Ukusekelwa ‘Amandla Angaphezu Kwavamile’
Njengoba ixoxwa uSadie Lewis Haddad
“WAKWENZA kanjani?” ngezinye izikhathi ngiyabuzwa. Ukwenzani? Ukukhulisa abantwana abayisishiyagalolunye, abokugcina abayisikhombisa ngingedwa. Futhi kwabayisishiyagalombili abaphilayo namuhla, abayisikhombisa kudala beyizikhonzi ezizinikezele ezithembekile zikaJehova uNkulunkulu.
Uma ngibheka emuva, ngiyazi ukuthi ukuba ngikwazi ukukhulisa abantwana bami eqinisweni likaNkulunkulu akwenziwanga kuphela ngamandla ami. Lokho kwakungeke kwenzeke. Ngempela kwakungosizo lukaJehova. Njengoba eye-2 Korinte 4:7, NW ibonisa, labo abafuna ngempela ukukhonza uNkulunkulu futhi benze intando yakhe bangaba na“mandla angaphezu kwavamile,” lawo avela kuNkulunkulu ngomoya wakhe ongcwele.
Kodwa kwenzeka kanjani .ukuba ngikhulise abaningi babantwana bami ngingedwa? Kwenzeka kanjani ukuba ngazi uJehova nezinjongo zakhe? Ake nginitshele okuncane ngesizinda sami.
Iminyaka Yokuqala Yesikole ELebanoni
Ngazalelwa eLebanoni ngaphezu kweminyaka engama-90 edlule, ngo-1892. Ubaba wayengumpristi weGreek Orthodox, njengoba noyise ongaphambi kwa khe ayenguye. Isifiso senhliziyo kababa sasiwukuba okungenani omunye wamadodana akhe abe umpristi, alandele izinyathelo zakhe. Kodwa akekho kubo owafisa ukulandela lomsebenzi.
Ubaba wayengajabuli neze ngalokhu. Nokho, uma kuyintando kaJehova “ovusa abafileyo,” ubaba uyovuka kwabafileyo lapho uNkulunkulu emisa iPharadesi laKhe emhlabeni “umhlaba omusha.” (2 Korinte 1:9; 2 Petru 3:13) Khona-ke ngiyokwazi ukutshela ubaba ukuthi nakuba ingekho emadodaneni akhe eyaba isikhonzi sikaNkulunkulu, indodakazi yakhe uSadie, nabaningi abantwana bayo nabazukulu baye baba izikhonzi zikaJehova!
Ngempela angizange ngimazi umama, ngoba washona ngineminyaka emithathu ubudala. Nokho, njengesicelo sakhe, ubaba wangiyisa eboarding school lapho izindelakazi zaseJalimane ezingamaLuthela zangifundisa kokubili isiArab nolimi lwesiJalimane. Ngafundiswa ukuthanda uJesu kodwa ngafundiswa okuncane kakhulu ngoNkulunkulu nezinjongo zakhe.
Nokho isifiso sami sasiwukuba ngibe indelakazi futhi ngiye ezulwini. Kodwa angizange ngibe indelakazi ngoba lapho ngiqeda isikole kwadingeka ukuba ngibuyele ekhaya ukuba ngiyonakekela ubaba ngaphambi kokuba afe. Lapho efa abafowethu baba nomthwalo wemfanelo wokuba banginakekele, njengoba kwakuyisiko eLebanoni ngalezozinsuku. Baba nomuzwa wokuthi kwakungcono ngami ukuba ngigane, futhi bangikhethela indoda. Ngangingenakukhetha kulendaba. Ngakho ngo-1909 lapho ngineminyaka eyi-17 kuphela ubudala, ngashada.
Ukufika EUnited States
Ngo-1910 umyeni wami nami sashiya iLebanoni futhi seza eUnited States. Ekugcineni sahlala epulazini lerayisi eTexas. Futhi njengoba iminyaka yayiqhubeka saba nabantwana abayisishiyagalolunye.
Kodwa umshado wami awuzange uphumelele kahle. Eqinisweni, ngo-1935 umyeni wami wangishiya, umntwana wethu wesishiyagalolunye eneminyaka emithathu ubudala. Nakuba indodakazi nendodana yami endala base beshadile kakade, izinkinga zabo zazilokhu zinakekelwa yimi. Futhi manje kwadingeka nginakekele abanye abantwana abayisikhombisa ngingedwa.
Ngonyaka olandelayo sathengisa yonke into esasingayithengisa, ngaphandle kwendawo ethile, futhi saqala indlu eBeaumont, eTexas. Abambalwa babantabami baqala ukusebenza ngalesosikhathi futhi banikela ezindlekweni zomkhaya. Lokho ngempela kwakulusizo olukhulu kimi.
Usizo Oluvela KuJehova
Usizo olukhulu, nokho, lwavela kuNkulunkulu. Emuva ngo-1917, lapho sisahlala epulazini, ngase ngiqale ukwazi uJehova nezinjongo zakhe futhi ngaqala ukuphendukela kuye ngosizo.
Kusukela ngiseyintombazanyana nganginenhlonipho ngoNkulunkulu, futhi manje ngangifuna ukwazi okwengeziwe ngaye. Okwanika lokhu umqondo wokuphuthuma kwakuyiMpi eNkulu, njengoba babeyibiza kanjalo ngalesosikhathi, eyagqashuka ngo-1914. Udadewethu eBeirut, eLebanoni, wangibhalela ngezimo ezimbi kuleyongxenye yezwe ngesikhathi sempi. Eziningi zezihlobo zami zalamba zaze zafa.
Udadewethu wathi wayephoqeleleka ukuba athengise ngendlu yakhe nezinye izinto ukuze athole nje isinkwa sokuba adle, futhi, ngaphandle kwalokho wagula kakhulu. Wangicela ukuba ngimthumelele imali yokuthenga ukudla. Ngakho ngokushesha ngayithumela imali. Kodwa ngalesosikhathi ngaziswa ngeposi ukuthi udadewethu washona ngalolosuku imali eyafika ngalo. Ngisenayo leyoncwadi ebuhlungu kakhulu.
Lokhu okuhlangenwe nakho kwangisiza ukuba ngibone ngokoqobo ukugcwaliseka kukaMathewu 24:7, nalokhu kwenza kwaba lula ukwamukela iqiniso lapho ngiliboniswa.
Imbewu Yeqiniso Iyatshaleka
Imbewu yeqiniso yaqala ukutshaleka enhliziyweni yami ngo-1917. Ngalowonyaka isikhonzi sesikhathi esigcwele esinguFakazi KaJehova safika kwami. Sangimemela ukuba ngenze isikhokhelo seNqabayokulinda ngolimi lwesiArabi. Eyokuqala eyafika ngayifunda kusukela ekuqaleni ngayikhipha ngalé. Kusukela ngalesosikhathi ngiye ngafunda ngayinye ephumayo kanye neBhayibheli, okuye kwaba umthombo wokholo lwami nethemba kuJehova.
Ekugcineni ngafunda ukufunda isiNgisi kahle ngokwanele ukuba ngishintshe isikhokhelo sami ngolimi lwesiNgisi. Isizathu esimqoka salokhu sasiwukuthi ngangifuna abantwana bami nabo bafunde labomagazini.
Umyeni wami akazange aphikisane nezinto engangizifunda kodwa wayengakufuni ukufunda kwami kakhulu. Ngakho uma ngangifunda ebusuku, ngemva kokuba yonke imisebenzi isiphelile nabantwana sebelele, ngangikhiya umnyango wekamelo lapho ngifundela khona futhi ngivale izimbobo lapho ukukhanya kwakungase kuphume khona. Ngalendlela ngakwazi ukuqhubeka ngifunda.
Ingabe Ngangingakwenza Lokho Kuzidela?
Iminyaka yaqhubeka. Ngaqhubeka ngifunda okuningi ngoNkulunkulu. Khona-ke ngo-1935, ngemva kokuba umyeni wami esehambile, ngamenywa ukuba ngibe khona enkulumweni eyayinikezwa oFakazi BakaJehova endlini yesikole eduze nepulazi lethu. Inkulumo yahlanganisa indaba yokudela kuka-Abrahama indodana yakhe, uIsaka.
Into eyayingihlupha ngaso sonke isikhathi njengomLuthela yayiwukuthi kungani uNkulunkulu acela uAbrahama ukuba anikele indodana yakhe eyodwa. Manje ngokuba umama wabantwana abayisishiyagalolunye, lokhu kwangihlupha ngisho nangaphezulu. Ngaba nomuzwa wokuthi ngangingeke ngikwenze lokho!
Nokho, ngokuzwa incazelo enkulumweni, ngaqonda ukuthi ukholo lweqiniso lwalusho ukuthini ngempela, nokuthi lwamvumela kanjani uAbrahama ukuba enze lokho. Wayeqinisekile ukuthi uNkulunkulu ovusa abafileyo ngokufanayo wayengamvusa nomtanakhe. (Heberu 11:17-19) Ngaqaphela ukuthi lolu kwakuwuhlobo lokholo engangiludinga ukuze ngibhekane nezinkinga ikusasa elaliziphethe. Kodwa ngangizobakhulisa kanjani abantabami ngendlela eqondile futhi ngibanike uhlobo lokholo uAbrahama ayenalo? Imikhuleko yami ephikelelayo kuNkulunkulu yayiwukuba ngikwenze.
Ukufunda Amaqiniso Engeziwe
Amasonto ambalwa nje ngaphambi kokuba siye edolobheni ngo-1936, oFakazi babuya kimi futhi badlala irekhodi likamongameli weWatchtower Society, uJ. F. Rutherford. Lalikhuluma ngokubaluleka kolwazi oluqondile. Labonisa ukuthi ulwazi oluqondile lwalubalulekile, ngoba uJesu wathi ulwazi ngoNkulunkulu noKristu luyoholela ekuphileni okuphakade. (Johane 17:3) OFakazi bangimema futhi ukuba ngiye emihlanganweni yabo. Ngakho ngemva kokuba sesithuthele edolobheni, enye yamadodakazi ami nami sathola ukuthi imihlangano yayiqhutshelwa kuphi futhi saya khona.
Umhlangano wethu wokuqala wawujabulisa kangangokuthi ekupheleni kwawo ngabuza oFakazi ukuthi babenaye yini uSontosikole ukuze abantwana bami bakwazi ukuhlanganyela. Ngangifuna ukuba bafunde izinto ezimangalisayo engangizifunda. Khona-ke oFakazi bangitshela ukuthi babengenazo izikole zangeSonto kodwa esikhundleni salokho babezoza ekhaya lami masonto onke futhi basifundise iBhayibheli. Ngabuza: “Nibiza malini?” Futhi baphendula: “Akukhokhwa. Kumahhala.” Lokho kwakumangalisa kimi!
Ngaphambi kokuba oFakazi beze kuleso sifundo sokuqala, ngathandaza kuJehova. Ngamcela ngenhliziyo yonke ukuba angisize nabantwana bami, nokuthi bafunde iBhayibheli nathi. Ngajabula kakhulu ngoba bonke bahlanganyela esifundweni, ngisho nendodakazi endala nabantwana bayo.
Isonto ngalinye sasihlatshwa umxhwele ukufunda amaqiniso amasha ngoMbuso kaNkulunkulu nokubusa kwawo emhlabeni oyiPharadesi ozayo. Safunda futhi, ukubaluleka kwegama likaNkulunkulu, uJehova. (AmaHubo 83:18) Lokho kwakungokuthile engangingakaze ngikuzwe esikoleni saseLuthela eLebanoni.
Ukusekelwa ‘Amandla Angaphezu Kwavamile’
Ngafunda futhi ukuthi uJehova unguNkulunkulu osekela izikhonzi zakhe uma zithembela kuye. Lapho leloqiniso lifinyelela ngokuphelele enhliziyweni yami, ngingasho ngobuqotho ukuthi angizange ngikhathazeke ngokuthi izinto zizoba njalo. Ngabeka ithemba lami eliphelele kuJehova, ngenza ingxenye yami, nginethemba lokuthi uzonginikeza ‘amandla angaphezu kwavamile.’
Ngokuhamba kwesikhathi, lelithemba laveza isithelo. Ngemva kwesifundo seBhayibheli sasekhaya esathatha unyaka, ngabhapathizwa, ngo-1937. Ngemva kwesikhathi, wonke amadodakazi ami ayisikhombisa abhapathizwa. Yeka ukuthi ngambonga kanjani uJehova ngaleso sibusiso!
Khona-ke uvivinyo olunzima lwafika. Kwakuyilolo olwalufuna ukuba ngincike ngokuphelele kuJehova ukuze ngithole amandla. Lokhu kwakuqondene nendodana yami encane. Nakuba yalitadisha iBhayibheli okwesikhashana, ayizange ithathe ukuma okuqondile ngeqiniso. Nokho, yayilihlonipha futhi isisekela ekulilandeleni kwethu. Kodwa ngalesosikhathi yagula, futhi yashona ngo-1968.
Ukufa kwendodana yami kwakuwusizi oludlula konke ekuphileni kwami. Ngangiyithanda kakhulu, njengoba ngangenza kubo bonke abantabami. Ngingasho ngeqiniso ukuthi ukuba kwakungesikho ukuba noJehova ukuba angisize, ngangingeke ngilubekezelele lolosizi. Induduzo enkulu yanikezwa ngokuqaphela ukuthi ngangizoyibona futhi ovukweni lwasemhlabeni.
Ukuhlanganyela Iqiniso Nabanye
Kusukela ngifunda iqiniso, ngiye ngaba nokukhululeka kwengqondo nokuthula kwenhliziyo engangingazange ngibe nakho ngaphambili. Ngaqaphela futhi nokuthi ngangingasafuni ukuba indelakazi ngiye ezulwini kodwa ngangifuna ukuphila emhlabeni ePharadesi ngaphansi kokubusa koMbuso kaNkulunkulu. Leli kwakuyithemba elihle kangangokuba ngaze ngaba nesifiso esingathi sína sokulihlanganyela nabanye. Futhi kuyo yonke iminyaka, ngakwenza, ngaba nokuhlangenwe nakho okuningi okumangalisayo.
Ngisho nakulobudala—cishe ama-91 eminyaka manje—ngisalokhu ngifuna ukuhlanganyela ekutsheleni abanye ngezindaba ezilungileyo zoMbuso. Yiqiniso, angisakwazi ukuhamba njengoba ngangenza, kodwa amadodakazi ami awusizo olukhulu kulokhu. Angithatha ngemoto futhi ngingene emizini nesigijimi soMbuso, khona-ke angibuyisele emuva emotweni ukuba ngiphumule isikhashana futhi ngiwalinde lapho eqhubeka nomsebenzi wokushumayela.
Eqinisweni, nenye yamadodakazi ami siqhuba isifundo seBhayibheli isonto ngalinye nabesifazane asebekhulile abane. Lokhu kungisiza ukuba ngigcine amaqiniso amangalisayo ngoJehova nezinjongo zakhe kukusha engqondweni yami.
Ngiye ngaba isikhonzi esibhapathiziwe sikaNkulunkulu iminyaka engaphezu kwama-45 manje. Ingabe sengikhathele ngokuthi iSimiso Esisha asikafiki? Nokho, ngikhathele ngokomzimba. Kodwa yeka injabulo okuye kwaba yiyo phakathi nalesikhathi ukubona ukukhula kwenhlangano kaJehova ebonakalayo isuka ezinkulungwaneni ezingamashumi ambalwa ngo-1937, lapho ngibhapathizwa, kuya ngaphezu kwezi-2 400 000 ngo-1982!
Phakathi kwalabo abadumisa uJehova kunabantabami abayisikhombisa kwabayisishiyagalombili abaphilayo futhi ci she nabo bonke abazukulu bami nabantwana babazukulu. Futhi nginendodakazi, uRose Peloyan, kanye nomyeni wakhe, abaye bachitha iminyaka engaphezu kwama-25 enkonzweni yesikhathi esigcwele endlunkulu yeWatchtower Society eBrooklyn. Phela, nginanomzukulu futhi okhonza khona nomyeni wakhe!
Kuyo yonke leminyaka, akuzange kube khona ukungabaza engqondweni yami ukuthi ngangiyohluleka kabuhlungu ukukhulisa umkhaya wami ukuba ukhonze uNkulunkulu uma ngangizokwenza ngamandla ami. Kodwa uJehova uye wathembisa ukuthi angeke azishiye izikhonzi zakhe. Esikhundleni salokho, uyozisiza ukuba ziphelelise intando yakhe ngokuba azinike “amandla angaphezu kwavamile” ngomoya wakhe ongcwele. Ngiye ngaba nokuhlangenwe nakho kwalolosizo amashumi eminyaka. Manje ngibheke phambili ekutholeni amandla ami omzimba ePharadesi nokukhonza uJehova kuze kube phakade.—AmaHubo 94:17-19.
[Amazwi acashunwe esihlokweni ekhasini 8]
Umyeni wami wangilahla ngo-1935 lapho umntwana wethu wesishiyagalolunye eneminyaka emithathu ubudala
[Amazwi acashunwe esihlokweni ekhasini 9]
Kusukela ngo-1917 ngiye ngafunda ngayinye ikhophi yeNqabayokulinda
[Amazwi acashunwe esihlokweni ekhasini 10]
Ukuba kwakungesikho ukuba noJehova ukuba angisize, ngangingeke ngilubekezelele lolosizi