithetho ibonakalisa ukulunga nokuhlakanipha kuka“Mahluleli,” ophelele, “uMniki-Mthetho” ne“Nkosi,” uJehova uNkulunkulu.—Isaya 33:22.

Isayensi noma Inganekwane?

Isithakazelo ekuphileni okusemkhathini siye sanda kakhulu eminyakeni yamuva nje, esiye sabangelwa ngezinga elingelincane neze, ukuya emkhathini nezinganekwane zesayensi namabhayisikobho. Eqinisweni, izithombe zamabhayisikobho ezidume kakhulu emlandweni—iStar Wars, nethi E.T. The Extra-Terrestrial—zibonisa lokhu. Ngesikhathi esifanayo, izakhiwo ezidulayo zesayensi ziyaqhubeka ngentshiseko enkulu ukuze kutholwe ukuphila noma nokuhlakanipha emkhathini ongaphandle. Umphumela uwukuthi kubantu abaningi, ikakhulukazi intsha, kubanzima ngokwengeziwe ukuhlukanisa lapho isayensi iphela khona ngempela nalapho kuqala khona inganekwane nje. Ukuba khona kwezidalwa zasemkhathini nethuba lokwenzeka ukuba kuxoxwe nazo nokuthonywa izona kuye kwangena ezingqondweni zabantu ngesinyenyela njengoba singakubeka kanjalo.

Ephawula ngalesigameko, UJack Catran, usosayensi kwezomkhathi, uyabhala esihlokweni sikamagazini iNewsweek esithi “E.A. = Sekwanele”: “Ababhali nabenzi bamabhayisikobho banelungelo lokuzicabangela nganoma isiphi isihloko sesayensi, kodwa masikubize njengoba kunjalo: yinganekwane yesayensi, hhayi isayensi. Futhi masiziveze njengoba zinjalo izifiso zabo ukuthi ziyini: ukuxhaphaza nokuthengisa, hhayi imfundo.” Ngokuqinisekile, iseluleko seBhayibheli sokwehlukanisa phakathi kweqiniso nalokho okuthiwa “ukwazi kungesikho” siyinkambo yokuhlakanipha.—1 Thimothewu 6:20.

Abanamuhla Abashumayeli Bevangeli

Nyakenye ngoDecember iNCCB (National Conference of Catholic Bishops) [Umhlangano Wesizwe WabaBishobhi BamaKatolika,] yavotela ukuqeda isimiso sayo seminyaka emihlanu nekomiti layo lokuthuthukisa umsebenzi wokushumayela ngevangeli. “Ukusakaza ‘izindaba ezinhle’ akuseyona imfuneko ephambili yesizwe emhlanganweni wababhishobhi,” kusho iNational Catholic Reporter. “Kuye kwaphebezwa ngokwezindawo njengesenzo esiyoya ngezimo.”

Kodwa kungani iNCCB iye yayeka umzamo wokushumayela ivangeli? “Asikakafiki isikhathi sokuba amaKatolika amaningi amukele ukuthi aye abizelwa ukushumayela ngevangeli njengesici esingokwemvelo sokholo lwawo,” kusho iReporter, yenezela ngokuthi “kwakungekho kukhathalela okutheni ngokushumayela ivangeli njengomunye umsebenzi omkhulu ngokuyinhloko yonke into iSonto eliyenzayo okumelwe ivumelane nawo.”

Yeka ukuthi lokhu kuphambene kanjani nomoya ovuthayo wokushumayela ivangeli wamaKristu eminyaka yekhulu lokuqala! Ngisho nabaphikisi bashukunyiselwa ukuba bathi: “Bhekani, senigcwalisé iJerusalema ngesifundiso senu.” (IzEnzo 5:28) Esikhundleni sokuyekelela njenge“senzo esiyoya ngezimo,” umphostoli uPawulu wathi: “Ngokuba ngimelwe ukwenze njalo [ngokuba isidingo sibekwe kimina, Douay Version yamaKatolika]; ngokuba maye kimina uma ngingalishumayeli ivangeli.”—1 Korinte 9:16.

Namuhla, ngokusabela emazwini kaJesu akuMathewu 24:14 no-28:19, 20, oFakazi BakaJehova, ngempela baye benza ukushumayela izindaba ezinhle zoMbuso kaNkulunkulu kwaba “ngomunye umsebenzi omkhulu ngokuyinhloko” ekuphileni kwabo. Inhlangano yabo ngeyezwe lonke eshumayela ivangeli.