Ukufakaza Kwasesiqhingini Okwaqala Ngeholide Labasanda Kushada
Iminyaka engaphezu kwama-60 yokushumayela ngoMbuso eLeewards
NJENGOMGEXO wetshe eliluhlaza okotshani elibengezelayo, iziQhingi zaseLeeward ezithandekayo zakha umngcele ongasempumalanga woLwandle iCaribbean. Kwakungo-1920 lapho uW. R. Brown nomakoti wakhe omusha bevakashela iMontserrat ukuba bamemezele izindaba ezinhle zoMbuso kaNkulunkulu. Phakathi nonyaka bafakaza nakubantu baseziqhingini zaseDominica, Barbados naseGrenada.
Ngokuphathelene nomsebenzi wabo, uW. R. Brown wathi: “Kwakuyiholide langemva komshado elijabulisayo enkonzweni kaJehova.” Eminyakeni emibili kamuva wabhalela iWatch Tower Society: “Ngosizo lukaJehova ngiye nganikeza ubufakazi kweziningi zeziqhingi zaseCaribbean futhi ngenza abafundi kweziningi. Ngizisebenze futhi?” Impendulo: “Qhubekela eSierra Leone, eNtshonalanga Afrika, nomkakho nomntwana.”
Ukwenza Abafundi Kuyaqhubeka
Namuhla, eminyakeni engaphezu kwama-62 ngemva kokuvakasha kukaBrown, ofakazi bakaJehova abangaphezu kwama-700 bakhuthele ekushumayeleni “izindaba ezinhle” kuyo yonke iLeewards. Futhi abantu abaningi babonisa isithakazelo esigijimini seBhayibheli.
Cabangela indaba yowesifazane osekhulile esiqhingini esinezintaba saseDominica. Phakathi nesifundo sakhe seBhayibheli, iHubo 143:1, 10 lacatshangelwa. Kulona sifunda lokhu: “Jehova, yizwa umkhuleko wami, . . . Ngifundise ukwenza intando yakho, ngokuba wena unguNkulunkulu wami.” Izinyembezi zagcwala amehlo akhe futhi zehla ngezihlathi zakhe njengoba ayechaza: “Sekuye kwaba iminyaka manje ngacela uNkulunkulu ukuba athumele othile ukuba angisize ngimazi. Kumanje, lapho ngibona khona ukuthi umkhuleko wami uye waphendulwa.’’
Ngesikhuthazo sombonisi ojikelezayo, izinsizwa ezintathu zanquma ukuya engxenyeni ekude ngokwengeziwe yeDominica ukuba zimemezele “izindaba ezinhle.” Imizamo yazo iye yavuzwa ngokucebile. Ngesikhashana nje base beqhuba izifundo zeBhayibheli eziyi-16. Lapho enye yalezinsizwa isele ekhaya ngenxa yokugula, abafundi beBhayibheli abathakazelayo beza kuleyondlu bezofuna othile owayengase abafundise imiBhalo.
Emzini ofihlekile wasemahlathini anemvula aseDominica, owesifazane ongumkatolika wamukela incwadi IQiniso eliholela Ekuphileni Okuphakade komunye woFakazi BakaJehova. Wayibeka etafuleni eceleni kombhede wakhe isikhathi esingaphezu konyaka, efunda izingxenye zayo ngezikhathi ezithile lapho elala. Ngolunye usuku wafunda lokhu: “Bantwanyana, zilindeni ezithombeni.” (1 Johane 5:21) Ehlatshwe umxhwele ilombhalo, wathatha isithombe esithandekayo ‘songcwele’ wakhe esisekelweni saso egumbini futhi waqala ukusibhekisisa ngokuqhathanisa nalokho ayekufundile. Kwase kuyiminyaka ethandaza phambi kwalesisithandwa seso lakhe. Abantabakhe babengavunyelwe ukugijima ekhaya, ngenxa yokwesaba ukuphazamisa lesisithombe. Manje, emhlane waso kwakunembobo embi lapho igundane laliye ladla indwangu nodaka. Phambi kwamehlo abantabakhe abamangele, lona owesifazane wathata lesithombe waya egcekeni, lapho asiphahlazela emgqonyeni wezibi.
Ngemva kokuba eseqede isifundo sencwadi Iqiniso ngosizo lomkhaya woFakazi owawuye waphindela kulesisiqhingi, lona owesifazane nendodana yakhe nendodakazi babhapathizwa. Umkhaya wabayisithupha emzini ofanayo kamuva wamukela isifundo seBhayibheli, futhi nawo manje uyizinceku zikaJehova ezibhapathiziwe. Ngokuhamba kwesikhathi, abantu abayi-14 babehlangana lapho njalo ukuba batadishe iBhayibheli futhi batshele abanye ngeqiniso eliholela ekuphileni okuphakade.
Ukwemuka Kuthinta Umsebenzi Wokufakaza
Ngenxa yokuthi abantu abaningi beza eziQhingini zaseLeeward okwesikhashana njengababuka izwe noma izisebenzi, imiphumela yomsebenzi woFakazi BakaJehova ayibonakali njalo lapha. Okubonisa lokhu incwadi eyamukelwa esikhathini esithile esidlule ihhovisi legatsha leWatch Tower Society laseziqhingini zaseLeeward eliseAntigua. Lencwadi yathi:
“Ngibhala ukuze ngizame ukuthintana nodade owaqala ukungifundela ngo-1970. Angisalikhumbuli igama lakhe. Nganginenkani ngenkolo yami ngalesosikhathi futhi ngamnikeza ubunzima. Ngemva kokuba ngishiye iAntigua, futhi ngabuyela eMississippi [eUnited States], ngaqhubeka njalo ngingagculiseki ngenkolo yethu nezinguquko zayo eziningi. Ababili boFakazi BakaJehova beza endlini yami lapha, ngaqala ukufundelwa futhi. Abayisithupha bomkhaya wethu bonke bangoFakazi ababhapathiziwe namuhla, futhi abantabethu ababili abancane, abaneminyaka eyi-10 neyi-8, bayalithanda iqiniso nabo. Bengifuna ukwazisa lodade onomusa ukuthi ngizisola ngempela ngendlela engamphatha ngayo, ngoba ngangingenamusa kakhulu. Kepha imizamo yakhe yayingelona ize.”
UJehova Unikeza Ukwanda
Ngenxa yokwanda enanini labamemezeli boMbuso, oFakazi BakaJehova baye bakhathalela ukuthola izindawo ezifanelekile zokuhlangana, amaHholo oMbuso. Ngo-1977 ihholo elihle elingahlalisa abangama-500, elinye lamakhulu kakhulu kuleziziqhingi, laqedwa eAntigua. Amabandla amane alapho ayajabula ngokukwazi ukulisebenzisela imihlangano nezehlakalo ezikhethekile. Emizini eminingana yaseLeewards, oFakazi banikela ngezindawo zamahholo, bahlanganyela ekucoceni iziza zokwakha futhi banikela imali yomsebenzi wokwakha.
Kusukela ekubuzeni kukaW. R. Brown ngokufaneleka kokuhlanganisa leziqhingi futhi, oFakazi BakaJehova baye basebenza amahora angamakhulu amaningi ezinkulungwane ekumemezeleni izindaba ezinhle eLeewards. Okufakazela iqiniso lokuthi kusenesidingo esiphuthumayo sokuzisebenza inani elikhulu labantu abanesithakazelo ngempela phakathi kwabayi-1 905 ababekhona eSikhumbuzweni sokufa kukaJesu Kristu sika-1982. Abaningi balabantu banezifundo zeBhayibheli zasikhathi sonke eziqhutshwa emakhaya abo ngoFakazi BakaJehova. Kanjalo, ngalokhu neminye imisebenzi yokumemezela uMbuso, leziziqhingi ziqhubeka zizwa isimemezelo senjabulo: “UJehova uyinkosi!”—IHubo 97:1.
[Ibalazwe/Isithombe ekhasini 28]
(Ukuze ubone ukuthi kumi kanjani, bheka encwadini)
IZIQHINGI ZASELEEWARD
ULWANDLEKAZI IATLANTIC
ULWANDLE ICARIBBEAN